Sooq kuisittoqartariaqarpa?

„Aallaritsi inunnillu inuiannit tamaneersunik ajoqersuganngortitsigitsi, . . . kuillugit.“ — MATTHÆUSI 28:19, NV.

1, 2. (a) Pissutsini qanoq ittuni ilaat kuisippat? (b) Kuisinneq pillugu suut apeqqutaalerpat?

UKIUNI 775-imiit 777-imut Frankrigimi kunngip Kaalersuup Sakserit ajugaaffigisani pinngitsaalillugit ataatsikkut kuisitsippai. „Pinngitsaalillugit kristumiunngortippai,“ oqaluttuarisaanermik ilisimatooq John Lord allappoq. Ruslandimi naalakkersuisoq Vladimir I ukiumi 987-imi kunngip pania Grækereq ortodoksiusoq katereerlugu aalajangerpoq innuttani ataatsikkut kuisissasut — kuisinngikkunik toqumik pillarneqarnissaannik sioorasaarlugit.

² Taamatut kuisitsitsineq pissusissamisoorpa? Iluaqutaava? Kikkut tamarmik kuisiinnassappat?

Qanoq kuisittoqartussaava?

3, 4. Serpartaaneq kueraanerluunniit kristumiutut kuisinnertut sooq akuerineqarsinnaanngila?

³ Kaalersuup Vladimir I-illu pinngitsaaliillutik kuisitsitsinerat Guutip oqaasianut akerliuvoq. Sallusuissummik Biibilimeersumik ilinniartinneqanngitsunik — serpartaanikkut, kueraanikkut morsutsitsinikkulluunniit — kuisitsitsineq iluaqutaanngilaq.

⁴ Ukiumi 29-mi Jiisusi Nazaretimiu Johannesi Kuisisumukarmat susoqarnersoq eqqarsaatigeriaruk. Johannesi kuussuarmi Jordanimi inunnik kuisivoq. Nammineq kajumissutsiminnik kuisinniarlutik Johannesimukarput. Kuussuup Jordanip qeqqani nikorfatiinnarlugit niaquisigut kueralaaginnarpai serpartalaaginnarlugilluunniit? Johannesip Jiisusi kuimmagu qanoq pisoqarpa? Matthæusip oqaluttuaraa Jiisusi kuisereerami ’erniinnaq imermit qaqisoq’. (Matthæusi 3:16) Tassa kuussuup Jordanip ernganiippoq, morsutsitaalluni. Kunngip atorfilittaa Ætiopiamiu Filipimit kuineqarmat oqaluttuarineqarpoq aamma ’marluullutik imermut ikisut’, kuisereermallu imermit ’qaqisut’. Jiisusi ajoqersugaalu kuisikkamik morsutsilluinnarneqarput. — Apustilit Suliaat 8:38, 39.

5. Kristumiut siulliit qanoq kuisittarpat?

⁵ Grækerit oqaasii ’kuisinneq’-mik aamma ’kuisippoq’-mik ilaalu ilanngullugit nutserneqartartut  isumaqarput imermut morsutsitaaneq imaluunniit misunneqarneq. Smith’s Bible Dictionary-mi allassimavoq: „Oqaaseq kuisinneq aallaqqaammut nutsiinnavillugulu isumaqarpoq morsutsitaaneq. Taamaattumik Biibilimik nutsikkat ilaanni Johannesi aamma taaneqartarpoq: „Johannesi Morsutsitsisoq“ aamma „Johannesi Misussisoq“. (Matthæusi 3:1, Rotherham; Diaglott, interlinear) August Neander atuakkiamini Allgemeine Geschichte der christlichen Religion und Kirche-mi allappoq: „Aallaqqaammut morsutsitaalluni kuisittoqartarpoq.“ Franskit qinerlerfissiaanni ilisimaneqarluartumi Larousse du XX^e Siècle-mi (Paris 1928) allassimavoq: „Kristumiut siulliit imilimmi sumiluunniit morsutsinneqarlutik kuisittarput.“ New Catholic Encyclopedia-lu ilaliivoq: „Paasinarpoq oqaluffeqaqqaalermat morsutsitaalluni kuisittoqartartoq.“ (1967, bind II, qup. 56) Ullumikkut Jehovap Nalunaajaasuisa ilaattut kuisinniaraanni aamma imermut morsutsitaalluinnarniarluni nammineq kajumissutsimit iliuuseqartoqartariaqarpoq.

Kuisinnissamut pissutissaq nutaaq

6, 7. (a) Johannesip kuissutaata suna siunertaraa? (b) Jiisusip ajoqersugaasa kuissutaannut atatillugu suna nutaartaava?

⁶ Johannesip kuissutaata siunertaa Jiisusip ajoqersugaasa kuissutaannit allaaneruvoq. (Johannesi 4:1, 2) Johannesip kuissutaa juutit Mosesip inatsisaanik unioqqutitsisimanerminnik peqqissiminerannut saannerannullu tamanut takutitsineruvoq assersuutaallunilu. (Lukasi 3:3) * Jiisusilli ajoqersugaasa kuissutaat nutaartaqarpoq. Ukiumi 33-imi piinsip ulluani Petrusip tusarnaartini ima kajumissaarpai: „Allamik isumataaritsi, Jiisusi-Kristusillu aqqani tamassi kuisigitsi ajortissi isumakkeerneqaatissaannik.“ (Apustilit Suliaat 2:37-41) Petrusip oqaluffigisai juutiullutillu ilasiaagaluartut kuissut eqqartugaa Mosesip inatsisaanik unioqqutitsinerminnik peqqissiminerannut assersuutaanngilaq; aamma oqanngilaq Jiisusip aqqani kuisinneq ajortaajaanerusoq. — Apustilit Suliaat 2:10.

⁷ Taamani Petrusip ’qilaap Naalagaaffiata matuersaataa’ siulleq atorpaa. Suna siunertaralugu? Tusarnaartini qilaap naalagaaffianut isersinnaanerannik paasinninnissaannut periarfissinniarlugit. (Matthæusi 16:19) Juutit Jiisusi Missiarsitut itigartimmassuk Guutimit isumakkeerfigineqarnissamik ujartuinermut tamatumalu angunissaanut tunngatillugu allamik isumataarneq Jiisusimullu upperneq nutaajuvoq pingaaruteqarlunilu. Upperneq taamaattoq tamanut takutinneqarsinnaavoq Jiisusi Kristusip aqqani imermut morsutsitaanikkut. Taamaalillutik Jiisusi aqqutigalugu Guutimut tunniulluinnarnerminnik ersersitsipput. Ullumikkut Guutimut iluarisaajumasut tamarmik taamatut uppertariaqarput, Jehova Guutimut tunniulluinnarlutik kristumiutullu kuisittariaqarlutik Guutimut qutsinnerussaartumut tamakkiisumik tunniulluinnarnerminnut assersuutaasumik.

Eqqortumik ilisarsineq pisariaqarpoq

8. Sooq kristumiut kuissutaat kikkunnut tamanoortuunngila?

⁸ Kristumiut kuissutaat kikkunnulluunniit kuissutaanngilaq. Jiisusip ajoqersukkani ima siunnersorpai: „Aallaritsi inunnillu inuiannit tamaneersunik ajoqersuganngortitsigitsi, Ataatap Ernerullu anersaallu illernartup aqqani kuillugit, ajoqersorsigillu ilissinnut peqqusakka tamaasa maleruaqqullugit.“ (Matthæusi 28:19, 20, NV) Kuisitsinnani ’Jiisusip ajoqersukkaminut peqqussutai tamaasa maleruarneqartariaqarput’. Taamaattumik uppinngitsunik aamma Guutip oqaasiani eqqortumik ilisimasaqanngitsunik pinngitsaaliilluni kuisitsitsineq iluaqutaanngilaq, Jiisusillu ajoqersukkaminut ilumoortunut peqqussutaanut akerliulluni. — Hebræerit 11:6.

9. ’Ataatap aqqani’ kuisinneq qanoq isumaqarpa?

⁹ ’Ataatap aqqani’ kuisinneq qanoq isumaqarpa? Isumaqarpoq kuisittussap Ataatatta qilammiup inissisimanera oqartussaaneralu akuerigaa. Taamaalilluni Jehova Guuti Pinngortitsisutut, ’nunarsuarmi tamarmi Qutsinnerussaartutut’ silarsuarmilu tamarmi kisimi oqartussaasutut akuerineqartarpoq. — Tussiaat 83:19; Esaja 40:28; Apustilit Suliaat 4:24.

10. ’Ernerup aqqani’ kuisinneq qanoq isumaqarpa?

¹⁰ ’Ernerup aqqani’ kuisinneq isumaqarpoq Jiisusip  inissisimaneranik Guutillu ernituatut oqartussaassuseqarneranik akuersineq. (1 Johannesi 4:9) Kuisissinnaasut Guutip Jiisusi „amerlasuut utertinneqaatissaattut“ tunniussimagaa paasisimavaat. (Matthæusi 20:28; 1 Timotheusi 2:5, 6) Aammattaaq kuisittussat akueraat Guutip Erni ’akitsingaartikkaa atermik akimuisumik tamanik tunillugu’. — Filippimiut 2:8-11; Saqqummersitat 19:16.

11. ’Anersaap illernartup aqqani’ kuisinneq qanoq paasisariaqarpa?

¹¹ ’Anersaap illernartup aqqani’ kuisinneq qanoq paasisariaqarpa? Isumaqarpoq kuisittussat paasigaat anersaaq illernartoq tassaasoq Jehovap nukinga sulissutiginnittoq siunertani naapertorlugu assigiinngitsutigut atortagaa. (1 Mosesi 1:2; 2 Samueli 23:1, 2; 2 Petrusi 1:21) Kuisinnissamik piumasaqaatinik eqqortitsisut paasisimavaat anersaap illernartup ’Guutip itissusiinik’ paasitissinnaagaatik, Guutip Naalagaaffia pillugu oqaluussitissinnaagaatik inerititaqartissinnaagaatillu Guutip anersaavata ineritaanik, ’asanninnermik, nuannaarnermik, eqqissinermik, kamajasuunnginnermik, inussiarnisaarnermik, ajunngitsuunermik, unneqqarissusermik, qanilaarnermik imminullu naalakkersinnaanermik’. — 1 Korinthimiut 2:10; Galatiamiut 5:22, 23; Joeli 3:1, 2.

Allamik isumataarnerup saannerullu pingaaruteqarnerat

12. Kristumiutut kuisinneq qanoq ililluni allamik isumataarnermut atassuteqarpa?

¹² Jiisusip ajorteqanngitsup kuisinnera kisimi pinnani kuisinneq allamik isumataarnermut assersuutaavoq, assersuut Guutip akuerisaa. Allamik isumataarneq isumaqarpoq iliuuserisimasamik iliuuserinngitsuugarisimasamilluunniit peqqissimissuteqarneq. Ukiuni hundredelinni siullerni juutit Guutimit iluarisaajumasut Kristusimut ajortuliatik peqqissimissutigisariaqarpaat. (Apustilit Suliaat 3:11-19) Korinthimi kristumiut juutiunngitsut ajortuliatik sualuttut, ilaatigut kinguaassiuutitigut inuunerlunneq, guutipilussiorneq tillittarnerlu, peqqissimissutigaat. Allamik isumataarput taamaattumillu Jiisusip aavani ’uffarneqarput minguiarneqarlutik’; Guutimut kiffartornissamut ’illernatitaapput’, imaluunniit immikkoortitaapput, ’Kristusip aqqatigut Guutillu anersaavatigut iluartuutitaallutik’. (1 Korinthimiut 6:9-11) Ilerasuutaarunniarluni Guutillu ikiuineratigut pisuussuteqartutut misigiunnaarniarluni allamik isumataarneq iliuusiuvoq pingaarutilik. — 1 Petrusi 3:21.

13. Kuisinnermut atatillugu saanneq qanoq isumaqarpa?

¹³ Jehovap Nalunaajaasuisa ilaattut kuisitsinnani saattariaqarpoq. Saanneq nammineq kajumissutsimit iliuusiuvoq Jiisusi Kristusimik malinninniarluni uummammik tamakkiisumik aalajangernermik ersersitsisoq. Tamatumunnga ilaavoq inooriaatsimik ajortumik taamaatitsineq Guutillu isaani eqqortumik iliorniarluni aalajangerneq. Hebræarit Grækerillu taamatut iliuuseqarnermut oqaluutaat Biibilimi isumaqartinneqarpoq „uterpoq, saappoq“. Taamatut iliorneq isumaqarpoq eqqunngitsumik iliuutsinik taamaatitsineq Guutimullu saanneq. (1 Kunngit 8:33, 34) Saassagaanni ’suliat allamik isumataarnerup piumasarisai suliarineqartariaqarput’. (Apustilit Suliaat 26:20) Tassa guutipilussiorunnaartariaqarpoq, Guutip inassutai naapertorlugit iliuuseqartariaqarluni Guutimullu tunniusimalluinnartariaqarluni. (5 Mosesi 30:2, 8-10; 1 Samueli 7:3) Saanneq eqqarsartaatsimik, anguniakkanik inuttullu allanngortitsisarpoq. (Ezekieli 18:31) Pissuserisat ajortut inummik nutaamik taarserlugit ’saattoqartarpoq’. — Apustilit Suliaat 3:19; Efesosimiut 4:20-24; Kolossemiut 3:5-14.

Uummammik tamakkiisumik tunniulluinnarneq pingaaruteqarluinnarpoq

14. Jiisusip ajoqersugaasa tunniulluinnarnermikkut suna takutippaat?

¹⁴ Jiisusip ajoqersugai kuisitsinnatik aamma uummammik tamakkiisumik Guutimut tunniulluinnartariaqarput. Tunniulluinnarneq tassaavoq siunertamut illernartumut immikkoortinneqarneq. Taamatut iliuuseqarneq ima pingaaruteqartigaaq naassaanngitsumut tunniusimalluinnarniarluta aalajangersimanerput Jehovamut qinunikkut ersersittariaqarlutigu. (5 Mosesi 5:9) Suliamut inummulluunniit aalajangersimasumut tunniulluinnarnerinnaanngilaq. Guutimut tunniulluinnarpugut.

15. Kuisittut sooq imermut morsutsinneqartarpat?

 ¹⁵ Kristusi aqqutigalugu Guutimut tunniulluinnaraangatta Biibilimi saqqummiunneqartutut Guutip piumasaatut inuuniarluta ersersittarparput. Tunniulluinnarnermut tamatumunnga assersuutitut kuisittut imermut morsutsinneqartarput, Jiisusip Guutimut sassarnerminut assersuutitut kuussuarmi Jordanimi iliorneratut. (Matthæusi 3:13) Malugisariaqarpoq pisumi pingaarutilimmi tassani Jiisusip Guutimut qinunera. — Lukasi 3:21, 22.

16. Kuisittunik takusaqaraangatta nuannaarnerput naleqquttumik qanoq takutissinnaavarput?

¹⁶ Jiisusip kuisinnera pisimasuuvoq asuleernerunngitsoq nuannersuullunili. Aammattaaq ullumikkut kristumiutut kuisinneq taamaappoq. Guutimut tunniulluinnarnerminnik ersersitsisunik takusaqaraangatta nuannaarnerput takutissinnaavarput ataqqinippaluttumik ersaartaalluta Jehovamullu aalajangiussinerannik nersualaarlugit. Uppernermulli ersersitsinerup tamatuma illernartuunera eqqarsaatigalugu suaartassanngilagut, uinngiartarnata assingusunillu iliornata. Nuannaarnerput ataqqinnittumik takutissavarput.

17, 18. Inuit ataasiakkaat kuisittussanut piumasaqaatit eqqortinneraat qanoq paasineqarsinnaava?

¹⁷ Naalungiarsunnik serpartaasut inuppassuarnilluunniit Biibilimik ilisimasaqanngitsunik pinngitsaaliillutik kuisitsitsisut assiginagit Jehovap Nalunaajaasui kuisigaangamik pinngitsaaliineq ajorput. Anersaakkut piumasaqaatinik eqqortitsisut kisiisa kuisarpaat. Allaat nutaarsiassamik nuannersumik kuisimanatik oqaluussisartunngunnginneranni kristumiut utoqqaanertat qulakkeertarpaat Biibilimi ajoqersuutit tunngaviusut paasisimaneraat, maleruarneraallu apeqqullu una akuerisinnaaneraat: „Jehovap Nalunaajaasuinut ilaarusuppit?“

¹⁸ Taava pineqartoq — utoqqaassusia peqqissuialu apeqqutaallutik — Guutip Naalagaaffianik isumaqarluartumik oqaluusseqataasaruni kuisikkusukkunilu kristumiut utoqqaanertat oqaloqatigissavai. Utoqqaanertat qulakkiissavaat ilumut uppertunngorsimanersoq, Jehovamut tunniulluinnarsimanersoq kuisittussanullu Guutip piumasaqaatai maleruarnerai. (Apustilit Suliaat 4:4; 18:8) Biibilimi ajoqersuutit pillugit apeqqutinut 100-nit amerlanerusunut ilinniartup nammineerluni akissutai tunngavigalugit utoqqaanertap paasissavaa kuisittussanut piumasaqaatit eqqortinnerai. Ilaasa piumasaqaatit eqqortinngilaat taamaattumillu kuisissinnaanatik.

Tunuarsimaaruteqarpit?

19. Johannesi 6:44 naapertorlugu Jiisusip kikkut kingornusseqatigissavai?

¹⁹ Inuppassuarnik kuisitsisuni pinngitsaalineqarlutik kuisittorpassuit qularnanngitsumik oqarfigineqarput toqugunik qilaliassasut. Jiisusili tumiminik atuaasussatut qaaqquneqartut pillugit ima oqarpoq: „Kinaluunniit uannut ornigussinnaanngilaq Ataatap uannik aallartitsisup kajungilersinngippani.“ (Johannesi 6:44) Jehovap 144.000-t Kristusimut kajungilersippai. Taakku qilaap naalagaaffianik Jiisusip kingornusseqatigissavai — kuissullu pinngitsaaliissutaasoq Guutip aaqqissuussinerani inissisimanermut ataqqinartumut tamatumunnga illernarsisitsisinnaanngisaannarpoq. — Romamiut 8:14-17; 2 Thessalonikamiut 2:13; Saqqummersitat 14:1.

20. Suli kuisissimanngitsut suna immaqa iluaqutigisinnaavaat?

²⁰ Ingammik 1930-p kingornali inuppassuit „annikilliortitaangaarnermit“ aniguinissamik nunamilu naassaanngitsumik inuunissamik neriugisaqalersimasut Jiisusip ’savaataanut allanut’ ilanngussimapput. (Saqqummersitat 7:9, 14; Johannesi 10:16) ’Uummatikkut iluunngarlutik tarnikkullu iluunngarlutik, nukitillu tamakkerlugit isumakkullu iluunngarlutik’ Guuti asagamikku Biibili malillugu inuulersimapput kuisinnissamullu  piumasaqaatinik eqqortitsillutik. (Lukasi 10:25-28) Inoqarpoq Jehovap Nalunaajaasuisa ’Ataatamik anersaakkut ilumoornikkullu’ pallorfiginninnerannik ilisimannittunik, Jiisusilli maligassiuneranik suli malinnilersimanngitsunik Jehovamillu asanninnerminnik tassungalu tunniusimalluinnarnerminnik kuisinnermikkut tamanut ersersitsisimanngitsunik. (Johannesi 4:23, 24; 5 Mosesi 4:24; Markusi 1:9-11) Taamaaliornissamut atatillugu ilumoorluni pissutaasorlu taallugu Guutimut qinuneq iluaqutaasinnaavoq. Taamaaliornertik sapiillissutigissavaat Guutillu oqaasianik maleruaalluinnarnissaminnut kajumississutigalugu, Jehova Guutimullu tamakkiisumik tunniulluinnarlutik kuisillutillu.

21, 22. Ilaasa tunniulluinnarnissaminnut kuisinnissaminnullu suna nangaassutigisarpaat?

²¹ Ilaat tunniulluinnarnissaminnut kuisinnissaminnullu nangaapput silarsuarmut tunngasut ulapputiginermik aningaasarsiorniangaaramilluunniit anersaamut tunngasunut piffissaqarpiannginnamik. (Matthæusi 13:22; 1 Johannesi 2:15-17) Isiginnittaasertilli inuunermilu anguniakkatik allanngortikkunikkik pilluarnerungaalissapput. Jehovamut qanimut attaveqalernertik anersaakkut pisuunnguutigissavaat, isumakuluutissakinnerulerlutik Guutillu piumasaanik iliornerup nassatarisaanik eqqissillutik nalerisimaalerlutillu. — Tussiaat 16:11; 40:9; Ussatit 10:22; Filippimiut 4:6, 7.

²² Allat Jehovamik asanninnerarput, tunniulluinnanngillalli kuisinnatillu taamaalillutik akisussaatinneqassasorinnginnamik. Tamattali Guutimut akisussaavugut. Jehovap oqaasia tusaratsiguli akisussaaffeqalerpugut. (Ezekieli 33:7-9; Romamiut 14:12) ’Inuiattut qinerneqarsimasutut’ itsaq Israelikkut inuiannut Jehovamut tunniulluinnarsimasunut ilaallutik inunngortarput, taamaattumillu maleruaqqusai naapertorlugit aalajaallutik kiffartorfiginissaa akisussaaffigalugu. (5 Mosesi 7:6, 11) Ullumikkut inuiannut taamaattunut ilaalluni inunngortoqarneq ajorpoq, Biibilimilli eqqortumik ilisarsilersimagutta ilisarsineq tamanna naapertorlugu upperluta iliuuseqartariaqarpugut.

23, 24. Kuisinnissamut suut nangaassutaasariaqanngillat?

²³ Immaqa ilaat kuisikkumanngillat naammattumik ilisimasaqarsorinnginnamik. Tamattali ilinniagassarpassuaqarpugut ’inuimmi Guutip qanoq iliorneri paatsiveqartinngilluinnarpaat’. (Oqaluussisartup oqaasii 3:11) Ætiopiamiut  dronngianni atorfilik eqqarsaatigeriaruk. Ilasiatut Allakkanik ilisimasaqarpoq, Guutilli siunertaa pillugu apeqqutit tamaasa akisinnaanngilai. Jiisusip ajortit matoorneqaatissaanik pilliutaa aqqutigalugu Jehovap annaanneqaatissatut aaqqissuussaa paasigamiuk erniinnaq Guutimut tunniulluinnarnini kuisinnikkut takutippaa. — Apustilit Suliaat 8:26-38.

²⁴ Ilaat Guutimut tunniulluinnanngillat eqqortitsinngitsoornissartik annilaangagigamikku. Monique 17-inik ukiulik oqarpoq: „Tunniulluinnarnera eqqortinngitsooqinagakku kuisinnissara tunuarsimaarfigaara.“ Uummammilli tamakkiisumik Jehova tatigigutsigu ’ingerlavissavut nalimmatsissavai’. Kiffamisut tunniulluinnarsimasutut aalajaatsutut ’sallusuissummi inuunissatsinnut’ ikiussavaatigut. — Ussatit 3:5, 6; 3 Johannesi 4.

25. Apeqqutit suut eqqassaatigissallugit pitsaassava?

²⁵ Jehovamut tatiginnilluinnarneq asanningaarnerlu pissutigalugit ukiut tamaasa tusindillit tunniulluinnartarput kuisillutillu. Guutimullu kiffat tunniulluinnarsimasut tamarmik soorunami aalajaakkusupput. Ullunili atugarliungaarfiusuni inuuvugut assigiinngitsutigullu uppernitsigut misilinneqartarluta. (2 Timotheusi 3:1-5) Jehovamut tunniulluinnarnerput eqqortinniarlugu qanoq iliorsinnaavugut? Tamanna allaaserisap tulliani sammineqarpoq.

[Quppernerup ataani ilanngussaq]

Eqqaamavigit?

• Kristumiutut qanoq kuisittoqartussaava?

• Kuisitsinnani suna ilisimaqqaartariaqarpa?

• Kristumiutut ilumoortutut kuisinniaraanni qanoq iliortoqartariaqarpa?

• Sooq ilaasa kuisinnissartik nangaassutigaat, qanorlu taakku ikiorneqarsinnaappat?

[Atuaqqissaarnermi apeqqutit]

[Qupp. 14-mi assiliartat]

„Ataatap Ernerullu Anersaallu Illernartup aqqani“ kuisinneq qanoq isumaqarpa?