Aqqutikkut ’narlusuukkoorit’

„PILLUARPOQ iluartoq! Taanna iluanaartussaavoq, suliami inerititai inuulluutigissavai,“ pruffiiti Esaja allappoq. Aamma oqarpoq: „Iluartup aqqutaa narlusuujuvoq.“ (Esaja 3:10; 26:7) Tassa suliavut inerititaqarluassappata Guutip isaani eqqortuliortariaqarpugut.

Qanorli aqqutikkut narlusuukkoorsinnaavugut, assuarnaatsukkoorluta? Taamaaliorutta suna angussavarput? Guutillu najoqqutassiai naapertuilluartut maleruarutsigit allat qanoq iluaqutigissavaat? Biibilimi Ussatit kapitali 10-mi Israelikkut kunngiata Salomop apeqqutit taakku akivai iluartut [naapertuillluartut] iluanngitsunut [guutiitsunut] illua-tungiliullugit. Oqaatsit ‘peqqusersuitsoq’ aamma ‘iluartoq’ 13-eriarluni atorpai, taakkua ilaat qulingiluat versini 15-imiit 32-mut. Taamaattumik Ussatit 10:15-32-p misissorneri pissarsinassapput. *

Oqaaqqissaarut aalajangiuguk

Salomop uparuarpaa peqqusersuitsuunerup pingaaruteqarnera. Oqarpoq: „Pisuup peqangaarutai inumminnut ipput pallittaalisatut isumannaatsutut, piitsut piitsuussusertik ajunaarutigisarpaat. Peqqusersuitsup pissarsiai inuutitsisuupput, peqquserluttup iluanaarutai ajortuliortitsisuupput.“ — Ussatit 10:15, 16.

Inuunermi nalorninartunut pigisat illersuutaasinnaapput, soorlu illoqarfik pallittaalisalik innuttaasunut illersuutaasinnaasoq. Pissutsinilu ilimaginngisani piitsuuneq ajunaarutaasinnaavoq. (Oqaluussisartup oqaasii 7:12) Kunngilli Salomop pisuujunerup piitsuunerullu navianaatigisinnaasai aamma eqqarsaatigisinnaavai. Pisuup pisuussutini kisiisa tunaarisinnaavai isumaqarluni pigissaarnini ‘qarmarsuartut portusuutut issasut’. (Ussatit 18:11) Piitsorlu isumaqarsinnaavoq piitsuunermi siunissamut neriuutissaqartinngikkaani. Arlaannaataluunniit  Guutimi tusaamasaalluarnissaq sulissutiginngilaa.

Akerlianik naapertuilluartoq nunap piisigut peqangaaraluartoq piitsuugaluartorluunniit assuarnaassusiata inuuginnartissavaa. Qanoq? Pigisani naammagissavai aningaasatigullu atukkani Guutimut attaveqarnerminut sunniuteqartinnagit. Pisuujugaluaruni piitsuugaluaruniluunniit maanna inuunini nuannaarutigissavaa siunissamilu naassaanngitsumik inuunissaq neriuutigissallugu. (Jobi 42:10-13) Guutiitsoq pisuujugaluarluni taamatut nuannaarutissaqanngilaq neriuutissaqarnanilu. Pisuussutit illersuutaasinnaanerat qujamasuutiginagu Guutillu piumasaanut naapertuuttumik inuunani pisuussutini inuunerluutigai.

„Oqaaqqissaarummik aalajangiussineq tassa inuunermut aqqutaasoq, ilitsersuummilli asiginnaasoq tammartitsisuuvoq,“ Salomo nangippoq. (Ussatit 10:17) Biibilimut tunngasumik oqaaseqartup uparuarpaa versi taanna marloqiusaasumik paasineqarsinnaasoq. Ima paasineqarsinnaavoq oqaaqqissaarummik ilassinnittoq naapertuilluartorlu inuunerup aqqutaaniittoq tusaajumanngitsorli inuunerup aqqutaaniikkunnaarsimasoq. Versili ima aamma paasineqarsinnaavoq: „Oqaaqqissaarummik aalajangiussineq inuunermut aqqutissiuussivoq [maligassiuilluarnermigut], ilitsersuummilli asiginnaasoq tammartitsisuuvoq.“ (Ussatit 10:17, New International Version) Paasinneriaatsini taakkunani marlunni oqaaqqissaarinerup malinnissaa ilitsersuutillu asiginnannginnissaa pingaaruteqarpoq.

Asannigit uumissuinak

Taava Salomo saqqummiussivoq ussatinik taamaaqatigiinnik marlunnik, ussatillu kingulliup siulleq kimeqarnerulersippaa. Oqarpoq: „Qarluni salluliortuniippoq uumissuineq.“ Uumissuisup uumissuinini iluareqqusaarluni oqaaseqarnikkut isertorniaruniuk avatangiisini peqquserluffigissavai — ‘qarlui sallussapput’. Taava Salomo nangippoq: „Sianiitsuuvoq oqaasipalaanik angallassisartoq.“ (Ussatit 10:18) Inuit ilaasa uumissuinertik isertornagu uumissugartik eqqunngitsumik unnerluutigisarpaat nikanarsarluguluunniit. Taamaaliorneq sianiitsuliorneruvoq, ajortitsiniaanerummi ajortumik pineqartoq allanngortinneq ajorpaa. Naalaarluartup mamarliisup ajortitsiniaanera paasissavaa ataqqiunnaarlugulu. Tassa ajortitsiniaasoq imminut ajoqusiinnartarpoq.

Naapertuilluartoq salloqittaasanngilaq mamarliisarnanilluunniit. Guuti Israelikkunnut oqarpoq: „Qatanngutit uumissussanngilat uummatikkut.“ (3 Mosesi 19:17) Jiisusillu tusarnaartini oqaaqqissaarpai: „Akeqqasi asasigit, ilissinnillu qinuginnittut qinnussigit. Ataatassinnut qilanniittumut qitornaaqqullusi.“ (Matthæusi 5:44, 45) Asanninneq uumissuineq pinnagu uummammiugigaanni pitsaanerungaarpoq.

‘Oqaasissatit killilersimaakkit’

Kunngi silatuup oqaasissat killilersimaartariaqarnerat erseqqissarpaa ima oqarluni: „Oqaluppallaaraanni unioqqutitsinngitsoorneq ajornartarpoq, silatuujuvoq oqaasissaminik killiliisinnaasartoq.“ — Ussatit 10:19.

„Silaatsup oqaaserpassuit atortarpai.“ (Oqaluussisartup oqaasii 10:14) „Qarnanit sianiitsuussuseq aniasarpoq.“ (Ussatit 15:2) Imaanngilaq oqaluinnaavissut tamarmik sianiitsuusut. Oqaluinnaavissorli oqaatissuariataarsinnaavoq sallumilluunniit ingerlatitseqqilluni, sianiitsumik oqalunneq tusaamanerlutsitsigajussinnaavoq, ajuallatsitsigajussinnaalluni sukanganartsitsigajussinnaallunilu, aap allaat timikkut ajoqusiigajussinnaalluni. Aap, „oqaluppallaaraanni unioqqutitsinngitsoorneq ajornartarpoq“. Aammattaaq sunik tamanik oqaaseqarfiginnittut uuminartarput. Taamaattumik oqaluinnaavittuussanngilagut!

Oqaasissaminik killilersimaarinnittoq ilumuunngitsunik ingerlatitseqqinngiinnanngilaq aammattaarli silatusaarpoq. Eqqarsaqqaarluni oqaluttarpoq. Jehovamut najoqqutassiaanullu asanninnermik kajumissisinneqarluni tullerminillu ilumoorluni ikiuerusukkami  oqaatsimi allanut qanoq sunniuteqarsinnaaneri eqqarsaatigisarpai. Inussiarnersumik, asannittumik eqqarsaqqaarlunilu oqaluttarpoq, oqaatsini allanut iluarinartuutillugit iluaqutaatillugillu. Taava tassaalissapput „iipilit kuultiusut assilissani sølviusuniittut“. — Ussatit 25:11.

‘Amerlasuunut paarsisuugit’

„Iluartup oqaata assigaa sølvi pitsaanerpaaq, iluanngitsulli uummataat atorfissaqanngillat,“ Salomo nangippoq. (Ussatit 10:20) Naapertuilluartup oqaasii minguitsuupput — sølvitut pitsaanerpaatut akuiakkatut illutik. Ingammik Jehovap kiffai Guuti pillugu ilisarsinermik inuunartumik allanik avitseqateqaraangamik taamaassapput. Ajoqersuisorsuarmik, Jehova Guutimik, ilinniartitaapput, tunineqarput „ajoqersukkap oqaanik qasusut ikiorsersinnaaqqullugit oqaatsinnik“. (Esaja 30:20; 50:4) Aap, oqaat sølvitut pitsaanerpaatut ippoq Biibilimi ajoqersuutit oqaluussissutigigaangamikkik. Oqaasii guutiitsut uummammiugisaannit ilumoorusuttumut naleqarnerungaarput. Taamaattumik Guutip naalagaaffia suliaalu tupinnangaartut pillugit oqaluttuapallanniarta!

Naapertuilluartoq avatangiisiminut iluaqutaavoq. „Iluartup qarlui amerlasuunut tassaapput nersutaatinik paarsisut, sianiitsulli isumaatsuunertik toqussutigisarpaat.“ — Ussatit 10:21.

Naapertuilluartoq qanoq ililluni ‘amerlasuunut paarsisuua’? Tassani siulersuineq inuussutissaqartitsinerlu pineqarput, savaatinik paarsisoq assigalugu. (1 Samueli 16:11; Tussiaat 23:1-3; Erinarsugassiat Pingaarnersaat 1:7) Naapertuilluartup allat naapertuilluartup aqqutaanut siulersortarpai, oqaasiilu tusartunut inuussutaapput. Pilluarnerulissutigaat, nalerisimaarnerulissutigalugu, immaqalu naassaanngitsumik inuussutigilersinnaallugu.

Sianiitsormi? Isumaatsuugami pissutiginiagai ajunngitsortaqanngillat siunissanilu isumakuluutiginagu. Kingunissai eqqarsaatiginagit piumasaminik iliortarpoq. Naapertuilluartoq allanik inuuginnartitsisartoq, isumaatsoq imminulluunniit inuutissinnaanngilaq!

Kanngunartuliornaveersaarit

Inuup kinaassusia nuannarisaasigut nuannarinngisaasigullu paasinarsigajuppoq. Tamanna kunngi Salomop uparuarpaa ima oqarluni: „Kanngunartuliorneq sianiitsup nuannarisaraa, silassorissup ilisimassuseq tipaatsuutigisarpaa.“ — Ussatit 10:23.

Ilaasa kanngunartuliorneq pinnguarnertut „nuannariinnarlugu“ iliuutsitut isigisarpaat. Iliuuserisatik Guutimut nassuerutigisariaqarsorinngilaat, ajortuliorsorinatillu. (Romamiut 14:12) Eqqarsariartaasiat mumingangaarami ajortuliornitik Guutimit takuneqarsinnaasorinngilaat. Ima oqarpullusooq: „Guuteqanngilaq.“ (Tussiaat 14:1-3; Esaja 29:15, 16) Sianiitsorpallassusia!

Silassorissulli nalunngilaa kanngunartuliornerit ‘nuannaarniutaanngitsut’. Nalunngilaa Guutip iluarinngikkai tassungalu attaveqarnerminnut ajoqutigisinnaallugit. Sianiitsuliorneruvoq inummik imminut ataqqiunnaartitsisaramik, aappariinnernik aseruisaramik, isumammik timimillu ajoqusiisaramik anersaakkullu peqqinnannginnamik. Ilisimassuseqarnermut ersiutaavoq kanngunartuliornaveersaarneq aamma aleqamut asasamut attaveqarnertulli ilisimassusermik ineriartortsitsineq. — Ussatit 7:4.

Eqqortumik tunngaviliorit

Salomop inuunerup eqqortumik tunngaveqartinnissaata pingaaruteqarnera erseqqissarpaa ima oqarluni: „Iluanngitsoq eqqorneqartarpoq annilaanngatigisaminit, iluartorli tunineqartarpoq kissaatigisaminik. Anorersuaq pitorarpat iluanngitsoq tingitaasussaavoq, iluartorli tunngaveqarpoq ataavartussamik.“ — Ussatit 10:24, 25.

Guutiitsoq allanik annilaangatitsisinnaavoq, naggataatigulli nammineq annilaangalissaaq. Najoqqutassiat naapertuilluartut aarlerinanngitsut tunngaviginnginnamigit, nammineq illutut uppeqqajaasutut anorersuarmi uppittutut ippoq. Tatineqaleruni ajutuussaaq. Akerlianilli naapertuilluartoq Jiisusip oqaatigisaatut ippoq: „Assigissavaa angut silatooq qaarsumi illuliortoq.“ Jiisusi nangippoq: „Siallersorsuanngorpoq kuussuillu imartusillutik; anorersuillu pitorarlutik illu taanna eqqorpaat, uppinngilarli qaarsumut tunngavilerneqarsimagami.“ (Matthæusi 7:24, 25) Taamaaliortoq aalajaassaaq — eqqarsaatai iliuusiilu najoqqutassianik Guutimeersunik tunngaveqarput.

Guutiitsut naapertuilluartullu assigiinngissutaannik taasaqaqqitsinnani Salomo mianersoqqusivoq. Naatsunnguugaluarluni pingaannginnerunngilaq. Oqarpoq: „Soorlu seernartoq kigullunnartuusoq pujorlu isillernartuulluni, taama sulisitsisiminut ippoq kiffaq eqiasuttoq.“ (Ussatit 10:26) Seernartoq kigutinut iluaappoq. Seernarnera mamaappoq kigutinullu misikkarissisitsisarluni. Pujoq isinut qasilinnarpoq. Taamatut assersuussinerup takutippaa eqiasuttumik sulisussarsisup taasaqartulluunniit nammineq ugguutigissagaa annaasaqaatigissagaalu.

„[Jehova] assuarnaatsumik ingerlasut sernissortigaat“

Israelip kunngia nangippoq: „[Jehovamik] mianerinninneq inuunermik sivitsortitsisarpoq, ukiulli iluanngitsut inuuffigisaat sivikillineqartarput. Iluartut pisassaraat tipaatsunneq, iluanngitsulli neriuutaarunneq.“ — Ussatit 10:27, 28.

Naapertuilluartoq Guutimik mianerinninnermik siulersortittarpoq eqqarsaatiminilu, oqaatsimini iliuutsiminilu Jehovamut iluaritinniartarluni. Guutip isumassorpaa ilimagisaalu eqquutitittarlugit. Guutiitsorli guuteqarnani inuuvoq. Neriuutai piviusunngornarsorinarsinnaapput, piffissamili sivikitsuinnarmi taamaappoq ulluimi ikilisinneqarajupput nakuusertoqarneratigut inooriaatsiminilluunniit nappaateqalerneratigut. Toquguni neriuutaarutissaaq. — Ussatit 11:7.

„[Jehova] assuarnaatsumik ingerlasut sernissortigaat, pinerluttunulli aseruutissaavoq,“ Salomo oqarpoq. (Ussatit 10:29) Assuarnaatsumik ingerlasut taaneqarmata pineqanngilaq inuunitsinni aqqutigisarput, pineqarporli Guutip inunnut iliuuseqartarnera. Mosesi oqarpoq: „Qaarsuuvoq Naalagaq, naammalluinnartuupput suliai, innarluitsuupput aqqutigisai tamarmik.“ (5 Mosesi 32:4) Guutip aqqutigisai innarluitsuusut naapertuilluartunut toqqissisimanarput guutiitsunullu ajunaarutaallutik.

Ilumut Jehovap innuttani sernissortarpai! „Iluartoq orloqqajaanngisaannassaaq, iluanngitsulli nunami najugaqassanngillat. Iluartup ilisimassutsip inerititai qanermiorai, oqaq salloqittaagajuttoq kipillugu peerneqassaaq. Iluartup qarlui iluarinassusermik ilisimasaqartuupput, iluanngitsulli qarna peqquserlunnermik paasisimasaqartuuvoq.“ — Ussatit 10:30-32.

Naapertuilluartoq ingerlalluassaaq. Assuarnaassutsip aqqutaatigoorami pilluaqqusaassaaq. Aap, „[Jehovap] pilluaqqusinera pisuunngortitsisarpoq, suleruloorneq pisuunerulersitsisanngilaq.“ (Ussatit 10:22) Qanortoq najoqqutassiat Guutimeersut naapertorlugit inuujuarta. Qanortoq oqaasissagut killilersimaartuartigit oqarpullu allanut iluaqutigitillugu Guutip oqaasianeersunik sallusuissutinik inuunartunik oqaluussinikkut assuarnaassutsillu aqqutaanut siulersuinikkut. (wE 9/15 01)

[Quppernerup ataani ilanngussaq]

[Qupp. 26-mi assiliartaq]

Oqqap „sølvi pitsaanerpaaq“ assigisinnaavaa