Pinngortitami ajunaarnersuaqaraangat

Accra, Ghana, 4. juuli 1995: Ukiuni 60-ingajanni aatsaat taama sakkortutigisumik sialussuarnera qarsutsinersuarnik kinguneqarpoq. Inuit 200.000-it missingisa pigisatik tamaasa annaavaat, 500.000-it angerlarsimaffeerupput 22-llu ajunaarlutik.

San Angelo, Texas, USA, 28. maaji 1995: Anorersuup kaavittuliortup nataqqornarnersuatalu illoqarfik 90.000-inik inulik perlussiortippaa dollarsinillu 120 millioninik nalillit ajoquserlugit.

Kobe, Japan, 17. januaari 1995: Sekundini 20-iinnarni nunap sajunnerani tuusintilikkuutaat ajunaarput, tituusintilikkuutaat aqqunartiterput hundredetuusintilikkuutaallu angerlarsimaffeerullutik.

PIFFISSAMI ’ajunaarnersuit ukiuinik’ taaneqarsinnaasumi inuuvugut. FN-ip nalunaarutaani erserpoq 1963-ip 1992-illu akornanni ajunaarnersuarni ajunaartut aqqunartiterneqartullu, kiisalu ajunaarnersuit pissutigalugit allamut nuuttariaqalersimasut, ukiumut 6 procentimik amerlisimasut. Pisartut alianartut tamakku pissutigalugit FN-ip 1990-ikkut suaarutigisimavai „Ukiut Qulit Pinngortitami Ajunaarnersuarnik Annikillisitsiniaaffissat“-tut.

 Soorunami pinngortitami pisartut — soorlu anorersuit, qaqqap anitsineri nunalluunniit sajunneri — tamatigut ajunaarnersuarnik pilersitsineq ajorput. Ukiut tamaasa tamakku hundredelippassuariarlutik pisarput inunnik ajoqusiinatik. Ajunaarnermilli pigisanillu annaasaqarnermik kinguneqaraangata ajunaarnersuartut taaneqarsinnaavoq.

Suli ajunaarnersuaqartarsinnaanissaa ilimaginngitsuugassaagunanngilaq. Atuakkami Natural Disasters — Acts of God or Acts of Man?-imi (Pinngortitami ajunaarnersuit — Guutip imaluunniit inuit piliaat?) ima allassimasoqarpoq: „Inuit avatangiisertik ajunaarnersuit ilaannit eqqorneqariaannanngorlugu allanngortiterpaat, ajunaarnersuarnillu tamakkunannga eqqoruminartunngussutigisaminnik inooriaaseqarlutik.“ Qanoq pisoqariaannaanera atuakkami ima allaatigineqarpoq: „Illoqarfimmi qillertoraminernik qalequtissianillu marrarnik oqimaatsunik sanaanik illulimmi qaqqap qooruata sivingasup sinaaniittumi sakkukitsumik nunap sajunnera ajunaarnersuannguuteriaannaavoq toqumik naalliunnermillu nassatalik. Ajunaarnersuarli nunap sajunneranik pissuteqassava imaluunniit inuit sumiiffinni ulorianartuni ulorianartunik illoqarnerannik pissuteqassava?“

Biibilimilli atuartartut pinngortitami ajunaarnersuit amerliartuinnarnerannut pissutaasumik aamma allamik ilisimasaqarpoq. Ukiut 2000-ingajaat matuma siorna Jesus Kristusip siulittuutigisimavaa „pissutsit aaqqissuussaanerata naggatissaanut“ ilaatigut ilisarnaataassasut ’kaannersuit nunallu tamatigut tamaana sajuttarneri’. (Matîuse 24:3, 6-8, NV) Aammattaaq Biibilimi siulittuutigineqarpoq ’ullussani kingullerni’ inuit imminnuinnaq asasuujumaartut, aningaaserituujullutik, pissusissamisoortumik asannissuseqaratik ajunngitsunullu asannissuseqaratik. * (2 Timûtiuse 3:1-5) Inuit tamakkuninnga pissuseqarnertik pissutigalugu avatangiisiminnik aserorterisarput, imminnut pinngortitap nukiinit eqqoruminarnerulersillutik. Ajunaarnersuit inuit pilersitaat inuiaqatigiit avatitsinniittut asannissuseqannginnerata kingunerai.

Nunarsuatta inui amerliartuinnarlutillu eqqoruminarnerujartuinnarput, nunarsuullu tunniussinnaasai paarinerlunneqaraluttuinnarput. Taamaattoqartuartillugu inuiaat ajunaarnersuarnit eqqorneqartuartassapput. Eqqorneqartunik ikiuiniarneq unamminiarnartortaqarpoq, tamannalu ilannguatassiami tulliuttumi sammineqarpoq.

[Quppernerup ataani ilanngussaq]

[Suminngaanneernera]

Qulleq: Information Services Department, Ghana. Talerpilleq: San Angelo Standarnd-Times