Sooq silarsuatoqaq piuneerunneqarpa?

SILARSUAQ tamakkerlugu ulersuaqarnera pinngortitami ajunaarnersuaq naliginnaasuunngilaq. Guutip eqqartuussineratigut pivoq. Mianersoqquseqqaarpoq, soqutigineqanngilluinnarlunili. Soormitaava? „Ullunimi taakkunani,“ Jiisusi nassuiaavoq: „Ulersuaq sioqqullugu nerillutik imerlutillu nuliartaarlutillu uinitsitsisarput ulloq Noap umiarsuarmut ikiffia tikillugu aatsaallu paasisaqalerput ulersuaq nalliummat tamaasalu nungutillugit.“ — Matthæusi 24:38, 39.

Atugartuussuseq ineriartorluarsimasoq

Atugartuussuseq Ulersuup siornagut piusoq, massakkumut naleqqiullugu iluaqutissartaqarneruvoq. Assersuutigalugu inuiaqatigiit tamarmik assigiinnik oqaaseqarput. (1 Mosesi 11:1) Eqqumiitsuliornermut ilisimatusaatitigullu ineriartornermut, inuppassuit assigiinngitsunik piginnaanillit suleqataaffigisariaqagaannut iluaqutaasimassaqaaq. Taamanikkut amerlanerit inuunertussuseq nuannaarutigisinnaagamikku ukiuni hundredilinni ilikkagarisimasatik nammineerlutik ineriartortissinnaavaat.

Ilaalli isumaqarput taamani taama sivisutigisumik inuusoqarneq ajortoq, Biibilimilu ukiut eqqartorneqartut ilumoortumik qaammatit pineqartut. Tamanna ilumoorpa? Mahalal’eli assersuutigeriartigu. Biibilimi allassimavoq: „Mahalal-elip 65-inik ukioqarluni Jeredi ernertaaraa. . . . Tassa ukiut Mahalal-elip inuuffigisai katillutik 895-inngorput; taava toquvoq.“ (1 Mosesi 5:15-17) Ukioq ataaseq ilumut qaammataannaasimappat, taava Mahalal’eli tallimaannarnik ukioqarluni ernertaarsimassaaq! Taamatut naatsorsuineq eqqunngilaq. Taamanikkut inuit inuusut  naammalluinnassusermut inuup pinngortitaaqqaartup, Adamip, pigisaanut qaninnerupput. Ukiuni hundredilinni arlalinni ilumut inuusarput. Sulerisarpammi?

Ukiuni hundredilinni Ulersuaq sioqqullugu nunarsuup inui ima amerlatigilersimapput allaat Adamip ernera Kaini illoqarfissualiorsinnaasimalluni Hanokimik taasaminik. (1 Mosesi 4:17) Ulersuaq sioqqullugu suliffippassuit assigiinngitsut pilersinneqarsimapput. Sannatit „kanngusammik saviminermillu“ sananeqartarsimapput. (1 Mosesi 4:22) Sannatit tamakku qularnanngitsumik sanaartornermut, pequsiornermut, mersornermut nunalerinermullu atorneqartarsimapput. Tamakku tamarmik nunarsuup inuisa siulliit nalaanni pisimasut oqaluttuarineqarput.

Ilisimasat misilittakkallu iluaqutigalugit kinguaariinnut ajornannginnerulersimavoq saviminilerinermi, nunalerinermi, nersutaateqarnermi, atuakkiornermi, eqqumiitsuliornermi nipilersornikkullu immikkut piginnaanngorsarnissaq. Assersuutigalugu Jubali „sianaarsortartut qarlortartartullu nagguigaat.“ (1 Mosesi 4:21) Atugartuussutsikkut ineriartortoqaqaaq. Tassanngaannarli peeruppoq. Susoqarami?

Sunaana ajoqutaasoq?

Atugartuussuseq iluaqutissartaqaraluaqaluni Ulersuaq sioqqullugu aallartinnerliorpoq. Tunngaviliisua, Adami, Guutimut pikititsivoq. Kainip, siulliulluni illoqarfimmik pilersitsisutut Biibilimi eqqaaneqartup, nukkani toquppaa. Ajortup siaruaatipallannera tupinnanngilaq! Adamip kinguaaminut ajortumik kingornussaqartitsinerata kinguneri ingasatsikkiartorput. — Romamiut 5:12.

Ineriartorneq ukiuni 120-iinnarni suli atassasoq Jehova aalajangermat, ingerlalluarnerpaaffianiippoq. (1 Mosesi 6:3) Biibilimi oqaluttuarineqarpoq: „[Jehovalli] paasigamiuk nunarsuarmi inuit ajussusiat angeqisoq ullorlu tamaat iliuuseriumasaat pilersaarusiaallu ajortuinnaasut. . . . nunarsuarmili aserorsimaneqarpoq . . . nakuusernernik ulikkaarluni.“ — 1 Mosesi 6:5, 11.

Piffissap ingerlanerani Noap paasivaa Guutip inuit tamaasa Ulersuarmik nungutinniarai. (1 Mosesi 6:13, 17) Noa ’iluarnermik nalunaariartortitaagaluartoq,’ silarsuaq ilisimasartik tamarmi suujunnaarsitaajumaartoq inuit upperiuminaatsissimagunaarpaat. (2 Petrusi 2:5) Inuit arfineq-pingasuinnaat mianersoqqussummut tusaapput annallutillu. (1 Petrusi 3:20) Ullumikkut uagutsinnut tamanna qanoq pingaaruteqarami?

Tamanna uagutsinnut qanoq isumaqarpa?

Ullumikkut Noap inuunerata naalaanitorluinnaq inuuvugut. Naakkittaatsumik peqqarniisernerit, naggueqatigiinnik nungusaanerit, siunertaqanngitsumik toqoraanerit angerlarsimaffinnilu nakuusernerit tupinnaannartumik amerleriarsimanerat tusartuarpavut. Nunarsuaq nakuusernernik ulikkaaqqissimavoq, silarsuarlu taamanituut eqqartuussutip nalliukkumaarneranik mianersoqquneqarpoq. Jiisusi nammineq oqarpoq Eqqartuussisutut Guutip toqqagaatut tikiutissalluni, inuillu avissaartissallugit soorlu savanik paarsisup savat savaasanit avissaartittarai. Inuusussaanngitsut ’aallarumaarput taakku naassaanngitsumik uternaveersitaassallutik,’ oqarpoq Jiisusi. (Matthæusi 25:31-33, 46 NV) Biibilimili ersersinneqarpoq, tamatumuuna inunnik millionilinnik annattoqarumaartoq — amerlangaartut Guutimik ilumoortutuamik pallorfiginnittut. Silarsuassami aggersumi eqqissineq toqqissisimanerlu ataavartut siornatigut misiginikuunngisartik nuannaarutigisinnaalissavaat. — Mika 4:3, 4; Saqqummersitat 7:9-17.

Oqaatsit taakku Biibilimeersut eqqartuussinissamillu mianersoqqussutit amerlasuut mitalliutigiinnartarpaat. Taakkuli pillugit apustili Petrusi oqarpoq piviusut isiginngitsuusaaginnartaraat. Allappoq: ’Ullussani kingullerni tikiukkumaarput . . . mitallerlutik ima oqartut: Tikiunnissaaninguna neriorsuut qanoq piniartoq?’ . . . „Inuit taama oqaluttut arajutsisimavaat itsarsuarmiilli qilaqartoq nunaqarlunilu Guutip oqaasiagut imermit imikkullu pinngortumik, taamaattumillu silarsuaq taamanernisaq imermit qarsunneqarluni piujunnaarpoq. Qilaalli nunalu maannakkut ittut oqaaseq taannarpiaq tunngavigalugu atatinneqarput utaqqisitaallutillu  ullormi eqqartuussivissami iluaatsut nungutitaanissaanni ikuallagaanissaminnut.“ — 2 Petrusi 3:3-7.

Jiisusip oqaasiinik eqquutitsinertut silarsuaq tamakkerlugu eqqissinissaq pillugu tusagassaq nuannersoq, eqqartuutiffissamillu mianersoqqussut oqaluussissutigineqarput. (Matthæusi 24:14) Mianersoqqussut sumiginnagassaanngilaq. Guutip ajugaqanngitsup oqaatsini eqquutitittarpai.

Silarsuassaq

Allanngornissarsuaq pisussaq eqqarsaatigalugu siunissarput qanoq isikkoqarpa? Qaqqami oqaluutsini aallarnerlugu Jiisusi oqarpoq: „Pilluarput qanilaartut, taakkuami nunarsuaq kingornutissavaat.“ Taava ajoqersukkani qinusarnissaannik ilinniartippai: „Naalagaaffiit tikiulli, piumasat qilammisut nunamissaaq pili.“ (Matthæusi 5:5; 6:10) Aap, Jiisusip nassuiarpaa inuiaat nuannersumik nunarsuarmi siunissaqartut. ’Ernioqqissitaaffimmik’ taavaa. — Matthæusi 19:28.

Siunissaq eqqarsaatigigaangakku, Guutip mianersoqqussutaa pillugu mitallersunit qulalersitaaqinak. Immaqa avatangiisit aalajaappasippoq silarsuarlu maannakkut piusoq sivisuumik piusimalluni. Tunaarisariaqanngilarpulli. Inuiaat silarsuaat eqqaartuunneqareerpoq. Taamaattumik apustili Petrusip allagaata naggataatungaani kajumissaarut maluginiarluaruk:

„Tamakku tamarmik suujunnaartussaammata taava tamatigut illernartuullusilu Guutimillu mianerinnillusi inuusariaqarpusi, Guutip ullussaata nalliunnissaa utaqqillugu. . . . Taamaattumik, asasakka, taama ittunik ilimagisaqarassi ilungersuutiginiarsiuk taassumunnga minguitsuullusilu assuarnaatsuunissarsi eqqissillusi. . . . Ineriartoritsili saammaannermi Naalakkatsinnik annaassisitsinnillu Jiisusi-Kristusimik ilisarsinermi.“ (2 Petrusi 3:11, 12, 14, 18) Noap nalaani pisimasut ilinniarfigikkit. Guutimut qanimut attaveqalerit. Jiisusi Kristusi pillugu ilisimasaqarnerulerit. Guutimut tunniusimaneq ineriartortiguk, taamaalillutillu takutillugu pissutsit aaqqissuussaanerata maannakkut atuuttup naggatissaani annattut millionillit ilagalugit silarsuarmi eqqisisimasumi inoorusuttutit. (wE 03/01 02)

[Qupp. 5-mi assiliartaq]

Ulersuup siornatigut saffiorneq ilisimaneqarpoq

[Qupp. 7-mi assiliartaq]

Inuiaat nuannersumik nunarsuarmi siunissaqarput