Sooq Jehovamut tunisineq tulluartuua?

ZIDONIMI illoqarfeeqqami Zareptami seqineq kissatseruttortoq uillarneq qisussanik katersuivoq. Nerisassamininnguanik igajumalluni kukutsiniarpoq — qularnanngitsumik ernermilu nerisassamik kingullersaannik nerisassiorniarluni. Sivisuumik panernersuaqarnerani kaannersuaqarneranilu erninilu inuuginnarniarlutik tamaviaartarsimapput, maannalu alianartumik pisoqartussanngorunarpoq. Perlertussanngorunarput.

Angut aggerpoq. Eliasimik ateqarpoq, uillarnerullu ingerlaannaq paasivaa Jehovap pruffiiterigaa. Guuti taanna siornatigut tusarsimagunarpaa. Jehova Ba’alimit allaaneruvoq. Ba’alisiorneq mumingasoq kanngunartorlu Zidonimi, najugarisaani, nalinginnaaqaaq. Taamaattumik Elias immiseqummat immikkasuarpaa. Immaqa taamaaliornermigut Jehovamut iluarisaalersinnaasorivoq. (Matîuse 10:41, 42) Eliasili nerisassaminittaaq qinoratarpoq. Uillarneq nassuiaavoq qajuusat nerinermut kingullermut naammaannartut pigalugit. Eliasilli qinnutini uteqqippaa neriorsorlugulu panernersuup qaangiunnissaata tungaanut Jehovap tupinnartuliornikkut nerisassaqartikkumaara. Qanoq iliorpa? Biibilimi allassimavoq: „Taava arnaq aallarpoq Eliallu oqaasii malillugit iliorluni.“ (1 Kunngit 17:10-15) Oqaasimininnguit taakkua uppernikkut iliuuseqarnermik angisuumik oqaluttuarput, ima atsigisumik ukiut tuusintit tamatuma kingorna uillarneq taanna maligassaalluartutut Jesusimit taaneqarluni. — Lúkarse 4:25, 26.

Taamaakkaluartoq eqqumiiginarsinnaavoq Jehova arnamit taama pigisakitsigisumit taama annertutigisumik piumasaqarmat. Ingammik angutip nuimasup Guutimut qinnutimini oqaatigisimasai eqqarsaatigalugit. Kunngip Davidip naalaffiup, ernerata Salomonip sanasassaata, sananeqarnissaanut tunissuteqarnerata amerlasuut tukkornissaannut kajumissisissimavai. Inuit tunissutaat milliardilippassuarnik naleqarput! Taamaakkaluartoq David Jehovamut qinnummini ima oqarpoq: „Uangami kinaanerpunga, innuttakkalu suunerpat? Uagut nammineq pissaanerput atorlugu kajumissutsikkut tunissutinik aatsivigisinnaanngilluinnarpatsigit. Suut tamarmik ilinnit pipput, makkuttaaq tunniussavut tassaapput ilinnit pisarisimasavut.“ (1 Israelikkut 29:14) Soorlu David oqartoq, Jehovap suut tamaasa pigai. Pallorfiginninneq minguitsoq siuarsarniarlugu tunisinivut tamaasa, Jehovap pigeriigai utertiinnartarpavut. (Tussiaat 50:10) Manna apeqqutaalerpoq: Soormiuna Jehovap tunissuteqarfigissagitsinni kissaatigigaa?

Pallorfiginninnerup ilumoortup ilaa pingaartoq

Pileqqaarneraniilli Jehovap tunissuteqarneq pallorfiginninnermut ilumoortumut pingaartutut ilaatissimammagu. Abelip aalajaatsup nersutaatimi pitsaanersaannik Jehova pilliivigisarsimavaa. Ataataanerpaasut Noa, Abraham, Isak, Jakob Jobilu assingusunik pilliuteqartarsimapput. — 1 Moses 4:4; 8:20; 12:7; 26:25; 31:54; Job 1:5.

Mosesip inatsisaani Jehovamut tunissuteqartarnissaq peqqussutaavoq, sunalumi tunissutaassanersoq inassutigineqarpoq. Assersuutigalugu, Israelikkut tamarmik pissarsiamik qulinginik tunisisussaapput, nunap naatitaasa qulinginik nersutaatimillu amerlissutaasa qulinginik tunisisassapput. (4 Moses 18:25-28) Tunissutilli allat inatsisitigut aalajangersagaaqqissaanngillat. Israelikkuusut tamarmik ineriteqqaakkatik nersutaatimillu  piaqqeqqaataat Jehovamut tunissutigissavaat. (2 Moses 22:29, 30; 23:19) Ineriteqqaakkalli ilaannik qanoq annertugisumik tunissuteqarnissaat inatsisip ataasiakkaat nammineq aalajangiisinnaatippai; piumasarineqaannarpoq pitsaanerpaassasut. Mosesip inatsisaani qujaniutitut neriorsuutillu eqqortinniarlugit pilliutit kajumissutsimit pisartut pillugit aamma aalajangersagaqarpoq. (3 Moses 7:15, 16) Jehovap innuttani kajumissaarsimavai pilluaqqusinerminut naapertuuttumik tunissuteqartaqqullugit. (5 Moses 16:17) Soorlu illernartuutip, kingusinnerusukkullu naalaffiup, sananeqarnerini taamaassimasoq ataasiakkaat uummatimikkut killinneqarnertik naapertorlugu tunissuteqartarput. (2 Moses 35:21; 1 Israelikkut 29:9) Kajumissutsimit tunissutit taamaattut Jehovap pingaartippai.

’Kristusip inatsisaasa’ ataanni tunissutit tamarmik kajumissutsimit pisussaapput. (Galâsiamiut 6:2; 2 Korintumiut 9:7) Tamannali isumaqanngilaq Kristusip ajoqersugai tunissutikinnerusarsimasut tunisisarunnaavissimasulluunniit. Naaggaluunniit! Jesus apustiliilu Israelimi oqaluussinerminni arnarpaalunnik ingiaqateqarsimapput pigisatik atorlugit taakkuninnga isumassuisunik. (Lúkarse 8:1-3) Apustili Paulus aamma tunissittarsimavoq ajoqersuiartortitatut kiffartornermini iluaqutigisaminik, ilagiillu ilaat kajumissaarsimavai pisariaqaleraangat ilagiit allat aningaasatigut tapersersortaqqullugit. (2 Korintumiut 8:14; Filípimiut 1:3-5) Jerusalemimi suilersuisoqatigiit angutit akisussassusermik misigisaqartut pisariaqartitsisunut aningaasanik agguaassinermik isumaginnitsittarsimavaat. Ersarippoq ukiuni hundredelinni siullerni kristumiut pallorfiginninnermik ilumoortumik taamatut tapersersuineq immikkut pisinnaatitaaffittut isigisimagaat.

Taamaakkaluartoq immaqa tupigisinnaavarput tunissuteqartarneq Jehovap pallorfiginninnermut ilumoortumut ilaatimmagu. Taamaanneranut pissutaasut sisamat sammissavavut.

Sooq tunissuteqartartugut

Siullermik, tunissuteqartarneq Jehovap pallorfiginninnermut ilumoortumut ilaatippaa uagutsinnut iluaqutaammat. Tunissuteqarnitta takutippaa Guutip ajunngissusia qanoq pingaartitsigigipput. Assersuuteqariarta. Sooruna angajoqqaat nuannaangaartartut qitornamik tunissutissarsisimagaangatik tunissutissaminnilluunniit sanasimagaangata? Pisariaqartitartik pingaartoq allatut matuneqarsinnaanngitsoq tunissutip matummagu? Ilimananngilaq. Aap, angajoqqaat qitornamik pissutsinik, soorlu pingaartitsinermik tukkornermillu, ineriartortitsilersimanerat nuannaarutiginerusarpaat. Assingusoq pissutigalugu Jehovap uagut tukkornissarput kajumissaarutigaa, taamaakkaangattalu nuannaartarpoq. Taamaalilluta takutittarparput ajunngissusia tukkorneralu killeqanngitsut pingaartillutigik. ’Tunissutit tamarmik ajunngitsut tunniussallu tamarmik naammalluartut’ taassuma tunniussarai. (Jâko 1:17) Qujassutissaqarfigiuassavarput. Pingaarnerpaamik Jehovap ernini asasani pilliutigisimavaa toqunerata akuerineratigut uagut inuunermik naassaanngitsumik pisinnaalersilluta. (Juánase 3:16) Qaqugumulluunniit naammattumik qujaffigisinnaanerparput?

Aappassaanik, tukkorneq ileqqorilerutsigu pingaartukkut Jehovap erneratalu, Jesus Kristusip, ilaarnissaat ilikkassavarput. Jehova tunisiuaannarpoq, tukkortuaannarpoq. Soorlu Biibilimi allassimasoq ’tamaasa tunisarpai inuunermik anersaarnermillu’. (apustilit suliait 17:25) Jehova anersaarnitsinnut tamanut, nerisassanut tamussiussatsinnut tamanut inuunermilu pilluarnartunut tamanut qutsavigissallugu pissusissamisoorpoq. (apustilit suliait 14:17) Jesus Ataatamisut tukkortuuvoq,  nangaanngivillunilu imminut tunniuppoq. Nalunngiliuk Jesus tupinnartulioraangami tunisisariaqartartoq? Biibilimi arlaleriarluni allassimavoq napparsimasut ajorunnaarsikkaangagit ’pikkunartoq tassumannga anisartoq’, tassa nukik taassumannga anisartoq. (Lúkarse 6:19; 8:45, 46) Jesusip tarnini, inuunini, toqumut tunniuppaa. Taama tukkortigaaq. — Jesaja 53:12.

Tassa piffissarput, nukivut aningaasaativulluunniit tunissutigigaluarutsigit Jehova ilaassavarput uummataalu nuannaartillugu. (Ussatit 27:11; Evfisumiut 5:1) Aamma Jesus Kristusip inunnut maligassiaa naammalluinnartoq malissavarput. — 1 Pîtruse 2:21.

Pingajussaanik, tunissuteqarutta pisariaqavissumik pingaartumillu matuseqataassaagut. Jehovap ikiortiginata naalagaaffimmi soqutigisaanut atatillugu pisariaqartut ajornanngitsumik matusinnaagaluarpai, soorlu oqaatsip oqaluussissutiginerani uagut atornata ujaqqat nilliatissinnaagaluarai. (Lúkarse 19:40) Jehovalli immikkut pisinnaatitaaffinnik tamakkuninnga tunniussinermigut nersornaasersimavaatigut. Taamaattumik Guutip naalagaaffiata soqutigisaanik siuarsaatissanik aningaasanik tunisigaangatta, nunarsuarmi suliamut pingaartumut peqataanerput nalunagu nalerisimaarnartarpoq. — Matîuse 24:14.

Soorunami Jehovap Nalunaajaasuisa silarsuarmi tamarmi oqaluussinerat angingaasanik akeqarpoq. Ukiup kiffartuussiffiusup 1995-ip ingerlanerani Peqatigiiffiup dollarit 60 millioningajaat (koruunit 300 millionit sinnerlugit) specialpioneerinut, ajoqersuiartortitanut angalallunilu nakkutilliisunut angalaffigisassaanni tapersiinermut atorsimavai. Silarsuarmili tamarmi immikkoortortaqarfiliornerni naqiteriviliornernilu aningaasartuutinut sanilliullugit taakkua annertunngillat. Taamaakkaluartoq tamakku tamarmik kajumissutsimik tunnissuteqarnikkut piviusunngorsinnaasimapput!

Jehovap innuttai nalinginnaasumik eqqarsarneq ajorput namminneq pisuujunnginnamik allat nammatsiinnarsinnaallugit. Taamatut isumaqarneq pallorfiginninnerup ilumoortup ilaanut tamatumunnga ilaanngitsoornermik kinguneqassaaq. Apustili Paulus naapertorlugu kristumiut Makedoniamiittut ’piitsuussusiat mikinngitsuusimavoq’. Taamaakkaluartoq tunissuteqarumallutik ilungersungaarlutik qinusimapput. Paulusillu uppernarsarpaa ’sapinngisartik akimorlugu’ tunisisut. — 2 Korintumiut 8:1-4.

Sisamassaanik, tunissuteqartarneq Jehovap pallorfiginninnermut ilumoortumut ilaatippaa pilluarnitsinnut ilasaataammat. Jesus oqarsimavoq: ’Tunisineq tigusinermit pilluarnarneruvoq.’ (apustilit suliait 20:35) Taamatut Jehovap pinngortissimavaatigut, tamannalu qanorluunniit tunissuteqarfigaluarutsigu tunissutitta uummatitsinni pingaartitsinitsinnut naleqqiunneqarsinnaannginneranut pissutaasut ilagaat. Sapinngisarpulli akimorlugu Jehovap piumaffiginngilaatigut. Qularutiginngissinnaavarput sapinngisarput naapertorlugu nuannaarluta tunisigaangatta nuannaartassasoq. — 2 Korintumiut 8:12; 9:7.

Pilluaqqussutit tukkornerup nassatarisai

Zareptami uillarneq qanoq pisimassagaluarpa isumaqarsimagaluaruni alla Eliasimik nerisitsisinnaanerusoq? Taamaakkaluarpat pilluaqqussut angisooq pinngitsoorsimassagaluarpaa.

Qularutissaanngilaq Jehovap tukkortut pilluaqqusarai. (Ussatit 11:25) Zareptami uillarneq nerisassami nunngutaasorisani tunniukkamiuk amigaateqalinngilaq. Akilerlugu Jehova tupinnartuliorpoq: qajuusaatai uuliaataalu nungunngillat panernersuaq qaangiutsinnagu. Akissarsiarli suli annerusoq pivaa, ernerami napparmat toqullunilu,  Eliasip, Guutip ilumoortup kiffaata, toqusunit makitippaa, tamannalu anersaakkut nukittuallaatigisimassaqaa. — 1 Kunngit 17:16-24.

Ullumikkut tupinnartuliortoqarnissaa naatsorsuutiginngilarput. (1 Korintumiut 13:8) Jehovalli neriorsorpaatigut uummammik tamakkiisumik imminut kiffartortut isumassorumaarlugit. (Matîuse 6:33) Taamaattumik Zareptami uillarnertulli qularutiginngissinnaavarput Jehovap isumagiumaaraatigut, anersaakkullu pilluaqquneqangaarumaartugut. Jesusip kajumissaarineratut isummeriataarnikkuunngitsoq aalajangersimasumilli tunissuteqartarutta iserput qaamasuutissavarput Guutillu naalagaaffiata soqutigisai pingaartissavavut. (Lúkarse 11:34; naleqqiuguk 1 Korintumiut 16:1, 2) Aammattaaq Jehovamut Jesusimullu suleqataasutut taakkununnga qaninnerulissaagut. (1 Korintumiut 3:9) Nunarsuarmilu tamarmi Jehovamik pallorfiginnittut ilisarnaataannut tukkornermut ilasaataassaaq. (wE 1/11 96)

[Qupp. 29-mi assiliartaq]

ILAAT QANOQ TUNISSUTEQARTARTUT

ANINGAASAT NUNARSUARMI TAMARMI SULINERMUT TUNISSUTIT:

Amerlasuut aningaasanik naatsorsuutiminni tunissutinik nakkaatitsivimmut „Naalagaaffiup sulinera — Mat. 24:14“-​mik allagartalimmut nakkartitassaminnik immikkoortitsisarput. Ilagiinni qaammatit tamaasa tunissutigineqarsimasut Napasuliaq Alapernaarsuiffiup Peqatigiiffianut nassuinneqartarput.

TUNISSUTIT:

Aningaasat kajumissutsimit tunissutit toqqaannartumik uunga nassiunneqarsinnaapput: Vagttårnet, Stenhusvej 28, 4300 Holbæk, giro 640-3468. Pinnersaatit allallu nalillit aamma tunissutigineqarsinnaapput. Tunissutaaneralli allakkatigut nalunaarutigisariaqarpoq.

PAARITITSINEQ:

Aningaasat isumaqatigiissuteqarnikkut Napasuliaq Alapernaarsuiffiup Peqatigiiffianut paarisassanngortinneqarsinnaapput taamaaliortup toqunissaata tungaanut („tunissutissamaatit“).

SILLIMMASIISSUTIT:

’Inuunermut sillimmasiissutit’ utoqqalinersiutissatulluunniit nammineq katersukkat Napasuliaq Alapernaarsuiffiup Peqatigiiffianut pisassanngortinneqarsinnaapput. Taamaalisoqarniaruni tamatigut Peqatigiiffik ilisimateqqaartariaqarpoq.

BANKKONTOT, PAPPIALAT NALILLIT ­PIGISALLU AALAAKKAASUT:

Bankkontomi uninngatitat, pappialat nalillit pigisallu aalaakkaasut tuniuminartut Napasuliaq Alapernaarsuiffiup Peqatigiiffianut tunniunneqarsinnaapput. Aamma tamatumani Peqatigiiffik ilisimateqqaarneqassaaq.

KINGORNUSSASSAT:

Aningaasaatit inatsisinut naapertuuttumik testamentiliornikkut Napasuliaq Alapernaarsuffiup Peqatigiiffianut kingornussassanngortinneqarsinnaapput — ingammik kingornussassat atsiorlugu uppernarsakkat. Pitsaassaaq Peqatigiiffik immaqalu ilagiit tamatuma kopiianik tunineqassappata. Ilisimatitsissutigisinnaavarput Napasuliaq Alapernaarsuiffiup Biibililiornikkut Atuagassialiornikkullu Peqatigiiffia kingornussassat akileraarutaannik akiliisanngimmat.

PERIARFISSAT ALLAT (pisussaasutut nalunaarutit allallu):

Tunissuteqarnissamut periarfissanik allanik ilagiinni ilaaffigisanni utoqqaanertat paasiniaaffigisinnaavatit.

Tunissutit kingornussassallu pillugit paasissutissanik siunnersuutinillu amerlanerusunik pisoqarsinnaavoq ilagiinni utoqqaanertat aperinerisigut imaluunniit uunga allannikkut: Vagttårnet, Stenhusvej 28, 4300 Holbæk.