Pingaarniassuseq qanoq kinguneqartarpa?

SUUNNGITSUTUT misigitinniarneqarsimavit? Immaqa qullersannit, sulisitsisunnit, nakkutilliisumit allaalluunniit qanigisannit ilinnik ammut isiginninniartumit ilinnillu asissuisumit? Inuk taanna qanoq misigiffigaajuk? Ungagaajuk? Naamerluinnaq, ilaa! Sooq? Pingaarniassuseq inuit akornanni assiaqutsiisarmat attaveqatigiinnermillu aseruisarluni.

Pingaarniartup inoqatini allat tamaasa ammut isiginiartarpai nammineq nuimanerusutut tamatigut pissusilersortarluni. Inuk taama ittoq inoqatiminik ajunngitsumik eqqartuigajunngilaq. Allat ajortortaannik eqqaasassaqartuaannartarpoq, soorlu: „Aap, immaqa ilumooraluarpoq, kisianni una unalu ajoqutigaa.“

Atuakkami Thoughts of Gold in Words of Silver-imi pingaarniassuseq ima allaaserineqarpoq: „Pissusipalaaq aserornartoq. Inummik aseroriartortitsisarpoq, ataqqinaataarutingajallugu.“ Tupigineqarsinnaannerpa inuit taama pissusillit ilagiuminaatsinneqartarmata? Taamaattumik pingaarniartut ilumoortunik ikinngutissaaleqigajuttuupput. Atuakkami nangilluni allassimavoq: „Maniguuttulli inunnit nuannarisaapput — imaanngitsoq maniguunnerminnik pingaakujuutiginnittut, kisianni ilumoortumik maniguuttut.“ Tamatumunnga naleqquttumik Biibilimi ima allassimasoqarpoq: „Imminut angisuutinnerup inuit ajunaartittarpai, imminulli nikanartittup ataqqinaat pisassaraa.“ — Ussatit 29:23.

Ikinnguteqarnermilli inunnilluunniit ataqqisaanermik annaasaqarsinnaanermit pingaarnerungaartoq tassaavoq pingaarniassuseq Guutimut attaveqarnermut qanoq sunniuteqartarnersoq. Guutip pingaarniartut, makitasuut anneruniartullu qanoq isigai? Pingaarniassuseq maniguussuserluunniit Guutimut apeqqutaava?

Maniguunnermik ilinniutissaq

Ussatit-nik isumassarsisitaalluni allattoq ima allappoq: „Imminut pingaartinneq ajunaarutaasarpoq, makitasaarneq naakkiussutaasarpoq. Nikanartut nikanarteqatigigaanni pitsaaneruvoq imminut angisuutittut ujajagaannik agguaqatiginerannit.“ (Ussatit 16:18, 19) Oqaatsit taakkua silatussusiat Syriamiut sakkutuuisa naalagaanertaannut, itsaq Israelimi pruffiitip Elisap nalaani inuusumut, Na’amanimut pisimasukkut uppernarsarneqarpoq.

Taamanikkut Na’aman pupinnermik nappaateqarpoq. Nakorsarneqarumagaluarluni Samariami angalavoq Elisamik nammineerluni naapeqateqarnissani eqqarsaatigalugu. Pruffiitilli nammineerluni Na’aman naapinnagu kiffani taassumunnga aallartippaa Jordanip kuussuani arfineq-marloriarluni uffassasoq oqarfigiartortillugu. Taamatut pineqarnini siunnersorneqarninilu Na’amanip assut ajuallaatigaa. Sooq pruffiitip kiffani oqariartortinnagu nammineerluni orninnianngilaa oqaloqatigalugulu? Aammami Syriami kuussuit Jordanip kuussuatulli pitsaatigigaluarput! Ajornartorsiutaa tassa pingaarniassuseq. Qujanartumilli  naggataatigut siunnersuut silatooq malippaa. „Na’aman Jordanimukarpoq, ernganullu arfineq-marloriarluni morsuttarluni Guutip kiffaata peqqussutaa malillugu, amialu nukappiarannguup amiatut pitsaatigilerpoq, minguerporlu.“ — 2 Kunngit 5:14.

Aap, maniguutilaaginnarnerluunniit assut iluaqutaasarpoq.

Makitassuseq annertuumik annaasaqaataasarpoq

Pingaarniassuseq iluaqutissamik annaasaqarnerinnarmit ajornerujussuarmik kinguneqarsinnaavoq. Pingaarniassuseq allatut ittoq oqaatsimi „hybris“-imiippoq, tamannalu griikerit oqaaseraat isumaqarluni anneruniassuseq, „ingasattumik pingaarniarneq imaluunniit imminut tatigivallaarneq, akineqarnermik kinguneqarajuttoq“. (Webster’s Ninth New Collegiate Dictionary) Biibilimik misissueqqissaartartoq William Barclay naapertussagaanni „hybris pingaarniassutsimik naakkittaassutsimillu akusaavoq . . ., makitalluni asissuineq allat misigissusiinik tummaatarinnitsitsisoq“.

Ingasattumik pingaarniassutsimut taama ittumut assersuutissaavoq Biibilimi oqaluttuarineqartoq Ammonikkut kunngiat Hanun. Qinerlerfissiami Indsigt i Den Hellige Skrift-imi ima allassimasoqarpoq: „Ilumoorfiginnilluni tunniusimaneq Nahasjip ersersissimasaa pillugu David arlalinnik aallartitsivoq Hanun ataataminik annaasaqarnerani tuppallersarniarlugu. Hanunilli naalagartaasa taanna isumaqalersippaat David illoqarfik isertortumik alapernaarsorniaannarlugu aallartitsisimasoq. Taamaattumik Davidip aallartitai nikanarsarpai umiisa affai unngiarlugit, nului nuisillugit atisai kipillugit aallartillugillu.“ * Pisimasoq tamanna pillugu Barclay ima oqarpoq: „Hanunip aallartitanut iliorfiginninnera hybris-imut ersiutaavoq. Iliuusia ataatsikkut ajuallatsitsinerullunilu, kanngunarsaanerullunilu kikkut tamarmik isigernanni nikanarsaaneruvoq.“ — 2 Samuel 10:1-5.

Aap, pingaarniartoq makitarpaluttumik pissuseqarajuppoq allallu kannguttaatsumik pisarlugit nikanarsartarlugillu. Misigittaatsumik inuppalaanngitsumillu inoqatini ajuallaatississallugit nuannarisarpaa kiisalu ajunaarutississinnaagaangamigit kanngunarsarsinnaagaangamigillu nuannaapiluttarluni. Inuulli allap imminut ataqqineranik aserorsaarineq aseruinerlu panatut illuttut kiinalittut ippoq. Ikinngummik annaasaqarnermik qularnanngilluinnartumillu akeraqalernermik kinguneqartarpoq.

Qanoq ililluni kristumiu ilumoortoq pingaarniassutsimik aserornartumik taama ittumik ersersitsisinnaava uffa Naalakkani peqqusisoq ’tullini immisut asassigini’? (Matîuse 7:12; 22:39) Taamaaliorneq Guutip Kristusillu iluarisaannut akerliulluinnarpoq. Taamaattumik Barclay ilungersornartumik ima isummerpoq: „Hybris tassaavoq pingaarniassuseq inummik Guutimut assortuilersitsisoq.“ Taamatut pingaarniartoq ima oqartarpoq: „Guuteqanngilaq.“ (Tussiaat 14:1) Imaluunniit soorlu Tussiaat 10:4-mi allassimasoq: „Guutiitsoq anneruniarluni isumaliorpoq: ’Pillarumanavianngilaanga,  naami Guuteqanngilaq!’“ Taamatut pingaarniassusillip makitassusillilluunniit ikinngutini qanigisamiluunniit ikinngutaanerat annaaginnarnagu, aamma Guutimik ikinnguteqarnini annaasarpaa. Ilumut annaasaq annertooq!

Pingaarniassutsimit aserugaaqinak

Pingaarniassuseq ’kiinarpassuaqarpoq’. Inuiaassutsimik pingaartitsinermik, allamik nagguilinnik uumissuinermik, inuiaqatigiinni inissisimaffimmik, ilinniagaqarnermik, pisuussutsinik, tatigisaassutsimik pissaaneqarnermilluunniit aallaaveqarsinnaavoq. Pingaarniassutsip arlaatigut ajugaaffigeriaannaavaatigut pissuserpullu aserorlugu.

Inuit ilarpassui qullersarisaminnit allaalluunniit naligisaminnit minnerusutut pissusilersortarput. Inulli maniguuppasikkaluartoq annertunerusumik oqartussaassuseqaleraangat ilaannikkut qanoq pisoqartarpa? Imminit atsinnerusutut isigisaminut naalagarsuartut pissusilersulertarpoq taakkuninnga nuanniilliortitsilluni. Inuit ilaat taama pisinnaasarput uniformeqaleraangamik arlaannilluunniit pissaaneqartitaanerminnut takussutissaqaleraangat. Allaat naalagaaffimmi kommunimiluunniit atorfillit pingaakujulersinnaasarput, eqqarsarlutik inuit imminnut kiffartortussaasut, namminneq taakkuninnga kiffartuussisussaanatik. Pingaarniassuseq peqqarniitsunngortitsillunilu misigittaatsunngortitsisarpoq — maniguussuserli inussiarnersunngortitsisarpoq.

Jesus ajoqersukkaminut makitasuumik sukannersumillu pissusilersorsimasinnaagaluarpoq. Namminermi Guutip erneraani naammalluinnartoq, taakkuli naammalluinnanngitsuupput, eqqarsaqqaarnatik iliuuseqariartarlutik isumaallioriartarlutillu. Tusarnaarumasulli qanoq kajumissaarpai? ’Ornissinga tamassi erloqisusi nanertugaasusilu, qasuersissavassi. Nammaatara ilissinnut pisissiuk ilinniarfigalungalu, qanilaarama uummatikkullu makitajuikkama; taava tarnissinnut qasuerfissarsiumaarpusi. Nammaatarami iluaqaaq, nammakkiussaralu oqeqaluni.’ — Matîuse 11:28-30.

Jesusip maligassiaa ilungersorluta tamatigut malinniartarparput? Imaluunniit ilaannikkooriarluta inoqativut misigittaatsumik, uteriitsumik, naalagaaniartumik, naakkittaatsumik makitasuumilluunniit pisarpavut? Jesusitut iliorluta inoqativut naqisimaniarnagit nakussatsinniartariaqarpavut. Taamaattumik pingaarniassutsip aserornassusia akiortigu.

Imminut ataqqineq akerlianillu imminut angisuutinneq

Pissuseq pingaarniassutsimit allaanerusoq tassaavoq tulluusimaarneq nassuiarneqarluni tassaanerarneqartoq „naleqquttumik pissutissalimmillu imminut ataqqineq“. (Webster’s Ninth New Collegiate Dictionary) Imminut ataqqineq inummut namminermut tunngavoq. Imminut ataqqisup imminut allat qanoq isumaqarfiginninnerat suusupaginngilaa. Isikkuni eqqumaffigaa ajunngitsumillu tusaamasaanissani soqutigisaralugu. Ilumoortumik ima ussateqarpoq: „Oqarfiginnga kikkut ilagisarlugit, taava oqarfigissavakkit kinaasutit.“ Peqqissaanngitsut, eqiasuttut, perorsarsimanngitsut kusananngitsunilluunniit oqaluttartut ilagisarukkit taakkunatut ilissaatit. Isumaannit sunnertissaatit imminullu ataqqinerit taakkunatulli annaassavat.

Aammali allatut ingasaassisoqarsinnaavoq, tassa tulluusimaarneq imminut angisuutinnermut ataqqeqqutuunngornermulluunniit sangusinnaavoq. Jesusip nalaani allakkanik ilisimasut farisiiarillu ileqqutoqqaminnik qallikkullu upperpalussutsiminnik tulluusimaarutiginnittuusimapput. Taakku pillugit Jesus ima mianersoqqusisimavoq: ’Suliatik tamaasa suliarisaraat inunnut isigeqqullutik. Kukkunaveersaatiginiakkatik silittunngortittaraat annorassamillu nivingataat angisuunngortillugit. Nereqatigiissuni salliujumallaaraat, naalagiartarfinnilu issiaviit salliit ingiffigiumasarpaat. Iluarillaaraat niueriartortarfimmi inuulluaqquneqaraangamik, inuillu ajoqersuisunik taasaraangatik.’ — Matîuse 23:5-7.

Eqqortumik tulluusimaassagaanni oqimaaqatigiissumik isumaqartariaqarpoq. Eqqaamassavarputtaaq Jehovap uummatitsigut qanoq ittuunerput isiginiartarmagu, qallikkut isikkorput pinnagu. (1 Samuel 16:7; Jeremia 17:10) Imminut iluartuutinneq tassaanngilaq Guutip naapertuilluassusia. Mannalu apeqqutaalerpoq: Qanoq iliorluta maniguunneq piviusoq ineriartortissinnaavarput pingaarniassutsillu kingunipilui ingalassimallugit?

[Quppernerup ataani ilanngussaq]

[Qupp. 4-mi assiliartaq]

Na’amanip maniguunnermik ersersitsilaaginnarnini assut iluaqutigaa