Nakuussutitit sanngiiffigileqinagit

Umiarsuup Titanic-ip timitaa immassinnaanngitsunik 16-inik immikkoortoqarsimavoq, taamaammallu umiarsuaq kivisinnaanngitsutut naatsorsuunneqarsimalluni. 1912-imi angalaqqaarnermini umiatsiat annanniutit pisariaqartut affaannai nassarpai. Umiarsuaq ilulissamut aporpoq kivillunilu, inuillu 1500-t sinnerlugit ajunaarput.

ITSAQ Jerusalemimi kunngi Uzzija Guutimik mianerinnittoq sakkutuunut naalagaasimavoq pillaqqissoq. Jehovap ikiuineratigut akeqqani tulleriiaarlugit ajugaaffigisarsimavai. „Ussia Guutip tupinnartumik ikiormani pissaaneqarneruleriartuinnarpoq, tusaamasaassusialu nunanut ungasissumiittunut annguppoq.“ Taavali ’makitasuunngorluni; [Jehovamut] Guutiminut ilumoorunnaarpoq’. Uzzija makitasuunngornini pissutigalugu pupissunngorpoq. — 2 Israelikkut 26:15-21; Ussatit 16:18.

Oqaluttuat taakkua marluk ilinniartippaatigut nukittuujuneq ilisimassusermik, pilimaniannginnermik makitaniannginnermillu oqimaaqatigiissinngikkaanni sanngiissutinngoriataarsinnaasut. Tamanna ilungersunartuuvoq tamattami arlaatigut nukittuffeqaratta piginnaaneqarlutaluunniit iluaqutaatikkusutatsinnik. Aap, piginnaanerit Guutimit tunissutit suulluunniit tamakkiisumik atorluarniartariaqarpagut uagutsinnullu iluaqutaajuartussanngorlugit pingaartut.

Assersuutigalugu suliffimminik nuannarisaqartup nakuussutini tamanna sanngiiffigilersinnaavaa suliffini pingaarnerpaatileruniuk. Inuk mianersortuuguni nakutikkuminassanngilaq, immaqali mianersungaarami aalajangersinnaassuseqanngilaq. Sulinermi angusaqarluarsinnaaneq ajunngikkaluarpoq, imali angusaqarluarusutsigisoqarsinnaavoq inuttut pissuserisaq sumiginnarneqarluni, taamaappallu misigittaatsumik qajassuussinngitsumillu pissuseqartoqalersinnaavoq nuannaarnerlu annaaneqarluni. Taamaattumik nakuussutitit eqqarsaatigilaariakkit. Atorluartarpigit? Allanut nuannaarutaappat? Jehovap, ’tunissutinik tamanik ajunngitsunik Tunisisup’ ataqqinaatissaanik atortarpigit? (Jâko 1:17) Tamatumunnga atatillugu misissoriartigu nakuussutit suut sanngiissutinngorsinnaasut, aap, mianersunngikkaanni ajoqutaalersinnaasut.

Eqqarsartaatsikkut piginnaanitit silatuumik atortakkit

Silassorissuuneq iluaqutaasorujussuuvoq. Tamannali sanngiiffinngorsinnaavoq imminut tatigivallaaraanni imminulluunniit pingaartippallaaraanni, ingammik allanit qujanarniarfigineqaraanni nersorneqarpallaaraanniluunniit.  Imaluunniit Guutip oqaasia Biibililersaarutillu atuaqqissaartakkavut ilisimaniarpallaarluta isigilersinnaavavut.

Imminut tatigivallaarneq arlalinnik ilisarnaateqarpoq. Assersuutigalugu tamanut ammasumik oqalugiartussaq imaluunniit Teokratiimik Atuarfimmi pisassaqartussaq immaqa piffissaq kingullerpaaq atorlugu piareersarpoq immaqalu Jehova ikiorneqarnissamik qinnuiginaguluunniit. Immaqa ilisimariikkani piginnaaninilu tatigalugit piareersarnani torrutiinnarlugu suliarisinnaasoraa. Piginnaaneqarluarnerata immaqa sivisungaatsiartumik iilaannginnera isertorsinnaagaluarpaa, Jehovamilli tamakkiisumik pilluaqqusaanani anersaakkut siumukarpiarunnaassaaq immaqaluunniit siumukarunnaavilluni. Tamanna piginnaaneqarluarnermik asuliinnartitsinerunngila? — Ussatit 3:5, 6; Jâko 3:1.

Aammattaaq silassorissup Biibili Biibililersaarutillu atuaqqissaartakkani ilisimaniarpallaarluni isigilersinnaavai. Ilisarsinerli taama ittoq ’annerujumassutaasarpoq’, imminullu pingaartippallaalernermik kinguneqarsinnaalluni. Tamanna kristumiut asaqatigiinnerannut ’ineriartuutaassanngilaq’. (1 Korintumiut 8:1; Galâsiamiut 5:26) Inuulli anersaakkut ittunik pingaartitsisup qanorluunniit piginnaaneqartigigaluaruni tamatigut Jehovap anersaavata ikiuinera annertoqqutigalugulu qinnutigisarpaa. Nakuussutaa suli iluaqutaanerulissaaq piginnaaneri ilalernartumik oqimaaqatigiissinneqarlutik asanninnikkut, maniguunnikkut, ilisarsinikkut ilisimassutsikkullu alliartortinneqartuarpata. — Kulorsamiut 1:9, 10.

Piginnaaneqarluarneq aamma sanngiiffiusinnaavoq imminut tatigivallaalernermik kinguneqaruni, tamatumalu takutissavaa anneruniajuinneq amigaatigigipput. Inuit silassoreqisut — taakkuninngalu malinnittut — puiorsimagunarpaat Jehovap ’imminnut ilisimatuutittut qiviarneq ajorai’, qanorluunniit piginnaaneqartigigaluarpata. (Job 37:24) „Qanilaartut ilisimassut pigaat, “ Biibilimi allassimavoq. (Ussatit 11:2) Apustili Paulus silassoreqalunilu ilinniartitaalluarsimavoq, Korinthimiulli ima allaffigai: ’Uanga tikikkassi, qatanngutikka, . . . oqaatsikkulluunniit ilisimassutsikkulluunniit malunnarumallunga pinngilanga . . . najorpassilu sanngiitsuullunga mianersorlungalu uulingaarlunga; oqaatsikkalu oqaluussisarnikkalu ilisimatuut oqaasiinik naalakkuminarsakkanik pinngillat, kisianni anersaaq pissaanerlu misinnartillugit, uppersutsissinnut inuit ilisimassusiat tunngavigeqqunagu kisianni Guutip pissaanera.’ — 1 Korintumiut 2:1-5.

Inuk ilumut ilisimassuseqaruni silarsuup silassorissutsimik iluatsitsinissamillu isiginnittaasianit tammartitaassanngilaq. Inunnit nersorneqarnissaq pigissaarnissarlu noqqaassutiginagit inuunerminik piginnaanerminillu tunisisoq pitsaanerpaanik tunisarpaa. (1 Juánase 2:15-17) Taamaattumik Guutip naalagaaffiata soqutigisai salliutittarpai, taamaalillunilu  „orpik kuunnguup killingani ikkunneqarsimasoq “ assigalugu. Jehovap pilluaqqusinera pissutigalugu, piginnaaninilu inunnguuserisani pissutiginagit, „qanoq iliornermini tamani iluatsitsisaraaq “. — Tussiaat 1:1-3; Matîuse 6:33.

Kristumiussutsip nakuussutitit nakussatsilligit

Kristumiussuseq ima nakuussuteqartigaaq silarsuup matuma isumaliutersuutai tamatumunnga naleqqiunneqarsinnaanatik. Kristumiutut inooriaaseq malikkaanni kingunerissavaa aappaalluarnerulerneq, inooqataalluarnerulerneq, sulisuulluarnerulernerlu. Peqqusersuitsunngornarpoq, ataqqinnittunngornarluni, qanilaartunngornarluni eqiasuitsunngornarlunilu. (Kulorsamiut 3:18-23) Kristumiutullu oqalunnermut ilinniartitaanerup ajoqersorneqarnerullu allanut attaveqarnerput pitsaanerulersittarpaa. (1 Timûtiuse 4:13-15) Taamaattumik tupinnanngilaq kristumiut sulisitsisuminnit akulikitsumik akisussaaffimmik annertuumik tunineqartarmata atorfimminniluunniit qaffatsitaasarmata. Tamatumanittaarli mianersoqqissaanngikkaanni nakuussutit atornerlunneqarsinnaapput. Atorfimmi qaffatsitaaneq imaluunniit atorfimmik neqeroorfigineqarneq ussernartorsiornartoq suliffimmut tunniusimalluinnalernermik kinguneqarsinnaavoq, kristumiut ataatsimiinnerinut imaluunniit ilaquttat ilaginissaannut piffissaarutsitsisinnaalluni.

Kristumiu utoqqaanertaq ilaqutariinnilu ittuusoq Australiamiu aamma niuellaqqissuusimavoq. Angusaqartorujussuusinnaagaluarpoq. Taamaattorli qaffakkiartornissamut nakkaannarsimanngilaq. „Ilaquttakka kristumiutullu kiffartorneq piffissaqarfiginerorusuppakka, “ oqarpoq. „Taamaattumik nuliaralu isumaqatigiissutigaarput piffissaq suliffinnut atugara peqqissaarullugu annikillisitariaqarlugu. Pisariaqanngippat sooq sapaatip-akunneranut ullut tallimat sulissaanga? “ nangippoq. Eqqarsaatigeqqissaakkanik arlaqanngitsunik inuunermini allanngortitsinermigut utoqqaanertap taassuma paasivaa sapaatip-akunneranut ullut pingasut sisamalluunniit sulisaruni ilaquttani pilersorsinnaallugit. Kingusinnerusukkut ataatsimeersuartarfimmut ataatsimiititaliami aamma ataatsimeersuarnerit aaqqissorneqarneranni immikkut kiffartuuteqarnissamik neqeroorfigineqarpoq. Piginnaanini atorluarpai, taamaattumillu nakuussutai ilaqutaasa iluaqutigalugillu nuannaarutigisinnaavaat.

Immikkut pisinnaatitaaffinnut oqimaaqatigiissumik isiginnittaaseq

Angutit kristumiut kajumissaarneqarput ilagiinni kiffartuutit immikkut pisinnaatitaaffiusut anguniaqqullugit. ’Ilagiinnik paarsisuuniartup [imaluunniit ilagiinni kiffartortunngorniartup] suliaq pingaartoq suliariniarpaa.’ (1 Timûtiuse 3:1) Soorluli nakuussutit pillugit eqqaaneqareersoq, aamma kiffartornermi immikkut pisinnaatitaaffinnut neqeroorutigineqartunut atatillugu oqimaaqatigiissaarisinnaaneq ersersinneqartariaqarpoq. Kinaluunniit ima suliassaqatigilertariaqanngilaq Jehovamut kiffartorneq nuannaarutigiunnaarlugu. Kiffartorusuttoq nersornaqaaq, aap, pisariaqartinneqarpoq, Jehovap imminut pilliutigerusunngitsoq iluarinngimmagu; kiffartorusuttorli aamma anneruniajuitsuusariaqarpoq ’isumakkullu peqqissuusariaqarluni’. — Títuse 2:12, NV; sarĸúmersitat 3:15, 16.

Jesus inussiarnersuummat, siuneqassuseqartuummat misiginneqataammallu allaat inuit tunuarsimaarnerpaat najussallugu nuannaraat. Ullumikkuttaaq inuit misiginneqataasut isumassuisullu kajungerineqarnerusarput. Kristumiut ilagiissaanni utoqqaanertat taamaattut asannittut ilassiortullu ’inunnik tunissutaasutut’ assut pingaartinneqartarput. „Tamarmik assigissavaat anorersuarmut oqquiffik sialussuarmullu oqqiffik, inoqajuitsumi kuunnguit kuuttut, nunami imissaaleqisumi qaarsorsuup alanngortaa.“ — Evfisumiut 4:8; Jesaja 32:2.

Utoqqaanertalli piffissaq allanik ikiuinerminnut atortagartik namminnerlu atuaqqissaarnermut, eqqarsaatiginninneqqissaarnermut, qinunermut oqaluussinermullu pisariaqartitatik oqimaaqatigiissaartariaqarpaat. Aappallit aamma ilaquttatik piffissaqarfigisariaqarpaat. Ilaquttat allanit tamanit ilaqutariinni ittuusup saaffigineqarsinnaanera misiginerusariaqarpaat.

 Arnat pikkorissut iluaqutaaqaat

Utoqqaanertat pikkorissut assigalugit arnat anersaakkut ittunik pingaartitsisut Jehovap peqatigiissortaanut iluaqutaaqaat. Arnat amerlanertigut allanik soqutiginninneq inunnguuseraat — pissuseq tamanna Jehovap pingaartippaa ineriartortinnissaanullu kajumissaarluta. Apustili Paulus allappoq: ’Kialuunniit namminissani pinnagu, kisianni allattaaq iluaqutissaat piniarliuk.’ (Filípimiut 2:4) Soorunalimi allanut soqutiginninnissarput killeqarpoq, kristumiummi kialuunniit kissaatiginngilaa ’suginngisanut naalagaaniarnissaq’ oqaluppallaarnissarluunniit. — 1 Pîtruse 4:15; 1 Timûtiuse 5:13.

Arnat allanik amerlasuunik nakuussuteqartarput. Nuliaasoq kristumiu immaqa uiminit silassorinneruvoq. ’Nuliaalluartulli’ Jehovamik mianerinnittup uini ataqqissavaa piginnaaninilu tapersersornissaanut atorlugit unamminagulu. Uiusullu silatuujuguni maniguuttuullunilu nuliani sinngagissanngilaa nakuussutaalu ajuallaatiginagit, pingaartillugilli nuannaarutigissavai. Kajumissaassavaa piginnaanini tamaasa atoqqullugit ilaqutariit ineriartortinnissaannut meeqqallu immisut ’Jehovamik mianerinninnissaannut’ ikioqqullugit. (Ussatit 31:10, 28-30; 1 Moses 2:18) Uiusoq nuliaasorlu taamaalillutik anneruniartuunatillu maniguuttuugunik aappariilluartutut Jehova ataqqissavaat.

Inuttut malunnaateqarluartuugaanni

Inuttut malunnaateqarluarneq naapertuilluassutsimit siulersorneqartoq uummatikkullu iluunngarluni Jehovap piumasaatut iliortoq iluaqutaalluassaaq inuk taanna anneruniajuillunilu maniguuttuuppat. Inuttulli malunnaateqarluarneq aamma sanngiiffinngorsinnaavoq allanut naalagaaniartuugaanni qunutitsisuullunilu. Ingammik kristumiut ilagiissaanni taamaappoq. Kristumiut ataatsimooqatigiinnerminni qasukkarsimasutut misigisinnaasariaqarput, aamma ilagiit utoqqaanertaat ilagigaangamikkik. — Matîuse 20:25-27.

Utoqqaanertattaaq ataatsimooqatigiinnerminni ilorrisimaarsinnaasariaqarput. Ataatsimiikkaangamik aalajangernerminni anersaamit illernartumit, inunnit malunnaateqarluartuniunngitsoq, aalajangiinerminni siulersortittariaqarput. Anersaap illernartup utoqqaanertat ilaat kinaluunniit sunnersinnaavaa, aammattaaq inuusunnerpaaq anneruniajuinnerpaarluunniit. Naak inuttut malunnaateqarluartut isumaqaraluartut isumartik eqqortuusoq, nakuussutimik nununissaat sungiusartariaqarpaat allat soqutiginissaat ilinniarlugu taamaalillutik utoqqaanertaqatitik ataqqigitik takutillugu. (Rûmamiut 12:10) Nalunaajaasup oqaasii 7:16-imi ima mianersoqquneqarpugut: „Iluassuseqarneq ilisimassuseqarnerlu ingasaanniassanngilatit. Soormi imminut aserorniinnassavit? “

Jehovap, ’tunissutinik tamanik ajunngitsunik Tunisisup’, nakuussutini ataqqinangaartut naammalluinnartumik atortarpai. (Jâko 1:17; 5 Moses 32:4) Taanna Ajoqersuisoraarput! Taamaattumik taanna ilinniarfigisigu tamaviaarlutalu piginnaanerit inunnguuserisavut, nakuussutivulluunniit, ineriartortillugit ilisimassutsikkut, asanninnikkut anneruniajuinnikkullu ersersittarlugit. Taamaalilluta allanut nuannaarutaangaarlutalu iluaqutaassaagut. (wE 1/12 99)

[Qupp. 27-mi assiliartaq]

Anersaakkut siumukarsinnaassagutta qinunikkut atuaqqissaartariaqarpugut Jehovalu tatigalugu

[Qupp. 29-mi assiliartaq]

Allanik soqutiginnillutillu anneruniajuitsut iluaqutaasorujussuupput

[Qupp. 26-mi suminngaanneernera]

The Mariners’ Museum, Newport News, VA