Peroriartornerit qanorluunniit ikkaluarpat inuuninni iluatsitsisinnaavutit

MEERAANERMINIT Nicholas pikitsitsiumatuuvoq. * Paatsiveerusimaarnerata ikiaroortartunngortippaa imerajuttunngortillugulu. „Ataataga imerajuttuuvoq qatanngutigalu atugarliuutigeqisatsinnik,“ Nicholas nassuiaavoq.

Malindap angajoqqaavi naalagiartartuupput ataqqisaasut, kisianni aamma immikkut upperusiortuni ileqqulersuutinik pingaartitsisimaqaat. „Immikkut upperusiortuni ileqqulersuutaannut atatillugu naalliutsinneqartarpunga, tamannalu meeraaninni misigissutsikkut aserorneqaatigeqaara,“ Malinda, maanna 30-t sinnerlugit ukiulik, anersaaruluppoq. Nangipporlu: „Eqqaamannissinnaalerninniilli imminut naleqanngitsutut isigisarpunga ataqqinermik amigaateqarlunga isumatsassimaqalungalu.“

Miserratigineqarsinnaanngilaq inuppassuit meeraanerat aserorneqarsimammat angajoqqaaminnit paarinerlunneqarlutik, nakuuserfigineqarlutik, atornerlunneqarlutik nuanniitsunilluunniit allanik atugaqarsimallutik. Pilluaalluni meeraaneq misigissutsikkut ikeqalersitsisinnaavoq. Imaappali inuit taakku sallusuissummik ilassinninnissaminnut pillualaalernissaminnullu periarfissaarutivissimasut? Naak alliartornertik taamaakkaluartoq Nicholasip Malindallu Guutip najoqqutassiai qutsissut maleruarsinnaavaat? Siullermik Judakkut kunngiata Josijap pineqarsimanera misissoriartigu.

Assersuut Biibilimeersoq

Ukiuni 600-kkunni u.n.s. Josija ukiuni 31-ni Judakkunnut naalakkersuivoq (659-629 u.n.s.). Ataatami toqutaanerata kingorna kunnginngortinneqarmat nunami pissutsit atuuttut ajortorujussuupput. Juda Jerusalemilu Ba’alisiortunik Malkamilu, Ammonikkut guutiat nuimanerpaaq, naqqissigalugu uppernarsaasartunik ulikkaarput. Judami naalagartat „løviupput uiannisaartut“, eqqartuussisullu „unnuap amarorai saanernik kikkartartut qaanissaata tungaanut,“ pruffiiti Sefania Josijap nalaani inuusoq taama oqarpoq. Taamaammat nakuuserneq peqquserlunnerlu nunami siaruapiloorsimapput. Inuit amerlasuut uummamminni oqarput: „[Jehova] ajunngitsumik ajortumilluunniit iliuuseqarnavianngilaq.“ — Sefania 1:3–2:3; 3:1-5.

Josija kunngitut qanoq ippa? Ezra ukiunik naatsorsuinermik suliaqartoq allappoq: „[Josija Jehovap] isaani ajunngitsumik iliorpoq siuaasami Daavip ileqqui malillugit talerpimmut saamimmulluunniit sanguallannani.“ (2 Nalunaarsuutit 34:1, 2) Tassa Guutip isaani ajunngitsumik iliorneq Josijap iluatsippaa. Meeraanerali qanoq ippa?

Meeraaneq ajunngitsoq ajortorluunniit?

Josija ukiumi 667-mi u.n.s. inunngormat ataataa Amoni 16-innarnik ukioqarpoq, aataalu Manasse Judamut naalakkersuivoq. Judap kunngiisa guutiitsuunerpaat Manasse ilagaat. Ba’alimut pilliiviliorpoq, tamatumunngalu atatillugu „annertoqisumik [Jehovap] isaani ajortumik iliorpoq“. Ernini innikkoortittarpai, angakkuartitsisarluni, anersaarsiorneq siuarsartarlugu inuillu pinngitsuusut toquttarlugit. Tamatuma saniatigut Asjerap assinga sanaani Jehovap illuani napparpaa. Ilumut, Judakkut Jerusalemimiullu „tammartippai inuiannit [Jehovap] Israelikkut pillugit nungutissimasaanit ajornerusumik iliortillugit“. — 2 Nalunaarsuutit 33:1-9.

Manasse ima ajortigaaq Jehovap allaat kalunnilersorlugu Babylonimut, Assyriap kunngiata illoqarfiisa pingaarnersaasa ilaannut, aallarunneqartippaa. Tassani tigusaaqqatilluni peqqissimivoq, maniguullunilu Jehova qinnuigalugu isumakkeerfigeqqulluni. Qinnutaa Guutip tusarpaa  Jerusalemimullu naalakkersuiffianut utertillugu. Tamatuma kingorna iluarsaaqqinnernik aallarniivoq, ilaatigut iluatsitsumik. — 2 Nalunaarsuutit 33:10-17.

Manassep ajussusia kingusinnerusukkullu peqqissiminera erneranut Amonimut qanoq sunniuteqarpat? Kunnginngorpoq ajortorujussuaq. Allamik isumataareerami Manassep ilungersorluni inuiaqatigiit mingutsitaanerannit nunamut atuutilersissimasaminit minguiarniarpai, tamannali Amonimut sunniuteqanngilaq. 22-nik ukioqarluni ataatani kingoraarlugu kunnginngorami „[Jehovap] isaani ajortumik iliorpoq ataatami Manassep ileqqui malillugit“. Jehovamut maniguunnissaminut taarsiullugu Amonip ’suliani ajortut amerlanerulersiinnarpai’. (2 Nalunaarsuutit 33:21-23) Amoni Judamut kunnginngormat Josija arfiniliinnarnik ukioqarpoq. Meeraagami atugarliorsimassaqaaq!

Ukiut marluk qaangiuttut Amonip kiffaasa Amoni pikitsitsiffigaat toqullugulu. Tamatumuuna naalakkersuinera ajortoq soraarpoq. Innuttaasulli kiffat pikitsitsisut toquppaat Amonillu ernera Josija kunnginngortillugu. — 2 Nalunaarsuutit 33:24, 25.

Naak meerannguugallarami atugarliorsimagaluarluni Josija Jehovap isaani ajunngitsumik iliorpoq. Naalakkersuinera pitsaalluinnarsimammat Biibilimi ima allaqqavoq: „Siornatigut kunngeqarsimanngilaq Josijatut uummammigut iluunngarluni tarnimigullu iluunngarluni nukinilu tamakkerlugit Mosesip inatsisai malilluinnarlugit [Jehovamut] saanniarsimasumik; taassumalu kingorna taamaattoqarsimanngilaq.“ — 2 Kunngit 23:19-25.

Atugarliungaarlutik meeraasimasunut Josija assersuutissaalluarpoq qiimaallannartoq. Assersuut tamanna sumik ilinniarfigisinnaavarput? Eqqortumik iliornissaminut taamaaliortuaannarnissaminullu Josijap suna iluaqutigaa?

Jehova ujaruk ilisariniarlugu

Aataava Manasse peqqissimereernermi kingorna Josijamut meerannguunerani ajunngitsumik sunniisut ilagaat. Qanoq  atassuteqaqatigiissimatiginersut Manasselluunniit iliuutsini allanngortimmagit Josiap qassinik ukioqarnera Biibilimi eqqaaneqanngilaq. Ilaqutariit juutiusut imminnut qanimut attaveqartarmata Manassep Josija atugaanut ajortunngornartunut illersorniarsimannguatsiarpaa Guutimut ilumoortumut Jehovamut taassumalu oqaasiinik ataqqinnilersinniarlugu. Sallusuissutip naatsiiassartai Manassep Josijap uummataanut siaruartersimasai sunniutillu ajunngitsut allat naggataatigut kinguneqarluarput. Judap issiavissaarsuani naalakkersuiffimmi ukiut arfineq-pingajussaanni Josijap 15-inik ukioqarluni Jehovap piumasaa paasinialerpaa iliuuserinialerlugulu. — 2 Nalunaarsuutit 34:1-3.

Meeraanerminni ilaasa sallusuissut Guutip oqaasianeersoq ungasissumik eqqarliminnit, ilisarisimasaminnit saniliminnilluunniit tusarsimasarpaat. Naatsiiassarli siaruarterneqartoq tamanna imerterneqaruni kingusinnerusukkut kinguneqarluarsinnaavoq. Malinda, aallaqqaataani eqqaaneqartoq, utoqqasaamik inussiarnersumillu sanileqarpoq, angutillu taassuma ilaqutariit akuttoqatigiimmik atuagassianik Napasuliaq Alapernaarsuiffik-mik Iteritsi!-millu pajuttarpai. Asannittutut eqqaavaa oqarluni: „Uannut sunniuteqarnerusoq tassaavoq nalliuttorsuit nalliuttorsiutigineq ajormagit. Uannut tamanna pingaartorujusuuvoq, tassami angajoqqaama immikkut upperusiortutut iluartut-ulluanni nalliuttorsuanilu allani suliamik ilaat ulluni taakkunanerpiaq suliarisarpaat.“ Ukiut qulit missaat qaangiuttut Malinda ikinngummit kristumiut ataatsimiinnerannut Jehovap Nalunaajaasuisa naalagaaffilersaarfianni pisussamut qaaqquneqarami sanilini eqqaallugu angerasuarpoq. Sallusuissummik ujaasinermini iluaqutigaa.

Guutimut maniguuttuugit

Josijap naalakkersuinerata Judami upperisarsiornikkut iluarsaaqqinnerit angisuut ilisarnaatigai. Ukiuni arfinilini guutipilussiorneq akiorniarlugu Judalu minguiarlugu suliniareerluni Jehovap illua iluarsaatilerpaa. Suliaq tamanna ingerlanneqartillugu palasiuneq Hilkija naleqaqisumik nassaarpoq. Mappersagaq Jehovap inatsisaasa allassimaqqaarfiat nassaaraa. Nassaaq uitsatigineqaqisoq Hilkijap Sjafanimut naalagaaffimmi allattuunermut tunniuppaa, taannalu kunngimut nalunaarpoq qanorlu pisoqarneranik oqaluttuullugu. Tamakkua Josijap 25-nik ukiullip makittasuunnguutigai? — 2 Nalunaarsuutit 34:3-18.

Ezra allappoq: „Josijap inatsisini allassimasut tusaramigit atisani alippai.“ Aliatsangaarneranut ersiutaavoq paasivaami siuaasami Jehovap peqqussutai tamaasa maleruarsimanngikkaat. Maniguussusia! Kunngip tassuuguinnaq angutit tallimat aallartippai pruffiitimut Huldamut taanna aqqutigalugu Jehova siunersioqqullugu. Aallartitat tusarliussamik matuminnga nassarlutik uterput: ’Ajunaarneq nalliukkumaarpoq Jehovap inatsisai maleruarneqarsimanngimmata. Kisianni illit kunngi Josija maniguutileravit eqqissillutit ilineqarumaarputit, ajunaarnerillu takussanngilatit.’ (2 Nalunaarsuutit 34:19-28) Josijap isiginnittaasia pillugu Jehovap asavaa.

Tunuliaqutarput qanorluunniit ikkaluarpat Guutimut ilumoortumut Jehovamut maniguutilersinnaavugut taassumunngalu oqaasianullu Biibilimut ataqqinnilersinnaalluta. Nicholas aallaqqaataani eqqaaneqartoq taamaaliorpoq. Oqarpoq: „Ikiaroornartunik imigassanillu atornerluinera pissutigalugu inuunera torinngeqaaq, Biibilili soqutigisaraara inuunerullu siunertaa paaserusoqalugu. Naggataatigut Jehovap Nalunaajaasui attaveqarfigilerpakka inuuneralu allanngortillugu sallusuissullu ilassillugu.“ Aap, alliartornitsinni avatangiisit qanorluunniit ikkaluarpata Jehovamut oqaasianullu ataqqinnittumik isiginnittaaseqalersinnaavugut.

Jehovap ikiuinera qanoq iluaqutigineqarsinnaasoq

Jehovap taassumalu oqaasiata saniatigut aamma Jehovap pruffiitii Josiap ataqqingaarpai. Pruffiiti Huldaannaanngitsoq siunersiorfigisarpaa, aamma pruffiitinit allanit ukiuni taakkunani inuusunit sunnerneqangaarpoq. Assersuutigalugu Jeremia Sefanialu Judami guutipilussiornermik assuarinnittuupput. Taakkua tusarliussaannut tusarnaartarnermigut eqqunngitsumik pallorfiginninnnermik akiuinermini Josija nakussatsinneqarsimassaqaaq. — Jeremia 1:1, 2; 3:6-10; Sefania 1:1-6.

 ’Naalakkap’, Jiisusi Kristusip, ajoqersukkami tanitaasut ilagiissaat — „kiffaq ilumoortoq silatoorlu“ — suliassippai piffissaq eqqorlugu anersaakkut tunniussisaqqullugit. (Mattæus 24:45-47) Atuagassiat Biibililersaarutit ilagiillu aaqqissuussaanerat ikiortigalugit ’kiffap’ ikiortarpaatigut paaseqqullugu unnersuussut Biibilimeersoq maleruarutsigu qanoq iluaqutigissagipput, aamma ulluinnarni qanoq ililluta maleruarsinnaaneripput atoriaannaasumik siunnersortarpaatigut. Ileqquvut peqqinnanngitsut sorlanissimasullu ajugaaffiginiarlugit Jehovap ikiuinera iluaqutiginiartigu. Meeraanerminiilli Nicholasip oqartussaassuseq uumigeqaa. Allaat sallusuissut Guutip oqaasianeersoq ilikkareeraa sanngiissutaata tamatuma Jehovamut tamakkiisumik kiffartornissaanut tunuarsimaartippaa. Isiginnittaatsip tamatuma allanngortinnissaa imaannaasimanngilaq. Naggataatigulli iluatsippoq. Qanoq? Nicholas oqaluttuarpoq: „Utoqqaanertat paasinnillaqqissut marluk ikiortigalugit kiisami ajornartorsiuteqarnera nassuerutigaara asannittumillu unnersuussutaat Biibilimeersut malerualerlugit.“ Imalu nangippoq: „Ilaannikkut kamaammertaraluarpunga, maannali pikitsitsiumatunera aqussinnaalersimavara.“

Malindap aamma utoqqaanertat siunersiortarpai inuunermini pingaartumik aalajangiissagaangami. Aamma allaaserisat assigiinngitsut Napasuliaq Alapernaarsuiffik-meersut Iteritsi!-meersullu isumatsassimanerminik imminullu nikaginerminik meeraanermineersunik qaangiinissaminut iluaqutigisarpai. Oqarpoq: „Ilaatigut immikkoortup oqaaseqatigiilluunniit — aap, allaaserisalluunniit ilaannaa — uannorpiaq tunngasarput. Ukiut qulingiluat matuma siorna allaaserisat taamaattut tigoriaannanngorlugit toqqortalerpakka.“ Ullumikkut allaaserisat katersugai 400-t missaanniipput.

Aap, kialuunniit ilaqutariittut inuuneq ajortoq atugarliuutigiuartariaqanngilaa. Jehovap ikiuineratigut anersaakkut iluatsittoqarsinnaavoq. Soorlu peroriartorneq ajunngitsoq Guutip najoqqutassiaanik qutsissunik maleruaanissamut qulakkeerisuunngitsoq, taamattuttaaq meeraanermi atugarliorsimaneq Guutimik mianerinnittunngornissamut akornutaanngilaq.

Naalaffiup iluarsaanneqarneranut atatillugu mappersagaq inatsisit allassimaffiat nassaarineqarmat ’Josija [Jehovap] kiinaata saani imaattumik angerfigeqatigiissitsivoq: Inuit neriorsuisippai [Jehova] malissagaat uummatimikkut iluunngarlutik tarnimikkullu iluunngarlutik naalallugu’. (2 Nalunaarsuutit 34:31) Inuuninilu tamaat aalajangerneq tamanna qimanngivippaa. Malindap Nicholasillu aamma Jehovamut ilumoortuaannarnissartik Guutillu najoqqutassiaanik qutsissunik maleruaanissartik taama aalajangiussimalluinnartigaat. Illittaaq Jehovamut qanittuaannarnissat taassumunngalu aalajaallutit kiffartornissat aalajangiussimalluinnarpiuk? Qularnanngilaq iluatsissinnaasutit, Jehova neriorsuimmat: „Siooraqinak ilagigakkit, erseqinak, uangaagama illit Guutit. Nakussatsippakkit ikiorlutillu, assannik ajugaasartumik najummivakkit.“ — Esaja 41:10, 13. (wE 15/4 01)

[Quppernerup ataani ilanngussaq]

[Qupp. 17-mi assiliartaq]

Naak meeraanermi atugarlioraluaqaluni Josijap Jehova ilisarilerniarpaa, inuunerminilu iluatsippoq

[Qupp. 19-mi assiliartaq]

Ileqqunnik sorlanissimasunik ajugaaffiginninnissannut utoqqaanertat ikiorsinnaavaatit

[Qupp. 19-mi assiliartaq]

Guutip najoqqutassiaanik qutsissunik maleruaajuaannarnissannut „Napasuliaq Alapernaarsuiffik“ „Iteritsi!“-lu iluaqutigisinnaavatit