Illit najoqqutassianik toqqaanerit

NAJOQQUTASSIANIK siulersortippit, isumaqarpilluunniit najoqqutassianik ileqqussatigulluunniit maligassianik maleruaaneq itsangasuusoq. Tamatta pingaaruteqarsorisatsinnik najoqqutassiaqarpugut. Politikens Store Nye Nudansk Ordbog naapertorlugu najoqqutassiaq tassaavoq: „Ilisimasaqarneq qularutiginngilluinnagarluunniit tamanut tunngasoq isummatsinnut iliuutsitsinnullu tunngaviusoq.“ Najoqqutassiat aalajangikkatsinnut sunniuteqartarput inuunermilu siunniutatsinnut aalajangiisuusarlutik. Najoqqutassiat pujorsiummut assersuunneqarsinnaapput.

Assersuutigalugu Jiisusip ajoqersukkani kajumissaarpai maleruagassaq atortuujuaannartoq, Matthæusi 7:12-imiittoq, maleruaqqullugu: „Inunnut qanorluunniit iliorfigeqqugussi ilississaaq taamatut iliorfigisigit.“ Konfutsesiortut li aamma jen pillugit najoqqutassiat, ajunngissusermik, maniguunnermik, ataqqinninnermik ilumoornermillu pingaartitsisut, maleruarpaat. Aammattaaq upperisarsiortuunngitsut pingaartitaqarput najoqqutaqarlutillu maleruakkaminnik.

Najoqqutassiat sorliit toqqartariaqarpavut?

Eqqumaffigisariaqarparpulli ajunngitsunik ajortunillu najoqqutassiaqarnera. Ukiuni qulini amerlanerusuniluunniit kingullerni inuit amerliartuinnartut namminissarsiortunngorsimapput, aamma „uangasiornermik“ taaneqartartoq. Immaqa inuppassuit oqariartaaseq taanna nalugaluarlu taamaattuusorinngikkaluarlutilluunniit, allanik najoqqutassiaqanngikkunik qutsissunilluunniit ileqqussatigut maligassaqanngikkunik, ileqqut uangasiornerup tunngavigisai ileqqorileriaannaavaat „Uangasiornermik“ allatulluunniit taaneqaraluaruni namminissarsiorneruvoq, soqqusaalluni pigisaleritunermik malitseqarajuttoq. „Marluinnarnik najoqqutassiaqarpugut,“ Kinami TV-mi pisortaq oqarpoq. „Siulleq tassaavoq imminut iluatatsinneq. Aapparaa aningaasanik katersineq.“

Uangasiorneq kajungersutulli sunniuteqarsinnaavoq. Kajungersoq pujorsiummut qanillivallaarpat, pujorsiutip tikkuutaa eqqunngitsumut saassinnaavoq. Taamatulli uangasiorneq ileqqussatigut pujorsiutitsinnik ileqqulluunniit tungaatigut najoqqutassiatsinnik paatsiveerutsitsisinnaavoq, suut tamaasa kissaatitsinnut sammitilerutsigit.

Immaqa isumaqartoqarsinnaavoq uangasiorneq nutaajusoq. Taamaanngilarli. Edenip Naatsiivianili pilerpoq siuaasatta siulliit Pinngortitsisup ileqqussatigut maleruaqqusai itigartimmatigit. Tamanna ileqqussatigut pujorsiutaannik allannguivoq. Inuunermut isiginnittaaseq piffissami nutaanerusumi „uangasiornermik“ taaneqartartoq Adamip Evallu kinguaavisut akiortariaqarparput. — 1 Mosesi 3:6-8, 12.

Biibilimi siulittuutigineqarpoq piffissami ’ullussanik kingullernik’ taasami, ’ullunik atugarliungaarfiusunik’ ilisarnaatilimmi, taamatut pissuseqarneq malunnangaarumaartoq. Ullumikkut inuppassuit namminissarsiortuupput. Taamaattumik  tupaallannanngilaq uangasiortut isumaannik ilaarseqqulluta tatineqangaarnerput. — 2 Timotheusi 3:1-5.

Immaqa Olaf, inuusuttoq Jehovap Nalunaajaasuisa Europami immikkoortortaqarfiannut allattoq, isumaqatigaat: „Ileqqorissaarniarneq ajornakusoortorujussuuvoq, ingammik uagutsinnut inuusuttuusunut. Taamaattumik Biibilimi najoqqutassianik maleruaanissap pisariaqarneranik eqqaasittuartigut.“

Olaf silatusaartumik isumaqarnini ersersippaa. Biibilimi najoqqutassiat ileqqut tungaatigut najoqqutassianik qutsissunik maleruaanissatsinnut — inuusuttuugutta utoqqaaguttaluunniit — iluaqutigisinnaavavut. Aammattaaq uangasiornerup akiornerani iluaqutigisinnaavavut. Taamaattumik Biibilimi najoqqutassiat qanoq iluaqutaasinnaanersut ilinniarnerorusukkukkit allaaserisap tullia atuaqqullugu kajumissaarpatsigit.

[Qupp. 4-mi assiliartaq]

Ullumikkut inuppassuit allat pisariaqartitaannik soqutigisaqanngillat