Ilaqutassariit pilluartut

ILAQUTASSARIIT ILAQUTARIITTUT PILLUARNEQ AAMMA ANGUSINNAAVAAT? AAP, TAAMAALIORSINNAAPPUT, ingammik ilaquttat tamarmik eqqaamappassuk ’Allakkat tamarmik Guutip sunniineratigut isumassarsiarititaasut iluaqutaallutik ajoqersuutaallutillu inerteqqutaallutik, iluarsiartuutaallutik, iluarnermut perorsaataallutik’. (2 Timûtiuse 3:16, NV) Tamarmik Biibilip najoqqutassiaanik maleruaagunik ilaqutariittut iluatsitsinissamut periarfissaqarluassapput.

Pissuseq tunngaviusoq

Biibilip inuit imminnut attaveqarfiginerat pillugu inatsisit ikittuinnaat imarai. Amerlanertigut pissutsit isummallu silatuumik iliornissatsinnut iluaqutaasinnaasut ineriartorteqqullugit kajumissaarpaatigut. Isummat pissutsillu pitsaasut taamaattut ilaqutariittut pilluarnartumik inuunermut tunngaviusarput.

Immaqa pissusissamisoorpalukkaluarpoq, erseqqissaarneqarluinnartariaqarporli ilaqutariittut inuuneq pilluarnartoq asanninnermik tunngaveqartoq. Apustili Paulus allappoq: ’Asanninneq pisuusaarnerunngikkili. . . . Qatanngutigiissutut asaqatigiigitsi ungagiillusi.’ (Rûmamiut 12:9, 10) Oqaaseq ’asanninneq’ kukkusumik atorneqarajuttarpoq, pissuserli Paulusip taasaa immikkut ittuuvoq. Tassaavoq asanninneq Guutimeersoq, ’soraarnaviassanngitsorlu’. (1 Korintumiut 13:8) Biibilimi nassuiarneqarpoq asanninnermik tamatuminnga piginnittoq namminissarsiortuunanilu ikiuiumatuusoq. Allat iluaqutissaannik iliuuseqartarpoq. Kamaginnittarpoq inussiarnertarlunilu, sinnganani, usorsitsaartuunani annerujumatuunanilu. Namminissaminik piniarneq ajorpoq. Isumatuujuvoq; tamatigut upperaraaq, tamatigut neriuttaraaq, sutigullu tamatigut ilalaararaaq. — 1 Korintumiut 13:4-7.

Asanninneq piviusoq eqqissisitsisarpoq inuillu perorsarneqarnermikkut inuttullu pissutsimikkut assigiinngitsuusut ataasiussuseqartittarlugit. Aamma avinnerup ataatamilluunniit anaanamilluunniit toqusoornerup kinguneri annernartut atoruminarsissinnaavai. Ataatassaq nammineq ajornartorsiutigisimasani pillugit ima oqaluttuarpoq: „Nammineq misigissutsikka  eqqarsaatigivallaartarakkit qitornassama nuliamalu qanoq innerat maluginngitsoortarpara. Misikkarinnginnerunissara ilinniartariaqarsimavara. Pingaarnerusumillu: Maniguunnissaq ilinniartariaqarpara.“ Asanninneq ikiortigalugu allanngorsinnaasimavoq.

Angajoqqaavik

Asanninnerup angajoqqaassat ikiorsinnaavai meeqqat ataatavimminnut anaanavimminnulluunniit allami najugaqartumut attaveqarnerannut paasinnilernissamut. Ataatassaq ima nassuerpoq: „Qitornassama uanga ataatavimminnit asanerussagaannga kissaatigisimavara. Pulaaraangassuk taassuma isornartorsiornissaa pinngitsoortinniarlugu ilungersortariaqartarpunga. Taassumani ulloq nuannersoq misigisimagaangassuk uannut annernartorujussuusarpoq. Pulaarsimanerat iluatsippallaarsimanngikkaangat nuannaartarpunga. Qitornassama annaanissaat ernumagaara. Ingammik meeqqat ataataviata taama pingaaruteqartiginera akueriuminaatsippara.“

Asanninneq piviusoq ikiortigalugu ataatassap taassuma paasilerpaa ilimagineqarsinnaanngitsoq meeqqat isumaminnik asalissagaanni. Meeqqanit ingerlaannaq ilassineqarsimanngikkaluarluni ilaluarineqartutut misigisimasariaqanngikkaluarpoq. Paasivaa qitornassami immaqa ataatavimmissut asatiginavianngikkaanni. Meeqqammi ataatavitsik inunngornerminnit ilisarisimavaat, ataatassalli tikerlaatut meeqqat asanninnerat aatsaat kingusinnerusukkut eqqortumik pisassarisinnaalerpaa. Inuppassuit ilisimatusartoq Elizabeth Einstein isumaqatigissavaat oqarmat: „Ataatavik anaanavilluunniit taarserneqarsinnaanngisaannarpoq — naamerluinnaq. Toqugaluaruni meeqqaniluunniit qimakkaluarunigit meeqqat inuuneranni suli pingaartumik inissisimaffeqassaaq.“

Perorsaaneq — isumaqatigiinngissutaasartoq

Biibilip takutippaa meeqqat inuusuttullu asannittumik perorsarneqarnissartik pisariaqartikkaat, qitornassallu aamma taamaapput. (Ussatit 8:33) Immikkut ilisimasallit amerlasuut tamatumani Biibili isumaqatigilersimavaat. Professori Ceres Alves de Araújo oqarpoq: „Kialuunniit killilersugaanerit nuannarinngilai, pisariaqarpulli. Oqaaseq ’naagga’ illersuinissaq siunertaralugu atorneqartarpoq.“

Ilaqutassariilli iluanni perorsaaneq sualuttumik isumaqatigiinngissutaalersinnaasarpoq. Qitornassat aamma inersimasumit najugaqaqatigisimasaminnit inuttut ilusilersorneqarsimasarput. Taamaattumik qularnanngitsumik ileqqoqarsinnaapput periaaseqarsinnallutillu ataatassap anaanassalluunniit iluarinngisaanik. Immaqa aamma ataatassap anaanassalluunniit assiiginngitsut pillugit isumai aalajangersimalluinnartut paasiuminaatsissinnaavaat. Taamaattoqartillugu qanoq iliortoqarsinnaava? Paulusip kristumiut ima kajumissaarpai: ’Asanninneq nikallujuinnerlu qanilaarnerlu noqqaassutigikkit.’ (1 Timûtiuse 6:11) Kristumiutut asanninnerup angajoqqaassat qitornassallu tamaasa ikiortarpai qanilaarnissamut nikallujuinnissamullu imminnut ilinniartillutik. Ataatassaq anaanassarluunniit erinitsajasuuppat, ’kamannerit nillianerit mitallernerillu’ ajunngitsumik attaveqalersimanerigaluaq aserorsinnaavaat. — Evfisumiut 4:31.

Pruffiiti Mika tamanna eqqarsaatigalugu pitsaasumik ima unnersuussivoq: „[Jehovap] ilisimatereerpaatit suna ajunngitsuusoq, nalunngereerpat suut ilinnit piumasarigai: Iluartumik iliussasutit, ilumoortumik asannissasutit, makitajuillutillu Guutit peqatigalugu inuussasutit.“ (Mika 6:8) ’Iluartumik iliorneq’ meeqqanik perorsaanermi pingaaruteqarluinnarpoq. ’Asanninnerli’ imaluunniit tunniusimaneq qanoq pingaaruteqartigaa? Kristumiu utoqqaanertaq oqaluttuarpoq sapaatikkut ullaakkut qitornassani makitinnissaat naalagaaffilersaarfimmullu ataatsimiigiarnissamut piareersarnissaat ajornakusoortissimallugu. Naveernagilli asannittumik iliorfigisarpai. Makiaartarpoq, ullaakkorsiutit piareersarlugit meeqqallu kissartutortillugit. Tamanna pissutigalugu makiaartinnissaat piuminarnerulerpoq.

Professori Ana Luisa Vieira de Mattos soqutiginartumik ima oqaaseqarsimavoq: „Ilaquttat imminnut attaveqarnerata pitsaassusia, ilaqutariit katitigaanerat pinnani, aalajangiisuusarpoq. Misissuisarnerma takutissimavaat inuusuttut ileqqulersuutitigut ajornartorsiutillit amerlanertigut angajoqqaaminnit isumakkiigaasartut, unnersuunneqartarnermik attaveqatigiinnermillu amigaateqarlutik.“ Imalu nangippoq: „Erseqqissarneqartariaqarpoq meeqqat perorsarneqarneranni ilaatigut naaggaartoqartariaqartoq.“ Nakorsat  Emily aamma John Visher oqarput: „Perorsaaneq siunertarisaasutut sunniuteqartarpoq aatsaat perorsarneqartussap perorsaasoq ajunngitsumik attaveqarfigerusukkaangagu, qisuariartarneralu sumiginnassanagu.“

Oqaaseqaatit tamakku tunngavigalugit aperisoqarsinnaavoq meeqqat perorsarnerannut atatillugu kina malittarisassiussanersoq tamakkualu malinneqarnerat nakkatigalugu. Angajoqqaat ilaat kina naaggaartassava? Suut tamaasa oqaloqatigiissutigereerlugit angajoqqaat ilaat aalajangersimapput ataatavik imaluunniit anaanavik aallaqqaammut taamaaliussasoq. Taamaappat anaanassaq ataatassarluunniit meeqqanut attaveqarluarnerunissaminut periarfissaqarnerussaaq. Angajoqqaassap meeqqat perorsartariaqarpai aatsaat malugisinnaaleruniuk meeqqat asaneqarnertik qulariunnaaraat.

Kisianni Biibilimi allassimanngila ataataasoq ilaqutariit niaqorigaa? Naamik. (Evfisumiut 5:22, 23; 6:1, 2) Ataatassalli taamaallaat utaqqiisaasumik anaanaasoq perorsaanermik akisussaaffeqalersissinnaavaa, ingammik meeqqat perorsaatissinneqartariaqartillugit. Meeqqat ’anaanamik malittarisassiaanut’ (NV) naalatsissinnaavai, taamaalillunilu kingusinnerusukkut ’[ataatassamik] oqaaqqissaarutaanik naalalernissaat’ tunngavilerlugu. (Ussatit 1:8; 6:20; 31:1) Pissutissaqanngilaq isumaqassalluni taamaaliorneq ilaqutariinni oqartussaassutsimik najoqqutassiamut ajoqutaassasoq. Ataatassaq ima oqarpoq: „Eqqaasarpara kajumissaarineq, oqaassuteqarneq oqaanneqarnerlu tamarmik perorsaatissiinermut ilaasartut. Angajoqqaat maligassaalluarlutik naapertuilluartumik asannittumillu perorsaatissiisaraangata amerlanertigut kinguneqarluartarpoq.“

Angajoqqaat oqaloqatigiittariaqarput

Ussatit 15:22-mi allassimavoq: „Siunnersuisoqarsimanngikkaangat pilersaarutit asuliinnartarput.“ Ilaqutassariinni aappariit ikinngutinnerpasissumik attaveqatigiilluartarnerat sunillu tamanik eqqissisimasumik oqaloqatigiissutigeqarsinnaanerat immikkut pingaaruteqarpoq. Aviisimi O Estado de S. Paulo-mi aaqqissuisoq allassimavoq: „Meeqqat angajoqqaamik killissarititaat misilinniartuartarpaat.“ Immaqalu ilaqutassariinni taamaaliornerugajuttarput. Taamaattumik angajoqqaat isumaqatigiissutiginiartariaqarpaat angerlarsimaffimmi maleruagassat suut atortinneqassanersut, meeqqat malugisinnaaniassammassuk angajoqqaat tapersersoqatigiittut. Taavami ataatassap anaanassalluunniit meeqqat anaanaviup ataataviulluunniit isumaa malillugu naapertuilluanngitsumik iliorfigippagit? Taamaappat angajoqqaat kisimiitillutik ajornartorsiut oqaloqatigiissutigissavaat — meeqqat tusaatinnagit.

Anaanaasoq kateqqissimasoq oqarpoq: „Anaanaasup misilittagaasa artornarnerpaat ilaat tassaavoq meeqqat ataatassaminnit naveerneqarnerat, ingammik misigiguni tuaviorpallaartumik kinaassusersiortumilluunniit qisuariartoq. Isumatsangaalissaaq meeqqallu illersorusulissallugit. Tamatumani uimut naalatsigitinneq tapersersuinerlu artornassaqaaq.

Ilaanni ernikka 12-inik 14-inillu ukiullit ataatassaminnut aalajangersimasumik iliornissaminnut akuereqqupput. Naaggaaginnarporli inilu qimallugu nukappiaqqat kissaatigisamik qanoq pingaaruteqartigineranik nassuiarnissaannut periarfissinnagit. Nukappiaqqat qiasunngulerput uangalu oqariarneq saperpunga. Angajulliup qiviarpaanga oqarlunilu: ’Anaana, qanoq iliortoq takuiuk?’ Akivara: ’Aap, takuara. Ilaqutariittulli niaqoraarput, Biibililu naapertorlugu oqartussaanera ataqqissavarput.’ Nukappiaqqat silatuusaramik isumaqatigaannga eqqisseqqilerlutillu. Unnuk taanna uiga pisimasumik nassuiaappara, paasivaalu naalagaaniarpallaarsimalluni. Ingerlaannaq nukappiaqqat inaannukarpoq utoqqatserfigalugillu.

Pisimasoq tamanna ilinniutigilluarparput. Uima aalajangertinnani tusarnaarnissani ilikkarpaa. Uanga ilikkarpara oqartussaassutsimik najoqqutassiaq ataqqissallugu, allaat artornaraluaraangat. Nukappiaqqat naalatsigitinnerup pingaaruteqarnera ilikkarpaat. (Kulorsamiut 3:18, 19) Uimalu utoqqatserluinnarnerata maniguunnermik ilinniartippaatigut. (Ussatit 29:23) Ullumikkut ernikka tamarmik kristumiut ilagiissaanni utoqqaanertatut kiffartorput.“

Ilaqutariit kikkulluunniit naammalluinnartuunngillat. Meeqqat ajuallannartunik oqaaseqartoortarlutillu iliuuseqartoortarput, angajoqqaassallu tatineqarnikkut ingasaassisumik iliuuseqartoorsinnaasarput. Ilumoortumilli utoqqatsertoqaraangat isumaqatigiinngissutit iluarsinneqarsinnaasarput.

 Ilaqutariittut atasiussuseq nakussatsittarsiuk

Ilaqutassariinni asannittumik qanittumillu attaveqarnermik ineriartortitsiniarneq sivisuusinnaavoq. Anaanassaaguit ataatassaaguilluunniit misiginneqataaneq ersersittariaqarpat. Paasinnittarit meeqqallu peqatiginissaannut piffissaqartarlutit. Meeqqat minnerusut pinguaqatigisakkit, meeqqallu annerit oqaloqatiginiartarlugit. Ataatsimoorlusi sammisaqartaritsi. Assersuutigalugu angerlarsimaffimmi suliassanik assigiinngitsunik, soorlu igaqataanissamut, biilimilluunniit asaanissamut, ikiuuteqqusinnaavatit. Apereriakkit pisiniarfiliaqatigerusunneraatsit. Immaqa aamma asannittumik tagiarlugit takutissinnaavat soqutigigitit. (Soorunami ataatassat panissamik tulluanngitsumik iliorfiginissaannut mianersortariaqarput, taakkua iluarinngisaannik attorumanagit. Anaanassallu eqqaamasariaqarpaat nukappiaqqat iluarinngisaqarsinnaasartut.)

Ilaqutassariit amerlasuut ingerlalluartarput. Ingerlalluarnerusut tassaanerusarput ingammik angajoqqaat, eqqortumik isumaqarfiginninnermik ineriartortitsisut piviusorsiortunillu ilimagisaqartartut. Apustili Johannes allappoq: ’Asanartusi ukorsii, asaqatigiinniarta asanninneq Guutimit pimmat.’ (1 Juánase 4:7) Aap, ilaqutassariittut pilluarnerup isertugaataa tassaavoq qamannga pisumik asanninneq.

[Qupp. 7-imi assiliartaq]

ILAQUTASSARIIT PILLUARTUT

Guutip oqaasianik atuaqqissaaqatigiittarput . . .

imminnut piffissaqarfigisarput . . .

oqaloqatigiittarput . . .

suleqatigiittarput . . .