Jehovap innuttani qaamanermik pilluaqquai
Jehovap innuttani qaamanermik pilluaqquai
„Nikutserit, qaammalerit qaammaqqutissat takkutereermat [Jehovallu] naalannassusiata nuiffigimmatit.“ — Esaja 60:1.
1, 2. (a) Inuit qanoq ittunik atugaqarpat? (b) Silarsuup taarmiuneranut kina pisuua?
„ESAJA-taqartuugutta Paulusertaqartuuguttaluunniit.“ 1940-kkunni USA-p præsidentia Harry Truman taama ajuusaarpoq. Oqaatsini-uku qanoq isumaqartikkai? Misigivoq piffissami tamatumani ileqqorissaartumik siulersuisoqarnissaq silarsuarmi pisariaqartinneqartoq. Inuiaat ukiuni 1900-kkunni piffissamit taarnerpaamit, sorsunnersuup aappaanit anigueqqammerput. Sorsuttoqarunnaaraluartorli, silarsuarmi eqqissineqanngilaq. Taartup silarsuaq suli matoqqavaa. Aamma ullumikkut, sorsunnersuup aappaanit ukiut 57-it qaangiuttut, silarsuaq suli taarmiuvoq. Præsidenti Truman ullumikkut inuusimagaluaruni qularnanngitsumik suli oqarumassagaluarpoq pruffiiti Esajatut apustili Paulusitullu ileqqorissaartigisunik siulersuisoqarnissaq pisariaqartinneqartoq.
2 Præsidenti Trumanip ilisimappagu ilisimanngippaguluunniit apustili Paulusip silarsuup taarmiunera allaatigaa, allakkaminilu mianersoqqussutigalugu. Assersuutigalugu Paulusip kristumioqatini ima allaffigai: „Sorsunnerput uinimmut aammullu sorsunnerunngilaq, piginnaatitaasunulli pissaanernullu taartumi matumani silarsuarmi naalagaasunut ajussutsillu anersaavinut pissaasunut qilaap ataaniittunut.“ (Efesosimiut 6:12) Paulusip silarsuup taarmiunera allaatigiinnanngilaa, aammattaarli uparuarpaa taarmiuneranut pissutaasoq, tassa anersaapiluit pissaaneqangaartut ’silarsuarmi naalagaasutut’ taaneqartut. Anersaat pissaaneqangaartut taamaattut silarsuup matuma taarmiuneranut akisussaappata, taava qimagutsinniarlugit inuinnannguakkuluttut qanoq iliorsinnaavugut?
3. Esaja naapertorlugu silarsuaq taarmiugaluartoq sumik neriuutissaqarpugut?
3 Aamma Esajap silarsuup taarmiunera eqqaavaa. (Esaja 8:22; 59:9) Isumassarsisitaallunili siulittuutigaa Jehovap maanna taarmiuffitsinni qaamasumik nuannarisaqartut siunissamut isumalluarsinnaanissaannut periarfissikkumaarai. Aap, ullumikkut Paulusi Esajaluunniit akornatsinniinngikkaluartoq, allagaat isumassarsiarititaasut siunnersiorfigisinnaavavut. Jehovamik asannittunut pilluaqqussutaangaarpoq — tamanna Esajap allagaani kapitali 60-imi siulittuutaasumi, maanna misissulikkatsinni, erserluarpoq.
Arnaq siulittuutaasoq qaammarsaasoq
4, 5. (a) Jehovap arnaq qanoq peqquaa, qanorlu neriorsorpaa? (b) Esaja kapitali 60-imi pissanganartunik sunik siulittuuteqarpa?
4 Esaja kapitali 60-imi oqaatsit siulliit arnamut atugarliortumut oqaasiupput. Taarmiulluni nunami siaarluni nalavoq. Tassanngaannaq taartumi qaamasoqalerpoq, Jehovalu suaarpoq: „Nikutserit, qaammalerit qaammaqqutissat takkutereermat [Jehovallu] naalannassusiata nuiffigimmatit.“ (Esaja 60:1) Maanna arnaq nikuissaaq Guutillu qaamasua, naalannassusia, akisutsillugu. Sooq? Versip tulliani tamanna akineqarpoq: „Takuat, taartup nuna matoorpaa, taarsuup matoorpai inuiaat; illilli [Jehovap] nuiffigaatit, naalannassusialu takkuppoq qulikkut.“ (Esaja 60:2) Arnap Jehovap peqqussutaa naalappagu nuanningaartumik kinguneqassaaq. Jehova oqarpoq: „Inuiaqatigiit ingerlaarumaarput qaamanerpit tungaanut, kunngillu nuinerpit akisunnerata tungaanut.“ — Esaja 60:3.
5 Versini pingasuni taakkunani oqaatsit pissanganartut kapitali 60-ip imarisaanik paasissutissiillutillu eqikkaanerupput. Kapitalimi siulittuutaavoq arnap siulittuutaasup qanoq atugaqarnissaa, nassuiarneqarlunilu ullumikkut inuiaat taarmiugaluartut qanoq Jehovap qaamasuaniissinnaasugut. Versinili pingasuni taakkunani assersuutit qanoq paasisariaqarpat?
6. Esaja kapitali 60-imi arnaq pineqartoq kinaava, nunarsuarmilu kikkut sinniisorai?
6 Arnaq Esaja 60:1-3-mi pineqartoq tassaavoq Zioni, Jehovap qilammi peqatigiissortai anersaajusut. Ullumikkut Zionip nunarsuarmi sinniisorai ’Israeli Guutip pigisaata’ sinneri, kristumiut tanitat silarsuaq tamakkerlugu ilagiivi, qilammi Kristusimik naalakkersueqateqarnissamik neriugisallit. (Galatiamiut 6:16) Inuiaat anersaakkut ittut taakku tamakkerunik 144.000-iussapput, ullumikkullu Esaja kapitali 60-ip eqquunnera taakku ilaannut „ullussani kingullerni“ nunarsuarmi inuusunut eqquuppoq. (2 Timotheusi 3:1; Saqqummersitat 14:1) Aammattaaq siulittuut kristumiut tanitat suleqataannut ’savanut allanut’ ’amerlangaartunut’ attuumassuteqarluinnarpoq. — Saqqummersitat 7:9; Johannesi 10:16.
7. Zioni 1918-imi qanoq atugaqarpa, qanorlu siulittuutigineqarsimava?
7 „Israeli Guutip pigisaa“ siulittuummi arnatulli piffissap ilaani taarmiusimava? Aap. Ukiut 80-it sinnerlugit matuma siorna, sorsunnersuup siulliup nalaani, kristumiut tanitat oqaluussiinnarnissartik ilungersuutigaat. 1918-imili, sorsunnersuup ukiuani kingullermi, aaqqissugaasumik oqaluussisarneq unilluinnarpoq. Joseph F. Rutherford, silarsuaq tamakkerlugu oqaluussinermik nakkutilliisoq, kristumiullu nuimasut allat eqqunngitsumik unnerluutigineqarlutik sivisuumik parnaarussassanngortinneqarput. Kristumiut tanitat taamani nunamiittut Saqqummersitat-ni siulittuutigineqarput ’aqqusiniinnarmiikkumaartut illoqarfissuarmi anersaakkut Sodomamik Egyptenimillu taaneqartartumi’. (Saqqummersitat 11:8) Ilumut Zionimut, nunarsuarmi qitornaminik tanitanik sinniisoqartumut, piffissaavoq taartoq.
8. 1919-imi qanoq allanngorluinnartoqarpa, sunalu kinguneraa?
8 1919-imili allanngortoqarpoq. Jehovap Zioni qaamasuminik qinngorfigaa. Israeli Guutip pigisaanut ilaasut nikuipput Guutillu qaamasua akisutsillugu qunusuillutik nutaarsiassaq nuannersoq oqaluussissutigeqqilerlugu. (Matthæusi 5:14-16) Kristumiut taakku aallussilluaqqilerallartillugit allat Jehovap qaamasuanut kajungilersinneqarput. Nutaat ilannguttut aallaqqaammut aamma Israeli Guutip pigisaanut ilaasutut taninneqarput. Guutip qilammi naalagaaffianik Kristusi kingornusseqatigissagamikku Esaja 60:3-mi kunnginik taaneqarput. (Saqqummersitat 20:6) Kingusinnerusukkut savat allat amerlangaartut Jehovap qaamasuanut kajungilerput. Taakkuupput ’inuiaat’ siulittuummi taaneqartut.
Arnap qitornai angerlarput!
9, 10. (a) Maluginiarnartumik sumik arnaq takusaqarpa, sumullu assersuutaava? (b) Zionip suna nuannaarutigisinnaavaa?
9 Maanna Jehovap Esaja 60:1-3-mi siulittuut annikitsualunnik ilavaa. Arnamut oqarpoq: „Qineriassasutit!“ Arnaq naalappoq, maanna nuanningaartumik takusaqarpoq. Qitornai angerlarmut ingerlapput. Allassimaffillu nangippoq: „Katersuullutik tamarmik ornippaatsit. Ernitit ungasissumit aggerput panitillu kissumiarneqarlutik.“ (Esaja 60:4) Guutip Naalagaaffia pillugu silarsuaq tamakkerlugu oqaluussinerup 1919-imi aallartittup kinguneranik tusindilikkuutaat Jehova kiffartorfigilerpaat. Aamma taakku Zionip ’ernerilerpai panigilerlugillu’, Israeli Guutip pigisaanut ilaasortat tanitat. Taamaalilluni Jehovap Zioni pilluaqquaa 144.000-it sinneri qaamasumiilersillugit.
10 Zionip qitornani najortigileramigit nuannaarnera takorloorsinnaaviuk? Jehovap Zioni allamik aamma nuannaarutissaqalersippaa, allassimavoq: „Taava nuannaarnerit isinni ersissaaq takulerukku; uummatillu kassullunilu tillerululerumaarpoq immap erlinnartuutai pigisarilissagakkit inuiaallu pisuussutaat ilinnukaanneqassammata.“ (Esaja 60:5) 1930-kkuniilli kristumiut tusindilikkuutaat nunami inuunissamik neriugisallit Zionimukaasimapput siulittuutip taassuma eqquunneratut. Inuiaat ’imaannit’ Guutimit ungasillisimasumit qaqisimapput. Taakkuupput ’inuaat pisuussutaannik’ aamma inuiaat tamarmik ’illernartuutaannik’ taaneqartartut. (Haggaji 2:7; Esaja 57:20) Namminneq aqqutissarsiunngillat, Jehova kiffartorfiginngilaat namminneq isumartik malillugu. Zionimut ataqqinaataapput aggerpummi qatanngutitillu tanitat pallorfiginneqatigalugit, tassaappullu ’savaatit katersat ataatsit ataatsimik paarsisullit’. — Johannesi 10:16.
Niuertut nersutaatinillu paasisut Zionimukaasut
11, 12. Zionimut aggiasut oqaluttuarikkit.
11 Katersuinerup siulittuutigineqartup tamatuma kinguneraa Jehovamik unnersiutiginnittut maluginiarnartumik amerlinerat. Tamanna pruffiitip oqaasiini tulliuttuni erserpoq. Takorlooriaruk arnaq siulittuutaasoq Qaqqami Zionimeeqatigalugu. Kangimut isigivusi, suna takuisiuk? „Qatigattuut amerlaqalutik ilinni katersuukkumaarput, taamatullu aamma dromedarit Midjanimit Efamillu aggiussat. Sabamit aggiassapput tamarmik; kuultimik tipigissaammillu nassataqassapput, [Jehovallu] unnersiutigineqarnissaa oqaatigissavaat.“ (Esaja 60:6) Niuertut angalasartut angalaqatigiippassuakkuutaat qatigattuujutitik Jerusalemimut siulersorpaat. Nuna qatigattuunik matoorneqarsimasutut ippoq. Tunissutissat akisuut ’kuultit tipigissaatillu’ nassarpaat. Niuertut Guutip qaamasuanukaapput Jehova qutsisisinniarlugu Jehovallu ’unnersiutigineqarnissaa oqaatiginiarlugu’.
12 Tikittut niuertuinnaanngillat. Aamma nersutaatinik paasisut Zionimukaapput. Siulittuut nangippoq: „Kedarip savaatai tamarmik ilinnut katersorneqassapput, Nebajotip savaataasa angutivissat kiffartuutissavaatsit.“ (Esaja 60:7a) Nersutaatinik paasisut nersutaatitik nassarlugit illoqarfiliaapput illernartumut nersutaatitik pitsaanerpaat Jehovamut pilliutigiartorlugit. Allaat Zionimi kiffartorusupput. Jehovap allamiut taakku qanoq ilassivai? Nammineq akivoq: „Pilliiviutinni ilassillugit tigussavakka, naalaffigalu takorannersoq pinnersaasersussavara.“ (Esaja 60:7b) Jehovap allamiut taakku kiffartorusunnerat ilassilluarpaa. Najuunnerat naalaffianut ’pinnersaataavoq’.
13, 14. Kitaanit suut aggersut takuneqarsinnaappat?
13 Kimmut qiviariarit. Suna takuiuk? Ungasissumi nuiatut qaqortutut ittoq immap qulaagut ingerlavoq. Maanna Jehova ima aperivoq: „Kikkunuku aggersut nuissatut ingerlaartutut, tuitut timmillutik iniminnut iseriartortutut?“ (Esaja 60:8) Nammineq ima akivoq: „Tassa umiarsuit qeqertanit ungasissumiittunit katersuuttut, umiarsuit Tarshishiliartaatit siullersaallutik ingerlaarlutik. Ernitit ungasissumit aggiuppaat. Sølvinik kuultinillu nassarput [Jehovap] Guutivit aqqanut Israelip Illernartuanut, pinnersarumagamitimmi.“ — Esaja 60:9.
14 Takorloorsinnaaviuk? Nuiaq qaqortoq kitaaniit qanilliartorpoq. Toorneerarpassuartut qaqortutut isikkoqarpoq. Soorlugooq timmiarpassuit immap qulaagut timmisut. Nuissalli qanilliartornerani paasinarsivoq umiarsuaasut tingerlaatiminnik tamakkersortut. Umiarsuit Jerusalemiliaasut amerlangaaramik tuerpassuartut isikkoqarput. Umiarsuit umiarsualivinniit ungasissuniit unnersiutiginnittunik ilaasullit Jehova pallorfigiartorlugu Jerusalemimut sukkalisaarput.
Jehovap peqatigiissortaani amerliartorneq
15. (a) Esaja 60:4-9-mi amerliartorneq suna siulittuutigineqarpa? (b) Kristumiut ilumoortut qanoq isiginnittaaseqarpat?
15 Versini 4-miit 9-mut oqaatsinik siulittuutaasunik 1919-imiilli silarsuaq tamakkerlugu amerliartorneq allaatigineqarluarpoq. Sooq Jehovap Zioni amerliartornermik taamaattumik pilluaqquaa? Israeli Guutip pigisaata Jehovap qaamasuminik qaamatitsiuaqqusinera naalammagu. Malugaajulli versi 7 naapertorlugu tikiuterlaat ’Jehovap pilliiviutaaniittut’? Pilliivik pilliisarfiuvoq, siulittuummilu oqaatsit taakku eqqaasippaatigut Jehovamut kiffartorneq pilliinertaqartoq. Apustili Paulusi allappoq: „Oqaaqqissaarniarpassi timisi sassaateqqullugit pilliutitut uumasutut illernartutullu Guutip iluarinartitaatut, tamanna tassaassaaq anersaakkut guutisiornersi.“ (Romamiut 12:1) Paulusip oqaasiinut naapertuuttumik kristumiut ilumoortut upperisarsiornikkut ataatsimiinnernut ilaannikkuinnaq najuuttarnissartik naammaginngilaat. Aammattaaq piffissartik nukitik pigisatillu pallorfiginninnermik ilumoortumik siuarsaanermut atortarpaat. Esajap siulittuutaata takutippaa pallorfiginnittut aallussilluartut taamaattut Jehovap illuanut ataqqinaataasut, akillugillu Jehovap ataqqigai.
16. Itsaq sanaqqiinermi kikkut ikiuuppat, ullumikkullu kikkut assingusumik iliorpat?
16 Tikiuterlaat sulerusupput. Siulittuut ima nangippoq: „Allamiut qarmarsuatit qarmaqqissavaat, kunngiisalu kiffartorfigissavaatsit.“ (Esaja 60:10) Siulittuut siullermik eqquuppoq juutit Babylonimi aallarussaaqqanerminnit utermata. Taamanikkut juutit kunnginit inuiannillu allaneersunit naalaffimmik Jerusalemimillu sanaqqiinerminni ikiorneqarput. (Ezra 3:7; Nehemia 3:26) Ullumikkut eqquunnerani tanitat sinneruttut pallorfiginninnermik ilumoortumik pilersitseqqinneranni amerlangaartunit ikiorneqarput. Kristumiut ilagiivinik pilersitseqataapput, taamaalillutillu Jehovap peqatigiiffiata illoqarfittut ittup ’qammarsuinik’ qajannaallisaapput. Aammattaaq sanaartugassavinnik — tassa naalagaaffilersaarfinnik, ataatsimeersuartarfinnik betelinillu — sanaartoqataapput. Tamakkunatigut qatanngutitik tanitat Jehovap peqatigiissortaani alliartuinnartumi pisariaqartitanik suliaqartut tapersersorpaat.
17. Jehovap innuttani qanoq ataqqinartippai?
17 Esaja 60:10-mi oqaatsit kingulliit qiimmaallannaqaat. Jehova oqarpoq: „Kamanninni pillaraluarakkit saammaanninni nallittussavakkit.“ Aap, Jehovap innuttani 1918-19-imi perorsarpai. Taamani taama pivoq. Ullumikkut Jehovap kiffani tanitat suleqataallu, savat allat, nallittorpai. ’Pinnersarpai’ amerliartungaartillugit.
18, 19. (a) Jehovap peqatigiiffimminut tikiuterlaat qanoq neriorsorpai? (b) Esaja kapitali 60-p versiani kingullermi qanoq ilisimatinneqarpugut?
18 Ukiut tamaasa „allamiut“ allat hundredetusindilikkuutaat Jehovap peqatigiissortaanut ilannguttarput, aqqullu suli amerlanerusunut ammavoq. Jehova Zionimut oqarpoq: „Isaaffitit ammajuassapput ullukkut unnuakkullu matuneqassanatik, inuiaat pisuussutaat ilinnut aanneqarsinnaaqqullugit kunngillu ilinnut ingerlanneqaqqullugit.“ (Esaja 60:11) Assortuisut ilaasa „isaaffiit“ taakku matuniaraluarpaat, iluatsitsissanngillalli. Jehova oqarpoq isaaffiit arlaatigut ammajuassasut. Amerliartortuassapput.
19 Jehovap naggatissap nalaani matumani innuttani aamma allatigut pilluaqquai ataqqinartillugillu. Qanoq taamaaliortoq Esaja kapitali 60-ip versiani kingullermi siulittuutaasumi allassimavoq. (wE 07/01 02)
Uku qanoq nassuiassavigit?
•„Arnaq“ Guutip pia kinaava, kikkullu nunarsuarmi sinniisorai?
• Zionip qitornai qanga nunami nalappat, qangalu qanorlu ’nikuippat’?
• Suna assersuutigalugu Jehovap siulittuutigaa Guutip Naalagaaffianik oqaluussisartut amerlinissaat?
• Jehovap innuttani qaamasumik qanoq qinngorfigai?
[Atuaqqissaarnermi apeqqutit]
[Qupp. 10-mi assiliartaq]
„Arnaq“ Jehovap pia nikueqquneqarpoq
[Qupp. 12-mi assiliartaq]
Killingusaami umiarsuit tuitut isikkoqarput