Anorimut oqquiffik

EROPAMI qaqqartuuni (Alpe-nik taaneqartartuni) nassaarineqarsinnaavoq ruusaq maattooq (oqaasaq). Naasoq taanna dværgrododendronimik taaneqartartoq orpikkatut pukkitsutut alliartortarpoq, aniguisarporlu nunap qaava malittareqqissaarlugu naasarami anorimut illersuutigalugu. Anorip nilleqisup naasut qaqqartoormiut aarlerinartorsiortittarpai issoq silaannarlu panertittaramigit.

Qunnerni sorlaninnermigut ruusaq qaqqartoormioq anorimit perlussiortitaaneq ajorpoq. Qunnerit alliartorfigissallugit issortakikkaluartut anorimut illersuutaapput naasorlu imissamaatissaqartsisinnaallugu. Rododendronit ukiup ilarujussuani nassaariuminaapput, aasakkulli aappallaarissunik sikkerlutik qaqqanut alutornarsaataasarput.

Pruffiitip Esajap siulittuutigaa ’naalagartat’ Guutimit toqqarneqassasut, taakkulu tamarmik ’anorersuarmut oqquiffiussasut’. (Esaja 32:1,2) Kunngi Jiisusi Kristusip aqutsineratigut taakku anersaakkut naalagartat imaluunniit nakkutilliisut qaarsutut aalajaatsutut issapput, erloqinartorsiornerni misilinneqarnernilu aalajaallutik. Atugarliorfiusuni oqquiffiussallutik annikilliortullu ikiussallugit anersaakkut Guutip oqaasianit imissaaleqeqqunagit.

Malersuinerup anoraata, nikallunganerup nappaateqarnerulluunniit kristumiu illersuuteqanngippat uppernera panertissinnaavaa. Kristumiu utoqqaanertap ajornartorsiutaanut tusarnaaqqissaarnermigut, Biibilimeersunik siunnersuuteqarnermigut, qiimmassaanermigullu suliassatigulluunniit ikiuinermigut sernissorsinnaavaa. Kunngimissut, Jiisusi Kristusitut ’naakkinarsisimangaartut’ ikiorusuppaat. (Matthæusi 9:36) Aammattaaq ajoqersuutit eqqunngitsut anoraanit aalaterneqarsimasut paarinerlugaasullu ikiorusuppaat. (Efesosimiut 4:14) Piffissaq eqqorlugu ikiuineq aalajangiisuulluinnarsinnaavoq.

„Inuunerma ilaani ajorluinnartunik atugaqarpunga ikinngutiginerpaasama ilaasa sallusuissut qimammassuk ataatagalu qaratsamigut aanaartoormat,“ Miriam oqaluttuarpoq. „Nikalluganinnik qaangiiniarsartillunga silamiumik angutaateqalerpunga. Naleqqutinngitsutut misigisimagama Jehovallu asanngikkaanga qularinngivillugu kingunitsiannguagut ilagiit utoqqaanertaat nalunaarfigaakka aalajangersimallunga sallusuissut qimanniarlugu.

Aalajangiiffissap pingaaruteqartup tamatuma nalaani utoqqaanertap naakkinnittup pioneritut kiffartorsimaninnik eqqaasipaanga. Oqarpoq aalajaassusera tupigusuutigiuartarlugu, inussiarnersumillu qinnuigaanga utoqqaanertanut ikiorteqqullunga, suli Jehovamit asaneqarnera uppernarsiniassagakku. Nalornisuuleruttorfinni asannittumik soqutiginnillutik ersersitsinerat anersaakkut anorersuarsiorninni ’oqquiffittut’ ippoq.Qaammatip ataatsip ingerlanerani angutaatiga qimappara, taamanimiilli sallusuissutsip aqqutaanit qimagutinngisaannarpunga.“

Piffissaq eqqorlugu sernisorneqarneq pissutaalluni utoqqaanertat kristumioqatitik anersaakkut ingerlalluaqqilersut takugaangamikkit pilluaqqusaangaartutut misigisarput. ’Oqquiffiit’ taakku Kristusip ukiuni tuusintini naalakkersuiffissaani naammangaartumik anersaakkut ikiorserneqarnissatsinnut sernissorneqarnissatsinnullu qilanaartuuserpaatigut. (wE 02/15 02)