Kristumiunut ileqqussatigut najoqqutassiat maleruarnissaannik imminut ajoqersorit allanullu ajoqersuillutit
Kristumiunut ileqqussatigut najoqqutassiat maleruarnissaannik imminut ajoqersorit allanullu ajoqersuillutit
„Illimmi allanut ajoqersuisuusutit imminut ajoqersunngitsoorpit?“ — Romamiut 2:21, Nv.
1, 2. Biibilip atuaqqissaarnissaanut sunik pissutissaqarpugut?
PISSUTISSAQARLUARPUGUT Guutip oqaasiata atuaqqissaarnissaanut. Inuit, pisimasut, sumiiffiit Biibilimilu eqqartorneqartut allat pillugit ilinniarnerorusuppugut. Aamma upperisarsiornermut tunngatillugu ajoqersuutit, assersuutigalugu Guutip ataasiullunilu pingasuussusianik ajoqersuut anniarfimmillu ajoqersuut, pillugit Biibilimi qanorpiaq allassimasoqarnersoq paaserusupparput. (Johannesi 8:32) Pingaaruteqarportaaq Jehovamik ilisarisimanninnerulernissaq, taamaalilluta ilaarluarnerusinnaassagatsigu iluarisaanillu iliorsinnaassalluta. — 1 Kunngit 15:4, 5.
2 Aamma Guutip oqaasiata atuaqqissaarnissaanut allamik pissutissaqarpoq, tamatumami allanut ajoqersuisinnaalersittarpaatigut — ilaquttatsinnut, ilisarisimasatsinnut allanullu naapitassatsinnut. Allanik ajoqersuisusaaneq kristumiunut qinigassaanngilaq, Jiisusimmi ajoqersukkani oqarfigai: „Taamaattumik aallaritsi inunnillu inuiannit tamaneersunik ajoqersuganngortitsigitsi, . . . ajoqersorsigillu ilissinnut peqqusakka tamaasa maleruaqqullugit.“ — Matthæusi 28:19, 20, NV.
3, 4. Jiisusip ajoqersueqqusissutaata maleruarnissaa sooq nersornarpa?
3 Allanik ajoqersuisinnaaneq pitsanngorsarniarlugu Biibilimik atuaqqissaarusunneq nersornarpoq nalerisimaarnaqalunilu. Ilinniartitsisuuneq ukiut ingerlaneranni ataqqineqartarsimavoq. Qinerlerfissiami Encarta Encyclopedia-mi allassimavoq: „Juutit akornanni inersimasorpassuit ilinniartitsisut annannissamut aqqutissiuisutut isigaat, allaallu meeqqat kajumissaartarpaat ilinniartitsisutik angajoqqaaminnit ataqqineroqqullugit.“ Aamma nersornarpoq kristumiut ilumoortut Biibilimik imminnut ajoqersortartut kingornalu allat maleruaqqullugu ajoqersorlugit.
4 „Ilinniartitsisut suliamik ilinniagalinni amerlanerpaapput, angutit arnallu 48 millionit missaat ilinniartitsisuugamik.“ (The World Book Encyclopedia) Atuarfinni ilinniarfinnilu ilinniartitsisut meeqqat inuusuttullu isumaat sunnersinnaavaat, ukiorpassuarnilu taakkunannga malugineqarsinnaasarpoq. Jiisusilli allanik ajoqersuinissamik peqqussutaa naalakkaangatsigu sunniuteqarnerungaarsinnaasarpoq, ajoqersuineq taanna naassaanngitsumik inuuneqalersitsisinnaammat. Apustili Paulusip tamanna erseqqissarpaa Timotheusi allaffigigamiuk: „Imminut nakkutiginiarit, aamma ajoqersuisutut suliat nakkutiginiaruk aalajangiullugulu, tassami taamaalioruit imminut annaatissagavit tusartitillu annatsillugit.“ (1 Timotheusi 4:16) Tassa ajoqersuinerput inunnut annassutaasinnaavoq.
5. Kristumiut ajoqersuinerannut peqataaneq sooq immikkut ittuua?
5 Imminut ajoqersornitta kingorna allanut ajoqersuisinnaatitaanerput qutsinnerpaamit pivoq, tassa silarsuarmi kisimi Oqartussaasumit. Taamaammat ajoqersuineq tamanna tassaavoq ilinniartitsineq nersornarnerpaaq. Oqaluussisartut kristumiut Biibilimik ajoqersuinerat allanut, piginnaanernik tunngaviusunik soorlu atuarsinnaanermik naatsorsuisinnaanermillu imaluunniit suliarisartakkanut atatillugu piginnaanernik ilinniartitsinermut, naleqqiunneqarsinnaanngilaq. Allaat nakorsaatitigut ilisimatusarnermi ilinniartitsinermut naleqqiunneqarsinnaanngilaq. Tassami Kristumiut ilumoortut inuit ajoqersortarpaat Guutip ernera, Jiisusi Kristusi, ilaaqqullugu allanillu aamma taamatut ajoqersuisinnaalersillugit. — Johannesi 15:10.
Sooq imminut ajoqersussaagut?
6, 7. (a) Sooq imminut ajoqersoqqaartariaqarpugut? (b) Ukiuni hundredelinni siullerni juutit ilaat qanoq ajoqersuinerluppat?
6 Sooq imminut ajoqersoqqaartariaqarpugut? Allat eqqortumik ajoqersorsinnaanngilavut imminut ajoqersoqqaarsimanngikkutta. Biibilimi Paulusip tamanna erseqqissarpaa juutit ilaat taamanikkut inuusut eqqarsariaallannartumik allaffigigamigit, aammali kristumiut ullumikkut pingaartumik ilinniarfigisinnaavaat. Paulusi aperivoq: „Taava illit allanut ajoqersuisuusutit imminut ajoqersunngitsoorpit? Oqaluussisartutit: ’Tillissanngilatit,’ nammineq tillittarpit? Oqartartutit: ’Allasiussanngilatit,’ nammineq allasiortarpit? Guutipilunnik maajuginnillutit oqartartutit naalaffiit piiaaffigisarpigit? Illit inatsisinik usorsisimaarutiginnittuusutit Guuti narrunarsartarpiuk inatsisinik unioqqutitsinikkut?“ — Romamiut 2:21-23, NV.
7 Taamaalilluni Paulusip apeqqutit atorlugit uparuarpai Inatsisini Qulini toqqaannartumik inerteqqutigineqartut marluk, tillinneq allasiornerlu. (2 Mosesi 20:14, 15) Paulusip nalaani juutit Guutip inatsisai pigigamikkik usorsitsaatigaat. Juutit ’inatsisit tunngavigalugit ajoqersorneqarsimapput’ qularutiginagulu ’tappiitsunut ilitsersuisinnaallutik taartumiittunut qaammaqqutaasinnaallutik, sianiitsunut perorsaasuusinnaallutik meeqqanullu ajoqersuisuusinnaallutik’. (Romamiut 2:17-20) Ilaalli ilumoortuusaarniartuupput isertorlutik tillittaramik allasiortarlutilluunniit. Tamanna Inatsisinut inatsisiliortumullu, Jehova Guutimut, narrunarsaaneruvoq. Paasinarpoq allanut ajoqersuisinnaanngivissut, imminnummi ajoqersunngillalluunniit.
8. Paulusip nalaani juutit ilaasa immaqa qanoq ’naalaffiit piiaaffigaat’?
8 Paulusip aamma naalaffimmik piiaaffiginninneq eqqaavaa. Juutit ilaat ilumut taamaaliorpat? Paulusip suna eqqarsaatigaa? Itinerusumik nassuiarneqanngimmat naluarput juutit ilaasa ’naalaffik piiaaffigigaat’ qanoq paasisariaqarnersoq. Tamanna sioqqullugu Efesosimi pisortat allattuat oqarsimavoq Paulusip angalaqatai ’naalaffimmi tillinniartuunngitsut’. Immaqa juutit tamatuminnga unnerluutigineqartaraluarput. (Apustilit Suliaat 19:29-37) Erlinnartuutit Guutimik nalusut naalaffiinit, sakkutuunit imaluunniit upperisarsiornikkut ingasattajaarniartunit ujajarneqarsimasuneersut, atorsimanerpaat tunisimanerlugilluunniit? Guutip inatsisai naapertorlugit kuultimik sølvimillu guutipiluliat aserorneqarluinnassapput. Juutit namminneq iluaqutissaminnut atortussaanngilaat. (5 Mosesi 7:25) * Tassa Paulusip pisimasinnaavai juutit Guutip inatsisaanik sumiginnaasut Guutimillu nalusut naalaffiinit atortussanik namminneq atuisut aningaasarsiortulluunniit.
9. Jerusalemimi naalaffimmut atatillugu unioqqutitsinerit suut naalaffimmit ujajaanertut oqaatigineqarsinnaappat?
9 Aamma allatut nassuiarneqarsinnaavoq. Josefusip eqqartorpaa Romami assuarnartuliaq juutinit sisamanit peqataaffigineqartoq, ilaatigut inatsisinik ajoqersuisumit. Taakkua arnaq Romamiu juutit upperisaannut ilanngussimasoq akuersiinnartippaat kuultimik erlinnartuutinillu allanik naalaffimmut Jerusalemimiittumut tunissuteqaqqullugu. Tunissutilli tigugamikkik namminneq atorpaat. Tamanna naalaffimmit piiaaffiginninnerunnginnerpa? * Allat Guutip naalaffia ilaatigut imatut piiaaffigaat innarluutilinnik pilliillutik naalaffimmilu piumatuumik niuerneq siuarsarlugu. Taamaalillutik naalaffik ’ujajaasunut inissanngortippaat’. — Matthæusi 21:12, 13; Malaki 1:12-14; 3:8, 9.
Kristumiut ileqqussaannik ajoqersuigit
10. Paulusip Romamiunut allagai 2:21-23-mi suna pingaarnersaava?
10 Paulusip ukiuni hundredelinni siullerni tillittut allassiortullu naalaffimmiluunniit piiaasut eqqartoramigit suna pineraa nalugaluarlutigu, tusarliussaata pingaarnersaa sumiginnartariaqanngilarput. Ima aperivoq: „Illimmi allanut ajoqersuisuusutit imminut ajoqersunngitsoorpit?“ Malugisariaqarparput Paulusip assersuutimini ileqqussanut tunngasut pigai. Apustilip samminngilai Biibilip oqaluttuarisaanera ajoqersuutilluunniit aalajangersimasut, kristumiunulli ileqqussaatigut najoqqutassianik imminut ajoqersorneq allanullu ajoqersuineq sammivai.
11. Guutip oqaasianik atuaqqissaarnitsinni sooq kristumiunut ileqqussatigut najoqqutassiat maluginiartariaqarpavut?
11 Paulusip Romamiunut allagai 2:21-23-mi siunnersuineq iluaqutigissagutsigu, Biibilimi ileqqussatigut najoqqutassiat ilinniartariaqarpavut, nammineq maleruartariaqarlugit allallu taamaalioqqullugit ajoqersortariaqarlugit. Taamaattumik Biibilimik atuaqqissaarnitsinni maluginiartariaqarparput Jehovap najoqqutassiai, kristumiut ileqqussaannut tunngaviusut, pillugit qanoq allassimasoqarnersoq. Biibilimi siunnersuutinik eqqarsaatiginninnissaq piffissaqarfigisaruk, nukittullutillu inuuninni maleruarnissaannut. Taamaaliussaguit sapiissuseqarlutillu aalajangeriataallaqqissuusariaqarputit. Inuit naammalluinnanngitsut pisuni aalajangersimasuni patsisissarsioriaannaapput kristumiunut ileqqussatigut najoqqutassianik sumiginnaanissaq ajoqutaannginnerarlugu allaalluunniit pisariaqarnerarlugu. Juutit Paulusip eqqartugai immaqa patsisissarsiullaqqissuupput, peqquserluttumik tunngavilersullaqqissuullutik allanilluunniit salloqqittaallaqqissuullutik. Paulusilli oqaasiisa takutippaat Guutip ileqqussatigut najoqqutassiai inuit iluarisaat naapertorlugit pingaaruteqannginnerarneqarsinnanngitsut.
12. Iliuutsivut Jehovamut qanoq attuumassuteqartinneqarsinnaappat, aamma sooq tamatuma eqqaamanissaa pingaaruteqarpa?
12 Biibilimi ileqqussatigut najoqqutassiat ilinniarnissaannut maleruarnissaannullu pissutaasut pingaarnerpaartaasa ilaat apustilip erseqqissarpaa. Juutit ileqqorlunnerat Jehovamut kanngunarsaavoq. Paulusi allappoq: „Illit inatsisinik usorsisimaarutiginnittuusutit Guuti narrunarsartarpiuk inatsisinik unioqqutitsinikkut? Tassami ’ilissi pissutaallusi Guutip aqqa inuianni allani mitaatigisaavoq’.“ (Romamiut 2:23, 24, NV) Ullumikkuttaaq taamaappoq. Kristumiunut ileqqussatigut najoqqutassiat sumiginnarutsigik najoqqutassiat taakkua pilerfiat narrunarsassavarput. Guutilli najoqqutassiaanik aalajangiussinitsigut ataqqissavarput. (Esaja 52:5; Ezekieli 36:20) Tamatuma aalajaattuarniarluta aalajangernerput nakussatsissinnaavaa usserneqaraangatta imaluunniit arlaannik pisoqaraangat kristumiunut ileqqoreqqussat sumiginnarnissaannik ajornanngipasinnerulersitsisunik imaluunniit sumiginnaraanni ilorrisimaarnarpasinnerulersitsisunik. Paulusip oqaasii aamma allamik ilinniarfigisinnaavavut. Iliuutsitta Jehova Guutimut attuumassuteqarnerannik eqqumaffiginnittariaqarnitta saniatigut allanik ilinniartitsigaangatta paasitittariaqartarpavut iliuutsimikkut Jehova ataqqissalluguluunniit kanngunarsassagaat. Guutip ileqqussatigut najoqqutassiaanik maleruaanerup nuannaalersiinnartanngilaatigut peqqissutsitsigullu illersuinnartarnata. Najoqqutassianik tamakkuninnga tunisisumut, maleruarnissaannillu kajumissaarisumut, ataqqinaataavoq. — Tussiaat 74:10; Jaaku 3:17.
13. (a) Ileqqussanut tunngasut eqqarsaatigalugit Biibili qanoq iluaqutigisarparput? (b) Paulusip Thessalonikamiunut allagai siulliit 4:3-7-mi qanoq siunnersuuteqarpa?
13 Iliuutsivut inunnut allanuttaaq sunniuteqartarput. Guutip oqaasiani arlalinnik assersuuteqarpoq Jehovap najoqqutassiaanik maleruaanerup iluaqutaaneranik sumiginnaanerullu ajoqutaaneranik paasinarsisitsisunik. (1 Mosesi 39:1-9, 21; Josva 7:1-25) Ileqqussanut tunngasunik toqqaannartumik siunnersuutit assersuutigalugu uku atuarsinnaavavut: „Guutimmi piumasaa tassaavoq illernartitaanissarsi, kinguaassiuutitigut inuunerlunnginnissarsi; tamassi timisi pigisinnaassagisi iluarsiartortillusi ataqqinartillusilu, kinguaassiuutitigut pilerituumik illigussuseqarnasi inuttut inuiaqatigiinneersutut Guutimik ilisarsinngitsutut; ilarsiluunniit ima sualutsigisumik iliussanngitsoq qatanngunni ajoquserlugu tamatumunngalu atatillugu pisussaanera narrunarsarlugu, Jehovammi taamaaliornerit qanorluunniit ittut pillarneqaataanissaat piumasaraa, . . . Guutimmi qaaqqunngilaatigut minguttuujunissaq akueralugu kisianni illernartitaaqqulluta.“ — 1 Thessalonikamiut 4:3-7, NV.
14. Paulusip Thessalonikamiunut allagai siulliit 4:3-7 eqqarsaatigalugit qanoq aperisoqarsinnaava?
14 Versinit taakkunannga inuit amerlanerit paasisinnaassavaat kinguaassiuutitigut inuunerlunneq Guutip ileqqussatigut najoqqutassiaanik unioqqutitsinerusoq. Amerlanertigulli allassimaffiit ingerlaannaq paasisatsinnit isumaqarnerusarput. Tamanna paasinartarpoq Biibili peqqissaarnerusumik atuaqqissaaraanni. Atuaqqissaaraanni eqqarsaqqissaarnissarlu piffissaqarfigigaanni siuneqassuseqarnerulernartarpoq. Assersuutigalugu eqqarsaatiginerusinnaavarput Paulusi qanoq isumaqarnersoq allakkami kinguaasssiuutitigut inuunerluttup ’qatanngunni ajoquseraa tamatumunngalu atatillugu pisussaanera narrunarsaraa’. Allat ’pisussaanerannik’ qanoq narrunarsaasoqarsinnaava, allassimaffimmillu paasinninnerunitta qanoq kristumiutut iliuuseqarnissatsinnut kajuminnerulersissinnaavaatigut? Apeqqutinut tamakkununnga akissutissarsinerup qanoq allanut ajoqersuilluarnerulersissinnaavaatigut Guutimillu ataqqinninnissaannut ikiuilluarnerulersissinnaalluta?
Ajoqersuinissat siunertaralugu atuaqqissaartarit
15. Nammineq atuaqqissaarnermi suut iluaqutaasinnaappat?
15 Jehovap Nalunaajaasuisa atuaqqissaarutit assigiinngitsut atorsinnaavaat apeqqutit aalajangersimasut misissornerorusukkaangamikkik. Oqaatsini assigiinngitsorpassuarni Vagttårnip naqitigaani allassimaffinnik ujarliut atorneqarsinnaavoq. Ujarliut taanna pigigukku Jehovap Nalunaajaasuisa naqitertitaanni paasissutissat ujarsinnaavatit. Sammisat allassimafiilluunniit ujarneqarsinnaapput. Aamma oqaatsini assigiinngitsuni Watchtower Library atorneqarsinnaavoq. Qarasaasiap programmia Cd-rommimiittoq taanna atuagassiarpassuarnik imalik iluaqutigalugu sammisat allassimaffiilluunniit aalajangersimasut ujarneqarsinnaapput. Iluaqutissat tamakku pigigukkit Guutip oqaasianik atuaqqissaartarninni atorluartariaqarpatit. Taamaalioruit allanut ajoqersuillaqqinnerulissaatit.
16, 17. (a) Paulusip Thessalonikamiunut allagai siulliit 4:6-imi kikkut ’pisussaanerat’ pineqarnersoq sumi nassuiaatissarsisinnaavarput? (b) Kinguaassiuutitigut inuunerlunnikkut allat ’pisussaanerat’ qanoq narrunarsarneqartarpa?
16 Assersuutigeriartigu Paulusip Thessalonikamiunut allagai siulliit 4:3-7, tassani allat ’pisussaanerannik’ narrunarsaaneq eqqaaneqarmat. Kikkut ’pisussaanerat’ pineqarpa, qanorlu narrunarsarneqarsinnaava? Atuaqqissaarutit eqqaaneqareersut iluaqutigalugit allassimaffiit taakku pillugit paasissutissarsisinnaassaatit, aamma kia „pisussaanera“ nassuiarneqarpoq. Assersuutigalugu Indsigt i Den Hellige Skrift, atuagaq 2-mi, qupperneq 1091-mi, erĸisineĸ isumangnáissuserdlo piviussut -- ĸanoĸ pilersíneĸásápat?, qupperneq 148-mi, Vagttårnet 15. november 1989-moortumi, qupperneq 31-mi paasissutissarsisoqarsinnaavoq.
17 Innersuussinerit tamakku misissornerugaanni paasinarsisarpoq Paulusip oqaasii qanoq ilumoortigisut. Kinguaassiuutitigut inuunerluttoq Guutimut ajortuliorpoq nappaammillu tunillanneqarnissaminik navianartorsiorluni. (1 Korinthimiut 6:18, 19; Hebræerit 13:4) Angut kinguaassiuutitigut inuunerlukkuni assigiinngitsutigut arnap pisussaaneranik narrunarsaasarpoq. Ileqqussatigut minguitsuujunnaarsippaa ilerasuuteqalersillugulu. Arnaq katissimanngippat, minguitsutut katinissaminut pisussaanera uissaatalu nuliassami angummit attorneqarsimannginneranik ilimasunnissaminut pisussaanera narrunarsarpai. Arnap angajoqqaavi katissimappallu aamma uia narrunarsarpai. Angutip kinguaassiuutitigut inuunerluttup aamma ilaquttani ileqqussatigut tusaamasaalluarnissaannik pisussaaffiiarpai. Ilagiinnut kristumiunut ilaasortaaguni aamma kanngusuutississavai tusaamasaanerlutilissallugillu. — 1 Korinthimiut 5:1.
18. Kristumiunut ileqqussatigut najoqqutassianut atatillugu Biibilimik atuaqqissaarneq qanoq iluaqutigaajuk?
18 Allassimaffimmut nassuiaat taamaattoq Guutip oqaasiata qanoq ititigineranik takutitseqataannginnerpa? Taamatut atuaqqissaarneq iluaqutaasorujussuuvoq, taamaaliornikkullu imminut ajoqersortarpugut. Sallussuissut Guutip oqaasiani paasinarnerusarpoq, eqqarsaatillu uatsinnut sunniuteqarnerusarput. Qanorluunniit usserniarneqaraluaraanni kristumiunut ileqqussatigut najoqqutassiat aalajangiusimaniarlugit aalajangerneq taamaaliornikkut nakussatsinneqartarpoq. Aamma ajoqersuillaqqinnerulernissatsinnut iluaqutigissavarput. Allat Biibilimik ajoqersoraangatsigik Paulusip Thessalonikamiunut allagai siulliit 4:3-7-mi allassimasunik paasinninnissaannut ikiorsinnaavavut, tamatumalu kristumiunut ileqqussatigut najoqqutassianik pingaartitsinerulersissavai. Illit allallu Guutimik ataqqinninnissassinnut atuaqqissaarnerit taamatut iluaqutigisinnaavarsi. Paulusip Thessalonikamiunut allagaanit assersuut ataasiinnaq allaaserisami uani eqqartorneqarpoq. Kristumiunut ileqqussatigut najoqqutassianut atatillugu aamma allanik annikitsualoqarpoq — siunnersuutit pitsaasut Biibilimilu maligassaalluartut misissorneqarnerusinnaasut, ilinniarfigineqarsinnaasut ajoqersuinermilu atorneqarsinnaasut.
19. Kristumiunut ileqqussatigut najoqqutassiat maleruarnerat sooq pingaaruteqarpa?
19 Qularutissaanngilaq atuaqqissaarneq Guutillu ileqqussatigut najoqqutassiaanik paasisaqarnerulerneq silatusaarnerusoq. Jaakup allagai 3:17-imi allassimavoq ’ilisimassuseq pavannga pisoq’, Jehova Guutimeersoq, ’pingaarnerpaamik minguitsuusoq’. Ima paasisariaqarpoq inuunitsinni kristuminut ileqqussatigut najoqqutassiat maleruartariaqarivut. Aap, Jehovap imminut sinniisutut allanut Biibilimik ajoqersuisartut piumaffigai ’minguissutsikkut’ maligassaalluassasut. (1 Timotheusi 4:12) Paulusi Timotheusilu kristumiunut maligassaalluarput. Kinguaassiuutitigut inuunerlunnaveersaarput, allaallu Paulusi allappoq: „Kinguaassiuutitigut inuunerlunneq mingunnartullu suulluunniit piumatuussuserlu taaneqassanngillalluunniit akornassinni, illernartut tamakku ileqqussarinngimmatigit. Ileqqussaanngilartaaq kannguttaanneq sianiitsunillu quiasaarnipalaanilluunniit oqalunneq.“ — Efesosimiut 5:3, 4.
20, 21. Sooq apustili Johannesip Johannesip allagai 5:3-mi oqaasii isumaqatigaagit?
20 Guutip oqaasiani ileqqussatigut najoqqutassiat paasinarluinnartuupput, maleruaruminaanngillallu. Johannesip, apustilinit allanit sivisunerpaamik inuusup, tamanna paasisimavaa. Ukiorpassuarni inuunermini misilittagaqarluarami paasivaa kristumiunut ileqqussatigut najoqqutassianik maleruaaneq inummut ajoqutaanavianngitsoq. Akerlianilli iluaqutaangaassaaq. Johannesip tamanna erseqqissarpaa allakkami: „Guutimummi asanninneq tassaavoq inassutai maleruaratsigit, inassutaalu artornartuunngillat.“ — 1 Johannesi 5:3.
21 Malugisariaqarparpulli Johannesip Guutip ileqqussatigut najoqqutassiaanik maleruaanissamut kajumissaaramisigut pissutigiinnanngikkai taamaaliornikkut ajornartorsiuterpassuaqalinnginnissarput kingunerlutsitsinnginnissarpullu. Aap, eqqortumik isiginnittaaseqalersippaatigut paasitilluta taamaaliornerput pingaarnerpaamik Jehova Guutimut asanninnitsinnut takussutissaasoq. Tassa Guutimut asanninnerput ineriartortinniarlugu allallu taamaaliornissaannik ilinniartinniarlugit kristumiunut ileqqussatigut najoqqutassiat maleruarnissaannik imminut ajoqersortuartariaqarpugut allanullu ajoqersuiuartariaqarluta. (wE 06/15 02)
[Quppernerup ataani ilanngussat]
^ imm. 8 Oqaluttuarisaanermik allattoq Josefusi isumaqanngilaq juutit illernartitamik nalinginnaatitsisut, taamaakkaluartorli erseqqissarpaa Guutip inatsisaani qanoq allassimasoqarnera ima allakkami: „Kialuunniit guutit illoqarfinni allani ataqqineqartut mitallissangilai, allalluunniit naalaffii piiaaffigissanagit, erlinnartuutilluunniit guutit ilaannut tunniunneqartut tigussanagit.“ (Uagut allanneri uingasunngortippavut.) — Jewish Antiquities, atuagaq 4, kapitali 8, immikkoortoq 10.
^ imm. 9 Jewish Antiquities, atuagaq 18, kapitali 3, immikkoortoq 5.
Eqqaamavigit?
• Sooq imminut ajoqersoqqaartariaqarpugut allat ajoqersortinnagit?
• Iliuutsivut qanoq Jehovap aqqanut attuumassuteqarsinnaappat?
• Kinguaassiuutitigut inuunerluttup allat ’pisussaanerat’ qanoq narrunarsartarpaa?
• Kristumiunut ileqqussatigut najoqqutassiat eqqarsaatigalugit suna aalajangiulluinnartariaqarparput?
[Atuaqqissaarnermi apeqqutit]
[Qupp. 30-mi assiliartaq]
„Inassutai artornartuunngillat“