Jehovap piumasaatut iliorput

Paulusip atugarliornini anigorpai

PAULUS atugarlioqaaq. Paulus inuillu allat 275-it umiarsuarmut ilaasut Eurakvilomit — Akullersuarmi anoraasuarsuit sakkortunersaannit — pitoraattumit eqqorneqarput. Anoraasuarsuaq sakkortungaarmat ullukkut seqineq takuneqarsinnaanngilaq unnuakkullu ullorissat takuneqarsinnaanatik, soorunami umiarsuarmut ilaasut inuunertik ernumassutigaat. Paulusip tuppallersarpai oqaluttuullugit sinnattortilluni Guutip qanoq nalunaarfigisimagaani: ’Ilassi ataatsilluunniit inuunera pineqassanngilaq, umiarsuaq kisimi aserussaaq.’ — apustilit suliait 27:14, 20-22.

Anorersuarsiorlutik ullut 27-ssaanni umiartortut tupaallannartumik paasisaqarput — immap itissusia isannerit 20-innaapput. * Ingerlaqqilaareeramik itissusersioqqipput. Maanna itissusia isannerit 15-iinnaapput. Nunamut qanittumiipput. Nutaarsiassarli nuannersoq tamanna aamma isumaalutsitsilerpoq, umiarsuarmi unnuakkut ikkattumi tissukartoq ikkarlilluni aserorsinnaavoq. Umiartortut silatusaarlutik kisarput, ilaasalu umiatsiaaraq singinnialerpaat annanniarlutik nunamut ikaarutiginiarlugu. * Paulusilli unitsippai. Sakkutuut naalagaannut sakkutuunullu oqarpoq: ’Uku umiarsuarmi uninngippata annassinnaanngilasi.’ Sakkutuut naalagaata Paulus tusarnaarpaa, maannalu umiarsuarmut ilaasut 276-iusut tamarmik qaamarnissaq utaqqilerpaat. — apustilit suliait 27:27-32.

Umiiarput

Qaamalermat umiarsuarmiittut kangerliumaneq sissartalik takuaat. Umiartortut neriuuteqaleqqillutik kitsat pituutaat killorpaat tingerlaallu sannerutilik anorimut isuillugu. Umiarsuup sissaq toraalerpaa, qularnanngitsumillu nuannaartoqarnera tusarsaasimassaaq. — apustilit suliait 27:39, 40.

Ikkannerli illuttut itinersualik eqqoramikku umiarsuaq tassunga ikkarlippoq. Ajorneruvorli mallit sakkortuut umiarsuup aqua aserormassuk. Tamarmik umiarsuaq qimattariaqalerpaat! (apustilit suliait 27:41) Ajornartorsiuteqarporli, umiarsuarmut ilaasorpassuit, taakkununnga Paulus ilaalluni, tigusaasuupput. Romamiut inatsisaat naapertorlugu tigusanik paarsisup tigusaq qimaasisooruniuk, tigusap pillaatissiaata assinganik pillarneqassaaq. Assersuutigalugu inuarsimasoq qimaappat, tigusanik paarsisup inuunerminik akilertariaqarpaa.

Sakkutuut, taamatut kinguneqarsinnaaneranik ernumasut, tigusat tamaasa toqunnialerpaat. Sakkutuulli naalagaat, Paulusimut inussiarnersuusoq, akuliuppoq. Naalakkiivoq nalussinnaasut nunamut nalussasut. Sinneri sallilikkanik umiarsuulluunniit aseqqukuusumit ikaaruteqartariaqarput. Umiiarsimasut ataasiakkaarlutik umiarsuarmiit aseqqukummiit nunamut ikaararput. Paulusillu oqarsimaneratut inuunermik annaasaqartoqanngilaq. — apustilit suliait 27:42-44.

Maltami tupinnartuliaq

Umiartortut qasoqqaqisut qeqertami Maltami oqquiffissarsipput. Maltamiut allanertanik oqaaseqartuupput, nutsiinnavillugu isumaqartumik „inuit naakkittaatsut“ (griikerisoorlugu barʹbaroi). * Maltamiunilli naakkittaatsuliorfigineqanngillat. Akerlianilli Paulusip angalaqataata, Lukasip, oqaluttuaraa ’mikinngitsumik inussiarnersaarfigigaatik inneq ikumatikkamikku tamaasalu ilassillugit, nalaatsorluni siallermat pueqqoqimmallu.’ Inuit qeqertameersut peqatigalugit Paulus orpikkanik katersuivoq ikumasumullu qissiullugit. — apustilit suliait 28:1-3.

Tassanngaannaq pulateriaarsuk toqunartulik Paulus assaatigut kiillugu nippuppoq. Qeqertarmiullu isumaqalerput Paulus inuarsimasuusimassasoq. Isumaqarsimagunarput Guutip ajortuliorsimasoq pillartaraa timaata ilaa ajortuliuutigisimasaa saassullugu. Qanorli pisoqarpa? Tupaallaatigisaannik Paulusip pulateriaarsuk toqunartulik innermut issugiuppaa. Lukasillu takunnittuusimasup oqaluttuaa naapertorlugu ’taakku utaqqipput  pullassasoralugu tassanngaannarluunniit toqulluni uppissasoralugu’. Susoqanngimmalli qeqertarmiut isumartik allangortillugu oqarput guutiusimassasoq. — apustilit suliait 28:3-6.

Paulus qaammatini pingasuni Maltamiippoq. Piffissami tamatumani Publiusip angutaa napparsimasullu allat ajorunnaarsippai. Publiusip, qeqertami pingaarnertaasuusup, Paulus inoroorsaarfigisimavaa. Aammattaaq Paulusip sallusuissutip inerittussartai qeqertami siaruarterpai, Maltamiunut inoroorsaartunut ajunngitsorpassuarnik kinguneqartumik. — apustilit suliait 28:7-11.

Ilinniarfissarput

Paulusip kiffartornermini unamminiarnartorpassuit naammattoortarsimavai. (2 Korintumiut 11:23-27) Qulaani oqaluttuarineqartumi nutaarsiassaq nuannersoq pillugu tigusaaqqavoq. Tamatuma saniatigut ilimaginngisaminik misilinneqarnerit amerlasuut anigorniartarsimavai: anorersuarsiorpoq tamatumalu kingunerisaanik umiiarluni. Pissutsit tamakku atortillugit Paulus nutaarsiassamik nuannersumik aallussilluarluni oqaluussinissamik aalajangiussisimanini patajaaffigaa. Misigisimasani tunuliaqutaralugit allappoq: ’Tamanik tamanilu sungiussisimavunga qaarsilaarnermik kaannermillu, peqangaarnermik ajorsarnermillu. Tamaasa pissatsitsisikkut sapinngilakka.’ — Filípimiut 4:12, 13.

Inuunitsinni ajornartorsiutigisinnaasatta Guutimut ilumoortumut aallussilluarluta kiffaanissatsinnik aalajangiusimasarput sanngiillisinngisaannassavaa. Ilimaginngisamik misilinneqaraangatta, nanertuutigisarput Jehovamut tunniuttassavarput. (Tussiaat 55:23) Taava nikallujuilluta misilinneqarnitta atorsinnaanissaanut qanoq iliuuseqassanersoq utaqqissavarput. Utaqqitilluta isumagiumaaraatigut tatigalugu aalajaalluta kiffartornerput ingerlatissavarput. (1 Korintumiut 10:13; 1 Pîtruse 5:7) Qanorluunniit pisoqaraluarpat aalajaattuarnitsigut Paulusitut atugarliornerit ajugaaffigisinnaavavut. (wE 1/5 99)

[Quppernerup ataani ilanngussat]