Aaperaat — uppernermigut maligassaalluartoq

’Aaperaat uppertunut tamanut ataataavoq.’ — ROMAMIUT 4:11.

1, 2. (a) Suna pissutigalugu ullumikkut kristumiut ilumoortut Aaperaat eqqaamavaat? (b) Sooq Aaperaat taaneqarpa ’uppertunut tamanut ataataasoq’?

INUIAQATIGIISSUARNUT siuaasaavoq, niuertuullunilu siulersuisuusoq. Taamaattoq ullumikkut kristumiunit eqqaamaneqaatigineruaa pissutsimi ilaat Jehova Guutip ikinngutimisut isiginnilissutigisaa — aalajaalluinnartumik uppernini. (Esaja 41:8; Jaaku 2:23) Tassaavoq Aaperaat, Biibilimilu taaneqarpoq ’uppertunut tamanut ataataasoq’. — Romamiut 4:11.

² Angutimmi Aaperaat sioqqullugu inuusut, soorlu Abeli, Enoki Noalu, upperluartuunnginnamik? Taamaakkaluartorli Guutip Aaperaat angerfigeqatigaa nunarsuarmi inuiaat tamarmik pilluaqquneqaatissaannut. (1 Mosesi 22:18) Taamaalilluni kinguaassamut neriorsuutigisamut upperinnittunut tamanut assersuutaasumik ataatanngorpoq. (Galatiamiut 3:8, 9) Taamaattumik Aaperaat ataatatsitut isigisinnaavarput, uppernermigummi malittariaqakkatsinnik maligassiuilluarpoq. Inuunera tamarmi uppernermut ersiutaanerarneqarsinnaavoq, inuunermini arlaleriaqaluni misilinneqartarmat. Aap, uppernermigut misilinneqaatiginerpaasani sioqquterujussuarlugu — ernini Iisaaq pilliutigeqquneqarmat — Aaperaat periarfissani allarpassuarni uppernerminik uppernarsaavoq. (1 Mosesi 22:1, 2) Maanna siusinerusukkut uppernermini misilinneqarnerisa ilaat misissoriartigik paasiniarlugu ullumikkut qanoq ilinniarfigisinnaanerivut.

Urimit aallaqqusaaneq

3. Biibilimi Abramip tunuliaqutaa pillugu sumik paasitinneqarpugut?

³ Abrami (kingusinnerusukkut Aaperaamik atserneqartoq) Biibilimi 1 Mosesi 11:26-mi eqqaaneqaqqaarpoq: „Terap 70-inik ukioqarluni Abrami, Nakori Haranilu ernertaarai.“ Abrami Semip Guutimik mianerinnittup kinguaaraa. (1 Mosesi 11:10-24) 1 Mosesi 11:31 naapertorlugu Abrami ilaquttanilu illoqarfimmi pigissaarfiusumi ’Urimi Kaldæamiittumi’, taamanikkut kuussuup Eufratip kangia’tungaaniittumi, najugaqarput. * Taamaattumik aallaqqaammut tupermiutut angalaannartutut pinnani illoqarfimmiutulli pigissaaruterpassuaqartumi alliartorsimavoq. Urip tuniniaasarfiini nioqqutissat nunanit allaneersut pisiarineqarsinnaapput. Illoqarfimmi illut kalkitikkat 14-it tikillugit initallit, kuuinnartumillu imillit, sanileriaarput.

4. (a) Guutimik ilumoortumik pallorfiginnittunut Urimi inuuneq qanoq unamminiarnartuua? (b) Abrami qanoq Jehovamut uppertunngorsimava?

⁴ Guutimik ilumoortumik kiffartuusserusuttunut Urimi najugaqarneq, pigisatigut iluaqutissartaqaraluarluni, immikkut unamminiarnartuuvoq. Illoqarfimmi guutipilussiortoqangaarpoq upperisapalaaqangaarlunilu. Qaammatip guutianut Nannamut ataqqinaat pyramidiusoq illoqarfiup illuinit portunerulluni nuisavoq. Qularnanngilaq Abrami guutipilussiornermut  peqataatinniarneqarsimassasoq, immaqa allaat eqqarliminit. Juutit kingornussassiissutaat naapertorlugit Abramip ataataa, Tera, allaat nammineq guutipiluliortarpoq. Ilumooraluarpat ilumuunngikkaluarpalluunniit qulakkeerneqarsinnaavoq Abrami guutipilussioqataasimanngitsoq. Siuaasaa utoqqalisoq Semi suli inuuvoq qularnanngitsumillu Jehova pillugu oqaluttuussimassavaa. Taamaattumik Abrami Jehovamut upperpoq Nannamut uppernani! — Galatiamiut 3:6.

Uppernermi misilinneqarneq

5. Abrami suli Urimiittoq Guutip sumik peqquaa, sumillu neriorsorpaa?

⁵ Abramip uppernera misilinneqangajalerpoq. Guuti Abramimut takutippoq oqarlunilu: „Nunagisat eqqarlitit ataatavillu illua qimallugit nunamut ilinnut takutitassannut aallarit. Inuiassuanngortikkumaarpakkit pilluaqqullutillu. Aqqit tusaamasanngortikkumaarpara, pilluaqqussutaassaatillu. Ilinnik pilluaqqusisut pilluaqqujumaarpakka ilinnillu perloqqusisoq perloqqujumaarlugu, ilikkullu nunarsuarmi eqqarleriit tamarmik pilluaqqunarsissapput.“ — 1 Mosesi 12:1-3; Apustilit Suliaat 7:2, 3.

6. Sooq Uri qimassaguniuk Abrami upperluartuusariaqarpa?

⁶ Abrami utoqqalivoq qitornaqaranilu. Qanoq ’inuiassuanngorsinnaava’? Nunalu ornigassaa sumiippa? Guutip tamatuminnga suli oqaluttuutinngilaa. Taamaattumik Abrami upperluartuusariaqarpoq Urimi inuuneq ilorrisimaarnartoq qimassaguniuk. Atuakkami  Family, Love and the Bible-imi itsaq ilaqutariit pillugit allassimavoq: „Ilaqutariinni unioqqutitsingaartumut pillaat ilungersunarnerpaaq tassaavoq ilaqutariinnit ’anisitaanissaq’. . . . Taamaattumik Aaperaap Guutimit peqquneqarluni nunani, aammalu eqqarlini, qimammagit Guutimut naalalluinnarnermut tatiginnilluinnarnermullu ersiutaavoq.“

7. Ullumikkut kristumiut qanoq Abramitut misilinneqarsinnaappat?

⁷ Ullumikkut kristumiut assingusumik misilinneqarsinnaapput. Abramitut tatineqartutut misigisinnaavugut pigisatigut soqutigisat teokratiimut tunngatillugu soqutigisanit salliutinnerusariaqarlugit. (1 Johannesi 2:16) Eqqarlitta uppinngitsut, ilaatigut anisitaasimasut, assortorsinnaavaatigut immaqalu ikinngutipalaaqartinniarsaraluta. (Matthæusi 10:34-36; 1 Korinthimiut 5:11-13; 15:33) Tamakku eqqarsaatigalugit Abrami maligassaalluarpoq. Taassumunnga Jehovamut ikinngutaaneq allanit tamanit — allaat ilaquttanit — pingaaruteqarneruvoq. Naluaa qanorpiaq, qaqugu sumilu Guutip neriorsuutai piviusunngorumaartut, neriorsuutilli tamakku tatigalugit kajumilluni inuunini navianartorsiortippaa. Tamatumuuna ullumikkut inuunitsinni Guutip naalagaaffiata salliutinnerunissaanut kajumissaarneqangaarpugut! — Matthæusi 6:33.

8. Abramip uppernera ilaqutaanut qanoq sunniuteqarpa, kristumiullu tamanna qanoq ilinniarfigisinnaavaat?

⁸ Abramip ilaqutai qaninnerusut qanoq qisuariarpat? Abramip upperneranit aalajaanneranillu sunnerneqarluarsimagamik, nulia Saraji jorngualu Loti iliarsuusoq tamarmik Guutip peqqussutaa naalallugu Urimit aallarput. Abramip qatanngutaata Nakorip qitornaasalu ilaasa kingusinnerusukkut Uri qimappaat  Karanimilu najugaqalerlutik, tassanilu Jehovamik pallorfiginnittuupput. (1 Mosesi 24:1-4, 10, 31; 27:43; 29:4, 5) Aap, allaat ataataata Terap ernini Abrami aallaqatigerusuppaa! Taamaattumik Biibilimi allassimasutut Tera ilaqutariit Kana’aniliarnerannut iliuuseqaqqaartoorpasikkaluarpoq. (1 Mosesi 11:31) Uaguttaaq pissuserilluta ilaquttavut oqaluussiffigigutsigik iluatsitsissannginnerpugut?

9. Abrami aallartinnani sunik piareersaasariaqarpa, aamma sooq immaqa pilliuteqartariaqarpa?

⁹ Abrami aallannginnermini ulapputissarpassuaqarpoq. Pigisat aalaakkaasut atortullu assigiinngitsut tuniniartariaqarpai, toqqillu qatigattuut, nerisassat atortussallu pisariaqartut pisiarisariaqarlugit. Aallarnissaminut sivikippallaamik piffissaqartinneqarluni piareersaasariaqarami Abrami aningaasatigut annaasaqarsinnaavoq, Jehovalli naalannissaa nuannaarutigeqaa. Suut tamarmik piareermata Abrami angalaqatissanilu tamakkerlutik Urip qarmarsuisa silataanniinnertik ulloq eqqaamanartuutissimassavaat! Aallartut kuussuup Eufratip sangoriarnera malillugu avannaata kitaanut ingerlapput. Sapaatip-akunnerisa arlallit ingerlaneranni 1000 kilometerit missaat ingerlareerlutik Mesopotamiap avannaani illoqarfimmut Karanimut, angalaqatigiippassuit uninngavigisartagaannut, apuupput.

10, 11. (a) Sooq Abrami Karanimi uninngagallarsimagunarpa? (b) Kristumiut angajoqqaaminnik utoqqalisunik isumaginnittut qanoq kaammattorneqarsinnaappat?

¹⁰ Abrami Karanimi najugaqalerpoq, qularnanngitsumik ataatani utoqqalisoq Tera eqqarsaatigalugu. (3 Mosesi 19:32) Ullumikkuttaaq kristumiorpassuit immikkut pisinnaatitaaffigaat angajoqqaaminnik napparsimasunik utoqqalisunilluunniit isumaginninnissartik, ilaallu allannguisariaqarput taamaaliorsinnaajumallutik. Qularinngilluinnarsinnaavaat asannillutik pilliutigisatik ’Guutip iluarigai’. — 1 Timotheusi 5:4.

¹¹ Ukiut ingerlapput. „Tera ukiuni 205-ini inuuvoq. Karanimilu toquvoq.“ Abramip ataatani aliasuutigisimassagunarpaa, aliasuffilli qaangiummat ingerlaanaq aallaqqilluni. „Abrami Karanimit aallarami 75-inik ukioqarpoq. Abramip aallaqatigai nulii Saraji qatanngummilu ernera Loti, pisuussutitillu katersorsimasatik tamaasa nassarpaat aamma Karanimi inussiaatitaatik ilaliullugit; Kana’aniliarput tassungalu pillutik.“ — 1 Mosesi 11:32; 12:4, 5.

12. Karanimiitilluni Abrami qanoq iliorpa?

¹² Soqutiginarpoq Abrami Karanimiinnermini ’pisuussutinik katersuisimasoq’. Uri qimakkamiuk Abrami pigisatigut pilliuteqaraluarluni, Karanimit aallarami pisoorsuuvoq. Taamaappoq qularnanngitsumik Guutimit pilluaqquneqarami. (Oqaluussisartup oqaasii 5:19) Jehovap ullumikkut kiffani pisuussutinik neriorsunngikkaluarlugit, neriorsuivoq kinaluunniit Guutip naalagaaffia pillugu ’illuminik, qatanngutiminik angutinik arnanillu qimatsisoq’ pisariaqartitaanik tuniumallugu, tamannalu naammassissavaa. (Markusi 10:29, 30) Abrami aamma ’inussiaatitaarpoq’, tassa kiffaqarluni. Allagatoqqani Jerusalemi-targuminik taaneqartuni aamma oqaaseqaatini Kaldæameersuni allassimavoq ’upperisamut ilanngutitsisoq’. (1 Mosesi 18:19) Imminut aperisinnaavugut upperisatta killinneraatigut sanilitta, suleqatitta atuaqatittaluunniit upperisatsinnik oqaluttuunnissaannut? Abrami Karanimiiginnarnianngilaq Guutip peqqussutaa puigorluinnarlugu. Piffissaq atorluarsimavaa. Maannali ingerlaqqittariaqarpoq. „Taava Abrami aallarpoq soorlu [Jehovap] taama peqqugaani.“ — 1 Mosesi 12:4.

Eufratip kuussua ikaarneqarpoq

13. Qanga Abramip Eufratip kuussua ikaarpaa, tamannalu qanoq pingaaruteqarpa?

¹³ Abrami aallaqqittariaqarpoq. Karani qimappaa angalaqatinilu ilagalugit kimmut 90 kilometerisut ungasitsigisumukarluni.  Eufratip kuussuani Karkemisjip, itsaq illoqarfiup niuerfiusartup pingaarutillip, akiani uninngagunarpoq. Eufratip kuussua tassuuna angalaqatigiippassuarnit ikaarneqartarpoq. * Ulloq suna Abramip Eufratip kuussua ikaarpaa? Biibili naapertorlugu tamanna pivoq ukiut 430-t juutit ukiumi 1513-imi u.n.s nisanip ulluisa 14-ianni Egyptenimit aniguinerat sioqqullugu. 2 Mosesi 12:41-mi allassimavoq: „Ullormi tassanerpiaq Egyptenimut pinermik kingornagut ukiut 430-t qaangiuffianni [Jehovap] katersaarsui tamakkerlutik Egyptenimit anipput.“ Ima paasisariaqarpoq Aaperaamut angeruseq atulerpoq 1943-mi u.n.s. nisanip 14-ani, Abramip Guutip peqqussutaa naalallugu Eufratip kuussua ikaarmagu.

14. (a) Abramip uppernerup isaanik suna takusinnaavaa? (b) Ullumikkut qanoq Abramimit periarfissaqarneruvugut?

¹⁴ Abramip illoqarfik pigissaarfiusoq qimappaa. Maannali ’takusinnaalerpaa’ „illoqarfik aalajaatsunik toqqavilik“, inuiannut naalagaaffissaq naapertuilluartoq. (Hebræerit 11:10) Aap, paasissutissinneqarpallaarnani Abramip Guutip inuiaat toqujartortut utertinneqarnissaannik siunertaa annerusutigut paasiartulerpaa. Ullumikkut Guutip siunertaanik Abramimit paasisaqarnerungaarpugut. (Ussatit 4:18) „Illoqarfik“, Naalagaaffik Abramip utaqqisaa, maanna piviusunngoreerpoq. 1914-imi qilammi pilersinneqarpoq. Taamaattumik Jehovamut uppernerput tatiginninnerpullu iliuuseqarnitsigut takutissannginnerpavut?

 Nunami neriorsuutigisami inuuneq aallartippoq

15, 16. (a) Sooq Abrami qunusuittariaqarpa Jehovamut pilliivilorami? (b) Ullumikkut kristumiut qanoq Abramitut qunusuitsigisinnaappat?

¹⁵ 1 Mosesi 12:5, 6-imi allassimavoq: „Kana’aniliarput tassungalu pillutik. Abrami nuna taanna ingerlavigalugu illernartuummut Sikemimiittumut pivoq, [Moremi orpissuit eqqaannut, NV].“ Sikemi Jerusalemimit 50 kilometerit avannamut ungasitsigisumiippoq, qooqqumi naggorissumi „nunap illernartup paratiisia“-nik taaneqartumi. Kisianni „taamani Kana’anikkut nunami tassani najugaqarput“. Kana’anikkut ileqqussatigut ajortunngorsimammata Abramip ilaquttani taakkunannga ajortumik sunnerneqaqqunagit illersortariaqarpai. — 2 Mosesi 34:11-16.

¹⁶ Aappassaanik „[Jehovap] Abrami saqqummerfigaa oqarfigalugulu: ’Kinguaassannut nuna manna tunniukkumaarpara.’“ Neriorsuut nuannerluinnartoq! Soorunami Abrami kinguaassaannarmi misigisassaannik nuannaarutiginnissinnaassaguni upperluartuusariaqarpoq. Taamaakkaluartorli neriorsuummit killinneqarluni Abrami „tassani pilliiviliorpoq [Jehovamut] imminut saqqummertumut“. (1 Mosesi 12:7) Biibilimik misissuisartut ilaat ima isumaqarpoq: „Nunami aalajangersimasumi pilliivilioraanni nuna taanna piginialerpaalusooq, ima paasillugu upperisarsiorsinnaanissani isumannaarniaraa“. Pilliiviliussagaanni qunusuittariaqarpoq. Pilliiviup assigissagunarpai pilliiviliat Guutip kingusinnerusukkut Inatsisini peqqussutigisai, tassa ujaqqanik sikkigissagaanngitsunik sanaat. (2 Mosesi 20:24, 25) Kana’anikkut pilliiviliaannit allaanerulluinnarpoq. Taamaalilluni Abramip qunusuinnini takutippaa Guuti ilumoortoq Jehova pallorfigalugu, eqqaamiuminillu uumigineqarsinnaalluni ajoquserneqarsinnaallunilu. Uaguttaaq taama qunusuitsigaagut? Ilatta — immaqa ingammik inuusuttut — nangaallutik sanilimminnut atuaqatiminnulluunniit Jehovamut pallorfiginnittuunertik eqqartunngitsoortarnerpaat? Abramip maligassiuilluarnera kajumississutigitigutoq Jehovamut kiffaanitta tulluusimaarutiginissaanut!

17. Qanoq takuneqarsinnaava Abramip Jehovap aqqa oqaluussissutigigaa, tamatumanngalu ullumikkut kristumiut sumik eqqaasinneqarpat?

¹⁷ Abramip sumiikkaluaraangamiluunniit Jehovamik pallorfiginninnini pingaarnerutittarpaa. „Tassannga ingerlaqqippoq nunamut qaqqalimmut Betelip kangianiittumut. Tuperpoq Beteli killeralugu Ajilu kangileralugu, tassanilu [Jehovamut] pilliiviliorluni. [Jehovalu] aqqagut torlorfigaa.“ (1 Mosesi 12:8) Hebræerit oqaasii ’Jehova aqqagut torlorfigaa’-mik nutserneqartut isumaqarsinnaapputtaaq „Jehovap aqqa nalunaarutigaa (oqaluussissutigaa)“. Qularutissaanngilaq Abramip nakimaalluni Jehovap aqqa saniliminut Kana’anikkunnut oqaluussissutigisimassagaa. (1 Mosesi 14:22-24) Tamatumuuna eqqaasinneqarpugut sapinngisatsinnik ’aqqanik nassuerutigininnissarput’ pisussaaffigigipput. — Hebræerit 13:15; Romamiut 10:10.

18. Abramip Kana’anikkut qanoq attaveqarfigai?

¹⁸ Abrami nunat taakku uninngavigerpianngilai. „Taama Abrami nooqattaarluni ingerlaarpoq Nunallu Kujasissortaanut pilluni“ — tassa Negebimut inoqajuitsumut Judap qaqqaata kujataaniittumut. (1 Mosesi 12:9) Nooqattaaramik tikitatillu tamaasa Jehovamut pallorfiginnittuunerminnik nalunaarfigigamikkik Abrami inoqutaalu „nassuerput nunami takornartaallutik allamiuullutillu“.  (Hebræerit 11:13) Tamatigut sanilitik Guutimik nalusut attaveqarfigivallaarnaveersaartarpaat. Tamatumunga assingusumik ullumikkut kristumiut silarsuarmut akuliunnaveersaartariaqarput. (Johannesi 17:16) Sanilivut suleqativullu inussiarnerfigitillugit, silarsuup Guutimut takornartaasup anersaavanut assingusumik ileqqoqarnaveersaartarpugut. — Efesosimiut 2:2, 3.

19. (a) Sooq angalaannartutut inuuneq Abramimut Sarajimullu sungiukkuminaassimassava? (b) Misilinneqarnerit suut Abramip erniinnaq atortariaqalissavai?

¹⁹ Puigussanngilarput Abramimut Sarajimullu angalaannartutut inuuneq artornartoq sungiukkuminaassimassasoq. Uumasuutitik inuussutigisariaqarpaat, nerisassat Urip tuniniaasarffiini pilersugaalluartuni pisiarinagit, tupernilu najugaqarlutik illumi najoruminartumiinnatik. (Hebræerinut allakkat 11:9) Abrami suliassaqarluarpoq; uumasuutimi kiffamilu isumiginissaat ulapputigaa. Saraji qularnanngitsumik kulturimi tamatumani arnat suliarisartagaannik suliaqartarpoq: qajuusaliortarpoq, iffiortarluni, savat meqquinik qissisarluni atisassanillu mersorluni. (1 Mosesi 18:6, 7; 2 Kunngit 23:7; Ussatit 31:19; Ezekieli 13:18) Misilinneqassappulli. Erniinnaq Abramip inoqutaasalu inuunerat navianartorsiussaaq! Abramip uppernera misilinneqarnermi ataannassanerpa? (wE 15/8 01)

[Quppernerup ataani ilanngussaq]

Uku malugaagit?

• Sooq Abrami taaneqarpa ’uppertunut tamanut ataataasoq’?

• Sooq Abrami upperluartariaqarpa Uri Kaldæamiittoq qimassaguniuk?

• Abramip qanoq takutippaa Jehovamik pallorfiginninneq tamatigut pingaarnerpaatillugu?

[Atuaqqissaarnermi apeqqutit]

[Nunap assinga]

(Allassimasut qanoq inissisimanersut naqitami takuneqarsinnaavoq)

ABRAMIP ANGALANERA

Imarsuaq

Karkemisji

Karani

KANA’ANI

Uri

[Suminngaanneernera]

Pictorial Archive (Near Eastern History) Est. and Survey of Israel-imit nunap assinga tunngavigalugu

[Qupp. 13-mi assiliartaq]

Urimi inuuneq ilorrisimaarnartoq qimassaguniuk Abrami upperluartariaqarpoq

[Qupp. 16-mi assiliartaq]

Tuperni najugaqarlutik Abrami inoqutaalu nassuerput „nunami takornartaallutik allamiuullutillu“