Kristumiut ilumoortut tamarmik iivangkiiliumik oqaluussisartuupput

„[Jehova] erinarsorfigisiuk, aqqa unnersiutigisiuk, annaassinera nalunaajaatigisiuk ullut tamaasa!“ — TUSSIAAT 96:2.

1. Sunaana nutaarsiassaq nuannersoq inuit tusartariaqaraat, Jehovap Nalunaajaasuisalu qanoq isiginnittaaseqarlutik tamanna oqaluussissutigisarpaat?

SILARSUARMI ullut tamaasa ajunaarnersuaqartarmat, tuppallernaqaaq nalunagu qanittukkut sorsuttoqarunnaassasoq, pinerluttoqarunnaassasoq, kaattoqarunnaassasoq naqisimannittoqarunnaassasorlu. (Tussiaat 46:10; 72:3, 7, 8, 12, 16) Nutaarsiassaanngila nuannersoq inuit tamarmik tusartariaqagaat? Jehovap Nalunaajaasui taama isumaqarput. Sumi tamani ’nalunaarummik nuannersumik’ oqaluussisartutut ilisimaneqarput. (Esaja 52:7) Ilumoorpoq Jehovap Nalunaajaasuisa ilarpassui malersugaasimasut nutaarsiassap nuannersup oqaluussissutiginissaa aalajangiusimagamikku; inoqatitilli pitsaanerpaamik kissaappaat, aallussilluartuunertillu nikallujuitsuunertillu ilisimaneqaatigaat.

2. Jehovap Nalunaajaasuisa piumassuseqarnerat aallussilluarnerallu ilaatigut sumik pissuteqarpa?

² Jehovap Nalunaajaasuisa aallussilluartuunerat ukiuni hundredelinni siullerni kristumiut aallussilluartuunerannut eqqaanarpoq. Taakku katuullit Romalerisut aviisianni L’Osservatore Romano-mi ima allaatigineqarput: „Kristumiut siulliit kuisinniariarlutik iivangkiiliup siaruarternissaanut akisussaasutut misigisarput. Inussiat inummiit inummut iivangkiiliu ingerlateqqittarpaat.“ Sooq Jehovap Nalunaajaasui kristumiutut siullertut piumassuseqartigippat? Pissutaasut pingaarnerit ilagaat nutaarsiassap nuannersup oqaluussissutigineqartup Guutimeersuunera. Piumassuseqarnissamut aallussilluarnissamullu pitsaanerusumik pissutissaqarnerpa? Oqaluussinermikkut tussiaasiortup kajumissaarutaa maleruartarpaat: „[Jehova] erinarsorfigisiuk, aqqa unnersiutigisiuk, annaassinera nalunaajaatigisiuk ullut tamaasa!“ — Tussiaat 96:2.

3. (a) Jehovap Nalunaajaasuisa aallussilluarnerannut pissutaasumik allamik taasaqarit. (b) Guutip „annaassinera“ sunaava?

³ Tussiaasiortup oqaasiisa Jehovap Nalunaajaasuisa aallussilluarnerannut pissutaasumik allamik eqqaasippaatigut: Annaanneqarnissaq pillugu oqaluussipput. Inoqarpoq inoqatiminnik peqqinnissakkut, inuttut atugarisatigut, aningaasatigut allatigulluunniit ikiuisartunik, tamannalu nersornaqaaq. Inuilli allanik ikiuisinnaanerat Guutip ’annaassineranut’ naleqqiullugu killeqartorujussuuvoq. Jiisusi Kristusi aqqutigalugu Jehovap inuit qanilaartut ajortimit, nappaatinit toqumillu annaatissavai. Annaanneqarnissamik ilassinnittut naassaanngitsumik inuujumaarput! (Johannesi 3:16, 36; Saqqummersitat 21:3, 4) Annaanneqarnissaq kristumiut oqaluussissutigisaat ullumikkut ’tupinnartulianut’ ilaavoq, kajumissaarummik uuminnga maleruaagaangata: „Inuiaat oqaluttuussigit naalannassusianik, inuiaqatigiit tamaasa tupinnartuliaanik! [Jehova] angingaarpoq unnersiutigineqangaartuullunilu, annilaarnangaarpoq guutinut tamanut.“ — Tussiaat 96:3, 4.

Jiisusip maligassiuinera

4-6. (a) Jehovap Nalunaajaasuisa aallussilluarnerannut pissutaasut pingajuattut suna eqqaaneqarpa? (b) Nutaarssissamik nuannersumik oqaluussiluni Jiisusi qanoq aallussilluartuua

⁴ Jehovap Nalunaajaasuisa aallussilluarnerannut pissutaasut pingajoqarput: Jiisusi Kristusip maligassiuinera malippaat. (1 Petrusi 2:21) Jiisusip naammalluinnartuusup ’nalunaarut nuannersoq piitsunut [qanilaartunut, NV] oqaatigeqqullugu’ suliassiissutaasoq piumassuseqarluarluni ilassivaa. (Esaja 61:1; Lukasi 4:17-21) Taamaalilluni iivangkiiliumik, nutaarsiassamik nuannersumik, oqaluussisartunngorpoq. Galilæa Judæalu tamakkerlugit  angalaarfigai „Naalagaaffimmik iivangkiiliu oqaluussissutigisarlugu“. (Matthæusi 4:23) Nalunnginnamiullu amerlasuut nutaarsiassaq nuannersoq ilassiumaaraat, ajoqersukkani oqarfigai: „Katersugassat amerlaqaat sulisussalli ikittuinnaallutik. Taamaattumik katersuinermi naalagaasoq qinnuigisiuk katersuisussanik aallartitseqqullugu.“ — Matthæusi 9:37, 38.

⁵ Jiisusi allat iivangkiiliumik oqaluussisartussatut ilinniartillugit nammineq qinnutini naapertorlugu iliuuseqarpoq. Piffissanngormat ajoqersukkani aallartippai ima oqarfigalugit: „Oqaluussiartoritsi ima: ’Qilaap Naalagaaffia qanillivoq!’“ Taamanikkut inuttut atugarisatigut ajornartorsiutit iluarsiniarlugit iliuuseqarsimasuuppata pitsaanerusimassagaluarpa? Taamanikkulluunniit akilersilluni peqquserluttuliorneq nalinginnaasoq ajugaaffiginiarlugu politikkimut akuliusimasariaqaraluarpat? Naamik. Jiisusip kristumiut ilumoortut tamaasa sulerissanersut najoqqutassippai ajoqersukkaminut ima oqarami: „Oqaluussiartoritsi.“ — Matthæusi 10:5-7.

⁶ Kingusinnerusukkut Jiisusip ajoqersukkat allat oqaluussiartoqquai ima oqaqqullugit: „Guutip naalagaaffia . . . qanillivoq.“ Uterlutik oqaluttuarmata qanoq kinguneqarluartigisimanersoq, Jiisusip nuannaarluni Guuti unnersiutigaa ima oqarluni: „Unnersiutigaakkit Ataataq qilaap nunallu Naalagaat, ilisimasunut sianisuunullu tamanna isertorakku saqqummersilluguli meerannguanut; tassami Ataataq, illit piumasat taamaappoq.“ (Lukasi 10:1, 8, 9, 21) Jiisusip ajoqersugai, siornatigut aalisartuusut, naasorissaasuusut assigisaannillu suliallit, meerannguatut ipput inuiaqatigiit upperisarsiornikkut siuttuinut ilinniagartuunut naleqqiullugit. Ajoqersukkalli nutaarsiassat nuannernerpaartaannik oqaluussisussatut ilinniartinneqarput.

7. Jiisusip qilaliarnerata kingorna ajoqersugaasa kikkut oqaluussiffigeqqaarpaat?

⁷ Jiisusip qilaliarnerata kingorna ajoqersugaasa annaanneqarnissaq pillugu nutaarsiassamik nuannersumik oqaluussissutigininneq ingerlatiinnarpaat. (Apustilit Suliaat 2:21, 38-40) Kikkunnut oqaluusseqqaarpat? Inuiaqatigiinnut Guutimik nalusunut? Naamik, Israelikkut ukiut 1500-t sinnerlugit Jehovamik ilisimannittut, oqaluussiffigeqqaarpaat. Inuiaqatigiinnut Jehovamik pallorfiginnittooreersunut oqaluussisinnaatitaappat? Aap. Jiisusip oqarfigai: „Nalunaajaasigissavassi Jerusalemimi Judæamilu tamarmi Samariamilu nunarsuullu isua tikillugu allaat.“ (Apustilit Suliaat 1:8) Israelikkut inuiaqatigiittut allatulli nutaarsiassap nuannersup tusarnissaa pisariaqartitsigaat.

8. Jehovap Nalunaajaasuisa ullumikkut ukiuni hundredelinni siullerni Jiisusip ajoqersugai qanoq malittarpaat?

⁸ Taamatulli Jehovap Nalunaajaasui ullumikkut  nunarsuaq tamakkerlugu oqaluussisarput. Inngili Johannesip takorruugaa ’iivangkiiliumik atajuartussamik nunarsuarmi najugaqartunut, inuiaqatigiinnut naggueqatigiinnullu, immikkut oqaasilinnut inuiannullu tamanut, nalunaarutiginnittoq’ suleqatigaat. (Saqqummersitat 14:6) Ukiumi 2001-imi nunani 235-ni, aamma nunani kristumiuunerarneqartartuni, oqaluussisimapput. Jehovap Nalunaajaasui akuerisaasunik oqaluffeqareersuni oqaluussisarmata ajorpa? Ilaat taama isumaqarput, immaqalu allaat oqarlutik taamaalillutik oqaluussisartut ’savanik tillittuusut’. Jehovap Nalunaajaasuisali eqqarsaatigisarpaat Jiisusip nalimini juutit maniguuttut qanoq misiginneqatigisarai. Naak juutit palaseqareeraluartut Jiisusip nangaanani nutaarsiassamik nuannersumik oqaluussiffigai. „Inuit takugamigit nalligingaalerpai paarinerlugaallutillu naakkinarsisimangaarmata savatut paarsisoqanngitsutut.“ (Matthæusi 9:36) Jehovap Nalunaajaasuisa inuit maniguuttut Jehovamik naalagaaffianillu ilisimanninngitsut naammattooraangamikkik, nutaarsiassamik nuannersumik oqaluttuutinngitsuussavaat, oqaluffimmut arlaannut ilaasortaanerarneqarmata? Soorunami naamik, Jiisusip apustiliisa maligassiaat malinniaratsigu. Nutaarsiassaq nuannersoq ’oqaluussissutigineqatariaqarpoq inuiaqatigiinnut tamanut’. — Markusi 13:10.

Kristumiut siulliit tamarmik iivangkiiliumik oqaluussisartuupput

9. Ukiuni hundredelinni siullerni kristumiut siulliit ilagiivini kikkut oqaluusseqataasarpat?

⁹ Ukiuni hundredelinni siullerni kikkut oqaluusseqataasarpat? Biibilimi oqaluffeqarfiillu oqaluttuarisaaneranni takutinneqarpoq kristumiut tamarmik iivangkiiliumik oqaluussisartuusut. Atuakkiortoq W. S. Williams allappoq: „Najunaajaatit tamarmik takutippaat ukiuni hundredelinni siullerni ilagiinni kristumiuni tamarmik . . . iivangkiiliumik oqaluussisartuusut.“ Ukiumi 33-mi piinsip ulluani pisimasut pillugit Biibilimi allassimavoq: „Taava tamarmik [angutit arnallu] Anersaamik Illernartumik ilumioqangaalerput allamiullu oqaasii atorlugit oqalulerput anersaap oqaasissiuinera naapertorlugu.“ Angutit arnallu, inuusuttut utoqqaallu, inussiat inussiaanngitsullu tamarmik oqaluussisarput. (Apustilit Suliaat 1:14; 2:1, 4, 17, 18; Joeli 3:1, 2; Galatiamiut 3:28) Malersugaanertik pissutigalugu kristumiorpassuit Jerusalemimit qimaasariaqaleramik, „siammartitaasimasut angalaartalerput oqaaserlu nalunaajaatigisalerlugu“. (Apustilit Suliaat 8:4) „Siammartitaasimasut“ tamarmik nalunaajaapput, imaanngilaq ikittuinnaat toqqarneqartut kisimik taamaaliortut.

10. Juutit pissutsinik aaqqissuussaanerat atorunnaarsinneqartinnagu suliassaq marlunnut sammisoq suna kristumiut naammassivaat?

¹⁰ Ukiuni siullerni taakkunani taamaappoq. Jiisusi siulittuilluni oqarsimavoq: „Naalagaaffimmillu iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.“ (Matthæusi 24:14) Ukiuni hundredelinni siullerni oqaatsit taakku eqquunneranni nutaarsiassaq nuannersoq kikkunnut tamanut oqaluussissutigineqarpoq juutit upperisarsiornikkut politikkikkullu aaqqissuussaanerat Romamiunit atorunnaarsinneqartinnagu. (Kolossemiut 1:23) Aammattaaq Jiisusip ajoqersugaasa tamarmik peqqussinera naalappaat: „Taamaattumik aallaritsi inunnillu inuiannit tamaneersunik ajoqersuganngortitsigitsi, Ataatap Ernerullu anersaallu illernartup aqqanut kuillugit, ajoqersorsigillu  ilissinnut peqqusakka tamaasa maleruaqqullugit. Atalu, ullut tamaasa najorpassi pissutsit aaqqissuussaanerata naggatissaanut allaat.“ (Matthæusi 28:19, 20, NV) Kristumiut siulliit eqqortuliorusuttut Jiisusimut uppertungornissaannik kajumissaariarlugit imminiiginnartanngilaat, ullumikkut oqaluffeqarfiit oqaluussisartuisa immineerisarnerattut. Jiisusip ajoqersuutaanik ilinniartittarpaat, ilagiittut aaqqissuullugit nutaarsiassamillu nuannersumik oqaluussisinnaanngorlugit ajoqersuganngortitsisinnaanngorlugillu ilinniartittarlugit. (Apustilit Suliaat 14:21-23) Jehovap Nalunaajaasui ullumikkut taamatorluinnaq periaaseqarput.

11. Ullumikkut kikkut nutaarsiassat nuannernerpaartaannik oqaluussisartuuppat?

¹¹ Jehovap Nalunaajaasorpassui Paulusi, Barnabasi allallu ukiuni hundredelinni siullerni inuusut malillugit ajoqersuiartortitatut nunanut allanut nuussimapput. Suliaat iluaqutaangaarpoq, politikkimut akuliusimannginnamik allatigulluunniit nutaarsiassamik nuannersumik oqaluuseqquneqarnertik unioqqutinnginnamikku. Jiisusip peqqussutaa naalaannarpaat: „Oqaluussiartoritsi.“ Jehovap Nalunaajaasuili amerlanerit ajoqersuiartortitatut nunani allaniinngillat. Ilarpassui nalinginnaasumik inuussutissarsiuteqarput allallu suli ilinniagaqartuullutik. Ilaat aamma meeraqarput. Jehovap Nalunaajaasuisali tamarmik nutaarsiassamik nuannersumik ilinniarsimasaminnik allat oqaluussiffigisarpaat. Inuusuttut utoqqaallu, angutit arnallu, nuannaarlutik kajumissaarut Biibilimeersoq maleruartarpaat: „Oqaaseq oqaluussissutiguuk, qanoq ilisukkulluunniit sassartarit, nakimajunnaarsitsigit, naqqissuisarit, oqaaqqissaarisarit, nikallujuillutit ajoqersuiuarlutillu!“ (2 Timotheusi 4:2) Siulerisamittut ’ajoqersuinertik ingerlatiinnarpaat nalunaajaatigalugulu Jiisusi tassaasoq Tanitaq’, imaluunniit Missiarsi. (Apustilit Suliaat 5:42) Nutaarsiassat nuannernerpaartaat oqaluussissutigisarpaat.

Oqaluussineq imaluunniit upperisamut ilanngutsitsiniarneq?

12. Ilasiassarsiorneq sunaava, oqaaserlu taanna qanoq isumaqartinneqalersimava?

¹² Grækerit oqaasiat prosēʹlytos isumaqarpoq ’allamik isumataartoq’. ’Ilasiaq’ oqaatsimit tassannga naggueqarpoq, isumaqartoq ’ilasiassarsiorneq’ imaluunniit upperisamut ilanngutsitsiniarneq. Ullumikkut isumaqartoqarpoq ilasiassarsiorneq ajoqutaasoq. Allaaserisami Oqaluffeqarfiit Silarsuarmi Ataatsimiititaliaata saqqummiussaani allaat ’ilasiassarsiornerup ajortuliaa’ allaaserineqarpoq. Sooq? Catholic World Report allappoq: „Ortodoksit oqaluffiisa unnerluuteqartuarnerat pissutigalugu oqaaseq ’ilasiassarsiorneq’ isumaqartinneqalersimavoq pinngitsaaliilluni allamik isumataartitsineq.”

13. Upperisamut ilanngutitsiniarnerup ajoqutaasinnaaneranik assersuuteqarit.

¹³ Upperisamut ilanngutitsiniarneq ajoqutaava? Aap, ilaannikkut ajoqutaasinnaavoq. Jiisusi oqarpoq allakkanik ilisimasut farisæerillu upperisaminnut ilanngutsitsiniarnerat allamik isumataartunut ajoqutaasoq. (Matthæusi 23:15) „Pinngitsaaliilluni allamik isumataartitsineq“ soorunami ajortuuvoq. Assersuutigalugu eqqaaneqarsinnaavoq makkabæeri Johannesi Hyrkan inuiaqatigiinnik Idumæamiunik naqisimannittoq. Flavius Josefusilu naapertorlugu taassuma ’nunaminniiginnarnissaat akueraa aatsaat kipineqarunik juutillu inatsisaat naalakkunikkik’. Idumæamiut juutit naalakkersuinerata ataani inuuginnassagunik, juutit upperisarsiornerannut ilannguttariaqarput. Ukiuni 700-kkunni Kaalersuup sakserit Guutimik nalusut maannakkut Tysklandip avannaatut ilisimaneqartumi inuusut ajugaaffigai, peqqarniillunilu allamik  isumataarnissaannik pinngitsaalillugit. * Sakserilli Idumæamiullu allamik isumataarnerat qanoq naleqartigaa? Assersuutigalugu Idumæamiu kunngi Herodesi Mosesip inatsisaanik Guutimit isumassarsiarititaasunik qanoq maleruaarusutsigaa, Jiisusi toqunniarlugu Betlehemimi meeraaqqat toqorartikkamigit? — Matthæusi 2:1-18.

14. Kristumiuuneraqatigiit ajoqersuiartortitaasa ilaat qanoq kimigiiserfiginnittarpat allamik isumataartitsiniarlutik?

¹⁴ Ullumikkummi pinngitsaaliilluni allamik isumataartitsisoqartarpa? Aap, taamaatoqartarpoq. Ilisimaneqarpoq kristumiuuneraqatigiit ajoqersuiartortitaasa ilaasa allamik isumataartut nunami allami ilinniarnissaannut aningaasanik ikiorsiissutinik neqeroorfigisaraat. Ajoqersuiartortitat allat qimaasut kaattut oqalugiaammut tusarnaareeraangata nerisassittarpaat. Biskoppit ortodoksit 1992-imi ataatsimiinneranni nalunaarusiaq naapertorlugu „pigisanik ussassaarilluni arlaatigulluunniit nakuuserluni upperisamut ilanngutitsiniartoqartarpoq“.

15. Jehovap Nalunaajaasui ullumikkut oqaatsimut isumagitinneqartoq naapertorlugu upperisamut ilanngutitsiniartarpat? Nassuiaruk.

¹⁵ Upperisarsiornerminnik allanngortitseqqullugit inunnik pinngitsaaliineq ajortuuvoq. * Jehovap Nalunaajaasui taama periaaseqanngillat. Taamaattumik ullumikkut oqaatsimut isumagitinneqartoq naapertorlugu upperisamut ilanngutitsiniarneq ajorput. Ukiunili hundredelinni siullerni kristumiutulli nutaarsiassaq nuannersoq tamanut oqaluussissutigisarpaat. Piumasut tamarmik kajumissaarneqarput Biibilimik atuaqqissaarnermikkut ilisarsinerulernissaminnut. Ilinniartitsinermik tamatuminnga ilassinnittut, Guutimik taassumalu siunertaanik eqqorluartumik ilisimasaqarneq tunngavigalugu upperisaqalertarput. Tamatuma kingunerisaanik annaanneqarumallutik Guutip aqqa, Jehova, torlorfigisarpaat. (Romamiut 10:13, 14, 17) Namminneq aalajangertussavaat nutaarsiassamik nuannersumik ilassinnikkumanerlutik. Pinngitsaaliisoqassanngilaq. Pinngitsaaliisoqassagaluarpat allamik isumataarneq iluaqutaanavianngilaq. Pallorfiginninneq Guutimit akuerineqarsinnaassappat uummamminngaanneersuusariaqarpoq. — 5 Moses 6:4, 5; 10:12.

Ullumikkut iivangkiiliumik oqaluussineq

16. Ukiuni nutaanerusuni Jehovap Nalunaajaasuisa amerliartornerannut suut takussutissaappat?

¹⁶ Ukiuni nutaanerusuni Jehovap Nalunaajaasuisa Matthæusi 24:14-imi allassimasup eqquunneratut pingaarnertut Guutip naalagaaffianik nutaarsiassaq nuannersoq oqaluussissutigisimavaat. Oqaluussineranni atuagassiaq Napasuliaq Alapernaarsuiffik pingaaruteqarsimaqaaq. * 1879-imi Napasuliaq Alapernaarsuiffik-up normui siulliit saqqummermata atuagassiaq oqaatsinut ataasiinnarnut 6000-it missaannut naqiterneqarpoq. 2001-imi, ukiut 121-it tamatuma kingorna, atuagassiaq 23.042.000-inut naqiterneqartarpoq, oqaatsinilu 141-ni saqqummertarluni. Jehovap Nalunaajaasuisa oqaluussinermi suliniuteqarnerat ilutigalugu  taamatut amerliartortoqarpoq. 1800-kkunni ukiut tamaasa nalunaaquttap-akunneri tusindialuinnaat oqaluussinermi atorneqartarput, 2001-imili nalunaaquttap-akunneri 1.169.082.225-t atorneqarlutik. Aammattaaq agguaqatigiissillugu qaammatit tamaasa 4.921.702-nik akeqanngitsumik Biibilimik atuaqqissaaqateqartoqartarpoq. Ilumut suliniuteqartoqangaarpoq! Guutip naalagaaffianik oqaluussisartut 6.117.666-t peqataapput.

17. (a) Guutipiluit qanoq ittut ullumikkut pallorfigineqartarpat? (b) Oqaatsit, inuiaassuseq innuttaaqatigiinnilu inissisimaffik apeqqutaatinnagit inuit tamarmik suna ilinniartariaqarpaat?

¹⁷ Tussiaasiortoq allappoq: „Inuiaammi guutii tamarmik suunngitsuupput, [Jehovali] tassaavoq pinngortitsisoq qilammik.“ (Tussiaat 96:5) Ullumikkut inuiaassutsimik pingaartitsineq, inuiaassutsimut ilisarnaatit, inuit nuimasut, pigisat allaallu pisuussutit guutisiorfigineqartarput. (Matthæusi 6:24; Efesosimiut 5:5; Kolossemiut 3:5) Mohandas K. Gandhi ilaanni oqarsimavoq: „Qularinngilluinnarpara . . . Europamiut ullumikkut kristumiuuneq taaguutigiinnaraat. Tassami, Mammoni [pisuussutit] pallorfigisarpaat.“ Imaappoq, inuit sumiittulluunniit nutaarsiassaq nuannersoq tusartariaqarpaat. Inuit tamarmik oqaatsit, inuiaassuseq innuttaaqatigiinnilu inissisimaffik apeqqunaatinnagit Jehova siunertaalu ilinniartariaqarpaat. Kissaatigaarput amerlanerungaartut tussiaasiortup kajumissaarutaa maleruarumaaraat: „Ilissi inuiaat eqqarleriissortaat, [Jehova] ataqqinartillugulu naalannartissiuk! [Jehovap] aqqa ataqqinartissiuk.“ (Tussiaat 96:7, 8) Jehovap Nalunaajaasuisa allat Jehovamik ilisarsitillugit ikiortarpaat eqqortumik ’naalannartissinnaaniassammassuk’. Kajumissaarummillu maleruaasut iluaqutigingaartarpaat. Allaaserisami tulliuttumi tamanna misissussavarput.

[Quppernerup ataani ilanngussat]

Uku nassuiarsinnaavigit?

• Sooq Jehovap Nalunaajaasui aallussilluarlutik iivangkiiliumik oqaluussisartuuppat?

• Sooq Jehovap Nalunaajaasui allaat kristumiuuneraqatigiit oqaluffeqarfigeriigaanni oqaluussisarpat?

• Suna pillugu Jehovap Nalunaajaasui ullumikkut oqaatsimut isumagitinneqartoq naapertorlugu upperisamut ilanngutsitsiniartanngillat?

• Ukiuni nutaanerusuni Jehovap Nalunaajaasuisa amerliartornerannut suut takussutissaappat?

[Atuaqqissaarnermi apeqqutit]

[Qupp. 9-mi assiliartaq]

Jiisusi aallussilluarluni iivangkiiliumik oqaluussisartuuvoq allallu suliami assinganik sulisussatut ilinniartillugit

[Qupp. 10-mi assiliartaq]

Ukiuni hundredelinni siullerni kristumiut tamarmik oqaluusseqataasarput

[Qupp. 11-mi assiliartaq]

Inunnik pinngitsaaliilluni allamik isumataartitsineq ajortuuvoq