Jehovap aqqutigeqqusaa ingerlavigiuartigu

„[Jehova] neriuffiguuk aqqutigeqqusaalu atuarlugu, taava nunamik kingornussisussanngortikkumaarpaatit.“ — TUSSIAAT 37:34.

1, 2. Kunngi Davidip Jehovap aqqutigeqqusaani ingerlanera sunik nassataqarpa? Uagutsinnut sunik nassataqarpa?

„AQQUTIGISASSANNIK ajoqersunnga, eriniffigigakkit.“ (Tussiaat 143:8) Ullumikkut kristumiut uummatikkut iluunngarlutik kunngi David isumaqatigaat. Ilumoorlutik Jehovamut iluarisaajumapput taassumalu aqqutigeqqusaa ingerlavigiumallugu. Tamanna sumik nassataqarpa? David taamaaliussaguni Guutip inatsisai maleruartariaqarpai. Jehova tatigisariaqarpaa ilumoortumillu kiffartorfigalugu, inuiaqatigiit eqqaamiutik peqatiginagit taakkualu guutii pallorfiginagit. Kristumiulli Jehovap aqqutigeqqusaata ingerlaviginissaa aamma allanik nassataqarpoq.

² Jehovap aqqutigeqqusaatigut ingerlasut pingaartumik Jesus Kristusip utertitsisutut pilliutaa upperisariaqarpaat akueralugulu taanna ’aqqutaasoq sallusuissutaalluni inuussutaallunilu’ (Juánase 3:16; 14:6; Epr 5:9) Aamma ’Kristusip inatsisai’ naammassiniartariaqarpaat, taamaattumillu qatanngutiminnut, ingammillu Jesusip qatanngutaanut tanitanut, asanninnertik takutillugu. (Galâsiamiut 6:2; Matîuse 25:34-40) Jehovap aqqutigeqqusaanik malinnittut taassuma najoqqutassiai inatsisaalu nuannaraat. (Tussiaat 119:97; Ussatit 4:5, 6) Kristumiutut kiffartornermut peqataasinnaaneq immikkut pisinnaatitaaffittut pingaartippaat. (Kulorsamiut 4:17; 2 Timûtiuse 4:5) Qinuneq inuunerannut ilaalluinnarpoq. (Rûmamiut 12:12) Saniatigut ’mianersoqqissaartarput saqilluarniarlutik, ilisimaatsutut pinnatik ilisimatuutulli’. (Evfisumiut 5:15) Nunap pii utaqqiisaannaasut piniarlugit imaluunniit illigussusipiluit kanngunartuliornermut atasut misigiumallugit anersaakkut naleqartitat pilliutiginianngilaat. (Matîuse 6:19, 20; 1 Juánase 2:15-17) Tamakkununnga ilaapput Jehovamut ilumoorneq tatiginninnerlu inuunerminni pingaartilluinnagaat. (2 Korintumiut 1:9; 10:5; Evfisumiut 4:24) Sooq taamaappa? Israelikkut itsaq atugarisaannut ullumikkut assingusunik atugaqaratta.

Tatiginninneq ilumoornerlu pisariaqarput

3. Ilumoornerup, uppernerup tatiginninnerullu qanoq ikiorsinnaavaatigut Jehovap aqqutigeqqusaani ingerlajuarnissatsinnut?

³ Israelikkut tassaasimapput inuiaqatigiinnguit inuiaqatigiinnit akeqqersimaartunit guutipilussiornermut atatillugu soqqusaatsumik periaaseqartartunit avatangersimaneqartut. (1 Israelikkut 16:26) Israelikkut kisimik Guuti ilumoortutuaq takussaanngitsorlu pallorfigisarpaat, taassumalu ileqqussatigut qutsisunik najoqqutassianik malinninnissaat. (5 Moses 6:4) Ullumikkut inuit arlaqanngitsunik millionillit kisimik Jehova pallorfigaat, taakkulu inuit 6 milliardingajaat allaanerulluinnartunik ileqqullit upperisallillu akornanni inuupput. Jehovamik pallorfiginnittunut millionilialunnut taakkununnga ilaagutta sunniutipilunnut mianersortariaqarpugut. Qanoq ililluta? Jehovamut ilumoorneq, upperneq neriorsuutaanullu tatiginnilluinnarneq iluaqutigissavavut. (Eprîarit 11:6) Taamaaliorutta silarsuup inuisa neriuffigisartagaat  tatigissanngilavut. — Uss 20:22; 1 Tim 6:17.

4. Sooq inuiaqatigiit ’isumakkut taarsiorpat’?

⁴ Apustili Paulusip eqqartorpaa kristumiut qanoq silamiunit allaanerusariaqartut ima allakkami: ’Taamaattumik maanna oqarpunga nalunaajaallungalu Naalakkami, taama saqiunnaaqqullusi soorlu Guutimik nalusut eqqarsaatimikkut piunngitsorsiorlutik saqisartut; taakku taarsiorput isumamikkullu inuunermit Guutip pianit avissaarsimallutik ilumikkut nalusuugamik uummatimikkullu manngertuugamik.’ (Evfisumiut 4:17, 18) Jesus tassaavoq ’qaammaqqut piviusoq’. (Juánase 1:9) Taassuminnga narruginnittut imaluunniit taassumunnga upperneraraluartut ’Kristusilli inatsisai’ naalannagu tamarmik ’isumamikkut taarsiorput’. Jehovap aqqutigeqqusaa ingerlaviginngilaat, ’inuunermillu Guutip pianit avissaarsimallutik’. Naak silarsuup pii pillugit paasisaqarluarsimagaluarlutik, ilisarsineq inuunermut sammisoq, tassa Jehova Guuti aamma Jesus Kristus pillugit ilisarsineq, naluaat. — Juánase 17:3; 1 Korintumiut 3:19.

5. Naak sallusuissut silarsuarmi qaamagaluartoq sooq inuppassuit uummatikkut manngertuuppat?

⁵ Taamaattorli sallusuissut silarsuarmi qaamavoq. (Tussiaat 43:3; Filípimiut 2:15) „Ilisimassut aqqusinermi nipituumik torlulavoq.“ (Ussatit 1:20) Siorna Jehovap nalunaajaasuisa nalunaaquttap-akunneri 1 milliardit sinnerlugit atorpaat allat Jehova Guuti Jesus Kristusilu pillugit oqaluttuuttarlugit. Inuit hundredetuusintilikkuutaat tusarliussaat ajunngitsumik qisuariarfigaat. Allarpassuilli tusarusunngimmata tupigusuutigissavarput? Naamik. Paulusip ’uummatikkut manngertuunerat’ eqqaavaa. Ilaat uummatikkut manngertuupput namminissarsioramik aningaaserituugamilluunniit. Allat eqqunngitsumik upperisarsiornermit silamiutulluunniit eqqarsariaatsimit ullumikkut nalinginnaasumit sunnerneqarsimapput. Inuunermi atugarliutit pissutigalugit inuppassuit Guuti tunussimavaat. Allat Jehovap ileqqussatigut qutsissunik najoqqutassiai maleruarumanngilaat. (Juánase 3:20) Jehovap aqqutigeqqusaani saqigaluartoq aamma manngertumik uummateqalersinnaava?

6, 7. Pisimasuni suni Israelikkut Jehova pallorfigigaluarlugu tunussippat, aamma sooq?

⁶ Soorlu Paulusip eqqaagaa Israelikkut itsaq taamaalisimapput. Ima allassimavoq: ’Tamakkuli taamaalipput missingiutaallutik pilluta, ajortumut kajumissileqqunata, soorlu ikku kajumissilersut. Aamma guutipilussiortunngornaveeritsi, soorlu ikkua ilaat guutipilussiortut, soorlu allassimasoq: „Inuit ingipput neriumallutik imerumallutillu, nikuippullu ikakkumallutik.“ Aamma uersaanaveerisa, soorlu ikkua ilaat uersaasut illuinnarlu 23.000-it toqutaallutik.’ — 1 Korintumiut 10:6-8.

⁷ Siullermik Paulusip innersuussutigaa Israelikkut Sinaip Qaqqaani nersuteeraasaliamik guultiusumik pallorfiginninnerat. (2 Moses 32:5, 6) Taamaalillutik sapaatit-akunnialui tamatuma siorna naalannissaminnik neriorsuigaluarlutik maanna Guutip inatsisaa unioqqutippaat. (2 Moses 20:4-6; 24:3) Paulusip nangilluni eqqaavaa qanoq Israelikkut Moabikkut panii ilagalugit Ba’ali pallorfigisimagaat. (4 Moses 25:1-9) Nersuteeraasaliamik guutipilussiorneq inuulluarumatussutsimik ’ikannermillu’ * ilisarnaateqarsimavoq. Ba’alisiorneq takussaasumik kanngunartuliornermut attuumassuteqarsimavoq. (sarĸúmersitat 2:14) Sooq Israelikkut taamaalillutik ajortuliorpat? Uummatimik ’ajortumut kajumissilernissaat’ akuerigamikku. Ajortoq tamanna tassaasinnaavoq guutipilussiorneq imaluunniit Ba’alisiornermut atatillugu soqqusaatsuliorneq.

8. Israelikkunnut pisimasut qanoq ilinniutigisinnaavavut?

⁸ Paulusip erseqqissarpaa pisimasut tamakkua ilinniarfigissagivut. Takorloorneqarsinnaanngilaq kristumiup nersuteeraasaliaq guultiusoq imaluunniit Moabikkutoqqat guutiisa ilaat pallorfigisinnaassagaa. Kisianni kanngunartuliorneq  imaluunniit namminissarsiorluni inooriaaseq qanoq isigaarput? Ullumikkut taamaaliorneq atugaangaarpoq, uummatitsinnilu pilerissuseq taama ittoq ineriartortikkutsigu Jehovamit ungasilliartortinneqassaagut. Guutipilussiornertut kinguneqassaaq — Guutimut takornartaalissaagut. (Naleqqiuguk Kulorsamiut 3:5; Filípimiut 3:19.) Paulus pisimasut tamakku oqaaseqarfigalugit naggasiivoq uppeqatini ima kajumissaarlugit: ’Guutipilussiorneq qimarratigisiuk.’ — 1 Korintumiut 10:14.

Guutip aqqutigeqqusaani saqinermut ikiorneqarnissaq

9. (a) Jehovap aqqutigeqqusaa ingerlavigiuaqqullugu qanoq ikiorneqarpugut? (b) Eqqaaguk ilaatigut qanoq ’kingunitsinni oqartoqartoq’ tusarsinnaagipput?

⁹ Jehovap aqqutigeqqusaani ingerlajumasut kisimiinngillat. Esajas ima siulittuivoq: „Talerpiup saamiulluunniit tungaanut sanguleraangassi siutissi tusaassavaat kingunissinni ima oqartoqartoq: ’Aqqut aana ingerlavigisassarsi.’“ (Jesaja 30:21) ’Siutitta’ qanoq ilillutik ’kingunitsinni’ oqaatsit taakku tusarsinnaavaat? Ullumikkut eqqortumik paasillugu nipimik imaluunniit tusarliussamik Guutimeersumik tusartoqanngilaq.  Tamatta ’oqartoqartoq’ taanna assigiimmik tusartarparput. Pingaartumik allakkat isumassarsiarititaasut, Biibilip atuagartai Guutip eqqarsaataanik inunnillu iliorfiginnissimaneranik oqaluttuamik imalik, aqqutigalugit tusarparput. Ullut tamaasa ’inuunermit Guutip pianit avissaarsimasut’ sunniiniarnerat naammattoortaratsigu, anersaakkut peqqittuassagutta aalajangersimasumik Biibilimi atuartariaqarpugut atuarsimasavullu eqqarsaatigeqqissaartariaqarlugit. Taamaalilluta ’piunngitsut’ pinngitsoortissinnaavavut ’inerilluarsinnaallutalu ajunngitsuliornernullu tamanut piginnaanngorsagaalluta’. (apustilit suliait 14:14, 15; 2 Timûtiuse 3:16, 17) Taava nakussatsinneqassaagut ’iluatsitsilluassallutalu’. (Josva 1:7, 8) Jehovap oqaasiani ima oqaaqqissaarneqarpugut: „Taava maanna tusaaniarsinga, qitornakka! Pilluarput uanga ingerlavigeqqusannik atuaasut. Oqaaqqissaarutikka tusaaniarsigit asiginnarnagillu, taava ilisimassuseqalissaasi.“ — Ussatit 8:32, 33.

10. Aamma qanoq ’kingunitsinni oqartoqartoq’ tusarneqarsinnaava?

¹⁰ ’Kingunitsinni oqaatsit’ aamma ’kiffaq ilumoorlunilu silatooq piffissaq eqqortoq nalliuttaraangat nerisassamik tunisisartoq’ aqqutigalugu tusartarpavut. (Matîuse 24:45-47) Nerisassat anersaakkut ittut tamakku ilaatigut pisarpavut atuagassiat Biibililersaarutit aqqutigalugit, ukiunilu kingullerni tamakkuninnga pilersorneqarluartarpugut. Assersuutigalugu atuagassiami Napasuliaq Alapernaarsuiffik-mi siulittuutit pillugit eqqorluarnerusumik paasitinneqarpugut. Atuagassiaq tamanna aqqutigalugu kajumissaarneqarpugut oqaluussinermi ajoqersuganngortitsinermilu nikallujuinnissatsinnut naak soqutigisaqannginneq annertunerujartoraluartoq. Aamma ikiorneqarpugut nakkarfissat ingalassimanissaannut kristumiutullu pissutsit ineriartortinnissaannut. ’Piffissaq eqqorlugu nerisassat’ pingaartippavut.

11. Allatiguttaaq ’kingunitsinni oqartoqartoq’ qanoq tusarneqarsinnaava?

¹¹ Kiffap ilumoorlunilu silatuup aamma ataatsimiinnerni nerisassanik anersaakkut ittunik tunisarpaatigut. Ilagiit ataatsimiinnerini, ataatsimeersuaararnerni ataatsimeersuarnernilu taama tunineqartarpugut. Kristumiut aalajaatsut tamarmik katersuunnerit tamakku pingaartissannginnerpaat? Jehovap aqqutigeqqusaata ingerlavigiuarnissaanut ikiuutaapput nalilerujussuit. Amerlanersavut suliffimmi atuarfimmilu allamik upperisallit peqatigalugit piffissaq annertooq atortariaqarmassuk, aalajaalluta ilagiit ataatsimiinnerinut najuuttarnerput inuunermut pingaaruteqarpoq. Ataatsimiinnerni asanninnermut ajunngitsuliornermullu kajumissaaqatigiinnissatsinnut periarfissinneqarpugut. (Eprîarit 10:24) Qatanngutivut asavavut peqatigissinnaanerilu pingaartingaarlugu. — Tussiaat 133:1.

12. Jehovap nalunaajaasui qanoq aalajangersimappat, qanorlu ilillutik ungasinngitsukkut aalajangersagartik nalunaarutigaat?

¹² Inuit 6.000.000-ingajaat anersaakkut nerisassat tamakku nakuussutigalugit maannakkut Jehovap aqqutigeqqusaa ingerlavigisarpaat, allallu millionilikkuutaat taamaaliorusuttut Biibili atuaqqissaartarpaat. Nunarsuup inuinut milliardilikkuutaannut naleqqiullugit ikittuinnaagamik nikallorpat? Naamerluinnaq. ’Kingunerminnit oqaaseq’ naalakkumallugu ilumoorlutillu Jehovap piumasaanik iliorumallutik aalajangiulluinnarsimavaat. Aalajangerneq tamanna tamanut ammasumik oqaatiginiarlugu Jehovap Nalunaajaasuisa 1998/1999-imi ataatsimeersuarneranni „Guutip inuunermut aqqutigeqqusaa“-mik qulequtalimmi najuuttut aalajangersagaq akueraat. Aalajangersakkami aalajangerluinnarfigisaat erseqqissarneqarpoq. Aalajangersagaq ima nipeqarpoq:

Aalajangersagaq

13, 14. Jehovap nalunaajaasuisa qanoq silarsuarmi pissutsit piviusorsiortumik isigisarpaat?

¹³ „Uagut, Jehovap Nalunaajaasui ataatsimeersuarnermi ’Guutip inuunermut aqqutigeqqusaa’-mi najuuttugut, qularunnaarsitsilluta nalunaarutiginiarparput Guutip aqqutigeqqusaa tassaasoq inooriaaseq pitsaanerpaaq. Nalunngilarpulli amerlanerit taama isumaqanngitsut. Inuiaat isumaliutersuutit upperisallu  assigiinngitsorpassuit misilissimavaat inooriaaseq pitsaanerpaaq naniniarlugu. Oqaluttuarisaaneq ullumikkullu silarsuarmi pissutsit ilumoorluni misissoraanni paasinarsivoq Guutip Jeremia 10:23-mi oqaasii ilumoortut: ’Angutip aalajangigassarinngilai qanoq ingerlanissani alloriartarnissanilu.’

¹⁴ Ullut tamaasa oqaatsit taakkua ilumoornerat uppernarsaatigineqartarpoq. Inuiaqatigiit ataatsitut isigalugit Guutip aqqutigeqqusaa ilisimajumanngilaat. Inuit suut eqqortuunersut ilumoortuunersullu pillugit namminneq isumartik malittarpaat. Kinguneri alianartut takusarpavut: ilaqutariittut inuunerup aseroriartornera meeqqat ilitsersorneqannginnerannik kinguneqartoq; nunap piinik pingaartitsivallaarneq ingasatsikkiartuinnartartoq imaqanngissutsimik pakatsisinneqarnermillu kinguneqartoq; pinerluttuliorneq nakuusernerlu ajorluinnartut inuppassuit toqunerannik kinguneqartut; naggueqatigiit ikinnerussusillit imminnut sorsuunneri aamma inuppassuit amiilaarnartumik toqunerannik kinguneqartut; aammalu kanngunartuliorneq atugaangaartoq kinguaassiuutit nappaataannik nappaalanersuarmik kinguneqartoq. Tamakku tassaapput ajornartorsiutit amerlasuut annertuullu inuit eqqissinissaannut, pilluarnissaannut toqqissisimanissaannullu akornutaasartut ilaannaat.

15, 16. Guutip aqqutigeqqusaanik inooriaaseqarumaneq pillugu aalajangersakkami suna eqqaaneqarpa?

¹⁵ Inuiaat alianartumik atugaqarnerat eqqarsaatigalugu aamma ’sorsunnissap Guutip ajugaqanngitsup ullussarsuani piumaartup’, Harmagedonimik taaneqartup (sarĸúmersitat 16:14, 16) qanillinera eqqarsaatigalugu uagut Jehovap nalunaajaasuisut ima nalunaarpugut:

¹⁶ 1. Isumaqarpugut kiffatut Jehova Guutip pigigaatigut. Nammineq inuttut nangaanngivilluta taassumunnga tunniulluinnarsimavugut, utertitsissullu Jehovap ernini Jesus Kristus aqqutigalugu pilersissimasaa aalajaatsumik upperiuarniarparput. Aalajangersimavugut Guutip aqqutigeqqusaa inooriaasitsitut maleruassallugu, taassumunnga nalunaajaasuulluta taassumalu kisimi oqartussaaneranut Jesus Kristusip naalakkersuineratigut ersersinneqartumut naalatsigitikkumalluta.

17, 18. Jehovap nalunaajaasuisa ileqqussatigut najoqqutassiat kristumiutullu qatanngutigiinneq qanoq isumaqarfigaat?

¹⁷ 2. Ileqqussanut najoqqutassiat qutsissut Biibilimi oqaatigineqartut maleruarniarpavut, angusassallu anersaakkut ittut tassani saqqummersinneqartut angunissaat noqqaassutigiuarpavut. Silarsuup inui ’eqqarsaatimikkut piunngitsorsiorlutik saqisut’ malinniarumanngilavut. (Evf 4:17-19) Aalajangerpugut Jehovap isaani minguitsuujuassalluta silarsuarmit mingutsinnaveersaarluta. — Jâko 1:27.

¹⁸ 3. Nunarsuaq tamakkerlugu qatanngutigiittut kristumiutut ingerlajuassalluta. Inuiaqatigiit akornanni kristumiutut attaviitsuunerput attattuaannarniarparput, naggueqatigiissutsikkut inuiaassutsikkullu uumissuisumik assortuunnernut akuliukkumanata.

19, 20. (a) Angajoqqaat kristumiut qanoq iliorumappat? (b) Kristumiut ilumoortut tamarmik qanoq ilillutik takutissavaat Kristusimut ajoqersugaallutik?

¹⁹ 4. Angajoqqaajusugut meeqqavut Guutip aqqutigeqqusaanik ajoqersorniarpavut. Kristumiutut inuunermi taakkununnga maligassaalluarniarpugut, ilaatigut aalajangersimasumik Biibilimik atuartarnikkut, ilaqutariittut atuaqqissaaqatigiittarnikkut kristumiullu ilagiissaasa sulinerannut, taakkununnga ilaatillugu oqaluussisarnermut, uummammit pisumik peqataaniarluta.

²⁰ 5. Tamatta pissutsit ajunngitsut Pinngortitsisutsinnit ilinniarsimasavut ineriartortittuarniarpavut, kiisalu Jesusitulli taassuma pissuserisai iliuuserisaalu malinniarsaralugit. (Evfisumiut 5:1) Aalajangerpugut ’susarnivut tamaasa asanninnikkut pissallugit’ taamaalillutalu takutillugu Kristusimut ajoqersugaalluta. — Juánase 13:35.

21-23. Jehovap nalunaajaasui qanoq iliortuarniarpat, sunalu qularinngilluinnarpaat?

²¹ 6. Kipisuitsumik Guutip naalagaaffianik nutaarsiassaq nuannersoq oqaluussissutiginiarparput ajoqersuganngortitsiniarlutalu. Ajoqersuganngortullu  Guutip aqqutigeqqusaa inooriaatsitut pitsaanerpaasoq pillugu ajoqersorniarpavut kajumissaarniarlugillu ilagiit ataatsimiinnerini ilinniartinneqartuarnissaannut. — Matîuse 24:14; 28:19, 20; Eprîarit 10:24, 25.

²² 7. Inuttut ataasiakkaarluta upperisarsioqatigiittullu Guutip piumasaa inuunitsinni salliutittuarniarparput. Taassuma oqaasianit, Biibilimit, siulersorneqarumavugut allamut saannata, taamaalilluta takutillugu Guutip aqqutigeqqusaa silarsuup aqqutigisaanit pitsaanerungaartoq. Aalajangerpugut aalajaalluinnarluta ilumoorlutalu maannakkut naassaanngitsumullu Guutip aqqutigeqqusaa inooriaatsitsitut ingerlaviginiarlugu.

²³ Aalajangersakkamut tamatumunnga isumaqataavugut Jehovap asannittumik neriorsuutaa tatigilluinnaratsigu, neriorsuimmat piumasaanik naammassinnittoq naassaanngitsumik atassasoq. Aalajangersagaq manna akueraarput qularinnginnatsigu Biibilip najoqqutassiai siunnersuutaalu maleruaraanni ullumikkut pitsaanerpaamik inooriaaseqarsinnaalluta, taamaalillutalu siunissamut tunngavissaqarluassalluta inuunerlu piviusoq tigusinnaassallugu. (1 Timûtiuse 6:19; 2 Timûtiuse 4:7b, 8) Tamanit pingaarnerutillugu taama aalajangerpugut Jehova Guuti uummatikkut iluunngarluta, tarnikkut iluunngarluta, isumakkut iluunngarluta nukivullu taamaasa atorlugit asagatsigu!

24, 25. Aalajangersagaq qanoq qisuariarfigineqarpa, Jehovallu aqqutigeqqusaani ingerlasut qanoq iliornissamik aalajangiussisimappat?

²⁴ Ataatsimeersuarnermut matumunnga najuuttut tamaasa aalajangersakkamik tamatuminnga isumaqataanerminnik nalunaarumasut qinnuigineqarput nipituumik ersarissumillu angeqqullugit!“

²⁵ Nunarsuaq tamakkerlugu arsartarfissuarni inersuarnilu ataatsimeersuariartut nipituumik angernerannik akisuavoq. Jehovap nalunaajaasuisa qularinngilaat Jehovap aqqutigeqqusaa ingerlavigiuassallugu. Taanna tutsuigilluinnarlugu tatigaat neriorsuutini eqquutitissagai. Qanorluunniit pisoqassagaluarpat taassumunnga ilumoorluinnassapput, aalajangerlutillu taassuma piumasaanik iliorniarlutik.

„Guuti iligaarput“

26. Jehovap aqqutigeqqusaani ingerlasut pilluaqqussutissat suut nuannaarutigisinnaavaat?

²⁶ Jehovap nalunaajaasuisa tussiaasiortup kajumissaarutaa eqqaamavaat: „[Jehova] neriuffiguuk aqqutigeqqusaalu atuarlugu, taava nunamik kingornussisussanngortikkumaarpaatit.“ (Tussiaat 37:34) Paulusip kajumissinartumik oqaasii puigussanngilaat: ’Guuti iligigutsigu kia assortussavaatigut? Taassumami erni allaat erliginngilaa, tunniuppaali tamatta pilluta; sooq taava taassumunnga ilanngullugit tamanik tunissannginnerpaatigut?’ (Rûmamiut 8:31, 32) Jehovap aqqutigeqqusaa ingerlavigiuarutsigu taassuma ’atugassatsinnik sunik tamanik tuningaartassavaatigut’. (1 Timûtiuse 6:17) Jehovap aqqutigeqqusaani qatanngutivut angutit arnallu peqatigalugit sumiiffigisatsinnit pitsaanerusumik sumiiffissaqarnerpugut? Taamaattumik Jehova saqeqatigalugu aalajangerniartigu taassuma aqqutigeqqusaaniittuarniarluta naggatissamut allaat aalajaalluta, tatigilluinnarlugu piffissaq taassuma aalajangersagaa nalliuppat neriorsuutiminik tamanik piviusunngortitsinera misigissagipput. — Títuse 1:2. (wE 15/5 99)

[Quppernerup ataani ilanngussaq]

Eqqaamavigit?

□ Kristumiup Jehovap aqqutigeqqusaa ingerlavigissaguniuk suna pisariaqarpa?

□ Sooq Jehovamut tatiginninnerup ilumoornerullu ineriartortinnissaa pingaaruteqarpa?

□ Jehovap aqqutigeqqusaa ingerlavigitillugu qanoq ikiorneqarsinnaavugut?

□ Ataatsimeersuarnermi „Guutip inuunermut aqqutigeqqusaa“-mi aalajangersakkamit angerfigineqartumit pingaarnerit ilaat eqqaakkit.

[Atuaqqissaarnermi apeqqutit]

[Qupp. 10-mi assiliartaq]

Ataatsimeersuarnermi „Guutip inuunermut aqqutigeqqusaa“-mi aalajangersagaq pingaarutilik angerfigineqarpoq