Jehovap Piumasaatut Iliorput

Mariap ’ajunnginneq’ qinerpaa

JESUSIP nalaani juutit arnartaat rabbinerit ileqqulersuutaannit killilersorneqartorujussuusimapput. Oqarfigineqarput Inatsisinik atuaqqusaanngitsut. Aap, Mishna ima inerniliivoq: „Angutip kialuunniit panini Inatsisit pillugit ilisimasaqartilerpagu assigiinnarpaa tiingatussusermik ilinniartillugu.“ — Sotah 3:4.

Tamatuma kinguneraa ukiuni hundredelinni siullerni Judæami arnat amerlaqisut ilinniarluarsimannginnerat. „Uppernarsaatissaqanngilaq Jesusip kiffartornera sioqqullugu juutit arnartaasa ajoqersuisumut annermut ajoqersugaasinnaasimanerannik, angalaqataasinnaasimanerannik aammalu meeraanngitsunik ajoqersuisinnaasimanerannik,“ The Anchor Bible Dictionary-p maluginiarsimavaa. Suli arnanut nikanarsinneruniarlugit, upperisarsiornermi siuttut ilaat maleruagassamik inatsisiliorput angutip arnaq inuit allat akornanni oqaluuttassanngikkaa!

Jesusip ileqqupalaat tamakku soqutiginngilai. Arnat angutitulli assigiimmik ajoqersortarpai, malittaasalu akornanni arnat angutillu takussaapput. (Lúkarse 8:1-3) Ilaanni Jesus Martap Mariallu angerlarsimaffiannut qaaqquneqarpoq. (Lúkarse 10:38) Arnat marluk taakku Lazarusip qatanngutigai, qatanngutigiillu pingasuullutik Jesusimut ajoqersugaallutillu ikinngutaalluartuupput. (Juánase 11:5) Ilimanarpoq ilaqutariit taakku nuimasuusimasut, Lazarusimi toqummat Martamut Mariamullu tuppallersaajartortut amerlassimaqaat. Qanorluunniit pisoqarsimagaluarpat, Jesus pulaartillugu angerlarsimaffimminni pisimasumi pingaartorujussuarmik ilikkagaqarput. Uaguttaaq ilinniarfigisinnaavarput.

Jesusip isigaasa saanni ilinniarneq

Qularnanngilaq Martap Mariallu ajunngitsumik isumaqarlutik Jesus nerersuartikkusussimassagaat. (Naleqqiuguk Juánase 12:1-3.) Taamaakkaluartoq, pulaartik isermat Maria ’Jesusip isigaasa saannut ingippoq oqaasiilu tusarnaarlugit.’ (Lúkarse 10:39) Najoqqutassiap suulluunniit Jesus unitsinnavianngilaa arnamik ilinniarumaqisumik peqqusersuitsumillu ilinniartitsinerani! Ilimanarpoq Maria Jesusip saavanut ingissimassasoq, ilinniartutut ilinniartitsisumi oqaasii kisiisa tusarnaarluarlugit. — Naleqqiuguk 5 Moses 33:3; apustilit suliait 22:3.

Maria assiginagu, Marta ’ulapeqaaq kiffartorfiginiarlugu’. Nerisassanik pitsaalluinnartunik piareersaaniarneq suliassaavoq ulapinnarlunilu piffissamik atuinartorujussuaq. Sivitsunngitsoq Martap puffassimaarutigilerpaa, kisimi suliassat tamaasa suliarigamigit, uffa Maria Jesusip isigaasa saanni issiasoq! Taamaattumik Jesusip Mariamut oqalunnera Martap immaqa tassanngaannartumik kipitippaa, oqarluni: ’Naalagaq, soqutiginngiliuk qatanngumma kisima kiffartortimmanga? Oqarfigiuk ikioqqullunga.’ — Lúkarse 10:40.

Martap piumasaa immini ajunngilaq. Tassami amerlasuunut nerisassiorneq imaannaanngilaq, ikiorneqarnissamillu ilimasunneq pissusissamisoorpoq. Taamaakkaluartoq Martap oqaaseqarnerata Jesus periarfissippaa pingaarutilimmik ajoqersuinissaanut. ’Marta, Marta,’ oqarpoq. ’Amerlasuut isumakuluutigalugillu ulapissutigaatit; ataaserli pisariaqarpoq. Mariap ajunnginneq qinerpaa; tamatuminnga arsaarneqassanngilaq.’ — Lúkarse 10:41, 42.

Jesus oqanngilaq Marta anersaakkut ittunik soqutiginnikkunnaarsimasoq. Akerlianik Jesusip nalunngilaa Marta Guutimut tunniusimalluartuusoq. * Tamannalu qularnanngitsumik pissutaasimavoq Jesusimik imminnut qaaqqusineranut. Naqqiilaarnermigullu Jesusip tikkuarpaa Martap nerisassanik ulapputeqarnermigut Guutip erneranit namminermit ajoqersorneqarnissaminit periarfissaq pitsak pinngitsooraa.

 Qularnanngilaq taamanikkut nalinginnaasimasoq arnaq illumi suliassat qanoq pikkoriffigitiginerai naapertorlugit nalilerneqartarsimassasoq. Jesusilli oqaaserisaasa takutippaat arnat angutitulli Guutip ernerata saavanut ingissinnaasut, oqaatsinillu inuunartunik pigiliussillutik! (Juánase 4:7-15; apustilit suliait 5:14) Tamanna eqqarsaatigalugu, pitsaanerungaarsimassagaluarpoq Marta amerlanngitsunik, ataasiinnarmilluunniit, nerisassiorsimappat taamalu Ajoqersuisumi saavanut ingilluni ilinniarfiginissaanut periarfissaqalerluni. — Naleqqiuguk Matîuse 6:25.

Uagutsinnut ilinniutissaq

Ullumikkut angutit arnallu ilaat Jesusip ’imermik inuunartumik akeqanngitsumik peqqusineranut’ qisuariarsimapput. (sarĸúmersitat 22:17) Ilaat, Martatut asanninnermit attortillutik, pisinnaasartik tamaat uppeqatitik pisariaqartitsisut ikiorniartarpaat. Suliassanut piginnaassuseqarluarput, suleriataarsinnaassuseqarlutillu, Jehovallu taamaattut neriorsorsimavai asanninnermik sulissutiginninnerat akilerumaarlugu. (Eprîarit 6:10; 13:16) Allat immaqa Maria assigineruaat. Nipaarlupput eqqarsaqqissaartarlutillu. Guutip oqaasiinik eqqarsaatigeqqissaarnerisa ikiorpaat uppernerminni sorlaqarlualernissaannut. — Evfisumiut 3:17-19.

Inuilli assigiinngitsut taakku marluk kristumiut ilagiivini pisariaqartinneqartut pingaaruteqartut matussuserpaat. Kisiannili naggataatigut tamarmik ’ajunnginneq qinertariaqaraluarpaat’ anersaakkut ittut pingaarnertut siulliuttarnerisigut. Pingaarnerimmi siulliuttarnerisigut Jehovamit iluarisaassaagut pilluaqquneqassallutalu. — Filípimiut 1:9-11. (wE 1/9 99)

[Quppernerup ataani ilanngussaq]