Uummatinnik isummannillu Guuti ujaruk

Guutip iluarisaanik uppissusermik ineriartortitsiniaraanni uummatip isummallu ilaatinnissaat kristumiussutsimi ilumoortumi kajumissaarutigineqarpoq.

JIISUSI KRISTUSI, kristumiussutsimik tunngaviliisoq, oqarpoq Guuti ‘isumakkut’, ‘silaqassutsikkut’, aamma ‘uummatikkut’ ‘tarnikkullu’ iluunngarluta asassagipput. (Matthæusi 22:37) Aap, pallorfiginninnitsinni silaqassuserput atorluartariaqarparput.

Jiisusip oqaatsini tusarnaartiminut eqqarsaatigilluaqqullugit kajumissaaraangamigit oqarfigai: „Qanoq isumaqarpisi? (Matthæusi 17:25; 18:12; 21:28; 22:42) Apustili Petrusi kristumioqatimi ‘isumaat eqeersarniarsaralugit’ allappoq. (2 Petrusi 3:1) Apustili Paulusi, nalimini ajoqersuiartortitanit angalanerpaajusup, kristumiut kajumissaarpai ’siuneqartutut’ kiffartoqqullugit kiisalu ’sianigileqqullugu sunaasoq Guutip piumasaa: ajunngitsoq, iluarinartoq, naammalluinnartoq.’ (Romamiut 12:1, 2) Aatsaat siuneqassutsip atorneqarneratigut misissueqqissaarnikkullu kristumiut Guutip iluarisaanik, inuunermilu misilinneqarnerit anigornissaannut iluaqutaasumik, uppissuseqalersinnaapput. — Hebræerit 11:1, 6.

Kristumiut ukiuni hundredelinni siullerni allat uppernermik taama ittumik ineriartortitseqqullugit ikiorniaraangamikkik ’allakkat najoqqutaralugit oqaloqatigalugit’ oqaatsitik ‘nassuiartarpaat erseqqissarlugillu’. (Apustilit Suliaat 17:1-3) Ilumoorussillutik soqutiginnittut taamaaliorneq ajunngitsumik qisuariarfigisarpaat. Assersuutigalugu amerlasuut Makedoniami illoqarfimmi Berøami najugaqartut „oqaaseq kajumeqalutik ilassivaat, ullullu tamaasa Allakkat misissuiffigisarpaat paasiniarlugu“ [Paulusip suleqataasalu oqaaserisaat] „ilumut taamaannersut“. (Apustilit Suliaat 17:11) Pingaartumik maluginiarnartut marluk eqqaaneqarput. Juutit Berøamiut  kajumeqalutik Guutip oqaasianik tusarnaarusupput; tulliullugu tusakkatik tamaviisa akueriinnarnagit, Allakkanut naapertuunnersut sianigeqqissaarpaat. Ajoqersuiartortitap kristumiup Lukasip taakku maniguuttumik nersorpai, „iluasaartuunerarlugit“. Illittaaq anersaakkut ittunut taama iluasaartigalutit isiginnittaaseqarpit?

Isummap uummatillu suleqatigiinnerat

Siuliani oqaatigineqareersutut isuma uummallu pallorfiginninnermut ilumoortumut ilaapput. (Markusi 12:30) Allaaserisami siulianiittumi qalipaasoq illumik qalipaasussaq, qalipaatinilli kukkusunik atuisumik assersuut eqqaajuk. Ilitsersuutigineqartunut tusarnaaqqissaarsimasuuguni piginnittup iluarinninnera tatigilluinnarlugu uummatikkut tarnikkullu iluunngarluni sulisimassagaluarpoq. Pallorfiginninnerput eqqarsaatigalugu aamma taamaappoq.

’Ilumoortumik pallorfiginnittut Ataataq pallorfigaat anersaakkut ilumoornikkullu,’ Jiisusi oqarpoq. (Johannesi 4:23) Paulusi assingusumik allappoq: „Taamaattumik . . . soraanngilagut qinnuttarlusi. Qinnutigisarparput tamatigut ilisimassuseqarnissigut anersaakkullu paasisimasaqassutsissigut naammattumik Guutip piumasaanik paasinnilernissarsi, [Jehovap, NV] piumasaa malillugu inuusinnaalerlusi, tamatigut iluarisaanik ilioqqullusi.“ (Kolossemiut 1:9, 10) ‘Tamatigut ilisimassuseqarnerup’ kristumiut ilumoortut uummatikkut tarnikkullu pallorfiginnissinnaatippai tatiginnissinnaatillugillu ‘pallorfigisartik ilisimagamikku’. — Johannesi 4:22.

Tamannarpiaq pissutigalugu Jehovap Nalunaajaasuisa naalungiarsuit soqutiginnilerlaallu Allakkanik misissueqqissaarsimanngitsut kuisitsinneq ajorpaat. Jiisusip ajoqersukkani peqquai: „Inuiaqatigiit tamaasa uannut ajoqersuganngortissigit . . . ajoqersorlugillu ilissinnut peqqussutikka tamaasa maleruaqqullugit.“ (Matthæusi 28:19, 20) Aatsaat Guutip piumasaa pillugu ilisimassuseqalersimasut ilumoorlutik Biibilimik misissueqqissaartut, eqqarsaatigeqqissaariarlugu aalajangersinnaapput Guuti pallorfigerusunnerlugu. Illit taamatut ilisimassuseqalerniarneq anguniarpiuk?

Ataatarpooq qanoq paasisariaqarpa?

Biibilimik ilisimassuseqarnerup qanorlu imaqarneranik qarsupittumik ilisimasaqarnerup assigiinngissutaat Matthæusi 6:9-13-mi ataatarpuumik taaneqartartumi ersarippoq.

Naalagiartartut millionilikkuutaat ataatarpoortarput. Qanorli isumaqarnera qassinit paasineqarsimava, pingaartumik qinnutip aallaqqaataa Guutip aqqanut naalagaaffianullu tunngasoq? Taakku ima pingaaruteqartigipput allaat Jiisusip qinnutaani siulliunneqarlutik.

Imatut aallartippoq: „Ataatarput qilanniittutit! Aqqit illernartitaali.“ Malugiuk Jiisusi oqartoq Guutip aqqata illernartitaanissaa qinnutigissagipput. Apeqqutit marluk akineqartariaqarput. Siullermik: Guuti qanoq ateqarpa? Aappassaanik: Sooq illernartinneqassava?

Apeqqutip siulliup akissutaa Biibilip allassimaqqaataani 7000-nit amerlanerusuni Biibilimi atuarneqarsinnaavoq. Ilaat Tussiaatit 83:19-mi allassimavoq: „Paasitserlugu illit kisivit - aqqit tassaasoq [Jehova] - Qutsinnerussaartuusutit nunarsuarmi tamarmi.“ Guutip aqqa pillugu Mosesimik allakkat 3:15-mi allassimavoq: „Tassa atera naassaanngitsumik aterisara, tassa ateriumasara kinguaariikkuutaani.“ * Sooq Guutip aqqa minguitsuusoq illernartuusorlu tamatigut illernartitaasariaqarpa? Inoqaleqqaarneraniilli mamarlerneqarluni asissorneqarsimammat.

Guutip Edenip naatsiiviani Adami Evalu paarnamik nereqqusaanngitsumik nerippata toqusussaanerarpai. (1 Mosesi 2:17) Satanip kanngusujuilluni Guuti assortorlugu Eva oqarfigaa: „Toqussanngivippusi“. Saatanip taamaalilluni  Guuti sallunerarpaa. Taannaannaanngilarli; Guutip aqqa asissorpaa Evamut oqarnermigut naleqangaartumik ilisimasaqalernissaraluanit Guuti akornusiinerarlugu. „Guutilli nalunngilaa neriffigigaluarussiuk [paarnaq orpimmiittoq ajunngitsumik ajortumillu ilisimalersitsisoq] isisi uisitaajumaartut Guutisullu ilerumaartusi ajunngitsoq ajortorlu nalujunnaassallugit.“ Salloqittaanerujussuaq! — 1 Mosesi 3:4, 5.

Adamip Evallu paarnaq nereqqusaanngitsoq nerigamikku Satanimut tapersersuilerput. Tamatuma kingorna amerlanerit, nalunngikkaluarlugu nalulluguluunniit, Guutip najoqqutassiaanik naapertuilluartunik narruginninnermikkut asissueqataasimapput. (1 Johannesi 5:19) Inuit Guutimik unnerluussiuarput naalliuutiminnut pisuutilugu — allaat namminneq silatusaanngitsumik inooriaaseqarnermikkut kingunerlutsitsigaangamik. „Inuk sianiissusiata orlutittarpaa, uummataali [Jehovamut] kamattarpoq.“ Ussatit 19:3-mi allassimavoq. Jiisusip, Ataatami asangaakkami, aqqata illernarsisinneqarnissaa qinnutigimmagu paasinarpoq.

„Naalagaaffiit tikiulli“

Aqqata illernartitaanissaa qinnutigereerlugu Jiisusi oqarpoq: „Naalagaaffiit tikiulli, piumasat qilammisut nunamissaaq pili;“ (Matthæusi 6:10) Tassunga aperisoqarsinnaavoq: ’Guutip naalagaaffia suugami? Guutillu piumasaata nunamissaaq pinissaanut qanoq attuumassuteqarami?

Biibilimi oqaaseq „naalagaaffik” amerlanertigut naalagaaffimmut kunngilimmut tunngatillugu atorneqartarpoq. Taamaattumik Guutip nalagaaffia tupinnanngitsumik naalagaaffimmut, imaluunniit naalakkersuisunut, Guutimit toqqarneqarsimasumik kunngilimmut tunngatilugu atorneqarpoq. Kunngi taanna tassarpiaavoq Jiisusi Kristusi makititaasimasoq — tassaallunilu „Kunngit Kunngiat Naalakkallu Naalagaat.“ (Saqqummersitat 19:16; Danieli 7:13, 14) Guutip naalagaaffia Messiasikkoortoq Jiisusimit naalakkersorneqartoq pillugu pruffiiti Danieli allappoq: „Kunngit taakkua inuutillugit qilaap Guutiata naalagaaffik qaqugumulluunniit atasussaq pilersikkumaarpaa, kingornalu inuiaat allat kunngiussutsimik pilersitsisinnaassanngillat. Guutip naalagaaffiata kunngeqarfiit allat tamaasa aserortissavai suujunnaarsillugillu, namminerli soraajuitsumik atassaaq.“ — Danieli 2:44.

Aap, Guutip naalagaaffiata nunarsuaq tamaat naalagaaffigissavaa, guutiitsut tamaasa piiarlugit „soraajuitsumik“ atassaaq. Taamaattumik Guutip naalagaaffia aqqutigalugu Satanip guutiitsullu unnerluutaannit eqqunngitsunit Jehovap atini illernarsisinniarpaa. — Ezekieli 36:23.

Guutip naalagaaffia naalagaaffiit allat assigalugit innuttaqarpoq. Taakku kikkuuppat? Apeqqut Biibilimit akineqarpoq: „Kisianni qanilaartut nuna kingornutissavaat pilluangaarnertillu nuannaarutigissallugu.“ (Tussiaat 37:11) Jiisusi assingusumik oqarpoq: „Pilluarput qanilaartut, taakkuami nunarsuaq kingornutissavaat.“ Soorunami Guuti pillugu eqqortumik ilisimasaqarnerat pissutaavoq, tamanna inuuginnarnissamut aalajangiisuummat. — Matthæusi 5:5; Johannesi 17:3.

Nunarsuaq tamarmi anneruniajuitsunik qanilaartunik, Guutimut imminnullu ilumoortumik asaqatigiittunik inulik takorloorsinnaaviuk? (1 Johannesi 4:7, 8) Jiisusip tamanna qinnutigaa oqarluni: „Naalagaaffiit tikiulli, piumasat qilammisut nunamissaaq pili.“ Sooq Jiisusip ajoqersukkani taamatut qinoqqusaqqullugit ilinniartikkai paasiviuk? Pingaarnerusumik, qinnutip taassuma eqquunnerata ilinnut attuumassuteqarnera takusinnaaviuk?

Allakkat millionilinnit maannakkut oqaluuserineqarput

Jiisusip siulittuutigaa Guutip naalagaaffia pilersinneqartussaq nunarsuaq tamakkerlugu anersaakkut ilinniartitsinikkut nalunaarutigineqassasoq. Oqarpoq: „Naalagaaffimmillu iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu [nunarsuarmi pissutsinut maannakkut atuuttunut] naggatissaq nalliutissaaq.“ — Matthæusi 24:14.

 Nunarsuaq tamakkerlugu Jehovap Nalunaajaasuisa 6 millionit missaaniittut tusagassaq nuannersoq inoqatiminnut oqaluussissutigaat. Siuneqassuseqarlutit ’Allakkat misissorneratigut’ Guuti naalagaaffialu pillugit annerusumik ilinniarnissannik kajumissaarpaatsit. Uppernerit nakussatsinneqassaaq nunamilu paratiisiusumi inuunissamik qaamasumik neriuuteqalersissavaatsit, „[Jehovamik] ilisimasaqarnerup nuna tamakkerumaarmagu soorlu ermit matoqqagaat immap naqqa.“ — Esaja 11:6-9.  (wE 4/1 02)

[Quppernerup ataani ilanngussaq]

 [Qupp. 8-mi ungalusaq/assiliartat]

Ajoqersuisorsuaq Ilaaruk

Jiisusip ilinniartitsinermini atuagassiat Biibililersaarutit aalajangersimasut atortarpai. Assersuutigalugu eqqaaneqarsinnaavoq ajoqersukkanut marlunnut toqusimanini pissutigalugu nalornisunut makititaanermi kingorna Guutip siunertaani inissisimaffimminik nassuiaanera. Lukas 24:27-mi allassimavoq: „Mosesi pruffiitillu tamaasa aallarniutigeriarlugit Allakkani tamani imminik pilluni allassimasunik nassuiaaffigai.“

Malugiuk Jiisusip sammisaq aalajangersimasoq toqqaraa — Messiasimut ’imminik pilluni allassimasut’, — ’Allakkallu tamaasa’ issuaaffigisarai. Jiisusip immikkoortut naleqquttut katitertakkatut katitertarpai, ajoqersukkat anersaakkut ilumoortut paasilluarniassammatigit. (2 Timotheusi 1:13) Taamaalillutik paasisaqaannaratik killitsingaarput. Oqattuaq nangippoq: „Uummativut kissalersimannginnerpat aqqutitsinni oqaluffigimmatigut Allakkanillu nassuiaalluta?“ — Lukasi 24:32.

Jehovap Nalunaajaasui oqaluussigaangamik Jiisusip periaasia malinniarsarisarpaat. Atuagassiat Biibililersaarutit neqeroorutiginerusartagaat tassaapput Guutip sumik piumaffigaatigut? atuagarlu Ilisarsineq inuunermut naassanngitsumut sammisoq. Sammisat soqutiginartut Biibilimiittut arlallit atuagassiani taakkunani sammineqarput, assersuutigalugu: „Guuti kinaava?“, „Sooq naalliunnartut atuunnerat Guutip akueraa?“, „Upperisaq ilumoortoq qanoq ililluni nanineqarsinnaava?“, „Ulluni kingullerni inuuvugut“ aamma „Ilaqutariit Guutimik ataqqinartitsisut“. Sammisani tamani allassimaffinnik innersuussuterpassuaqarpoq.

Jehovap nalunaajaasuinut najukkanniittunut saaffiginninnissannut tikilluaqqusaavutit imaluunniit najukkamut atuagassiami matumani qupperneq 2-mi allassimasumut allassinnaallutit sammisassallu taakku allalluunniit pillugit Biibilimik atuaqqissaaqatigineqarnissamik qinnuigisinnaavatit. (wE 4/1 02)

[Assiliartaq]

Sammisat Biibililersaarutit aalajangersimasut sammineratigut ilinniartup uummataa kajumissaaruk

[Qupp. 7-mi assiliartat]

Jiisusip qinnutaata isumaa paasiviuk?

„Ataatarput qilanniittutit! Aqqit illernartitaali . . ..“

„Naalagaaffiit tikiulli . . .“

„Piumasat qilammisut nunamissaaq pili“