Jesusip toqusunit makissimanera qularineqarpoq

„Jiisusi ilumut inuusimasoq qularutiginagu oqaatigisinnaavarput . . . Guutimilli ilumut toqusunit makititaasimanersoq taama qularutiginngitsigalugu oqaatigisinnaanngilarput.“ Tuluit Nunaanni oqaluffiup biskopiunera taama oqarsimavoq.

APUSTILI kristumiu Paulusi taama qularuteqarsimanngilaq. Itsaq Grækenlandimi illoqarfiusimasumi Korinthimi kristumioqatiminut allakkamini isumassarsiarititaasuni siullerni kapitali 15-mi ima allagaqarpoq: „Pingaarnerpaatillugimmi ilissinnut tunniuppakka uannut kingornussassiissutigineqartut makku: Kristusi toqusoq ajortivut pillugit Allakkat malillugit, ilisaasorlu; ullullu pingajuanni makissimasoq Allakkat malillugit.“ — 1 Korinthimiut 15:3, 4.

Jiisusi Kristusip toqusunit makissimaneranik upperinninnerisa ajoqersugai „qilaap ataani pinngortitanut tamanut“, tassa grækerinut Romamiunullu tamanut tusagassamik nuannersumik oqaluusissutiginninnissaannut piumassuseqalersippaat. (Kolossemiut 1:23) Jiisusip toqusunit makissimanera kristumiut uppernerannut tunngaviulluinnarpoq.

Aallaqqaammulli Jiisusip toqusunit makissimanera qularutigineqarlunilu upperineqartarsimanngilaq. Angut qisummut paagunneqarsimasoq Jiisusip ajoqersugaanit Missiarsiunerarneqarmat tamanna juutinit kanngunartutut isigineqarpoq. Grækerinut tarnip toqujuissusianik upperisaqartunut toqusunit makititaanermik eqqarsaat maajunnartuuvoq. — Apustilit Suliaat 17:32-34.

Ullutsinni qulartut

Ilisimatuut kristumiuunerartut ilaat ukiuni kingullerni Jiisusip toqusunit makissimanera oqaluttualiaannaanerarlugu allaaseralugulu atuakkiarisarsimavaat, tamaalillutillu oqallinneq annertooq aallarnisarsimavaat. Jiisusimik oqaluttuarisaanermut naleqquttumik ujarlernerminni ilisimatuut assigiinngitsut oqaatigisarsimavaat Jiisusip ilerranik imaqanngitsumik makinneranillu iivangkiiliuni oqaluttuaq takorluugaannaasoq, toqunerata kingornerujussua qilammi pissaaneqarnera tapersorniarlugu ajoqersugaanit nassaarineqarsimasoq.

Assersuutigalugu Testamantitaamut professorip atuakkamillu Was mit Jesus wirklich geschah. Die Auferstehung historich betrachtet-mik (Jiisusip toqusunit makinnera oqaluttuarisaanerup isaanit isigalugu) allattup ilisimatuup tyskip Gerd Lüdemannip isumai qivialaariartigit. Jiisusip toqusunit makinnerarneqarsimanera ’asuli oqaluttuaannaasoq’ uppernarsarneqarsinnaanngitsoq, ’ilisimatuullu isaannik isiginnittaaseqartunit’ tamanit tunuartinneqartariaqartoq oqaatigaa.

 Professor Lüdemannip oqaatigaa apustili Petrusip Jiisusimik makissimasumik takunnissimanerarnera miserratiginnissimanerminik aliasungaarnerata imminullu pisuutinnerata takusuusitissimassagaa. Lüdemann naapertorlugu ataasiarluni Jiisusip ajoqersukkaminut 500-ngajannut takutinnera tassaasimasoq „amerlasuut paatsiveerunnerat“. (1 Korinthimiut 15:5, 6) Naatsumik oqaatigalugu ilisimatoorpassuit Jiisusip toqusunit makinneranik Biibilimi oqaluttuaq ajoqersukkanut anersaakkut nukittorsaatissaannartut oqaluussinerannullu kajumissaarutissaannartut misigisalikkersaarutaannaanerarpaat.

Soorunami ilinniarnertuut isumaqatigiinngissutaat soqutigineqarpallaanngillat. Taamaakkaluartoq Jesusip toqusunit makissimaneranik oqallinneq tamatta soqutigisariaqarparput. Sooq? Tassami Jiisusi toqusunit makissimanngippat kristumiussuseq eqqunngitsumik tunngaveqarsimassaaq. Jiisusili ilumut toqusunit makissimappat kristumiussuseq ilumoortumik tunngaveqarsimammat. Taamaappat Kristusip oqaasii ilumuuinnaratik aamma neriorsuutai ilumoorput. Aamma ilumut toqusunit makittoqarsinnaappat taava toqu ajugaasuunani akeraasimassaaq nungutinneqarsinnaasoq. — 1 Korinthimiut 15:55.

[Suminngaanneernera]

The Self-Pronouncing Edition of the Holy Bible, King James Version-imik aamma Revised Standard Version-imik imalik