’Ullut kingumut iluarsivissat’ qanillipput!

Jesusip qilaliarnissaa sioqqutilaarlugu ajoqersugaasa ima aperaat: ’Naalagaq, taamaalisukkut naalagaaffik Israelikkunnut kingumut iluarsisissaviuk?’ Jesusip akissutaani erserpoq Naalagaaffiup piviusunngornissaanut piffissangaatsiaq ingerlajumaartoq. Piffissami tamatumani ajoqersukkat annertuumik suliassaqarput. Jesusip ’nalunaajaasigiumaarpai Jerusalemimi Judiamilu tamarsuarmi Samariamilu nunallu isuanut allaat’. — apustilit suliait 1:6-8.

SULIASSIISSUT tamanna ullualuit, sapaatip-akunnialui qaammataaluilluunniit ingerlaneranni naammassineqarsinnaanngilaq. Ajoqersugai nangaanngivillutik oqaluussilerput, pilerseqqitsinissarli soqutigiunnaanngilaat. Tamanna pillugu apustili Peter inuppassuarnut Jerusalemimi katersuussimasunut ima oqaluussivoq: ’Allamik isumataaritsi saanniarlusilu, ajortisi piiarneqaqqullugit, ullut inuummarissiviusut [Jehovap] kiinaanit nalliuteqqullugit, aallarteqqullugulu ilissinnut oqaluussissutigeriigaq Kristus Jesus; taassuma qilak inigissagaa ullut suut tamarmik kingumut iluarsivissat nalliutserlugit, tamakku Guutip itsarsuarmit pruffiitimi iluartut qarnisigut oqaatigai.’ — apustilit suliait 3:19-21.

’Ullut kingumut iluarsinerisigut’ Jehovamit nalliutissapput ’ullut inuummarissiviusut’. Pilerseqqitsinissaq siulittuutigineqartoq marlunnut immikkoortinneqarluni pissaaq. Siullermik nutaanngornartumik anersaakkut ittumik kingumut iluarsiisoqassaaq, maannakkut pisumik. Taava nunami paratiisivimmik pilersitsisoqassaaq.

Ullut kingumut iluarsivissat aallartipput

Apustili Peterip Jerusalemimi inuppassuarnut uparuussineratulli, Jesusip ’qilak inigissavaa’ ullut kingumut iluarsivissat nalliutserlugit. Jesus kunngitut pissaneqalermat Guutillu kunngiutitaatut naalakkersuilermat, 1914-imi pisumi, ullut pilerseqqitsiffissat aallartipput. Peterip siulittuutigisimavaa Jehovap erni ’aallartissagaa’, tassa ima paasillugu Taassuma Guutip siunertaani qitiusumik inissisimanini Jesusimut tunniutissagaa. Biibilip oqaasii assersuutaasut atorlugit pisut ima allaatigineqarput: ’Ernivorlu [Guutip qilammi peqatigiissortai] ernertaarluni, taassuma [Guutip naalagaaffiata Jesus Kristusimik kunngillip] saviusumik ilitsersuuteqarluni inuiaqatigiit tamaasa paarissagai.’ — sarĸúmersitat 12:5.

Inuiaqatigiilli Kristusip naalakkersuineranut naalatsigitikkusussimanngillat. Akerlianik innuttai nunamiut ilumoortut, ullumikkut Jehovap Nalunaajaasuisut ilisimaneqartut, mitaatigaat. Aqqutissiuisimittulli, apustilitut, nangaanngitsigalutik ’Jesusip nalunaajaataanik’ nalunaajaalersimapput. (sarĸúmersitat 12:17) Suliaannut assortuineq nunarpassuarni malunnarsisimavoq. Brooklynimi, New Yorkimi, Napasuliaq Alapernaarsuiffiup Peqatigiiffiata qullersaqarfiani akisussaasut 1918-imi eqqartuussivimmut eqqunngitsumik unnerluutigineqarput naapertuilluanngitsumillu sivisuumik  parnaarussassanngortinneqarlutik. Sivisungaatsiartumik nalitsinni ’nunap isuanut allaat’ nalunaajaanissaq naammassineqarsinnaanngitsutut isikkoqarsimagaluarpoq. — sarĸúmersitat 11:7-10.

1919-imili qullersaqarfiup sulisui parnaarussivimmiittut iperagaapput kingusinnerusukkullu unnerluutinit tamanit pinngitsuutitaallutik. Piffissaq asiutinnagu anersaakkut ingerlatitseqqinniarlutik aallarteqqipput. Taamanimiilli Jehovap innuttaasa anersaakkut atugarissaarneq naleqanngitsoq nuannaarutigilersimavaat.

Inuit inuiannit tamaneersut Jesusip ajoqersukkaminut peqqussutaanik maleruaasinnaaqqullugit oqaluussineq annertooq aallartinneqarpoq. (Matîuse 28:20) Inuit uumasutut, qaasuttutut, pissuseqarsimagaluartut, allanngorluinnarsimapput. Inutoqaq, siornatigut ’kamannermik, mitallernermik oqaatsinillu kanngunartunik’ ilisarnaatilik iperarsimavaat, ’inuttaarlu ilisarsigamik pinngortitsisertik [Guuti] assigilerlugu nutaanngortoq atisimallugu’. Pruffiitip Esajasip oqaasii anersaakkut ittumik eqquutereerput: „Amaqqup [inuup amaqqutut pissuseqarsimagaluartup] najussavaa savaasaaraq [inuk maniguuttoq], milakulaallu savaasaaraq aqupeqatigissavaa. Ussiup piaraa løvellu piaraa mangiaqatigiissapput.“ — Kulorsamiut 3:8-10; Jesaja 11:6, 9.

Suli annertunerusumik pilerseqqitsinissaq qanillivoq!

Ullumikkut anersaakkut paratiisinngortitsisumik kingumut iluarsiinerit saniatigut, nunarsuup paratiisivinngortinneqarnissaa qanilliartupallappoq. Jehovap siuaasavut siulliit, Adam Evalu, naatsiivimmut Edenimut najugassimmagit nunarsuup ilamininngua paratiisiuvoq. (1 Moses 1:29-31) Taamaattuminguna Paratiisip pilerseqqinnissaa eqqartorsinnaagipput. Tamannali pitinnagu nunarsuarmi upperisarsiornerit Guutimik ataqqinaataajaasut tamarmik peerneqaqqaartariaqarput. Silarsuup matuma naalakkersuisuisa tamanna isumagissavaat. (sarĸúmersitat 17:15-18) Taava naalakkersuisut niuertullu taakkunanngalu tapersersuisut peerneqassapput. Guutip akeraasa nungutaat, Satan Diaavulu inngilipiluilu, qilersorneqassapput ukiunilu tusindini parnaarussaallutik, piffissami pilerseqqitsiffiusumi. Taava „inoqajuitsoq naggorluttorlu tipaatsussapput. Nuna naasuitsoq qiimmattassaaq naasunillunilu“. (Jesaja 35:1) Nunarsuamiut tamarmik eqqississapput. (Jesaja 14:7) Aammattaaq toqusimasut millionillit nunarsuami inuunermut makitinneqassapput. Tamarmik utertitsissutitut pilliutip peqqissinartuunera iluaqutigissavaat. (sarĸúmersitat 20:12-15; 22:1, 2) Tappiitsoqarnanilu tusilartoqarnanilu tusiattoqassanngilaq. „Nunatsinni ima oqartoqassanngilaq: ’Napparsimavunga.’“ (Jesaja 33:24) Kristusip ukiuni tusindini naalakkersuinerata kinguninngua Diaavulu inngilipiluilu sivikitsumik iperagaassapput takussavaallu Guutip nunarsuarmut siunertaa taamanikkut qanoq eqquussimasoq. Naggataatigullu naassaanngitsumik piuneerussaassapput. — sarĸúmersitat 20:1-3.

Ukiut tusindillit ingerlaneranni pilerseqqitsisoqareerpat „anerneqartut tamarmik“ Jehova erinalimmik unnersiutigissavaat, naassaanngitsumullu taamaaliussallutik. (Tussiaat 150:6) Taamaaliortunut ilaarusuppit? Ilaasinnaavutit.