„Uummatit paariuk“

JEHOVA pruffiitimut Samuelimut oqarpoq: „Inuit pingaartitaat uanga pingaartitarinngilakka. Inuimmi isiminnut saqqumisuinnaat isigisarpaat, [Jehovalli] inuup uummataa isigisarpaa.“ (1 Samuel 16:7) Tussiaasiortup Davidip aamma uummat assersuutaasoq pivaa erinarsorami: „Uummatiga illit [Jehova] misissuiffigigaluarukku paasisassarsiorfigalugulu unnuakkut, allaammi innermik misilikkaluarumma maajunnartunik uanni nassaassaqanngilatit.“ — Tussiaat 17:3.

Aap, Jehovap uummatitta ilorpiaa qimerloortarpaa qanoq ittorpiaanersugut paasiniarlugu. (Ussatit 17:3) Taamaattumik pissutissaqarluarluni Salomon, qanga Israelimi kunngiusimasoq, ima siunnersuisimavoq: „Paarisassannit tamanit annermik uummatit paariuk inuuneq tassannga aallaaveqarmat.“ (Ussatit 4:23) Uummat assersuutaasoq qanoq ililluta paarisinnaavarput? Ussatit kapitaliisa sisamaanni akisut nanisinnaavarput.

Ataatap oqaaqqissaarutai tusaaniarsigik

Ussatit kapitaliisa sisamaat ima aallartippoq: „Qitornakka! Ataatassi oqaaqqissaarutai tusaaniarsigit, tusarnaarniaritsi paasisaqalersinnaaqqullusi. Ilissinnut ilisimasassiissutikka ajunngitsuupput, ajoqersuussutikka maleruanngitsoorniaqinasigit!“ — Ussatit 4:1, 2.

Meeqqat inuusuttuaqqallu uani siunnersorneqarput angajoqqaamik Guutimik mianerinnittut tunngaveqarluartumik ilinniartitsinerat, ingammik ataatamik siunnersuutai, tusarnaaqqullugit. Biibili naapertorlugu ataataasoq ilaquttami timikkut anersaakkullu pisariaqartitaanik matussusiisussaavoq. (5 Moses 6:6, 7; 1 Timûtiuse 5:8) Taamatut siunnersorneqarnani peroriartorneq ineriartornerlu inuusuttuaqqanut oqitsuinnaanngilaq. Pissutissaqarluarpoq ataatap oqaaqqissaarutai ataqqinnittumik ilassissallugit.

Inuusuttummi siunnersuisinnaasumik ataataqanngikkunik? Assersuutitut taasinnaavarput aqqanilinnik ukiulik Jason, sisamanik ukioqarluni ataataaruttoq. * Kristumiup utoqqaanertap aperimmani suna isumakuluutigineruneraa, Jason nangaanani akivoq: „Ataataqanngilanga, ilaannikkullu nikalluutigisaqaara.“ Inuusuttulli siunnersuisinnaasumik ataataqanngitsut asannittumik siunnersorneqarsinnaapput. Jason allallu taamatut atugallit ilagiinni utoqqaanertanit kristumiunillu inersimalluartunit allanit ataatarpalaartumik siunnersorneqarsinnaapput.  —Jâko 1:27.

Salomonip nammineq ilinniartinneqarnini eqqaallugu ima nangippoq: „Uangattaaq ataatama erneraanga, anaanama naalungiaa pisuaalu.“ (Ussatit 4:3, NV) Kunngip peroriartornini nuannersumik kingumut eqqaannguatsiarpaa. Salomon inuusuttuulluni ataataminut, Davidimut, qanimut asannittumillu attaveqarsimassaaq, oqaatigineqarmammi ’ataataata ernerigaa’ isumaqarpoq ernerulluarniarluni iliuuseqarsimasoq ataatami siunnersuutai uummammiuliullugit. Aammattaaq Salomon ’pisuaasimavoq’, qujaginerpaasaat imaluunniit asanerpaasaat. Meeqqat angerlarsimaffimmi asannittumi peroriartornissaat meeqqallu inersimasullu akornanni ammasumik attaveqatigiinnissaat pingaaruteqangaarpoq.

Ilisimassummik silassorissusermillu pissarsigit

Tamatumunnga tunngatillugu Salomonip ataatami siunnersuutai asannittut eqqaamavai:  „Ataatama ajoqersorpaanga ima oqarluni: ’Oqaatsikka aalajangiunniakkit, inassutikka maleruarniakkit, taava inuuginnassaatit! Ilisimassummik pissarsiniarit silassorissusermillu pisillutit, ilinnut oqaaserisakka puigorniaqinagit tununnagillu. Ilisimassut iperarnaveersaaruk paarsisigissagakku, nuannariuk sernissortigissagakku. [Ilisimassut pingaarnerpaavoq, NV.] Ilisimassut pigilerumagukku pisiariuk, silassorissuseq pissarsiariniaruk pigisatit tamaasa akigalugit!’“ — Ussatit 4:4-7.

Sooq ilisimassut ’pingaarnerpaava’? Ilisimassut tassaavoq ilisimasanik paasisanillu kinguneqarluartumik atuisinnaaneq. Nammineq misilittakkat, isigisat atuakkalluunniit tunngavigalugit ilisimalikkat ilisimassummut tunngaviupput. Tamanna eqqortumik atorsinnaanngikkutsigu, ilisimasaqarnerput nalikitsuararsuussaaq. Biibili atuagassiallu, ’inussiaq aalajaallunilu silatooq’ aqqutigalugu pilersinneqartut, akuttoqatigiimmik atuartarnissaat naammanngilaq. Ilinniakkavut atorniarlugit iliuuseqartariaqarpugut. — Matîuse 24:45.

Aammattaaq silassorissinissaq pineqartullu eqqortumik paasiniarnissaa pingaaruteqarpoq. Pineqartup immikkuualuttortaasa imminnut atassuteqarnerat takusinnaasariaqarparput, pineqartorlu ataatsimut isigisinnaasariaqarlutigu. Eqqortumik paasisaqarsimanngikkutta pisimasut piviusumik imminnut qanoq ilillutik ataqatigiinnersut qanoq ililluta nalilersinnaavavut, taamaalillutalu siuneqassuseqalerluta naliliisinnaassuseqalerlutalu? Aap, naatsorsuisinnaassagutta eqqortumillu inerniliilluta pisariaqarpoq eqqortumik paasisimasaqarnissaq silassorinnissarlu. — Daniel 9:22, 23.

Salomon ataatami oqaasii issuarlugit nangippoq: „Ilisimassut pingaartiguk, taava akitsisissavaatit; pakkusimagukku ataqqinarsisissavaatit. Nigaliliaq kusanartoq atitissavaa niaqunnut kusanangaartumillu niaqoruserlutit.“ (Ussatit 4:8, 9) Ilisimassutip Guutimeersup taassuminnga pakkussisoq illersortarpaa. Allaat ataqqinarsisittarpaa kusatsisittarlugulu. Taamaattumik ilisimassuseqalerniarnissamut pissutissaqarluarpoq.

„Perorsarneqarneq tamatigut aalajangiussimaniaruk“

Israelikkut kunngiata ataatami unnersuussutaanik issuaanini nangippaa: „Ernera, oqaatsikka ilassiniakkit, taava ukiorpassuarni inuussaatit. Ilisimassummut aqqummik  ajoqersuutissavakkit iluartullu ingerlaviisigut ingerlatillutit. Pisukkuit isikkatit akornusersortissaqassanngillat, arpakkuillu naakkiutinngisaannassaatit. [Perorsarneqarneq tamatigut aalajangiussimaniaruk, annaanaveersaarniaruk, NV] ilinnut inuussutaammat.“ — Ussatit 4:10-13.

Salomon ernerulluarami asannittumik perorsarneqarnerup aamma oqaaqqissaarisup ilitsersuisullu pingaaruteqarnera paasisimassavaa. Oqimaaqatigeeqqissaartumik perorsarneqanngikkutta qanoq ililluta ilimagisinnaavarput anersaakkut inersimallualernissarput inooriaaserinnerulernissarpulluunniit? Kukkussutivut ilinniarfiginngikkutsigik imaluunniit eqqarsaatipiluit iluarsinnginngikkutsigik anersaakkut ineriartornerput annikissaaq. Naleqquttumik perorsarneqarnerup Guutimik mianerinninnerulersissavaatigut „iluartullu ingerlaviisigut“ ingerlatissinnaalluta.

Aamma perorsarneqarnerup allatut ittup ’ukiorpassuarni inuutissinnaavaatigut’. Suup? Soorlu Jesus oqarsimasoq: ’Minnikkut ilumoortoq amerlasuutiguttaaq ilumoorpoq, minnikkullu ilumuunngitsoq amerlasuutiguttaaq ilumuunngilaq.’ (Lúkarse 16:10) Annikitsuni imminut perorsarutta, annertunerusuni, immaqa inuunermik naleqarsinnaasuni, taamaaliornissarput ajornannginnerussanngila? Assersuutigalugu imminut perorsarluta ’pileritsaallugu arnaq isiginaveersaarutsigu’ kanngunartuliornissarput ilimanannginnerussaaq. (Matîuse 5:28) Najoqqutassiaq soorunami arnanut angutinullu atuuppoq. Imminut perorsarutta ’eqqarsaatillu tamaasa tigusatut kiffartortillugit’, oqaatsitsigut iliuutsitsigullu sualuttumik unioqqutsitsinissarput ilimanannginnerussaaq. — 2 Korintumiut 10:5.

Ilumoorpoq perorsarneqarneq amerlanertigut ilassiuminaattarmat, immaqalu akornutigalugu misigisarpugut. (Eprîarit 12:11) Kisianni kunngip silatuup neriorsoqqissaarpaatigut ’perorsarneqarneq tamatigut aalajangiussimagutsigu’ ingerlavik siumukartitsisoq qinissagipput. Aap, ’perorsarneqarneq tamatigut aalajangiussimagutsigu’ inuunerup aqqutaani aalajaalluta orlunatalu ingerlajuarsinnaavugut, soorlu arpattartoq sungiusarluarsimasoq sukkanerpaaffimmini orlunani ajoqusernaniluunniit arpassinnaasoq. Soorunami aqqut eqqortoq peqqissaarluta qinertariaqarparput.

„Iluaatsut ingerlavii“ nigorsimakkit

Salomonip ilungersorluni ima mianersoqquaatigut: „Iluaatsut ingerlavii ingerlaviginaveersaakkit ajortullu aqqutaat atuallannagit. Tamakku ingalassimaniakkit nigorsimallugillu, tunukkit atuarnagillu avaqqullugit ingerlallutit! Iluaatsut sinilinngisaannarput ajortumik ilioreersimatinnatik; innangaannartarput sinissaarullutik orlutitaqarsimanngikkaangamik. Nerisaammi tassaavoq ajussuseq, viinnilu imigaat tassaavoq nakuuserneq.“ — Ussatit 4:14-17.

Ajortut Salomonip ingerlaveqatigeqqunngisai kanngunartuliornermikkut inuuginnartarput. Taakkununnga ajortuliorneq nerinertut imernertullu ippoq. Sinissinnaanngillat ajortulioqqaartinnatik. Inuttut pissusiat ajortuuvoq. Taamaattut ilagisarutsigik uummaterput paarilluarsinnaanerparput? ’Iluaatsut ingerlaviitigoorneq’ ullumikkullu aliikkusersuinerit nakuusernermik ilisarnaataanik imminut ulorianartorsiortikkutta sianiitsuliornerussaaq. Qamanna pisumik misiginneqataaniarsaritigaluni nakuusertunik soqqusaatsunik aliikkusersortittoqarsinnaanngilaq.

Qaamasumiiginnarit

Salomonip aqqummik assersuunni nangippaa: „Iluartulli aqqutaata assigaa ullaap qaammalernera qaammarissiartortoq ulluuneratut  qaamatigilerserluni.“ (Ussatit 4:18) Biibilimik atuaqqissaarneq ajoqersuutaanillu maleruaalerneq ullaarorluni pisuttuarnermut assersuunneqarsinnaavoq. Unnuami qilaap taarnera qaammariartuleraangat takusaqarniarneq ajornakusoortarpoq. Qaammariartortillugu nunap isikkua arriitsumik erseriartortarpoq. Seqineq qullaraangat suut tamaasa erseqqissumik takusinnaasarpavut. Aap, Biibili qasusuilluta peqqissaartumillu atuaqqissaartuarutsigu sallusuissut paasiartuaassavarput. Pisariaqarluinnarpoq uummatitta anersaakkut ittunik inuussutissalersornissaa, eqqunngitsunik tunngavilersuutinut illersussagutsigu.

Biibilimi siulittuutit isumaat aamma saqqummersinneqariartuaarput. Siulittuutit Jehovap anersaavanit illernartumit qaammaqquserneqariartortillugit silarsuarmilu pisartunit imaluunniit Guutip innuttaasa oqaluttuarisaanerini pisunit eqquutitinneqariartortillugit paasinerujartussavavut. Utaqqikatalluta siulittuutit eqquunnissaat isumaliutersuutiginagit qaamanerup ’qaammarissiartornissaa’ utaqqisariaqarparput.

Guutimimi qaammaqqutaatigoorumannginnermikkut siulersuineranik itigartitsisut? „Inupiluit ingerlaviat taartuinnarsuuvoq,“ Salomon oqarpoq. „Naakkiuffiusinnaasut isiginngilaat.“ (Ussatit 4:19) Guutiitsut taartumi suna naaffigalugu sianiginagu orlusutut ipput. Guutiitsut iluaatsuliornitik ingerlalluaatigigaluarunikkilluunniit iluatsitsinerat sivikitsuinnaasarpoq. Tussiaasiortup ima allaatigai: „Aqqutinut quasartunut pisissavatit, ajunaarnermut ajattussavatit.“ — Tussiaat 73:18.

Sissuertuartarit

Israelip kunngia nangippoq: „Ernera, oqaatsikka naalaarniakkit, siutit manillugu oqaasissakka tusaaniakkit! Aanngaanaveersaarniakkit uummativillu ilorpiaani paaralugit! Tamakkumi nanisisiminnut inuussutaapput timimullu tamarmut peqqissaataallutik. Paarisassanit tamanit annermik uummatit paariuk inuuneq tassannga aallaaveqarmat.“ — Ussatit 4:20-23.

Salomonip nammineq maligassiaata takutippaa uummatip paarinissaanik siunnersuutip malinnissaa qanoq pingaaruteqartigisoq. Ilumoorpoq inuusuttuunermini ataataminut ernerulluarsimasoq inersimasutullu ukiorpassuarni Jehovamut aalajaassimasoq. Biibilimili oqaluttuarineqarpoq: „Tassa Salomo utoqqalimmat nuliaasa uummataa guutinut allanut saatsippaat ataatani  ilumoorsusiatigut assiginagu [Jehovamut] Guutiminut uummammigut iluunngarluni ilumoorunnaarsillugu.“ (1 Kunngit 11:4) Mianersortuaannanngikkaanni uummatiginnerpaarluunniit ajortuliornissamut ussernartorsiorsinnaavoq. (Jeremia 17:9) Guutip oqaasiani eqqaasitsissutit ’uummatitta ilorpiaanilersillugit’ puiuikkiuttariaqarpavut. Aamma unnersuussutit Ussatit kapitaliisa sisamaanniittut pigiliuttariaqarpavut.

Uummativit qanoq innera misissortaruk

Uummatitta assersuutaasup illersorniarnera qanoq ingerlava? Qanoq ililluta uummatitta assersuutaasup qanoq innera paasisinnaavarput? ’Uummatimmi ulikkaarutaanit qaneq oqaluttaraaq’, Jesus oqarpoq. (Matîuse 12:34) Aamma oqarpoq: ’Uummammit pisarput isumapiluit, toqutsinerlu arnaaneqarnerlu uersaanerlu tillinnerlu nalunaajaatillu sallusut mitalliinerillu.’ (Matîuse 15:19, 20) Aap, oqaatsivut iliuutsivullu uummammiutsinnik takutitsilluarsinnaapput.

Salomonip naleqquttumik ima oqaaqqissaarpaatigut: „Salluliorluni oqalunneq ingalassimaniaruk, qarlutillu atunngisaannakkit peqquserluttumik oqalunnermut! Isitit sammisikkit siumuinnaq, siuninniittut alartaasikkit! Aqqutit atuagassatit nakkutigilluarniakkit, ingerlaviillu toraarsimatittuarniaruk anguniakkavit tungaanut! Talerpimmut saamimmulluunniit sangoqinak, isikkatit ajortumit nigorsimatikkit.“ — Ussatit 4:24-27.

Salomonip oqaaqqissaarutaa naapertorlugu oqaatsivut iliuutsivullu qanoq takutitsinersut eqqarsaatigisariaqarpavut. Uummaterput paarissagutsigu Guutimullu iluarisaajumagutta peqquserluttumik imaluunniit ’tunussisutut’ oqalunnaveersaartariaqarpugut. (Ussatit 3:32) Taamaattumik oqaatsivut iliuutsivullu qanoq takutitsinersut qinunikkut eqqarsaatigeqqissaartariaqarpavut. Sanngiiffigisatsinnik sumilluunniit aaqqiiniarnitsinni Jehovamut ikioqqusa. — Tussiaat 139:23, 24.

Taamaattumik siumuinnaq isiginissaq pingaaruteqarpoq. Ataatatta qilammiusup uummatikkut iluunngarluta kiffartuunnissaanik toraagarput isigiuartigu. (Kulorsamiut 3:23) Qanortoq aqqutigisanni tamani Jehovap pilluartikkilisit, qanortorlu pilluaqqungaarlisit iluartut ingerlavigiisigoortillutit ’uummatip paarinissaanik’ siunnersuut isumassarsiarititaasoq eqqumaffigigakku. (wE 15/5 2000)

[Quppernerup ataani ilanngussaq]

[Qupp. 22-mi issuagaq]

Aliikkusersuutit nakuusernernik salliutitsisut nigorsimaniarpigit?

[Qupp. 21-mi assiliartaq]

Misilittagallit siunnersuutaat iluaqutigikkit

[Qupp. 23-mi assiliartaq]

Perorsartinneq siumukarnissamut akornutaanngilaq

[Qupp. 24-mi assiliartaq]

Biibili eqiasuillutit atuartuaruk