Nipilersorneq Guutimik nuannaartitsisoq

Nipilersorneq nassuiarneqarsimavoq „eqqumiitsuliortaatsit pisoqaanersaralugulu pissusissamisoornersaat“. Soorlu oqaatsinik oqalussinnaassutsip paasinnissinnaassutsillu inuit uumasunit immikkooruteqartikkai, aamma taamaappoq nipilersuutinik atuillunilu nuannaarutiginnissinnaanermut. Tunissutaavoq qaqutigortoq misigissutsinik attuisartoq. Tassaasinnaavoq tusarnaagaq nuannersoq, eqqarsaatinut iluaallaataasoq, tamanilli pingaarnerusumik, Guutimik nuannaarutissiisoq.

BIBILIMI paasivarput Israelikkut inuiaasut nipilersornermik nuannarisaqartut. „Biibilip nalaani nipilersorneq eqqumiitsuliortaasiuvoq akimasoq,“ Unger’s Bible Dictionary allappoq. Erinarsorneq nipilersornerlu Israelikkut ullut tamaasa pallorfiginninneranni pingaaruteqarluinnarsimavoq, kisianni erinarsorneq pingaarnerpaasimavoq.

Kunngi David tupermi naalaffiliami ernermi Salomonip naalaffiliaata atoqqaartinnera sioqqullugu „erinarsornermi siulersuisussanik“ Levikkut akornanni toqqaavoq. (1 Israelikkut 6:31, 32) Angerutsip illerfia, Jehovap najuunneranik eqqaasitsisuusoq, Jerusalemimut tikiunneqarmat, Davidip Levikkut ilaat ’Jehova qutsavigalugulu erinarsorlunilu unnersiutiginissanut eqqaasitsisussatut’ atorfinitsippai. Erinarsorlutik unnersiutiginninnertik nipilersuutinik ingiortarpaat „kukkilattarissanik sianaanillu, . . . sianaartunillu, . . . sulluartaatinik“. Angutit taakku Jehovap qutsaviginissaanut ’aqqisigut taallugut qinerneqarsimapput’, isumassuinera naassaanngimmat’“. — 1 Israelikkut 16:4-6, 41; 25:1

Versip ilaa uteqattaartagaq „[Jehovap] nallittuinera atavoq naassaanngitsumut“ tussiaatini amerlasuunik atorneqarpoq, Biibilip atuagartaani pingaartumik nipilersornermut atassuteqartinneqartumi. Assersuutigalugu Tussiaat 136-mi versit 26-t tamarmik taamatut naaneqarput. „Uteqattaartagaq taanna naatsoq erinarsornermut piukkunnarluartuuvoq.“ Biibilimik misissueqqissaartartoq oqarpoq. „Ataasiarluni tusarsimagaanni, eqqaamajuminartorujussuuvoq.“

Tussiaatit qulequtaasa takutippaat nipilersuutinik atuinerup siammarsimasuunera.  Tussiaat 150-imi taaneqarput sulluartaatit, kukkilattarissat, sianaat, qilaatit, qarlortaatit avilortullu taakkua saniatigut nipilersuutit noqartillit. Kisianni tussiaammi kajumissaarummi pingaarnerpaasimavoq nipip atorneqarnissaa. Tussiaat 150 Vers 6-imi allassimavoq „Anerneqartut tamarmik [Jah] erinalimmik unnersiutigissavaat! [Jah unnersiutigisiuk! NV]“

Nipilersornikkut misigissutsit takutinneqarsinnaapput, Biibilillu nalaani eqqarsaatikkut aliasuutit erinarsornikkut ersersinneqartarput. Erinarsuutit taamaattut Israelikkut nipilersoriaasiannut ilaasut killeqarput. Isumaqartoqarpoq upputit rytmimut atasumik, assigiiginnangajammik, erinnersaartumik nipeqarluni atorneqartartut. Taamatut erinarsorneq taamallaat toqup ajunaarnerullu aliasuutigineranut atatillugu atorneqartarpoq. Tamanna qinerlerfissiami Indsigt i Den Hellige Skrift-imi * atuarneqarsinnaavoq.

Jesusip ajoqersugaasalu aalajaatsut Jesusip toqunissaa sioqqullugu unnukkut Jehova unnersiutigalugu erinarsorput, qularnanngitsumik tussiaatit hallelujaarutit oqaasertaannik atuaallutik. (Tussiaat 113-118) Jesusip ajoqersugai nakussatsinneqarsimassapput Naalakkamik Ajoqersortimillu annaanissaa akuerisinnaalerlugu, aammattaaq pinngortitarsuarmi qutsinnerpaalluni Oqartusaasup Jehovap aalajallutik kiffartuuttuaannarnissaanik aalajangernerat nakussatsinneqarsimassaaq, tallimariarlutik uteqattaartagaq erinarsuutigigunikku: „Nallittuinera atammat naassaanngitsumut.“ — Tussiaat 118:1-4, 29.

Efesusimi Kolossæmilu kristumiut siulliit erinarsuutigisarpaat Guutimut ’erinalissiat qujaniutillu’ (eqqortumik „tussiutit unnersiutiginnissutit“). Aammattaaq eqqaaneqartarput ’eriniukkat anersaap pii’ uummatimikkut erinarsortagaat. (Evfisumiut 5:19; Kulorsamiut 3:16) Qanertik erinarsorluni unnersiutiginninnermut oqaatsinillu Guutip unnersiutigineranut atorpaat. Jesus oqarsimavoq: ’Uummatimmi ulikkaarutaanit qaneq oqaluttaraaq.’ — Matîuse 12:34.

Nipilersuutit Guutip iluarinngisai

Nipilersuutit Biibilimi taaneqartut tamarmiunngitsoq Guutimut nuannaarutaapput. Sinajip Qaqqaani pisimasut eqqarsaatigikkit, tassani inatsisit Mosesimut tunniunneqarput, Inatsisit Qulit ilanngullugit. Qaqqakkut ammukartilluni Mosesip suna tusaavaa? „Ajugaasut ajorsartulluunniit niilianerisa nipiginngilaat, qittattunukua nipaat.“ Taassaavoq nipilersorneq guutipilussiornermut atassuteqartoq, Guutip iluarinninnginneranik pilersitsisoq peqataassut 3000-it missaaniittut toqunerannik kinguneqartoq. — 2 Moses 32:18, 25-28.

Naak inuit erinniorsinnaagaluartut, nipilersorlutik nipilersuukkallu assigiinngitsut tamaasa nuannaralugit, imaanngilaq nipilersukkat tamarmik Guuti nuannaartikkaat. Sooq taamaanngila? Apustili Paulus kristumiuusoq nassuiaavoq: ’Tamarmik ajortuliorput Guutimi nersornaammik ajorsarlutik.’ (Rûmamiut 3:23) Guutipilussiortut kinguaassiorluarnissamut ileqqulersuutaat, tarnip toqusuitsuuneranik ajoqersuut Mariamillu „Guup anaanaatut“ unnersiutiginninneq amerlanertigut nipilersugassianut tunngaviusutut atorneqartarput. Taamatulli isumaqarnerit ileqqulersuutillu sallusuissutsip Guutianut narrunarsaataapput, Biibilimi Guutip oqaasiani isumassarsiarititaasumi saqqummersinneqartunut akerliugamik. — 5 Moses 18:10-12; Hesekiel 18:4; Lúkarse 1:35, 38.

Silatuumik nipilersukkanik toqqaagit

Nipilersukkanik amerlaqisunik qinigassaqarneq paatsiveerussutaasinnaavoq. Cd-it puuisa saqqaat imaatut ilusiligaapput pisiniartut nipilersukkanik immiussanik sunilluunniit pisisussanngorlugit. Kisianni Guutip nuannarisaanik iliussagaanni, mianersortariaqarpoq silatusaarlunilu taallat nipilersuukkallu isummanik eqqunngitsumik upperisarsiornermi isummanik sunnerneqarsimasut, imaluunniit inuunerlunnermik anersaapilussiornermillu pingaartitsisut ingalassimallugit.

Albert, Afrikami ajoqersuiartortitaasimasoq, oqaluttuarpoq tassani pattannissaminut periarfissani killeqartorujussuusimasut. Kisianni nuutit nassatani amerlanngitsut uteqattaarlugit tusarnaartarsimavai. Maanna Albert nunaminut utersimavoq, tassani nakkutilliisutut angalalluni ilagiit tikeraartarpai. Nipilersukkanik tusarnaarnissaminut piffissakitsuararsuuvoq. „Erinniortuni Beethoven tusarnaarusunnerusarpara,“ oqarpoq. „Ukiut ingerlaneranni erinniarsuinik,  tusarnaartitsissusiaanik, sonatiliaanik sisamaattarissanillu tusarnaagassiaanik immiussat katersorsimavakka.“ Nipilersukkat taakku tussarnaarnerat nuannaarutissarsiffigisimaqaa. Soorunami tamatta immikkut assigiingitsunik nuannarisaqarpugut, kisianni kristumiutut Paulusip siunnersuutaa eqqaamasariaqarparput: ’Taamaattumik nerigaangassiluunniit imeraangassiluunniit sugaangassiluunniit Guuti naalannarseqqullugu pisartaannaritsi.’ — 1 Korintumiut 10:31.

Tunniulluinnarluni inuuneq nipilersorneq ilaatillugu

Susiep meeraagallaramili nipilersorneq nuannaraa. Oqaluttutarpoq: „Arfinilinnik ukioqarlunga pattattalerpunga, qulinik ukioqarlunga agiartalerlunga, kukkilattariartalerlungalu aqqaneq marlunnik ukioqarlunga,“ Kingusinnerusukkut Susie Royal College of Music-imi Londonimiittumi kukkilattariarnermut ilinniarpoq. Ukiut sisamat kukkilattariarnermut tusaamasaasumi Spaniamiumi ilinniartuuvoq, sulilu ukioq ataaseq Parisimi nipilersornermut ilinniarfimmi, nipilersornermut bachelorgradimik angusilluni kukkilattariarnerminut pattaannermullu ilinniarnerminut nersornaatinik pissarsilluni.

Susie Londonimi Jehovap Najunaajaasuisa ilagiivini ilaasalerpoq. Tassani Jehovap Nalunaajaasuisa qanoq imminut soqutiginninnermik asanninnermillu piviusumik takutitsinerat misigivaa. Jehovamut asanninnera ineriartuaarpoq, kiffartuunnissaanillu kissaatigisaqangaarnerata taamaaliornissaanut ikiorlugu aqqutissiuuppaa. Tamatumalu kinguneraa Guutimut tunniulluinnarnera kuisinneralu. „Nipilersortartup inuunermini nipilersorneq pingaarnerutippaa, taamaattumik arlaannik pingaarnerutitsinermik eqqarsat uannut nutaajunngilaq,“ Susie oqarpoq. Jesusip peqqussutaa Guutip naalagaaffianik iivangkiiliup oqaluussissutigeqarnera peqataaffigeqqullugu naalallugu peqataaleriartuaarnermini, tusarnaartitsinissaminut piffissakinnerulerpoq. — Matîuse 24:14; Mákorse 13:10.

Massakkut nipilersornermut piffisaqarpiarunnaarami qanoq ippa? „Ilaannikkut sungiusarnissannut piffissaarunnera isummakkut naammaginngeqqajaasarpara,“ nassuerpoq, „kisianni suli nipilersortarpunga nipilersornerlu nuannareqaara. Nipilersorneq Jehovamit tunissutaavoq. Massakkut tassunga kiffartorneq inuunermi pingaarnerutikkakku nipilersorneq nuannaarutigineruara. — Matîuse 6:33.

Guutip unnersiutiginissaanut nipilersorneq

Jehovap Nalunaajaasui allat 6 millioningajaat peqatigalugut Albertip Susiellu akuttoqatigiimmik erinarsornermik nipilersornermillu Jehova unnersiutigisarpaat. Jehovap Nalunaajaasuisa ataatsimiinnerini, nunani 234-ni naalagaaffilersaarfiini ingerlanneqartuni, ajornanngikkaangat erinarsorluni aallartillugillu naggaserneqartarput. Nipilersukkat tusarnersut sallaatsut sakkortuullu Biibili tunngavigalugu erinarsuutinut ingiuisoralugit Jehova unnersiutigineqartarpoq.

Najuuttut tamarmik uummammit pisumik Jehovap isumassoraatigut erinarsoqataaffigaat (erinarsuut nr. 44). Jehovamut qujaniut erinarsorneqarpoq (erinarsuut nr. 190). Kristumiutut qatanngutigiinnermut atassuteqartut nuannaarutit akisussaaffiilu, kristumiutut inooriaaseq kristumiutullu piginnaassutsit erinarsuutigineqarput. Erinarsornerup nuannaarutiginera suli annerulerpoq erinarsuutit assigiingitsunik nipilersuutigineqarsinnaammata, Asiami, Australiami, Europami imaluunniit Amerikami avannarlermi kujallermiluunniit erinniorneqarsimanersut apeqqutaalluni. *

„[Jehova] erinalersorfigisiuk erinniukkamik nutaamik, [Jehova] erinalersorfigisiuk nunamiut tamassi!“ Tussiaasiortup nalaani kunngimik unnersiutiginninnermi misinnangaartumi oqaatsit taamatut aallartipput. „Inuiaat allamiut oqaluttuussigit naalannassusianik, inuiaqatigiillu tamaasa tupinnartuliaanik.“ (Tussiaat 96:1-3) Jehovap Nalunaajaasui taamaaliorput, qaaqquaatsillu peqatigalutik erinarsorluni unnersiutiginninneq taanna peqataaffigeqqullugu. Naalagaaffilersaarfiannut tikilluaqqusaavutit, tassani Jehova nililersuummik nuannarisaanik unnersiutiginissaa ilinniarsinnaavat. (wE 1/6 2000)

[Quppernerup ataani ilanngussat]