Anaanaasup silatuumik oqaaqqissarutai

„Ernera, ataatavit oqaaqqissaarutai naalattarniakkit anaanannillu ilinniakkatit puigornagit!“ — Ussatit 1:8.

ANGAJOQQAATTA naleqangaartumik qiimmassarlutalu ikiorlutalu ajoqersortarpaatigut. Tassa ataata anaanalu marluullutik pineqarput. Ussatit kapitali 31-mi kunngip inuusuttup Lemuelimik atillip ’anaanaata taassumunnga oqaaqqissaarutigisimasai’ oqaluttuarineqarput. Uaguttaaq anaanaasup taassuma silatuumik oqaaqqissaarutai iluaqutigisinnaavavut. — Ussatit 31:1.

Kunngiusumut ajoqersuutigisariaqartut

Lemuelip anaanaa soqutiginartunik apeqquteqarluni aallartippoq: „Qanoq oqarfigissavakkit erniarisimasara asasara, qinnutima tusarneqarneratigut ernertaarisimasara?“ Ilungersorluni pingasoriarluni sassarnerata takutippaa siunnersuutini ernermi tusarnissaa soqutigilluinnaraa. (Ussatit 31:2) Anaanaasup taassuma meeqqani anersaakkut ingerlalluassanersut ernumaneranut ullutsinni angajoqqaanut kristumiuusunut maligassaalluarpoq.

Anaanaasoq peqquteqavissumik ernumassuteqassaaq ernini imerpallaartut inuunerluttullu akornanniittarpat, ’viinni, arnat erinarsornerillu’ akornanni atugaaffiusumi. Lemuelip anaanaa tunuarsimaarnani oqarpoq: „Nukitit asuliinnaq atoqinagit arnanut.“ Tamalikanneq tassaanerarpaa ’kunnginik aseruisartoq’. — Ussatit 31:3.

Ingasattumik imigassartorpallaarneq aamma ulorianartuuvoq eqqumaffigineqartariaqartoq. „Lemuel, inuunermut aseruutissiuutit tamakku kunnginut naleqquttuunngillat,“ mianersoqqusivoq. Kunngi aalakoortuaannaruni qanoq ililluni ajunngitsumik eqqarsaatigilluagaasumillu eqqartuussissava ’inatsisit ileqqoreqqusallu puigornagit qunutitaasunullu tamanut eqqartuussisissaq muminnagu’? — Ussatit 31:4-7.

Kunngili taamatut ileqqoqanngikkuni ’naapertuilluartumik eqqartuussissaaq, nikanartut piitsullu eqqortumik pineqartillugit’. — Ussatit 31:8, 9.

Ullutsinni kristumiut inuusuttut ’kunngiunngillat’, kisianni Lemuelip anaanaata silatusaartumik oqaaqqissaarutai ullutsinni taamanikkutulli pisariaqartigipput — pisariaqarnerunngikkunik. Imigassamik atornerluineq, pujortartarneq kanngunartuliornerlu ullutsinni inuusuttut akornanni atugaasorujussuupput, kristumiullu inuusuttut angajoqqaami ’oqaaqqissaarutigisimasai’ tusassallugit pingaaruteqarpoq.

Nuliaalluartoq

Anaanaasut ernitik inersimasunngulersut siunissami katinnissaat pissusissamisoortumik soqutigisarpaat. Lemuelip anaanaata pissutsit nuliaalluartup ilisarnaata maluginiarnerulerpai. Qularnanngilaq nukappissap apeqqummut tamatumunnga pingaarutilimmut arnap isiginnittaasia tusaaniaruniuk iluaqutigissagaa.

Uss 31 Versi 10-mi ’nuliaalluartoq’ sapanngarissumut qaqutigoortumut naleqangaartumullu assersuunneqarpoq. Soorlu Biibilip nalaani sapannganik nassaarniarneq ilungersunartuuvoq taamattaaq ippoq nuliaalluartussamik nassaarniarneq. Nukappiaq katipallanniaarnarnani silatuumik qinersisinnaanissaminut piffissalertariaqarpoq. Taamaalioruni nuliartaani pingaartinnerussavaa.

Lemuelimut tunngatillugu nuliaalluartoq pillugu ima oqarpoq: „Uiata tamatigorluinnaq tatigisarpaa.“ (Uss 31 Versi 11) Allatut  oqaatigalugu uiusup piumasarisariaqanngilaa nuliaami tamatigut suniaraangami uiminut akuersissummik piniaqqaartarnissaa. Aappariit suliassanik pingaartunik soorunami imminnut isumalioqatigiittariaqarput, soorlu pisiassat annerusut imaluunniit meeqqami perorsarnissaat pillugit. Tamakku pillugit oqaloqatigiilluartarneq ataqatigiilluarnerulersitsissarpoq.

Nuliaalluartoq amerlasuunik suliaqartarpoq. Versini 13-mit 27-mut eqqartorneqarput siunnersuutit najoqqutassiallu nuliaasut ilaquttami iluaqutissaanik sukkulluunnit atorsinnaasaat pillugit. Akit qaffakkiartorneri ilutigalugit nuliaalluartup atorluaaneq sipaarnianerlu ilinniartarpai ilaquttani atisarissaartinniarlugit takujuminartuutinniarlugillu. (Uss 31 Versi 13, 19, 21, 22) Sapinngisaminik inerititanik naatsitsisarpoq, ilaquttamilu nerisassaannut aningaasartuutit sipaarniarlugit pilimaniarnani atortarpai. — Uss 31 Versi 14, 16.

Arnap taamaattup „nerisartagai eqiasunnikkut pissarsiaanngillat“. Sulilluartarpoq illumilu suliassat paarilluarsinnaallugit. (Uss 31 Versi 27) „Nakuussut qiterutigaa“, isumaqarpoq nukersornartunik sulinissaminut piareersimasoq. (Uss 31 Versi 17) Seqernup suli nuinnginneraniit kingusissukkullu unnuuneranut sulilluartarpoq. Soorlulusooq qulleq saaniittoq qaminngisaannartoq. — Uss 31 Versi 15, 18.

Nuliaalluartup pingaartumik anersaakkut ittut soqutigai. Guutimik mianerinnippoq ataqqingaarlugulu pallorfigalugu. (Uss 31 Versi 30) Aamma uini ikiortarpaa meeqqatik taamaaliornissaannut perorsarlugit. Uss 31 Versi 26-mi allassimavoq meeqqani „silatuumik“ ajoqersortarai, ’oqaaseqartarlunilu inussiarnersunik ajoqersuussutinik’.

Uiulluartoq

Lemuel nuliarluassaguni nammineq uiulluartutut isumagisassani naammassisariaqarpai. Lemuelip anaanaata tamakku ilaannik eqqaasippaa.

Uiulluartoq ’nunami utoqqaanertanit’ tusaamalluarneqartarpoq. (Ussatit 31:23) Isumaqarpoq peqqusersuitsuussasoq, tatiginartoq Guutimillu mianerinnittoq. (2 Moses 18:21; 5 Moses 16:18-20) Angut taama ittoq „inuit katisimasarfiini ilisarisimaneqarluarpoq“, angutit nuimasut illoqarfimmi suliassaasut pillugit katersuuffigisartagaanni. Guutimik mianerinnittutut „ilisarisimaneqassaguni“ ingasaassiniartussaanngilaq „nunamilu“ utoqqaanertat suleqatigalugit, „nunamilu“ tassaasinnaasoq najukkami imaluunniit nunagisami ilaani.

Lemuelip anaanaata qularnanngitsumik misilittakkani eqqarsaatigalugit ernermi nuliassaminik pingaartitsinissaanik eqqaasippaa. Angummut taassunga nunarsuarmi allamik erlinnarnerusoqarnavianngilaq. Tusaqqoorneqarsinnaavoq Lemuelip killitsilluni nipaa tamarmillu tutsaanni oqarmat: „Arnarpassuaqaraluarpoq pikkorissunik, illilli tamakkunannga tamanit nallernissaqanngilatit.“ — Ussatit 31:29.

Ersarippoq Lemuel anaanami silatuumik unnersuussutai pingaartikkai. Assersuutigalugu vers 1-imi malugisinnaavarput anaanami oqaasii soorlu nammineq oqaatsimisut eqqaagai. Anaanami perorsaanera tigulluarpaa siunnersuutaalu iluaqutigalugit. Uaguttaaq „oqaaqqissaarutigisimasai“ iluaqutigisinnaavavut tamatumunnga najoqqutassiat inuunitsinni atorutsigik. (wE 1/2 2000)

[Qupp. 32-mi assiliartaq]

Nuliaalluartup „nerisartagai eqiasunnikkut pissarsiaanngillat“