Jehova tatigiuk — Guuti piviusuusoq

Unnukkut qilaap tungaanut nuiaqanngivissumi isiginnaarnikuuit ullorissallu kisissaanngitsut uisorilasut tupigusuutigalugit? Pinngorsimanerat qanoq nassuiassaviuk?

UNNUAMI nipaatsumi ullorissat Israelip kunngianut, Daavimut, oqaluppullusooq allatsillugulu: „Qilaap oqaluttuaraa Guutip naalannassusia, qilaanngusaasap nalunaarutigaa assaasa piliaat.“ (Tussiaat 19:2) Daavi isumaqatigisariaqarparput Pinngortitsisoq, pinngortitaq pinnani, qinngaqqunnanngitsoq pigissallugit „naalannaat ataqqinaallu pissaanerlu“. — Saqqummersitat 4:11; Romamiut 1:25.

’Tamanik sanasoq tassaavoq Guuti,’ Biibilimi allassimavoq. (Hebræerit 3:4) Guuti ilumoortoq, ’aqqa tassaasoq [Jehova], Qutsinnerussaartuuvoq nunarsuarmi tamarmi.’ (Tussiaat 83:19)Takorluugaannaanngilaq — „puikkarnerunanilu“. Jiisusi Kristusi ataatani qilammiusoq, Jehova, pillugu oqarpoq: ’Uannik aallartitsisoq ilumoortuuvoq.’ — Johannesi 7:28.

Jehova — siunertaminik piviusunngortitsisoq

Guutip aqqa asseqanngitsoq, Jehova, Allakkani Hebræerisuuginnarni 7000-riarluni allassimavoq. Aqqata nammineq nalunaarpaa piusuusoq. Aqqa isumaqavippoq „-nngortitsivoq“. Taamaalilluni siunertaminik piviusunngortitsisartutut ilisaritippoq. Mosesip Guutip aqqa apeqqutigimmagu, atermi qanoq isumaqarnera Jehovap erseqqinnerusumik nassuiarpaa oqarluni: „Tassaavunga uangaasoq.“ (2 Mosesi 3:14) Rotherhamip nutsigaani ima allassimavoq: „Iluarisara naapertorlugu qanorluunniit ilissaanga.“ Jehova, siunertaminik neriorsuutiminillu iluartunik piviusunngortitsinissaminut pisariaqavissoq naapertorlugu ’taamaattunngortissaaq’, imaluunniit ’aalajangerpoq taamaattunngortissalluni’. Tamatumunnga naapertuuttumik taaguuterpassuaqarpoq, soorlu assersuutigalugu Pinngortitsisoq, Ataataq, Naalagaq kisimi oqartussaasoq, Paarsisoq, Katersaarsuit Jehovaat, Qinnutinik tusartartoq, Eqqartuussisoq, Ajoqersuisorsuaq, Utertitsisoq. — Eqqartuussisut 11:27; Tussiaat 23:1; 65:3; 73:28; 89:27; Esaja 8:13; 30:20; 41:14; 42:5.

Guutip ilumoortup kisimi eqqortumik Jehova aterisinnaavaa, kialuunniimmi allap pilersaarutimi piviusunngornissaat qulakkeersinnaanngilaa. (Jaaku 4:13, 14) Jehova kisimi oqarsinnaavoq: „Soorlumi sialuit qaniillu nakkartartut qilammit tassungalu utissanatik nunali masatsertarlugu, inerititaqalersittarlugu naalersoqalersittarlugulu, tunniussaqartarlutik siaruartigassanik siaruarteriumasunut inuussutissanillu neriumasunut, taama ippoq oqaasera qaninnit anisoq: „Susaarluni uannut utissanngilaq, kisianni suliareqqusakka suliarissavai naammasseqqusakkalu naammassissallugit.“ — Esaja 55:10, 11

 Jehovap siunertaasa piviusunngornissaat ima qularnaatsigaaq, inunnut piviusuunngitsutut ittut Jehovamut piviusuupput. Aaperaat, Iisaaq Jaakulu toqoriikatattut Jiisusip suli inuusutut eqqartorpai, oqarami: „Guutimi toqusut Guutiginngilaat, inuusulli Guutigaat, taassumunnga tamarmik inuummata.“ (Lukasi 20:37, 38) Ataataanerpaat aalajaatsut taakku pingasut toqoreerput, Guutimilli makitinneqarnissaat ima qularnaatsigimmat taassuma isimini inuusutut isigilereerpai. Inuup pinngortitaaqqaartup issumit pinngortinneranit taakkua uummarteqqinnissaat Jehovamut ajornarnerunavianngilaq! — 1 Mosesi 2:7.

Apustili Paulusi Jehovap siunertaminik piviusunngortitsiumaarneranik allamik assersuuteqarpoq. Biibilimi Aaaperaat ’inuiaqatigiippassuarnut ataatatut’ taaneqarpoq. (Romamiunut 4:16, 17) Abrami suli meeraqalinngikkallarmat aqqa Jehovap Aaperaamut allanngortippaa, isumaqartoq „amerlasoorpassuarnut ataataasoq“. Atip tamatuma isumaa Jehovap piviusunngortippaa tupinnartuliornikkut aappariit utoqqalisut, Aaperaat Saralu, kinguaasiorsinnaalerseqqillugit. — Hebræerit 11:11, 12.

Jiisusip, pissaanermik oqartussaassutsimillu tunineqangaarsimasup, inuinnaat paasisinnaasaanniit qutsinnerujussuarmit piviusut oqaluuserai. Naak ikinngutigilluakkani Lazarusi toqungagaluartoq, ajoqersukkaminut oqarpoq: „Ikinnguterput Lazarusi sinippoq, itersariartussavarali.“ (Johannesi 11:11) Sooruna Jiisusip toqungasoq siniinnartutut taagaa?

Jiisusi Lazarusip nunaqarfianut, Betaniamut, pigami ilivermukarpoq peqqusillunilu ujarak ilerrup isertarfiata matua peeqqullugu. Nipituumik qinoreerami, eqqaminiittut isigitillugit peqqusivoq: „Lazarusi, maanga anigit!“ Taava „toqusoq anivoq isigai assaalu annoraaminernik nimersimallutik kiinaalu nermussiffigisimalluni.“ Jiisusi oqarpoq: „Nermussaajarsiuk, pisullilu!“ (Johannesi 11:43, 44) Tassa Jiisusip Lazarusi makitippaa — angut ulluni sisamani toqungasimasoq uummarteqqippaa! Jiisusi kukkunngilaq oqarami Lazarusi siniinnartoq. Jehovap Jiisusillu isaanni siniinnartutut ippoq. Jiisusip Ataatatalu qilammiittup piviusut sammivaat.

Neriugisavut Jehovap piviusunngortissinnaavai

Guutipiluit peqquserluttut susinnaanngitsut Guutillu ilumut piviusuusup assigiinngissusii! Guutipilussiortut guutitik inunnit qutsinnerusumik piginnaaneqarnerartarlugillu pissaaneqarnerartarpaat. Qanorluunniilli ataqqitigigaluarpatigit pallorfigitigigaluarpatigillu guutipiluit tupinnartuliorsinnaalernavianngillat. Jehovalli kiffani qangalili toqusimasut suli inuusutut eqqortumik eqqaasinnaavai, uummarteqqissinnaagamigit. „[Jehova] ilumut Guutiuvoq,“ kiffanilu salloqittanngisaannarpai. — Jeremia 10:10.

Tuppallernaqaaq nalunagu, Jehovap piffissarititani nallerpat eqqaamasani makitikkumaarai uummarteqqillugillu. (Apustilit Suliaat 24:15) Makititaanermi inuup inooriaaserisimasaa pilerseqqinneqassaaq. Toqusimasup inooriaasianik eqqaamanninneq taassuminngalu makititsinissaq Pinngortitsisumut ajornartorsiutaanngilaq, ilisimassusiami pissaaneralu killeqanngimmata. (Jobi 12:13; Esaja 40:26) Asanningaassusersuamigut eqqaamallaqqissutsi atussavaa toqusullu nunami paratiisiusumi uummarteqqillugit, toqunnginnerminni kinaassusiisa assinginik kinaassusilerlugit. — 1 Johannesi 4:8.

 Saatanip silarsuaata naggatissaa qanilliartortillugu, Guutimut ilumoortumut tunaarinnittut siunissaat qaamavoq. (Ussatit 2:21, 22; Danieli 2:44; 1 Johannesi 5:19) Tussiaasiortup ima neriorsorpaatigut: „Iluanngitsoq erniinnaq peeruttussaavoq,. . . Kisianni qanilaartut nuna kingornutissavaat pilluangaarnertillu nuannaarutigissallugu.“ (Tussiaat 37:10, 11) Pinerlunnerit nakuusernerillu qanganngoreersimassapput. Tamanut naapertuilluassuseqassaaq piitsoqassananilu annikilliortoqassananilu. (Tussiaat 37:6; 72:12, 13; Esaja 65:21-23) Inuunermi atukkatigut, ammip qalipaataatigut naggueqatigiissutsikkullu immikkoortitsinerit peerneqarluinnarsimassapput. (Apustilit suliaat 10:34, 35) Sorsuttoqassaassaaq, sorsuuteqarunnaassallunilu. (Tussiaat 46:10) Taamanikkussamut oqartoqassanngilaq: „Napparsimavunga“ (Esaja 33:24) Tamarmik peqqilluinnassapput inuummarissallutillu. (Saqqummersitat 21:3, 4) Nunarsuarmi paratiisi piviusunngungajalerpoq. Jehovap tamanna siunertaraa!

Aap, Biibilip neriorsuutai tamarmik piviusunngungajalerput. Sooq silarsuup matuma guutipiluinit salloqittartissaagut, Jehova tunaarilluinnarsinnaagutsigu? Taassuma „piumasaraa inuit tamarmik annaanneqassasut sallusuissummillu ilisarsissallutik“. (1 Timotheusi 2:3, 4) Silarsuup guutiinut piviusuunngitsuinullu „puikkarnerusunut“ piffissarput nukivullu atoqinatigit — Guutimik piviusuusumik ilisimasaqalerniarniarta, uummaterpullu tamakkerlugu tatigalugu. — Ussatit 3:1-6; Johannesi 17:3. (wE 1/15 2002)

[Qupp. 6-mi assiliartaq]

Jehovap Jiisusillu isaanni Lazarusi toqunganngilaq — siniinnarpoq

[Qupp. 7-mi assiliartaq]

Nunarsuarmi paratiisi piviusunngungajalerpoq