Asanninnerup aqqutaa pakatsisitsinngisaannarpoq

’Tunissutit annerusut ilungersuutigisigik. Sulilu aqqummik aatsaat aqqutaalluartumik unnersuussavassi.’ — 1 KORINTUMIUT 12:31.

1-3. (a) Asanninnerup ersersinnissaa allamiut oqaasiinik ilinniagaqarnermut qanoq assersuunneqarsinnaava? (b) Suut pissutigalugit asanninnermik ersersitsinissap ilinniarnissaa unamminiarnartuusinnaava?

ALLAMIUT oqaasiinik ilinniarneq misilissimaviuk? Unamminiarnartorujussuuvoq, ilaa? Soorunami meeraaqqat oqaatsit ilikkarsinnaasarpaat tusarnaaginnartarlugit. Qarasaasa oqaatsit tamakkualu isumaat milluartarpaallusooq, erniinnarlu meeraaqqat namminneq oqaluttalerput, immaqa oqaluttuartalerlutik. Inersimasut taamaanngillat. Oqaatsinik ujarlerfissiaq qupperaqattaartariaqarparput allamiut oqaasiisa ilaannaalluunniit ilinniarsinnaajumallugit. Kisianni piffissap ingerlanerani oqaatsit nutaat atornissaannik sungiusareerutta oqaatsit nutaat atorlugit eqqarsartalerpugut atortarnerallu piuminarnerulersittarlugu.

² Asanninnerup ersersinnissaata ilikkarnissaa oqaatsinik allanik ilikkarnissamut assingussuteqarpoq. Pissutsip tamatuma Guutimeersup ilaa inunnguuserigaluarparput. (1 Moses 1:27; naleqqiuguk 1 Juánase 4:8.) Taamaattorli asanninnermik ersersitsinissaq ilikkassagaanni ilungersuutigisariaqarpoq — ingammik ullumikkut tunniusimaneq pissusissamisoortoq amigaataasarmat. (2 Timûtiuse 3:1-5) Allaat ilaqutariit iluanni taamaassinnaavoq. Aap, inuppassuit avatangiisini asannittumik oqaaseqartoqanngingajaffiusuni peroriartortarput. (Evfisumiut 4:29-31; 6:4) Qanoq ililluta asanninnerup ersersinnissaa ilikkarsinnaavarput, nammineq misigivallaarsimanngikkaluarlugu?

³ Biibili tamatumani iluaqutigisinnaavarput. 1 Korintumiut 13:4-8-mi Paulusip, asanninnerup suunera sukumiisumik nassuianngikkaluarlugu, asanninneq qutsinnerpaaq iliuuseqartitsisartoq uummaarissumik allaatigaa. Versit taakku misissorutsigik pissuseq tamanna Guutimeersoq paasilluarsinnaavarput namminerlu pissuserinerulersinnaallutigu. Asanninnerup immikkoortui assigiinngitsut Paulusip allaaserisai misissoriartigik. Immikkoortut pingasut eqqarsaatigalugit asanninneq misissussavarput: nalinginnaasumik ileqqulersuutivut; taava peqqissaarnerusumik allanut attaveqarnerput; kiisalu nikallujuissuserput.

Pingaarniarnerup ajugaaffiginissaanut asanninnerup ikiortarpaatigut

4. Biibilimi sinnganeq pillugu sumik paasitinneqarpugut?

⁴ Asanninneq aallarniutaasumik oqaatigereerlugu Paulusip Korinthimiut ima allaffigai: ’Asannittoq sinngasarinngilaq.’ (1 Korintumiut 13:4) Sinnganeq tassaasinnaavoq allat iluatsitsinerannut angusaqarnerannulluunniit usorunneq. Sinnganeq tamanna aserorsaataasarpoq — timikkut, misigissutsikkut aamma anersaakkut. — Ussatit 14:30; Rûmamiut 13:13; Jâko 3:14-16.

5. Teokratiimut atatillugu immikkut pisinnaatitaaffimmik tunineqanngitsooraluarutta sinnganerup ajugaaffiginissaanut asanninnerup qanoq ikiorsinnaavaatigut?

⁵ Tamanna eqqarsaatigalugu imminut apereriarit, ’Teokratiimut tunngatillugu immikkut pisinnaatitaaffimmik tunineqanngitsooraluaruma sinngalissanerpunga?’ Taamatut misigiguit  isumatsaqinak. Biibilimik allattup Jakobip eqqaasippaatigut inuit naammalluinnanngitsut tamarmik ’ilungersortumik’ imaluunniit ’sinngajasumik’ anersaaqartut. (Jâko 4:5, NV) Qatanngutinnut asanninnerpit oqimaaqatigiissumik isumaqarnissannut ikiorsinnaavaatit. Ikiorsinnaavaatit tipaatsuttut tipaatsoqatigisinnaalersillugit allallu pilluaqquneqaraangata nersorneqaraangataluunniit minitaasutut misiginnginnissannut. — Naleqqiuguk 1 Samuel 18:7-9.

6. Ukiuni hundredelinni siullerni ilagiinni Korinthimiittuni qanoq ingasattumik pisoqarsimava?

⁶ Paulus nangilluni allappoq asannittoq ’usorsitsaartuunanilu annerujumatuusarinngitsoq’. (1 Korintumiut 13:4) Arlaannik piginnaaneqarluarutta tamanna takoqqusaarutigisariaqanngilarput. Paasinarpoq Korinthitoqqami angutit qaffakkiartorumasut taamaattut ilagiinnut ilaalersimanerat ajornartorsiutaasimasoq. Immaqa isumaminnik saqqummiussillaqqipput imaluunniit sunniuteqarluarnerusumik iliuuseqarnerarlutik. Imminnut malugeqqunerat ilagiit avissaartuutilernerannik kinguneqarsimagunarpoq. (1 Korintumiut 3:3, 4; 2 Korintumiut 12:20) Pissutsit ima ingatsigilersimapput Paulusip kingusinnerusukkut Korinthimiut ’siuneqanngitsunik ilaginnarumallarmata’ avoqqaarisariaqarlugit, taakku Paulusip isornartorsiuilluni ’apustilitut assut akitsisutut’ taasai. — 2 Korintumiut 11:5, 19, 20.

7, 8. Biibili tunngavigalugu qanoq ililluta piginnaanerit inunnguuserisavut ataasiussutsip siuarsarnissaanut atorsinnaagivut nassuiaruk.

⁷ Ullumikkut tamatumunnga assingusumik pisoqarsinnaavoq. Assersuutigalugu, ilaasa immaqa oqaluussinermi angusaqarnitik imaluunniit Guutip peqatigiissortaani immikkut pisinnaatitaaffitsik usorsitsaarutigigajussinnaavaat. Allaalluunniit ilagiinniittut allat piginngisaannik immikkut piginnaaneqaraluarutta, tamatuma pingaakujunnissamut pissutissaqartissavaatigut? Tassami inunnguuseralugit piginnaanivut tamaasa atortariaqarpavut ataasiussuseq siuarsarniarlugu — immitsinnut siuarsarniarnata. — Matîuse 23:12; 1 Pîtruse 5:6.

⁸ Paulus allappoq naak ilagiit amerlasuunik ilaasortaqaraluarlutik ’Guutip avatit tamaasa immikkut timimi piumasaminik ineqartikkai’. (1 Korintumiut 12:19-26) Griikerit oqaasiannik ’ineqartippai’-mik nutserneqarsimasumi oqimaaqatigiissumik akoorneqarneq, soorlu qalipaatinik akoorinermi, pineqarpoq. Taamaattumik ilagiinni kialuunniit piginnaanini pingaakujuutigisariaqanngilai imaluunniit allanut naalagaaniartuusariaqarnani. Pingaarniarneq qaffakkiartorumassuserlu Guutip peqatigiissortaani inissisimaffeqanngillat. — Ussatit 16:19; 1 Korintumiut 14:12; 1 Pîtruse 5:2, 3.

9. Biibilimi namminissarsiorneq eqqarsaatigalugu inuit mianersoqqussutaasut ilaannik taasaqarit.

 ⁹ Asannittoq ’namminissaminik piniartarinngilaq’. (1 Korintumiut 13:5) Asannittoq isummani maliinnarlugu allanut sunniiniassanngilaq. Biibilimi tamanna pillugu assersuutinik mianersoqqussuteqarpoq. Assersuutigalugu: Dalila, Jesabel Ataljalu allaatigineqarput — tamarmik arnaapput namminissarsiorlutik allanut sunniiniartut. (Eqqartuussisut 16:16; 1 Kunngit 21:25; 2 Israelikkut 22:10-12) Aamma kunngi Davidip ernera Absalom taamaappoq. Taassuma illoqarfiup isaaffiata eqqaani eqqartuussiviliartut ornittarpai oqaatigimisaartarlugulu kunngip eqqartuussisui inuit ajornartorsiutaannik iluamik soqutigisaqanngitsut. Taava toqqaannartumik oqarfigisarpai angut immisut naakkittartigisoq eqqartuussisunngortitaasariaqaraluartoq! (2 Samuel 15:2-4) Soorunami Absalom inuit nikanartitaasut soqutiginagit imminuinnaq eqqarsaatigaaq. Imminut kunnginngortissimasutut pissusilersornermigut inuppassuit uummataat sunnerpai. Naggataatigulli Absalom ajorsartinneqarluinnarpoq. Toqugami allaat iluamik ilineqarnissamut qinngaqqunartutut isigineqarpoq. — 2 Samuel 18:6-17.

10. Qanoq ililluta takutissinnaavarput allat iluaqutissaat soqutigigivut?

¹⁰ Tamanna kristumiunut ullumikkut inuusunut mianersoqqussutaavoq. Angutaagaluarutta arnaagaluaruttaluunniit imaassinnaavoq sunniiniallaqqissuusugut. Immaqa piumasatta pitinissaa ajornartorsiutigissanngilarput, allat kimigiiserfiginerisigut allamilluunniit isumallit nigortinnerisigut. Asannittuuguttali allat iluaqutissaat soqutigissavavut. (Filípimiut 2:2-4) Guutip peqatigiissortaani misilittagaqarnerput imaluunniit inisissimaffipput atornerlullugu allat iluanaarniutigalugit sunnerniartanngilavut apeqquserneqarsinnaasunillu siunnersorniassanagit uagut isumarput kisiat pingaaruteqartorlusooq. Akerlianik ussat Biibilimeersoq manna eqqaamassavarput: „Imminut pingaartinneq ajunaarutaasarpoq, makitasaarneq naakkiussutaasarpoq.“ — Ussatit 16:18.

Asanninneq eqqissinermut siuarsaataasarpoq

11. (a) Qanoq ililluta asannilluta inussiarnerlutalu ippinnanngitsumik iliorsinnaavugut? (b) Qanoq ililluta takutissinnaavarput iluannginneq tipaatsuutigisarinatigu?

¹¹ Paulus aamma allassimavoq asannittoq ’inussiarnerlunilu’ ’ippinnartumik iliortarinngitsoq’. (1 Korintumiut 13:4, 5) Aap, asannikkutta soqutigittaatsumik, kannguttaatsumik ataqqinninngitsumillu iliuuseqarnavianngilagut. Akerlianik allat misigissusii soqutigissavavut. Assersuutigalugu, inuk asannittoq allat nalunngeqatiginnissutsimikkut aalassaatigisaannik iliuuseqarumanavianngilaq. (Naleqqiuguk 1 Korintumiut 8:13.) Asannittup ’iluannginneq tipaatsuutigisarinngilaa, sallusuissulli tipaatsuutigisaraa’. (1 Korintumiut 13:6) Jehovap inatsisai nuannarigutsigik kanngunartuliorneq soqutiginngitsuusaassanngilarput imaluunniit Guutip uumigisai aliikkusersuutigiumassanagit. (Tussiaat 119:97) Aserornartut pinnagit ineriartornartunik nuannarisaqarnissatsinnut asanninnerup ikiussavaatigut. — Rûmamiut 15:2; 1 Korintumiut 10:23, 24; 14:26.

12, 13. (a) Allanit ajuallatsinneqarutta qanoq qisuariartariaqarpugut? (b) Allaat pissutissaqaraluarluni kamalluni sianiitsumik iliuuseqartoqarneranik assersuutinik Biibilimeersunik eqqaasaqarit.

¹² Paulus nangilluni allappoq asannittoq ’narrutsattarinngitsoq’ („puffajasuunngitsoq,“ Phillips). (1 Korintumiut 13:5) Soorunami inuttut naammalluinnanngitsuugatta aalassatsinneqartarpugut kamalerlutalu allanit ajuallatsinneqaraangatta. Kisianni sivisuumik ajuallassimagutta imaluunniit kamassimagutta eqqunngitsuliussaagut. (Tussiaat 4:5; Evfisumiut 4:26) Allaat pissutissaqaraluarluni kamanneq nakkutigineqanngippat isumaatsuliornermik kinguneqarsinnaavoq, Jehovallu tamatuminnga akisussaatissinnaavaatigut. — 1 Moses 34:1-31; 49:5-7; 4 Moses 12:3; 20:10-12; Tussiaat 106:32, 33.

¹³ Allat naammalluinnanngissutsiminnik ersersitsisarnerat pissutigalugu ilaat kristumiut  ataatsimiinnerinut takkutinngitsoortarsimapput imaluunniit oqaluussinermut peqataajunnaarsimallutik. Taakkua ilarpassuisa upperisaq assoroorutigisimavaat, immaqa ilaquttaminnit assortorneqarneq, suleqatimminnit illaruaatigineqarneq assigisaallu atortariaqarsimallugit. Assortorneqarnerit tamakku naammagalugit atorsimavaat assuarnaassutsimut misilinneqarnertut eqqortumik isigigamikkik. Taavami kristumioqatitta ilaat asanninngitsumik oqaaseqarpat iliuuseqarluniluunniit? Tassaannginnerpattaaq assuarnaassutsimut misilinneqarneq? Aap, taamaappoq, narrutsassimajuarutta ’Diaavulu inissaqartissinnaagatsigu’. — Evfisumiut 4:27.

14, 15. (a) ’Eqqunngitsuliorfigineqarnernik naatsorsuutiginninneq’ qanoq paasisariaqarpa? (b) Qanoq ililluta Jehovap isumakkeerfiginneriaasia malinniarsinnaavarput?

¹⁴ Paulus pissutissaqarluarluni nangilluni allappoq asannittoq ’ajortumik isumaqartarinngitsoq,’ imaluunniit Ny Verden-Oversættelsen naapertorlugu ’eqqunngitsuliorfigineqarnernik tamanik naatsorsuutiginnittarinngitsoq’. (1 Korintumiut 13:5) Tassani oqaaseq naatsorsuinermut atasoq atorpaa, taamaalilluni naatsorsuutit allassimaffiinut puigorneqartussaajunnaarlugit allattuisarneq assersuutigalugu. Asannittuliornerussanerpa oqaaseq iliuuserluunniit ajuallannartoq eqqaamaniartuarutsigu, isumaqarlutalusooq kingusinnerusukkut eqqaaqqinnissaa pisariaqassasoq? Qujamasuutigisinnaavarput Jehovap taamaaliorluni naakkittaatsumik nakkutigineq ajormatigut! (Tussiaat 130:3) Aap, peqqissimigutta ajortivut piiassavai. — apustilit suliait 3:19.

¹⁵ Tamanna eqqarsaatigalugu Jehova malinniarsinnaavarput. Allat ajuallatsippatigut sualuttumik qisuariarfigisariaqanngilarput. Ajuallajagutta ajuallatsitsisup uatsinnik ajoqusiisinnaaneranit sakkortunerusumik immitsinnut ajoqusiinnarsinnaavugut. (Nalunaajaasup oqaasii 7:9, 22) Akerlianik eqqaamasariaqarparput asannittoq ’tamatigut uppertuummat’. (1 Korintumiut 13:7) Soorunami uppiasuujumanngilagut. Aammali qatanngutitta pissutiginiagaat apeqquseqqajaavallaartariaqanngilavut. Ajornanngikkaangat qularnerput allanut iluaqutissanngortinniartariaqarparput. — Kulorsamiut 3:13.

Asanninnerup nikallujuinnissatsinnut ikiortarpaatigut

16. Atukkat suut atortariaqarutsigik asanninnerup kamajuitsuunissatsinnut ikiorsinnaavaatigut?

¹⁶ Paulusip paasitippaatigut ’asannittoq kamajuitsuusoq’. (1 Korintumiut 13:4) Kamajuinnitsigut atukkat atoruminaatsut, allaat sivisuumik, atorsinnaavavut. Assersuutigalugu kristumiut amerlasuut ukiorpassuarni allamik upperisalimmik aappaqarsimapput. Allat kissaatiginngikkaluarlugu aappaqaratik inuusariaqarput ’Naalakkami’ tulluartumik aapparisinnaasaminnik nassaarnissamut periarfissaqarsimannginnamik. (1 Korintumiut 7:39; 2 Korintumiut 6:14) Allat nappaateqarlutik sanngiillisimaneq akiortariaqarpaat. (Galâsiamiut 4:13, 14; Filípimiut 2:25-30) Aap, aaqqissuussaanermi naammalluinnanngitsumi matumani kialuunniit inuunermini nikallujuissuseq pisariaqartippaa. — Matîuse 10:22; Jâko 1:12.

17. Suna ikiortigalugu tamatigut nikallujuissinnaavugut?

¹⁷ Paulusip neriorsoqqissaarpaatigut asannittoq ’tamatigut kamaginnittartoq, . . . tamatigut neriuttartoq, tamatigut ilalaartartoq’. (1 Korintumiut 13:7) Jehova asagutsigu naapertuilluassuseq pillugu suut tamaasa naammagalugit atorsinnaavavut. (Matîuse 16:24; 1 Korintumiut 10:13) Naalliutsitaanissaq kissaatiginngilarput. Akerlianik eqqissilluta piuaallutalu inoorusuppugut. (Rûmamiut 12:18; 1 Tásalûníkamiut 4:11, 12) Taamaattorli uppernikkut misilinneqaraangatta tamakku nikallujuilluta atorumassavavut ilisimagatsigu Kristusimut ajoqersugaaneq tamakkuninnga nassataqartartoq. (Lúkarse 14:28-33) Nikallujuitsilluta isumalluarniartarpugut, misilinneqarnitta ajunngitsumik kinguneqarumaarnera neriuutigalugu.

18. Sooq allaat ajunngitsumik atugaqaraanni nikallujuinneq pisariaqarpa?

 ¹⁸ Misilinneqarnerit saniatigut aamma allatigut nikallujuissuseqartariaqarpugut. Ilaatigut nikallujuissuseq tassaasarpoq misilinneqaraluaraanniluunniit aalajangersimassuseqarluni toraagassamut ingerlajuarneq. Nikallujuissagaanni anersaakkut ingerlalluarneq pigiuartariaqarpoq. Assersuutigalugu periarfissatit naapertorlugit kiffartornermi siunertaqarluartumik peqataasarpit? Guutip oqaasia atuartarlugulu eqqarsaatigisarpiuk qinunikkullu Ataatat qilammiusoq attaveqarfigisarlugu? Ilagiit ataatsimiinnerinut aalajangersimasumik najuuttarpit, uppeqatillu kajumissaaqatigisarnerat iluaqutigaajuk? Taamaaliortaruit taava maannakkorpiaq ajunngitsunik artornartunilluunniit atugaqaraluaruit nikallujuissimassaatit. Nakkaannaqinak, ’nalliuppat katersuiumaarattattaaq qasunngikkutta’. — Galâsiamiut 6:9.

Asanninneq — ’aqqut aatsaat aqqutaalluartoq’

19. Asanninneq qanoq ililluni tassaava ’aqqut aatsaat aqqutaalluartoq?

¹⁹ Paulusip asannittuliornerup pingaaruteqassusia erseqqissarpaa pissuseq Guutimeersoq tamanna ’aqqummik aatsaat aqqutaalluartumik’ taagamiuk. (1 Korintumiut 12:31) Qanoq ililluni ’aatsaat aqqutaalluarpa’? Tassami, Paulusip eqqaareerpai anersaap tunissutai kristumiut ukiuni hundredelinni siullerni inuusut akornanni nalinginnaasut. Ilaat siulittuisinnaassuseqartitaapput, allat napparsimasunik ajorunnaarsitsisinnaallutik, allarpassuillu oqaatsinik allanertanik oqalussinnaallutik. Tunissutit tamakku tupinnarluinnartuupput! Taamaattoq Paulusip Korinthimiut ima allaffigai: ’Inuit inngilillu oqaasiinik oqaluttaraluaruma asannissuseqarnangali, kanngussak sianaartoq avilortunnguarluunniit sianaalasoq taava assigeqqajaqaakka. Pruffiitisullu oqalussinnaagaluarumaluunniit, anngigisallu tamaasa ilisarsissutillu tamaasa ilisimagaluarukkit, uppernerlu tamaat pigigaluarukku qaqqarsuit nutsersinnaagaluarlugit allaat, asannissuseqarnangali, taava suunngeqqajaqaanga.’ (1 Korintumiut 13:1, 2) Aap, allaat suliat nalilerujussuit tassaasinnapput ’suliat inuussutaanngitsut’ Guutimut tullermullu asanninnermik pissuteqanngikkunik. — Eprîarit 6:1.

20. Sooq ilungersuussiuartariaqarpugut asanninneq ineriartortissagutsigu?

²⁰ Jesusip asanninnermik Guutimeersumik ineriartortitsinissatsinnut allamik aamma pissuteqartippaatigut. ’Matumannga tamarmik ilisarissavaasi ajoqersugarigissi: asaqatigiikkussi.’ (Juánase 13:35) Tassani pissanersorsiut atorneqarmat takusinnaavarput kristumiup nammineq asannittuliornissani ilinniartariaqaraa. Tassami, nunami allamiineq namminermini naammanngilaq tassanimiut oqaasii ilikkassagaanni. Aamma naalagaaffilersaarfimmi ataatsimiigiartarutta imaluunniit kristumioqativut ilagisarutsigik tamanna namminermini naammanngilaq asanninnermik ersersitsisinnaanissaq ilikkassagutsigu. Asanninnerup ’oqaasii’ ilikkassagutsigik ilungersuussisariaqarpugut.

21, 22. (a) Asanninnerup ersiutaasa Paulusimit eqqartorneqartut ilaannik ersersitsinngitsoortarutta qanoq iliortariaqarpugut? (b) Sooq oqarsinnaavugut ’asanninneq soraarnavianngitsoq’?

²¹ Ilaatigut asanninnerup ersiutaasa Paulusimit eqqartorneqartut ilaannik ersersitsisinaasarnavianngilatit. Nikalloqinalli. Sulissutigiuaruk. Biibili misissoqqissaartuaruk allanullu  iliuuseqartarninni najoqqutassiai atortakkit. Jehovap uatsinnut maligassiaa puigoqinagu. Paulusip Efesusimiut ima kajumissaarsimavai: ’Ajunngitsumik iliorfigeqatigiigitsi isumassuigajullusilu isumakkeerfigeqatigiillusilu, soorlu Guutip isumakkeerfigigaasi Kristusimi.’ — Evfisumiut 4:32.

²² Soorlu piffissap ingerlanerani allamiut oqaasiinik atuinissaq piuminarnerulersinnaasoq, qularnanngitsumik aamma paasissavat asanninnermik ersersitsinissaq piuminarnerujartortartoq. Paulusip neriorsoqqissaarpaatigut ’asanninneq soraarnavianngitsoq’. (1 Korintumiut 13:8) Anersaap tunissutai tupinnartuliorsinnaatitsisut assiginagit asanninneq soraarnavianngilaq. Taamaattumik pissutsip tamatuma Guutimeersup ersersinnissaa ilinniarruk. Soorlu Paulus oqarsimasoq tassaavoq ’aqqut aatsaat aqqutaalluartoq’. (wE 15/2 99)

Nassuiarsinnaavigit?

□ Pingaarniarneq ajugaaffigissagutsigu asanninnerup qanoq ikiorsinnaavaatigut?

□ Ilagiinni eqqissinerup siuarsarnissaanut asanninnerup qanoq ikiorsinnaavaatigut?

□ Nikallujuinnissatsinnut asanninnerup qanoq ikiorsinnaavaatigut?

□ Asanninneq qanoq ililluni tassaava ’aqqut aatsaat aqqutaalluartoq’?

[Atuaqqissaarnermi apeqqutit]

[Qupp. 19-imi assiliartaq]

Asanninnerup ikiorsinnaavaatigut uppeqatitta kukkunerini isumakkeerfiginissaannut

[Qupp. 23-mi assiliartaq]

Nikallujuissagutta teokratiimut atatillugu sulissuteqartuartariaqarpugut