Utaqqisinnaaneq ilikkarsimaviuk?

UKIUT tamaasa piffissaq qanoq annertutigisoq utaqqinermut atorneqartartoq eqqarsaatigisimaviuk? Inuit niuertarfinni benziinaarniarfinniluunniit utaqqerrattarput. Neriniartarfinniikkaangamik saqisoq utaqqisarpaat. Nakorsiaraangamik kigutilluunniit nakorsaanukaraangamik utaqqisarput. Bussi qimuttuitsulluunniit utaqqisarpaat. Aap, tupaallannartumik inuunitta ilarujussua pisussanik utaqqinermut atortarparput. Misissuineq naapertorlugu tyskit ukiumut nalunaaquttap-akunneri 4,7 milliardit angallattut tattoqiunnerini utaqqisarput. Tamanna inuit 7000-it ukiut inuuffigisaasa nalingajagaat.

Utaqqineq nikallornartorujussuusinnaavoq. Ullumikkut suliarerusutanut tamanut naammattumik piffissaqanngittuaannarluni misiginarpoq, suliarisariaqaraluakkallu tamaasa eqqarsaatigalugit utaqqineq misilinneqaataasinnaalluni. Atuakkiartoq Alexander Rose ima oqarsimavoq: „Inuunermi ugguutigisat affaat utaqqinerupput.“

Amerikami naalakkersuinermik ilisimasallip Benjamin Franklinip nassuerutigisimavaa utaqqineq akisusinnaasoq. Ukiut 250-it matuma siorna oqarsimavoq: „Piffissaq aningaasaavoq.“ Taamaattumik suliffeqarfiit ilaasa suleriaatsiminnik pisariaqanngitsumik kinguarsaataasinnaasut pinngitsoortinniartarpaat. Piffissami sivikinnerusumi amerlanerusunik nioqqutissiorsinnaagaanni iluanaarnarneruvoq. Suliffeqarfiit tamanut kiffartuussisut sukkasuumik kiffartuussinerit — nerisassat piareersimasut, biilinit niunani aningaaserivimmit aningaasanik tigusisinnaaneq assigisaallu — neqeroorutigisarpaat nalunnginnamikku pisiniartoq iluarusutsissagunikku utaqqineq sivikinnerpaasariaqartoq.

Piffissamik erlinnartumik asiutitsineq

Taalliortoq Amerikamiu Ralph Waldo Emerson, 1800-kkunni inuusoq, ugguarluni oqarsimavoq: „Inuunerup ilarujussua utaqqinermi annaaneqartarpoq!“ Ukiuni nutaanerusuni atuakkiortup Lance Morrowip utaqqinerup qasunarnera nuanniinneralu ajuusaarutigisimavaa.  Aammattaarli „utaqqinermut tunngatillugu malunnanginnerusoq alianarnerusorlu“ eqqaavaa. Sunaagami? „Pisuussummik naleqarnerpaamik, tassa piffissamik, inuunerup ilaanik, arsaarneqarnerup annaavinneqarneratalu ilisimanera.“ Alianarpoq ilumoorlunili. Piffissaq utaqqinermi asiusoq uteqqissinnaanngilaq.

Inuuneq taama sivikitsiginngikkaluarpat soorunami utaqqineq taama isumakuluutaatigissanngikkaluarpoq. Inuunerli sivikippoq. Ukiut tusindilikkuutaat matuma siorna tussiaasiortoq allassimavoq: „Ukiummi inuuffigisassavut tassa ukiut 70-it, imaluunniit 80-it, nukissaqassagutta, ukiutta ajunnginnersaat allaat sulipiloornermik ulikkaarput. Ukiummi ingerlalertoqaat, timmisugut soorlu.“ (Tussiaat 90:10) Sumiluunniit najugaqaraluarutta kinaagaluaruttalu inuunerput killeqarpoq — ullut, nalunaaquttap-akunneri, minutsit inuuffigisassavut killeqarput. Piffissarli erlinnartoq inunnik allanik pisussanilluunniit utaqqinermut atunngitsuuissinnaanngilarput.

Utaqqisinnaaneq ilikkarneqarsinnaavoq

Qularnanngitsumik ilarpassuagut biilimik aquttumut biilimik siunerminiittumik qaangiiniartuaannartumut ilaasimapput. Nukinginnartoqarnera pissutaagajunngilaq — aquttoq pingaarutilimmik eqquutitittariaqakkaminik isumaqatigiissuteqangilaq. Qanoq sukkatiginissani biilertup allap aalajangissagaa sapiinnarpaa. Naammagittaannerata takutippaa utaqqineq ilikkarsimanngikkaa. Aap, utaqqisinnaaneq ilikkagassaavoq; inunnguusiunngilaq. Naalungiarsuit kaalerniariarlutik iluaalliulerniariarlutilluunniit malugeqqusarput. Allilaarunik aatsaat paasissavaat ilaannikkut piumasartik piumallugu utaqqisariaqarlutik. Utaqqineq inuunermut ilaalluinnarmat naammagittarluni utaqqisinnaaneq inersimalluarnermut ersiutaavoq.

Soorunami nukinginnartoqartarpoq erinitsattoqarpat paasinartumik. Ataatanngulersup nuliaminik ernisuttumik tuaviinnaq napparsimmaviliaassisup kinguarsaasut eqqortumik naammagittaaffigissavai. Inngilit Lotimik Sodomamit qimaatitsiniarlutik tuavisaarisut Lot nangaasoq utaqqiumanngilaat. Illoqarfik aserorneqangajalerpoq Lotip ilaqutaasalu inuunerat navianartorsiorput. (1 Moses 19:15, 16) Utaqqisoqartariaqaraangalli amerlanertigut inuit inuunerannik navianartorsiortoqarneq ajorpoq. Pissutsini taamaattuni nuannernerungaassaaq kikkut tamarmik naammagittarneq ilikkarpassuk — inuup allap naammassisakinnera soqutiginninngineraluunniit pissutaagaluarpataluunniit. Ammattaaq piffissaq utaqqiffiusoq pissarsinartumik tamarmik atorsinnaalerpassuk utaqqineq oqinnerulissaaq. Utaqqineq qanoq oqinnerulersinnaasoq qanorlu atorluarneqarsinnaasoq ungaluusami qupperneq 5-imi assigiinngitsunik siunnersuuteqarpoq.

Utaqqisinnaannginnerup makitasuunermut — allat utaqqinissaannut pingaaruteqarpallaarluni misiginermut — ersiutaasinnaanera sumiginnarneqarsinaanngilaq. Taamatut misigisup kialuunniit Biibilimi oqaatsit eqqarsaatigisariaqarpai: „Kamajuissuseq anneruniarnermit pitsaaneruvoq.“ (Nalunaajaasup oqaasii 7:8) Anneruniarneq imaluunniit makitaneq inuttut pissusiuvoq ilungersunartoq, Biibilimilu imaattumik ussateqarpoq: „Makitasuut tamaasa [Jehovap] maajunnarai.“ (Ussatit 16:5) Naammagittarneq — utaqqisinnaaneq — ilinniassagaanni imminut allanullu attaveqarneq misissortariaqarsinnaavoq.

Naammagittarneq akilerneqartarpoq

Amerlanerit utaqqisinnaanerusarput qularinngikkaangamikku utaqqinertik kinguneqarluarumaartoq piffissallu ingerlanerani utaqqisartik piviusunngorumaartoq. Tassunnga atatillugu pitsaavoq eqqarsaatigalugu ilumoorlutik Guutimik pallorfiginnittut tamarmik neriorsuutai misinnangaartut Biibilimi allassimasut eqquunnissaat utaqqigaat. Assersuutigalugu Biibilimi tussiaatit ilaat imaappoq: „Iluartut nuna kingornutissavaat najugaqassallutillu tassani naassaanngitsussamut.“ Neriorsuut tamanna apustili Johannesimit uteqqinneqarpoq. ’Guutip peqqusaanik naammassinnittoq naassaanngitsumik atassaaq.’ (Tussiaat 37:29; 1 Juánase 2:17) Soorunami naassaanngitsumik inuusinnaagaluarutta utaqqineq ajornartorsiuterujussuussanngikkaluarpoq. Maannakkulli taamaassinnaanngilagut. Inuunermik naassaanngitsumik eqqartuinissaq piviusorsiornerussava?

Apeqqut tamanna akitinnagu Guutip siuaasavut siulliit naassaanngitsumik inuusinnaatillugit  pinngortikkai eqqarsaatigiuk. Ajortulioramilli, nammineq kinguaavisalu, uagut ilanngulluta, periarfissaq tamanna annaavaat. Ajortuliornerisa kinguninngua Guuti nalunaarpoq ajortuliornerisa kinguneri iluarsiiviginiarlugit. „Kinguaassaq“, Jesus Kristusiunera nalunarunnaartoq, tikiukkumaartoq neriorsuutigaa. — 1 Moses 3:15; Rûmamiut 5:18.

Guutip neriorsuutaasa eqquunneri iluaqutigissanerlutigik nammineq aalajangissavarput. Misigiumallugit naammagittartariaqarpugut. Naammagittarnissamut iluaqutigisinnaasatut Biibilimi kajumissaarneqarpugut naasorissaasup maligassiunera eqqarsaatigeqqissaaqqullugu. Naatitassani siaruartertarpai allatullu iliorsinnaannginnami katersuinissap tungaanut inerititassani paariitigalugit naammagittarlunilu utaqqisariaqarluni. Taavali naammagittarnera akilerneqartarpoq, suliamilu inerititai takullugit. (Jâko 5:7) Apustili Paulus naammagittarneq pillugu allamik assersuuteqarpoq. Angutinik arnanillu aalajaatsunik itsaq inuusunik eqqaasippaatigut. Guutip siunertaminik naammassinninnissaa qilanaaraat, piffissarli aalajangigaa utaqqisariaqarpaat. Paulusip kajumissaarpaatigut taakkua ’upperlutik erinitsajuillutillu unnersuutigisamik kingornussisut’ ilaaqqullugit. — Eprîarit 6:11, 12.

Aap, utaqqineq inuunitsinnut ilaalluinnarpoq. Paamitsannartuujuaannartariaqanngilarli. Guutip neriorsuutaasa eqquunnissaannik utaqqisunut allaat nuannersuusinnaavoq. Utaqqinerminni Guutimut qanimut attaveqarneq ineriartortissinnaavaat uppernerminnullu ersiutaasunik suliaqarlutik. Qinunikkut atuaqqissaarnikkullu ilinniakkaminnillu eqqarsaatiginneqqissaarnermikkut Guutip neriorsuutaasa tamarmik piffissarititaani eqquunnissaannik tatiginnilluinnarneq ineriartortissinnaavaat. (wE 1/9 2000)

[Qupp. 5-mi ungalusaq]

Utaqqineq ajunngitsunut atoruk

Siumut sillimareertarit. Nalunngikkukku utaqqissallutit atuarnissannut, allannissannut, nuersaanissannut, nissikalluttaanissannut allamilluunniit iluaqutaasumik iliuuseqarnissannut piareersimagit.

Piffissaq pissutsinik eqqarsaatiginninnermut, silarsuatsinni ulapiffioqisumi matumani ajornarsiartuinnartumut, atoruk.

Telefonikkut attaveqarneq utaqqisariaqalissagaluarukku atuarsinnaasannik telefonip eqqaanut ilisigit. Minutsini tallimani quliniluunniit quppernerpaaluit atuarneqarsinnaapput.

Allat utaqqeqatigigaangakkit, naleqquppat, periarfissaq oqaloqatigiinnermut atorsinnaavat ineriartornartunillu eqqarsaatissillugit.

Allaffissanik atuagassanilluunniit biilimiititaqarit utaqqisariaqalissagaluaruit atugassannik.

Sequnngerit, qasuersaarit imaluunniit qinugit.

UTAQQINERMI PIFFISSAMIK ATORLUAANEQ ISIGINNITTAASEQARNERMIK SIUMULLU SILLIMAREERNERMIK AALAJANGERNEQARAJUPPOQ