Guuti piviusoq tatigaajuk?

Ilisimasassarsiortut Amerikamiut uumasunik pinngortitanillu ilinniagaqarnermut tunngasumik katersugaasiviannit New York-imiittumit aallartitat misissuiffigaat issittumi nuna, Robert E. Peary-ip ukiut arfineq-marluk siornatigut tassa 1906-mi takusimaneragaa.

CAPE Colgate-miit Amerikap avannarliup avannaata kitikanniata nuuaniit, Peary ungasissumi qaqqat inngiitut isikkulinnik takusaqarsimavoq. Nuna taanna Crocker-ip nunaanik atserpaa, ilisimasassarsioriartornerminut tunngatillugu tunissuteqarsimasut ilaat atsiullugu. Ilisimasassarsiornermi tulliuttumi peqataasut qaqqat, qooqqut qaqqallu inngii apummik qallersimasut takullugit tulluussimassaqaat. Ajoraluartumilli paasileriallarpaat takusartik sikujuitsumi avannarlermi puikkarnerinnaasoq! Silaannarmi takusamit Peary salloqittarneqarpoq, maannalu ilisimatusariat nutaat piffissaq, nukiit aningaasallu misissugassamut piviunngitsumut atulussinnarpaat!

Ullumikkut amerlasuut guutit piviusuusorisatik pallorfigalugit piffissaq nukiillu atortarpaat. Apustilit nalaanni guutit soorlu Hermesi Zeusilu pallorfigisaapput. (Apustilit Suliaat 14:11, 12) Shintosiornermi, hindusiornermi guutisiornernilu allani guutit millionillit pallorfigisaapput. Ilumoorpoq Biibilimi allassimammat ’guuterpassuaqartoq naalagarpassuaqarlunilu’. (1 Korinthimiut 8:5, 6) Guuterpassuit tamakku pivusuuppat?

Guutit ’annatsitsisinnaanngitsut’

Amerlasuut guutimik pallorfiginninnerminnut assilissat assersuutitullu atortut atortarpaat. Assilissanik taakkuninnga tatiginnittunut taakkuluunniit aqqutigalugit qinusartunut guutit taakku inunnit pissaaneqarnerupput, pallorfiginnitsitik akilersinnaallugit navianartunilluunniit aniguisissinnaallugit. Taamaaliorsinnaappalli? Guutit taamaattut pillugit tussiaasiortoq oqarpoq: „Inuiaat guutiliaat sølviupput kuultiullutillu, sananeqartut inuit assaannit. Qaneqaraluarlutik oqalunneq saperput,  iseqaraluarlutik takunninneq saperput, siuteqaraluarput tusaasinnaanatilli, anersaartunngillalluunniit qanermikkut.“ Tassa guutiupput ’annatsitsisinnaanngitsut’. — Tussiaat 135:15-17; Esaja 45:20.

Qularnanngilaq guutilianik sanasut sanaatik uumassusilittut pissaanilittullu isigisaraat, taakkuninngalu pallorfiginnittut taakku tatigisarlugit. Guutipiluk taamaattoq pillugu pruffiiti Esaja oqarpoq: „Ersukkiuppaat ingerlallugulu; inissippanni iniminiiginnassaaq tassannga aalariassanani.“ Nangipporlu: „Suaartaraluarpanni akissanngilaq, annikilliuutaannit annaatissanngilai.“ (Esaja 46:7) Eqqortorli tassaavoq guutiliaq uumassuseqanngimmat, taamaattuassallunilu qanorluunniit pallorfiginnittaasa tatigitigigaluarpassuk. Assilissat qiperukkat guutiliallu kuisat ’guutipiluliaannaapput oqajuitsut’. — Habakkuki 2:18.

Ullumikkut nalinginnaasuuvoq inuit, soorlu filmiliaritittartut, arsartartut, politikkimi upperisarsiornermilu siulersuisut ataqqineqartarnerat qummullu isigineqartarnerat „nuannaartorisaalertarnerallu“. Amerlasuunullu aningaasat aamma guutiupput. Tamanut atatillugu piginnaaneqarfiginngisaminnik piginnaaneqarsorineqarput. Pallorfiginnitsimik neriugisaat tunniussinnaanngilaat. Assersuutigalugu pisuussutit, ajornartorsiuterpassuarnut aaqqiissutissaasorinartarput, ’nakutitsiniutaannaapulli’. (Markusi 4:19) Misissueqqissaartartoq aperisimavoq: „Piviusoq una qanoq nassuiassavarput, inuppassuit anguniarsimasaat ajornartorsiutiminnullu aaqqiissutisaasorisaat pakatsinermiit aliasunnermut kinguneqarsimammat?“ Aap, pisuussutinik noqqaassutiginnikkaanni naleqavissut, soorlu peqqissuseq, ilaqutariinneq nalerisimaarnartoq, qanimut ikinngutit pinngortitsisumullu attaveqarluarneq annaaneqarsinnaapput. Paasinarsivoq guuti taanna guutisiorfigisaat ’piunngitsuusoq’. — Jona 2:9.

„Nipimik tutsiuttoqanngilaq”

Sianiitsorpallanneruvoq piunngitsoq piusutut torlorfigalugu. Eliap nalaani ba’alisiortut tamanna misigisimasaminnit ajungaartumit ilikkarpaat. Upperilluinnarpaat guutip ba’alip inneq qilammiit nakkartillugu nersutit pilliutissat pilliivimmiittut nungullugit ikikkarsinnaagai. ’Ba’alip aqqa torlorfigaat ullaamiit ulloqeqqanut oqarlutik: „Ba’ali, akitigut!“’ Ba’ali siuteqarpa tusaasinnaalluni, qaneqarpa oqalussinnaalluni? Oqaluttuaq nangippoq: ’nipimik tutsiuttoqanngilaq akisoqarnanilu’. Aap, ’nissappallattoqanngilaq.’ (1 Kunngit 18:26, 29) Ba’ali guutiunngilaq piviusoq, uumasoq sulisinnaassuseqartorlu.

Guutip ilumut piviusuusup akuerinissaata pallorfiginissaatalu pingaaruteqarluinnassusia! Aperisoqarsinnaavorli, Guuti piviusoq kinaagami? Taassumunngalu tatiginninneq qanoq iluaqutaasinnaava?

[Qupp. 3-mi assiliartat]

Pearyp ingiaqataa Egingwah ungasissumut nunamik takusassarsiortoq.

Robert E. Peary

[Suminngaanneernera]

Egingwah: Atuakkamiit The North Pole: Its Discovery in 1909 Under the Auspices of the Peary Arctic Club, 1910; Robert E. Peary: NOAA

[Qupp. 4-mi assiliartat]

Amerlasuut silarsuup nuannaartorisanngortitaanit salloqittagaapput.