Qujamasuttuuit?

Afrika-killermi ajoqersuiartortitat angerlarsimaffianni teddymik atilimmik qimmeqartoqarsimavoq. Neqimik nalussivigineqaraangami mamarsaatigeqqaarnagu tamuaqqaarnagulu ingerlaannaq iisarpaa. Kiaqisumi seqinermi anertikkarluni mamartumininnguamik utaqqisarpoq. Tunineqaqqinngikkaangamilu ingerlaqqittarpoq.

Teddy qujamasunnermik ersersitsinngisaannarpoq. Qujamasunnissaa kialuunniit naatsorsuutiginngilaa. Qimmiinnaavormi.

QUJAMASUNNERUP tungaatigut inoqativut uumasunit ilimasuffiginerusarpavut, amerlanertigulli pakatsisarluta. Amerlasuut inuunerup neqeroorutigisinnaasaanik tamanik piniartarput, annertunerusumillu pinissartik naatsorsuutigisarlugu; tamanna aamma tupaallannartuunngilaq. Biibilimi siulittuutigineqarsimavoq ulluni kingullerni inuit qujasuitsuujumaartut. — 2 Timûtiuse 3:1, 2.

Guutilli kiffai allatut pissuseqarput. Apustili Paulusip uppeqatiminut unnersuussutaa maleruarpaat: ’Qujasaritsi.’ — Kulorsamiut 3:15.

Jehova qujamasuttuuvoq

Pingaartitsinermik ersersitsinerup tungaatigut Jehova Guuti naammalluinnartumik maligassiuivoq. Kiffani aalajaatsut qanoq isigigai eqqarsaatigeriaruk. Paulus isumassarsisinneqarsimalluni kristumiunut hebriiarinut ima allassimavoq: ’Guuti iluaatsuunnginnami sulinersi asanninnersilu aqqa pillugu ileqqorisarsi puiussanngilai, iluartut kiffartuuttarassigik sulilu kiffartuuttarlugit.’ — Eprîarit 6:10.

Jehovap kiffaminik aalajaatsunik pingaartitsineranik assersuutissarpassuaqarpoq. Abraham pilluaqquaa kinguaavi ’qilaap ulloriaasut  sioqqatullu sissamiittutut amerlatigilersillugit’. (1 Moses 22:17) Jobillu misilinneqarnermini aalajaattuarnera Jehovap pingaartillugu pisuussutigisimasaata naligisaannai pinnagit, „pigisarisimasaasa marloriaataannik pigisaqarlersippaa“. (Job 42:10) Ukiut tusindilikkuutaat ingerlaneranni Jehovap inunnik isumassuisarsimanerata oqaatsit uku ilumoorneri uppernarsarpaat: „[Jehovammi] nunarsuarmiittut tamaasa takusinnaavai, uummatimikkut iluunngarlutik imminik tunaarinnittut pissaanermigut ikiorsinnaallugit.“ — 2 Israelikkut 16:9.

Guutip piumasaminik malinnikkusuttunik pingaartitsinera akileerusunneralu pissusiisa pingaarnerit ilagaat. Tamatuminnga paasinninneq kristumiut upperisaanni pingaaruteqarpoq. Paulus allappoq: ’Uppersuseqarnani Guutimut iluaritinneq ajornaqaaq, Guutimut orniguttup upperisassarimmagu . . . ujarlersini akilerumaarai.’ — Eprîarit 11:6.

Jehova taamaattuunani sukannersuugaluarpat isorinnippaluttuullunilu tamatta pillagassaassagaluarpugut. Tamanna itsaq tussiaasiortumit erseqqissarneqarsimavoq: „Illit [Jehova], ajortuliat naatsorsuutigissagaluarukkit kina atassagaluarpa taava, [Jehova]?“ (Tussiaat 130:3) Jehova qujasuitsuunanilu isorinnippaluttuunngilaq. Kiffani pingaartippai. Qujamasuttuuvoq.

Jesus — inuk qujamasungaartoq

Jesus Ataatamisorluinnaq qilammiusutut pissuseqarpoq allallu uppernikkut iliuusii qujamasuutigalugit. Ilaanni Jerusalemimi naalaffimmi pisimasoq eqqarsaatigeriaruk: ’Massikkami pisoorsuit takulerpai tunissutiminnik naalaffiup aningaasanik ilioraaffianut ilioraasut. Aammali uillarneq piitsoq takuaa quppakunik marlunnik ilisisoq. Taava oqarpoq: „Ilumut oqarfigaassi: uillarneq una piitsoq tamanit annermik ilisivoq. Taakku tamarmik sinnerutitamik ilaannik tunissutinut ilisimmata, uumali ajorsartuulluni inuutissarsiutissaraluani pigisani tamaasa ilivai.“’ — Lúkarse 21:1-4.

Aningaasartaannai eqqarsaatigalugit tunissutaa annikippoq, ingammik pisoorsuit tunissutaannut sanilliullugit. Najuuttut ikinnerpaartaannaasa malugisimassagaluarpaat, Jesusilli malugaa. Pissutsit atugai paasivai pingaarteqaalu.

Piffissami allami arnaq pisooq, tassa Maria, maluginiarnartumik iliuuseqarpoq. Jesus neritillugu, uulia akisooq tipigissorlu Jesusip isigaanut niaquanullu kuivaa. Ilaasa iliuusia isornartorsiorpaat oqarlutik uulia tunineqarsinnaagaluartoq aningaasallu piitsunut ikiuutaasinnaagaluartut. Jesus qanoq qisuariarpa? Oqarpoq: ’Assuareqinasiuk; sooq erloqisippisiuk? Ajunngitsumik iliorfigaanga. Ilumut oqarfigaassi: sumiluunniit silarsuarmi tamarmi iivangkiiliu oqaluussissutigineqaraangat taannattaaq oqaatigissavaat qanoq iliorsimasoq eqqaallugu.’ — Mákorse 14:3-6, 9; Juánase 12:3.

Uuliap akisuup allatut atorneqannginnera Jesusip kamaatiginngilaa. Mariap tunisiumatuujulluni asanninnerminik uppernerminillu ersersitsinera pingaartippaa. Pisimasoq Biibilimi oqaluttuarineqarpoq ajunngitsuliorneranut eqqaassutissatut. Oqaluttuat taakkua allallu takutippaat Jesus qanoq qujamasuttuutigisoq.

Guutip kiffarippatit qularutiginngilluinnarsinnaavat pallorfiginninneq ilumoortoq siuarsarniarlugu ilungersuutigisatit Jehova Guutip Jesus Kristusillu pingaartingaarai. Ilisimanninnerup tamatuma taakkununnga kajungilersippaatigut, qujamasunnermillu ersersitsinikkut ilaarnissaannut kajumilersilluta.

Satanip isorinnippaluttuunera

Qujamasunnermik ersersitsisimanngitsoq eqqarsaatigeriartigu — Satan Diaavulu. Satanip qujamasunnermik amigaateqarnera ajunaarutaasumik Guutimut pikititsineranut pissutaaqataavoq.

 Isorinnippaluttuuneq naammagittaatsuunerlu ineriartortereerlugit Satanip isumat taakku allanut siaruartilerpai. Edenip naatsiiviani pisimasut eqqarsaatigeriakkit. Jehova Guutip inuit siulliit pinngortippai, naatsiivimmut paratiisiusumut inissillugit oqarfigalugillu: ’Naatsiiviup orpii tamaasa neriffigisinnaavasi.’ Ataasiinnarmik killilerneqarput. ’Orpik ajunngitsumik ajortumillu nalujunnaarutaasoq neriffigissanngilarsi,’ Guuti oqarsimavoq. ’Neriffigigaluarussiummi toqussaasi.’ — 1 Moses 2:16, 17.

Erniinnarli Satanip Jehovap uppernassusia apeqquserpaa. Ilaatigut kissaatigaa Evap Jehovamut qujasuitsuunissaa nammineq Guutimut pikititsisimanermisut. „Ilumununa Guutip naatsiiviup orpiisa arlaannaalluunniit neriffigeqqunngikkaa?“ Satan aperivoq. (1 Moses 3:1) Eva isumaqartinniarpaa Guutip pingaarutilimmik erliguukkaa isaanik uisitsisinnaasumik Guutisut ilisitsisumik. Jehovap pilluaqqussuterpassuinut qujamasunnani inerteqqutaasoq kajungerilerpaa. — 1 Moses 3:5, 6.

Kinguneri alianartut ilisimaneqarluarput. „Inuusut tamarmik anaanagisussaammassuk“ Evamik atserneqaraluarluni toqujartortunut tamanut anaananngorsimavoq. Adamikkut ajorti, toqumik kinguneqartoq, tamarmik kingornussimavaat. — 1 Moses 3:20; Rûmamiut 5:12.

Guuti Kristusilu ilaarsigik

Satanip Jesusillu assigiinngissutaat eqqarsaatigeriakkit. Satan ’qatanngutitta unnerluutiginnittaattut . . ., ullukkullu unnuakkullu Guutitta saani unnerluutiginnittartutut’ oqaatigineqarpoq. (sarĸúmersitat 12:10) Akerlianilli Jesusip ’aqqutigaluni Guutimut pisut naalluinnarsimasumik annaassinnaavai, inuuttuinnarami qinnuttassallugit’. — Eprîarit 7:25.

Satanip Guutip kiffai unnerluutigai. Jesusip pingaartippai qinnuttarlugillu. Kristusip malinnittaattut kristumiut imminnut ajunngitsussarsiorfigisariaqarput imminnullu pingaartillutik. Taamaaliornermikkut qujamasunnermik ersersitsinermik maligassiuilluarnerpaamut, Jehova Guutimut, qujamasunnertik ersersissavaat. — 1 Korintumiut 11:1. (wE 15/4 99)

[Qupp. 16-mi assiliartaq]

Jesusip Mariap ajunngitsuliornera qujamasuutigalugu ersersippaa