Guutiitsunik avatangiiseqarluni Enokip Guuti inooqatigaa

DIAAVULUP inuit tamaasa Guutimit tunussitissinnaanerarpai, ilaannilu ilumut iluatsitsisutut isikkoqartarpoq. Abelip toqunerata kingorna ukiuni tallimanik untritilingajanni Jehovamut aalajaalluni kiffartortoqarsimanngilaq. Akerlianik ajortuliorajulluni guutiitsuullunilu inuuneq nalinginnaavoq.

Kinguaariit anersaakkut ajorsiartuinnartut nunarsuarmi sunniinerisa nalaani Enoki inuuvoq. Biibilimi naatsorsueriaaseq naapertorlugu ukiumi 3404-mi u.n.s. Enoki inunngorpoq. Taamani inuusut assiginagit Enoki angutaavoq Guutip iluarisaa. Jehovap kiffaanut uppersutsimikkut kristumiunut maligassiuisimasut ilaattut apustili Paulusip Enoki eqqaavaa. Enoki kinaana? Unamminiannartut suut nalaassimavai? Qanoq ililluni qaangerpai? Maligassiuinera uatsinnut pingaaruteqarpa?

Enokip inuunissaa ukiunik untritilinnik sisamanik sioqqullugu Enoship inuunerata nalaani ’Jehova aqqagut torlorfigineqartalerpoq.’ (1 Mosesi 4:26) Inuilli siulliit pinngortinneqarmatali Guutip aqqa atorneqartarpoq. Taamaattumik Enoship nalaani Guutip aqqata atorneqalernera qularnanngitsumik Jehovamik uppernikkut torlorfiginninnerunanilu pallorfiginninnermut minguitsumut ersiutaagunanngilaq. Ilisimatuut hebræerit ilaat isumaqarput Mosesimik allakkat siulliit 4:26 ima issuarneqartussaasimagaluartoq: Jehovap aqqa ’illernassusiiarlugu torlorfigisalerpaat’, imaluunniit Jehovap aqqanik ’illernarsusiiaasalerput.’ Ilaasa immaqa Jehovap aqqa imminnut allanulluunniit Guutimut qanillattorfigisinnaasamittut isigisaminnut atortarsimavaat. Immaqaluunniit Jehovap aqqa guutipilunnut atsiuttarsimavaat.

’Enokip Guuti inooqatigaa’

Enoki guutiitsunik avatangersimaneqaraluarluni Jehova ’Guuti ilumoortoq inooqatigiuarpaa’. Enokip siuaasai Seti, Enoshi, Kenani, Mahalal’eli aamma Jeredi taama oqaatigineqanngillat. Taamaassimagaluarunilluunniit Enokitut aalajangersimatigisimanngillat; taannami inooriaatsimigut allaanerulluinnarunarpoq. — 1 Mosesi 5:3-27.

Jehovap piumasaa naapertorlugu inooqatigissaguniuk ilisarisimasariaqarpaa qanittumillu attaveqarfigisariaqarlugu. Jehovap Enoki akueraa. Allaat Septuaginta-mi grækerisuumi oqaatigineqarpoq Enoki Guutimut ’iluarinartuusoq’, eqqarsaat apustili Paulusip aamma oqaatigisimasaa. — 1 Mosesi 5:22, Hebræerit 11:5.

Enokip uppernera Jehovamut attaveqarluarneranut pissutaavoq. ’Arnap kinguaassaa’ Guutimeersoq upperisimassavaa. Adami angumerisimaguniuk paasisimassavaa Guuti Edenimi inunnut siullernut qanoq iliorsimanersoq. Guutimik ilisimasaqarnerata Enoki ’kajumilluni Guutimut qanillattortippaa’. — 1 Mosesi 3:15; Hebræerit 11:6, 13.

Soorlu Enokimut taamaassimasoq — aamma uatsinnut suli taamaappoq — Jehovamut attaveqarluarneq taassuminnga ilisarisimanninnerinnaanngilaq. Ilumuunnginnerpa inuk aalajangersimasoq pingaartikkutsigu iliuutsivut eqqarsaativullu taassuma qanoq eqqarsarnerinit iliuusaanillu sunnerneqassasut? Oqaatsit iliuutsillu  ikinngutigiinnitsinnik aseruisinnaasut ingalassimassannginnerpavut, inuunitsinnilu arlaannik allannguiniarutta ikinngutigiinnitsinnut sunniutigisinnaasai eqqarsaatigissannginnerparput?

Guutimut qanittumik attaveqarnissamik kissaatitta iliuutsivut aamma sunnissavai. Iluarisaanik niluarinngisaanillu ilisimasaqarluarnissaq naammassisariaqakkatta siullersaraat. Tamatuma kingorna ilisimassummik taassumannga siulersortittariaqarpugut, iluarisaanillu iliorniarluta eqqarsaatitsigut iliuutsitsigullu ilungersortariaqarpugut.

Taamaammat Guuti inooqatigissagutsigu iluarisaanik iliortariaqarpugut. Ukiuni untritilinni arlalinni Enoki taamaaliorpoq. Enokip Guutimik ’inooqatiginninneranut’ atatillugu oqaluutip hebræerisuup atorneqartup takutippaa iliuuseriuagaq imaluunniit uteqqittuarlugu iliuuserisaq pineqartoq. (Taamaattumik ‘inooqatigiuarpaamik’ issuarneqarpoq.) Angut alla aalajaatsoq ’Guutimik inooqatiginnittoq’ tassaavoq Noa. — 1 Mosesi 6:9.

Enoki nuliaqarlunilu meeraqarpoq. Oqaatigineqarpoq ’ernertaartarlunilu panissaartartoq’. Ernerisa ilaat tassaavoq Metusalemi. (1 Mosesi 5:21, 22) Qularutissaanngilaq Enoki pisinnaasani tamaat inoqutiminik siulersuilluartuuniarsimasoq, inunnilli guutiitsunik avatangiiseqarami Guutimut kiffartornera oqitsuinnaasimanavianngilaq. Noap angutaa, Lemeki, ukiuni taakkuusuni inuusoq Enokitulli Jehovamut uppertutuaasimagunarpoq. — 1 Mosesi 5:28, 29.

Enoki qanoq aalajaattuaannarsinnaasimava? Jehovap aqqanik ataqqinaataajaatitsisut imaluunniit allat ilagisassaqqinngitsut ilagisarsimanavianngilai. Pinngortitsisup iluarinngisaasa ingalassimanissaannik aalajangersimaneranut Jehovamut qinunikkut orniguttarnera aamma iluaqutaasimajunnarsivoq.

Guutiitsunut siulittuut

Guutiitsunik avatangiiseqarluni najoqqutassiat qutsissut malittuassallugit ajornakusoorsinnaavoq. Maligassaalluinnaranili guutiitsunut eqqartuussinissamik Enoki aalajaalluni  oqaluussivoq. Guutip anersaavanik siulersorneqarluni ima siulittuivoq: „Takuat, Jehova aggerpoq illernartortaminit 10.000-ilippassuarnit iluneqarsimalluni tamanik eqqartuussiartorluni tarnillu tamaasa pillariartorlugit iliorsimaneri iluaatsut tamaasa pillugit iluaatsullu ajortuliortut akerlilersorluni oqaaserisaat soqqusaatsut tamaasa pillugit.“ — Judasi 14, 15.

Inunnut ileqqorluttunut uppinngitsunullu oqariartuut tamanna qanoq sunniuteqassava? Oqaatsit annernartut assuarlerpaluttullu taamaattut Enoki nuannarisaajunnaartissimassannginnerpaat, immaqalu mitaatigisaatillugu, asissugaatillugu sioorasaagaatillugulu? Qularnanngitsumik ilaasa nipangersivikkusussimassavaat. Enokili qunulinngilaq. Abeli iluartoq qanoq pineqarsimasoq nalunngilaa, taassumatullu qanorluunniit pisoqaraluarpat Guuti kiffartuunniarlugu aalajangersimavoq.

’Guutip peerutitippaa’

„Guutip peerutitimmani“ Enokip inuunera qularnanngitsumik navianartorsiorpoq. (1 Mosesi 5:24) Pruffiitimi aalajaatsup akeqqanit ingasattajaarussisunit naalliutsinneqarnissaa Jehovap akueriumanngilaa. Apustili Paulusi naapertorlugu ”Enoki peerutitaavoq toqu misigeqqunagu“. (Hebræerit 11:5) Ilaat oqartarput Enoki toqunngitsoq Guutilli qilaliartikkaa, tassanilu inuuinnartoq. Jiisusili paatsuugassaanngitsumik ima oqarpoq: ”Allamik qilammut pavunnartoqanngilaq, qilammit aqqartoq kisimi, tassa Inuup Ernera.“ Qilaliartussanit Jiisusi ’siuartuuvoq’. — Johannesi 3:13; Hebræerit 6:19, 20.

Taavami Enoki qanoq pineqarpa? ’Toqu misigeqqunagu peerutitaammat’ isumaqarsinnaavoq siulittuinerani Guutip qiimmattartingaariarlugu suli taama misigisimasoq inuunera kipitikkaa. Taamaalilluni toqup annernartui Enokip misiginngilai. Tamatuma kingorna ’sumiinnera ilisimaneeruppoq’, qularnanngitsumik Mosesip timaata toqungasup peersimaneratut Enokip timaa toqungasoq Jehovap peersimammagu. — 5 Mosesi 34:5, 6.

Enoki ukiuni 365-ini inuuvoq — nalimini inuusunit sivikinnerujussuarmik. Pingaarneruvorli naggatissamut allaat aalajaammat, nalunngilarpullu Enoki aalajaassimasoq, tassami nalunngilarput Enoki ”peerutitaatinnani Guutimit iluarisaasimasoq”. Tamatuminnga Enoki qanoq paasitinneqarsimanersoq Biibilimi oqaluttuarineqanngilaq, toqutinnanili Guutimit akuerisaanerminik uppernarsaavigineqarpoq, makinnissamilu Jehovap eqqaamassagaa qularinngissinnaavarput.

Enokitut upperit

Inuit Guutimik mianerinnittut uppernerat ilaarsinnaavarput. (Hebræerit 13:7) Uppernikkut Enoki nunarsuarmi siullersaalluni aalajaalluni Guutimut pruffiititut kiffartorpoq. Enokip nalaani nunarsuarmi pissutsit ullumikkutut ipput — nakuusernernik, iluaassusermik guutiitsuussusermillu ulikkaarpoq. Enokili allaaneruvoq. Uppernermik piviusumik uppersuseqarluni Guutimik mianerinninnermini maligassiuilluarpoq. Oqariartuummik pingaarutilimmik Jehovap oqaluussitippaa, taamaaliornissaanullu nukissaanik tunivaa. Suliassani taanna sapiilluni Enokip suliaraa, akeraanullu Jehovap sernissorpaa.

Enokitut uppersuseqarutta Jehovap ulluni kingullerni makkunani oqaluussinissatsinnut nukissatsinnik tunissavaatigut. Akerlilersuinermik nalaataqaraangatta ikiortassavaatigut, guutimillu mianerinninnitta guutiitsunit allaanerutissavaatigut. Uppernerup Guuti inooqatigalugu ingerlatissinnaalersissavaatigut, uummataatalu nuannaarutissaanik iliuuseqartissalluta. (Ussatit 27:11) Uppernikkut nunarsuarmi guutiitsumi Enokip Guuti inooqatigisinnaasimavaa, uaguttaarlu aamma taamaaliorsinnaavugut. (wE 15/9 01)

[Qupp. 27-mi issuagaq]

Enokip Allagai Biibilimi issuaavigineqartarpat?

Enokip Allagai Biibilip ilaatut akuerisaanngillat. Eqqunngitsumik Enokimut allagaritinneqarput. Ukiut untritillit aappaanni siuliannilu ukiunik naatsorsuisarnerput sioqqullugu allagaapput, Mosesimillu Allakkani siullerni Enoki pillugu oqaluttuamik nangitsiniarnerugaluarlutik piviusorsiunngitsut juutillu oqaluttualiatoqaannik uppernarsarneqanngitsunik oqaluttualiaallutik. Tamannaannarluunnit tunngavigalugu Guutip oqaasianut isumassarsiarititaasumut asannittut tunuartippaat.

Biibilimi Judasip allagai kisimik Enokip oqaasiinik siulittuutaasunik imaqarput: ”Takuat, Jehova aggerpoq illernartortaminit 10.000-ilippassuarnit iluneqarsimalluni tamanik eqqartuussiartorluni tarnillu tamaasa pillariartorlugit iliorsimaneri iluaatsut tamaasa pillugit iluaatsullu ajortuliortut akerlilersorluni oqaaserisaat soqqusaatsut tamaasa pillugit.“ (Judasi 14, 15) Ilisimatuut misissueqqissaartartut isumaqarput nalimini inuusunut guutiitsunut Enokip siulittuutaa Enokip Allagaaniit issuaanerusoq. Allakkat tutsuviginanngitsut Judasip atorsimassanerpai?

Enokip siulittuutaa Judasip sumit ilisimaneraa Biibilimi oqaatigineqanngilaq. Qangarsuarli oqaluttuarineqartartoq tutsuiginartoq issuarsimasinnaavaa. Faraop illussaarsuani angakkut marluk Mosesimik akerlilersuisut, Jannesi aamma Jambresi, Mosesillu allagaani siullerni atiisigut taaneqanngitsut Paulusip eqqaagamigit assingusumik iliorpoq. Enokip Allagaanik allattoq taamatut paasiniaanissaminik periarfissaqarsimappat Judasi aamma taamaaliorsimasinnaannginnerluni? * — 2 Mosesi 7:11, 22; 2 Timotheusi 3:8.

Judasip qanoq ililluni Enokip siulittuutaanik paasisaqarsimanera apeqqutaavallaanngilaq. Judasip allagaani Guutimit isumassarsiarititaasuni siulittuutip taassuma tutsuiginarnera uppernarsarneqarpoq. (2 Timotheusi 3:16) Guutip anersaava illernartoq ilumuunngitsumik allaaserisaqannginnissaanut illersuutaavoq. (wE 15/9 01)

[Quppernerup ataani ilanngussaq]

[Qupp. 28-mi assiliartaq]

Jehovamit oqariartuut Enokip sapiilluni ingerlateqqippaa.