Kristumiut anersaakkut ilumoornikkullu pallorfiginnittarput

„Guuti anersaajuvoq, taassuminngalu pallorfiginnittut taamaaliussapput anersaakkut ilumoornikkullu.“ — JOHANNESI 4:24.

1. Pallorfiginninneq qanoq ittoq Guutip iluaraa?

JEHOVAP ernituata Jiisusi Kristusip qularnarunnaarsippaa pallorfiginninneq qanoq ittoq Ataatami qilammiusup iluarigaa. Illoqarfiup Sykarip eqqaani puilasuliami arnaq Samariamiu nalunaajaaffigalugu Jiisusi oqarpoq: „Ilissi ilisimanngisarsi pallorfigaarsi; uagulli ilisimasarput pallorfigaarput, annassummi juutinit pivoq. Piffissarli nalliukkumaarpoq — ilami maanna nalliussimavoq — ilumoortumik pallorfiginnittut Ataatamik pallorfiginniffissaat anersaakkut ilumoornikkullu. Ataatarmi taamaattunut pallorfigeqquvoq. Guuti anersaajuvoq, taassuminngalu pallorfiginnittut taamaaliussapput anersaakkut ilumoornikkullu.“ (Johannesi 4:22-24) Oqaatsit taakku qanoq paasisariaqarpat?

2. Samariamiut pallorfiginninnertik sumik tunngaveqartippaat?

² Samariamiut upperisarsiornikkut eqqunngitsunik isumaqarput. Taamaallaat Allakkat Illernartut tallimat siulliit Guutimit isumassarsiarititaasutut — namminnerlu Samariamiutuunngortitartik Samariamiut Pentateukiattut ilisimaneqartoq — akueraat. Samariamiut Guuti ilisarisimanngivippaat,  juutilli Allakkanik paasisaqartitaapput. (Romamiut 3:1, 2) Juutit allallu aalajaatsut Jehovamit iluarineqarlersinnaapput. Sumilli piumasaqarfigai?

3. Guuti ’anersaakkut ilumoornikkullu’ pallorfigissagutsigu suut pisariaqarpat?

³ Jehovamut iluarisaajumallutik, juutit, Samariamiut allallu itsaq inuusut qanoq iliortariaqarpat? „Anersaakkut ilumoornikkullu“ pallorfigisariaqarpaat. Uaguttaaq taamaaliortariaqarpugut. Guutimut kiffartortut uummammit asanninnermik uppernermillu ulikkaartumit killinneqarlutik kiffartortariaqarput aallussilluarlutik, kisianni Guuti anersaakkut pallorfigissagutsigu aamma anersaava illernartoq pigisariaqarparput tamatumanngalu siulersortittariaqarluta. Guutip oqaasianik atuaqqissaarnitsigut maleruaanitsigullu anersaarput imaluunniit isiginnittaaserput Guutip anersaavanut naapertuuttunngortittariaqarparput. (1 Korinthimiut 2:8-12) Pallorfiginninnerput Jehovamut akuerisaassappat aamma ilumoornikkut pallorfigisariaqarparput. Guutip oqaasiani, Biibilimi, taanna siunertaalu pillugit saqqummersinneqartunut naapertuulluinnartariaqarpoq.

Sallusuissut paasineqarsinnaavoq

4. Ilaasa sallusuissut qanoq isigaat?

⁴ Isumaliutersuutinik sammisallit ilaat isumaqarput sallusuissutivik paasineqarsinnaanngilluinnartoq. Assersuutigalugu atuakkiortoq svenskeq Alf Ahlberg allassimavoq: „Apeqquterpassuit isumaliutersortarnermut atasut aalajangersimasumik akineqarsinnaanngillat.“ Ilaat oqartarput sallusuissut assigiinngitsumik isigineqarsinnaasoq, ilumulli taamaappa? Jiisusi Kristusi taama isumaqanngilaq.

5. Sooq Jiisusi silarsuarmut piva?

⁵ Takorlooriartigu pisumut matumunnga isiginnittuulluta: Ukiumi 33-mi upernaajuvoq, Jiisusilu Romamiut naalagaannut Pontiusi Pilatusimut sassartitaavoq. Jiisusip Pilatusi oqarfigaa: „Taamaattumik silarsuarmut pivunga sallusuissut nalunaajaassutigissallugu.“ Pilatusi aperivoq: „Sunaana sallusuissut?“ Jiisusilli akinissaa utaqqinngilaa. — Johannesi 18:36-38.

6. (a) „Sallusuissut“ qanoq nassuiarneqarsimava? (b) Jiisusip malitsini sumut pisinnaatippai?

⁶ „Sallusuissut“ ima nassuiarneqarsimavoq: „piviusut, pisimasuiit ilumoortullu tamarmik katunnerat“. (Webster’s Ninth New Collegiate Dictionary) Jiisusilli ilumoortut nalinginnaat nalunaajaassutigai? Naamik, sallusuissut immikkut ittoq eqqarsaatigaa. Malitsini sallusuissumik taassuminnga oqaluussinissaanut pisinnaatippai, ima oqarfigalugit: „Taamaattumik aallaritsi inunnillu inuiannit tamaneersunik ajoqersuganngortitsigitsi, Ataatap Ernerullu anersaallu illernartup aqqanut kuillugit, ajoqersorsigillu ilissinnut peqqusakka tamaasa maleruaqqullugit. Atalu, ullut tamaasa najorpassi pissutsit aaqqissuussaanerata naggatissaanut allaat.“ (Matthæusi 28:19, 20, NV) Pissutsit aaqqissuussaanerata matuma naggatissaa sioqqullugu Jiisusip malittaasa ilumoortut „iivangkiiliup ilumoorsusia“ nunarsuaq tamakkerlugu oqaluussissutigissavaat. (Galatiamiut 2:14) Taamaalilluni Jiisusip oqaasii uku eqquupput: „Naalagaaffimmillu nutaarsiassaq nuannersoq tamanna nunarsuarmi inuit najugarisaanni tamarsuarmi inuiaat tamarmik nalujunnaarutissaannik oqaluussissutigineqassaaq; taavalu naggatissaq.“ (Matthæusi 24:14, NV) Taamaattumik pingaaruteqarpoq paasissallugu kikkut inuiannut tamanut sallusuissummik ajoqersuinersut Guutip naalagaaffianik tusagassaq nuannersoq oqaluussissutigalugu.

Sallusuissut qanoq ilinniarsinnaavarput?

7. Qanoq uppernarsarsinnaaviuk Jehova sallusuissummut pilerfiusoq?

⁷ Jehova anersaakkut sallusuissummut pilerfiuvoq.  Tussiaasiortup Daavip Jehova ’sallusuissutip Guutianik’ taavaa. (Tussiaat 31:6, NV; 43:3) Jiisusip paasivaa Ataatami oqaasii ilumoortut, oqarlunilu: „Pruffiitini ima allassimasoqarpoq: ’Tamarmik Guutimit ajoqersorneqarsimassapput.’ — Ataatamit tusagaqarlunilu ilikkagaqartoq kinaluunniit uannukartarpoq.“ (Johannesi 6:45; 17:17; Esaja 54:13) Nalunanngilaq sallusuissummik ujaasisut Jehovamit, Ajoqersuisorsuarmit, ilinniartinneqartariaqartut. (Esaja 30:20, 21) Sallusuissummik ujaasisut ’Guuti ilisimalertariaqarpaat’. (Ussatit 2:5) Jehovalu asannilluni assigiinngitsutigut sallusuissummik ajoqersuisimavoq imaluunniit tunniussilluni.

8. Guutip suut aqqutigalugit sallusuissut ajoqersuutigisimavaa tusarliulluguluunniit?

⁸ Assersuutigalugu inngilit aqqutigalugit Guutip Inatsisit Israelikkunnut tunniuppai. (Galatiamiut 3:19) Ataataanerpaat Aaperaat Jaakulu sinnattortillugit pilluaqqussutissanik neriorsorpai. (1 Mosesi 15:12-16; 28:10-19) Guuti allaat qilammit oqaluppoq, soorlu oqaatsit pissanganartut uku nunami tusarneqarsimasut Jiisusi kuisimmat: „Tassa ernera asasara, nuannarisara.“ (Matthæusi 3:17) Qujamasuutigisinnaavarputtaaq Guutip sallusuissut tusarliummagu Biibilimik allattut isumassarsisillugit. (2 Timotheusi 3:16, 17) Taamaattumik Guutip oqaasianik ilinniarnerup ’sallusuissummut uppertilersinnaavaatigut’. — 2 Thessalonikamiut 2:13.

Sallususissut Guutillu ernera

9. Sallusuissutip saqqummersinnissaanut Guutip ernini qanoq atorpaa?

⁹ Guutip ingammik ernini, Jiisusi Kristusi, atorpaa sallusuissut inuiannut saqqummersinniarlugu. (Hebræerit 1:1-3) Aap, Jiisusitut sallusuissut pillugu oqaluttoqarsimanngisaannarpoq. (Johannesi 7:46) Allaat qilaliareerluni sallusuissut Ataatamineersoq saqqummersittarpaa. Assersuutigalugu apustili Johannesi tunineqarpoq ’Jiisusi-Kristusip saqqummersitaanik, Guutip taassumunnga tunniussaanik, qanittukkut piumaartussat kiffaminut takuteqqullugit’. — Saqqummersitat 1:1-3.

10, 11. (a) Sallusuissut Jiisusip nalunaajaassutigisaa sumut attuumassuteqarpa? (b) Jiisusip sallusuissut qanoq piviusunngortippaa?

¹⁰ Jiisusip Pontiusi Pilatusi oqarfigaa nunarsuarmut pilluni sallusuissut nalunaajaassutiginiarlugu. Kiffartornermini Jiisusip paasinarsitsippaa sallusuissut taanna Guutip naalagaaffia Kristusimik kunngilik aqqutigalugu Jehovap kisimi oqartussaassusiata qutsissisitaanissaanut attuumassuteqartoq. Jiisusilli sallusuissummik nalunaajaanerani oqaluussiinnarneq ajoqersuiinnarnerlu naammanngillat. Jiisusip sallusuissut piviusunngortippaa eqquutitillugu. Taamaattumik apustili Paulusi allappoq: „Kikkunnilluunniit eqqartuutitinnaveeritsi nerisartakkat imertakkalluunniit imaluunniit qanoq nalliuttorsiortarnerit qaammanniffissiortarnerilluunniit sabbatisiortarneriluunniit pillugit. Tamakku piumaartussap tarraannarai, timili Kristusip pigaa.“ — Kolossemiut 2:16, 17.

¹¹ Sallusuissut ilaatigut piviusunngortinneqarpoq Jiisusi siulittuutigineqartutut Betlehemimi inunngormat. (Mika 5:1; Lukasi 2:4-11) Sallusuissut aamma piviusunngorpoq ’sapaatit-akunneri ukiunngortitat’ 69-it naalerneranni Danielip Missiarsip tikiunnissaa pillugu siulittuutaa eqquummat. Tamanna pisimavoq piffissaq eqqorlugu ukiumi  29-mi Jiisusi kuisimmat taamaalillunilu imminut Guutimut sassaalluni anersaamillu illernartumik kuineqarluni. (Danieli 9:25; Lukasi 3:1, 21, 22) Sallusuissut aamma piviusunngortinneqarpoq Jiisusi Naalagaaffik pillugu oqaluussinermigut qaammanermik aggiussimmat. (Esaja 8:23; 9:1, 5, 6; 61:1, 2; Matthæusi 4:13-17; Lukasi 4:18-21) Aamma toquneratigut makinneratigullu piviusunngorpoq. — Tussiaat 16:8-11; Esaja 53:5, 8, 11, 12; Matthæusi 20:28; Johannesi 1:29; Apustilit Suliaat 2:25-31.

12. Sooq Jiisusi oqarsinnaava: ’Uanga sallusuissutaavunga’?

¹² Sallusuissutip Jiisusi Kristusi qiterimmani, taanna oqarsinnaavoq: „Uanga aqqutaavunga sallusuissutaallungalu inuussutaallungalu; uakkuinnaq Ataatamut pisoqarsinnaavoq.“ (Johannesi 14:6) Inuit Guutip siunertaani Jiisusip inissisimaffia akueralugu sallusuissut tapersersoraangamikku anersaakkut inussiaajunnaartarput ’sallusuissummit pipput’. (Johannesi 8:32-36; 18:37) Inuit savatut ittut sallusuissut ilassigamikku upperlutillu Kristusi malillugu, naassaanngitsumik inuulissapput. — Johannesi 10:24-28.

13. Pingasut suut eqqarsaatigalugit Biibilimi sallusuissut misissussavarput?

¹³ Sallusuissut Jiisusip ajoqersuutigisaa ajoqersugaanillu isumassarsisitaasunit ingerlateqqinneqartoq tassaavoq kristumiut ilumoortut upperisaat. Taamaattumik ’uppernermut naalattut’ ’sallusuissummi inuupput’. (Apustilit Suliaat 6:7; 3 Johannesi 3, 4) Ullumikkut kikkut sallusuissummi inuuppat? Kikkut inunnik inuiannit tamaneersunik sallusuissummik ajoqersuisarpat? Apeqqutit taakku akiniarlugit kristumiut siulliit suut ajoqersuutigineraat paasiniartariaqarpavut Biibilimilu sallusuissummik (1) ajoqersuutinik, (2) pallorfiginneriaatsimik, (3) inuttullu ileqqulersuutinik misissuilluta.

Ajoqersuutit pillugit sallusuissut

14, 15. Kristumiut siulliit Jehovallu Nalunaajaasuisa Allakkanut isiginninnerat qanoq oqaatigisinnaaviuk?

¹⁴ Kristumiut siulliit Jehovap oqaasia pingaartingaarpaat. (Johannesi 17:17) Taanna ajoqersuutiminnut ileqqulersuutiminnullu najoqqutaraat. Clemens Alexandriameersoq ukiuni 100-kunni 200-kunnilu inuusoq oqarpoq: „Pitsaanerpaamik noqqaassutiginnittut sallusuissummik ujaasiunnaassanngillat upperisartik Allakkani uppernarsaatissaqalertinnagu.“

¹⁵ Kristumiut siulliit pisarnerattut Jehovap Nalunaajaasuisa Biibili pingaartingaarpaat. Upperaat ’Allakkat illernartut tamarmik Guutip sunniineratigut isumassarsiarititaasut iluaqutaallutillu ajoqersuinermut’. (2 Timotheusi 3:16, NV) Taamaattumik kristumiut siulliit ajoqersuutaasa ilaat misissoriartigik Jehovallu ullumikkut kiffaasa Biibili atuakkatut ilinniutitut pingaarnerpaatut atorlugu ilinniarsimasaannut naleqqiullugit.

Tarneq pillugu sallusuissut

16. Tarneq pillugu sallusuissut qanoq ittuua?

¹⁶ Allakkani allassimasut upperigamikkik kristumiut siulliit tarneq pillugu sallusuissut ajoqersuutigaat. Nalunngilaat Guutip inuk pinngortimmagu ’inuk tarninngortoq uumasoq’. (1 Mosesi 2:7, NV) Paasivaallu inuk tarniusoq toqusinnaasoq. (Ezekieli 18:4; Jaaku 5:20) Nalunngilaattaaq ’toqungasut sunnguamilluunniit ilisimasaqanngitsut’. — Oqaluussisartup oqaasii 9:5, 10.

17. Toqungasut sumik neriuutissaqarnersut qanoq nassuiassaviuk?

¹⁷ Taamaattorli Jiisusip ajoqersugaasa siulliit neriuutigilluinnarpaat toqusimasut Guutip eqqaamasai makillutik inuuleqqikkumaartut. Upperisaq taanna Paulusip erseqqissarpaa oqarami: „Taakkunatullu Guutimut neriugisaqarlunga, tassa toqusut makikkumaartut — iluartut iluaatsullu.“ (Apustilit Suliaat 24:15) Kingusinnerusukkut kristumiuunerartoq Minucius Felix allappoq:  „Kina ima sianiitsigisinnaava inuk aallaqqaammut Guutimit pinngortitaasoq taassumannga pinngorteqqinneqarsinnaanngitsoq?“ Kristumiut siulliit pisimanerattut Jehovap Nalunaajaasuisa tarneq, toqu makinnissarlu pillugit sallusuissut Biibilimiittoq aalajangiuppaat. Maanna Guuti Kristusilu pillugit ajoqersuutit misissoriartigik.

Pingasuussutsimik ajoqersuut pillugu sallusuissut

18, 19. Sooq oqartoqarsinnaava pingasuussutsimik ajoqersuut Biibilimeersuunngitsoq?

¹⁸ Kristumiut siulliit Guuti, Kristusi anersaarlu illernartoq ataasiullutillu pingasuusutut isiginngilaat. The Encyclopædia Britannica-mi allassimavoq: „Oqaaseq pingasuussuseq imaluunniit pingasuussutsimik ajoqersuut erseqqissumik nassuiagaalluni Testamentitaami nassaassaanngillat; aammattaaq Jiisusip ajoqersugaasalu Shemamik taaneqartartoq [hebræerit qinnutigisartagaat] Testamentitoqqamiittoq, tassa: ’Tusaagit Israeli! [Jehova] Guuterput, [Jehova] ataasiuvoq’ assortorumanngilaat. (5 Mosesi 6:4)“ Romamiut guutii ataasiullutillu pingasuusut guutilluunniit allat Kristumiut pallorfiginngilaat. Jiisusip oqaasii akueraat Jehova kisimi pallorfigineqartussaasoq. (Matthæusi 4:10) Kristusillu oqaasii uku upperaat: „Ataatarmi uannit anneruvoq.“ (Johannesi 14:28) Ullumikkut Jehovap Nalunaajaasui aamma taama upperisaqarput.

¹⁹ Jiisusip ajoqersugaasa siulliit Guuti, Kristusi anersaarlu illernartoq immikkoortilluinnarpaat. Ajoqersukkat kuisarpaat (1) Ataatap aqqani, (2) Ernerup aqqani aamma (3) anersaap illernartup aqqani, ataasiullunilu pingasuusup aqqani kuinagit. Jehovap Nalunaajaasui aamma sallusuissummik Biibilimeersumik ajoqersuisarput taamaattumillu Guuti, ernera anersaarlu illernartoq immikkoortillugit.— Matthæusi 28:19.

Kuisinneq pillugu sallusuissut

20. Kuisittussat suna akuerisariaqarlugulu paasisariaqarpaat?

²⁰ Jiisusip malinnitsini pisinnaatippai allanik sallusuissummik ajoqersuinermikkut ajoqersuganngortitsinissaannut. Kuisinnissamut piukkunnarsarlutik ajoqersukkat Biibilimik tunngaviusumik ilisimasaqartariaqarput. Ilaatigut Ataatap, erneratalu, Jiisusi Kristusip, inissisimaffii oqartussaanerallu akuerisariaqarpaat. (Johannesi 3:16) Kuisittussat paasisariaqarpaattaaq anersaaq illernartoq kinaassusiliunngitsoq tassaasorli Guutip pissaanera sulissutiginnittoq. — 1 Mosesi 1:2, aamma takuuk Ny Verden-Oversættelsen-imi quppernerup ataani nassuiaat.

21, 22. Sooq uppertuinnaat kuisissinnaappat?

²¹ Kristumiut siulliit kuisarpaat ajoqersorneqarsimasut ajortuliaminnillu peqqissimissutiginnittut kisiisa namminnerlu nangaanngivillutik Guutimut tunniulluinnarsimasut piumasaatut iliorumallutik. Juutit juutinullu ilasiaasut ukiumi 33-mi piinsip ulluani Jerusalemimi katersuuttut Allakkanik Hebræerisuunik ilisimasaqareersimapput. Apustili Petrusi tusarnaaramikku Jiisusi Missiarsiusoq pillugu oqaluttoq, 3000-it missaat ’oqaasiinik ilassinnillutik kuisipput’. — Apustilit Suliaat 2:41; 3:19–4:4; 10:34-38.

²² Uppertut kisimik kristumiutut kuisissinnaapput. Samariamiorpassuit sallusuissut ilassivaat, aamma „Filipi Guutip naalagaaffianik Jiisusi-Kristusillu aqqanik iivangkiiliumik nalunaajaasoq upperileramikku kuisipput, angutit arnallu“. (Apustilit Suliaat 8:12) Filipip Missiarsi pillugu siulittuutip eqquunneranik nassuiaanera akuereqqaarlugu Kunngip atorfilittaa Etiopiamiu ilasiaasoq Guutimik mianerinnittoq Jehovamik ilisimasaqareersoq kuisippoq. (Apustilit Suliaat 8:34-36) Kingusinnerusukkut Petrusip Corneliusi Guutimillu nalusut allat paasitippai ’inuianni tamani kinaluunniit [Guutimik] mianerinnitoq naapertuilluartumillu iliortoq [taassuma] nuannarigaa’ Jiisusi Kristusimullu uppertut tamarmik ajortiminnik isumakkeerfigineqassasut. (Apustilit Suliaat 10:35, 43; 11:18) Tamakku tamarmik Jiisusip peqqussutaanut naapertuulluinnarput: ’Ajoqersuganngortitsigitsi ajoqersorlugillu ilissinnut peqqussutikka tamaasa  maleruaqqullugit’. (Matthæusi 28:19, 20; Apustilit Suliaat 1:8) Jehovap Nalunaajaasuisa maligassiaq tamanna malittarpaat, Biibilimik tunngaviusumik ilisimasaliinnaat Guutimullu tunniulluinnarsimasuinnaat kuisitsittarlugit.

23, 24. Eqqortumik qanoq Kristumiutut kuisittoqartussaava?

²³ Imermut morsutsitaalluni kuisinneq uppertunut kuisinneruvoq eqqortoq. Jiisusi kuussuarmi Jordanimi kuisereerami ’imermit qaqivoq’. (Markusi 1:10) Kunngip atorfilittaa Etiopiamiu kuisimmat Filipi taannalu „marluullutik imermut ikipput“ kingornalu ’imermit qaqillutik’. (Apustilit Suliaat 8:36-40) Aamma Biibilimi kuisinneq ilisaanermut assersuunneqarmat takutinneqarpoq imermut morsutsitaasoqartariaqartoq. — Romamiut 6:4-6; Kolossemiut 2:12.

²⁴ The Oxford Companion to the Bible-imi allassimavoq: „Testamentitaami kuisitsitsinnerit allaatigineqaraangata takutinneqartarpoq kuisittoq imermut morsutsinneqartoq.“ Franskit qinerlerfissiaanni allassimavoq ’kristumiut siulliit imilimmi sumiluunniit morsutsinneqarlutik kuisittartut’. (Larousse du XX^e Siècle, Paris 1928) Atuakkamilu After Jesus — The Triumph of Christianity-imi allassimavoq: „[Kuisinnermi] tunngaviunerusumi piumasaqaataavoq kuisittussap upperisani nassuerutigissagaa tamatumalu kingorna Jiisusip aqqani imermut morsutsitaalluni.“

25. Allaaserisami tulliuttumi suna sammissavarput?

²⁵ Kristumiut siulliit uppernerminni iliuutsiminnilu Biibilimi ajoqersuutinik malinninnerat pillugu eqqartorneqartut assersuutissat ilaminiinnaraat. Aamma kristumiut siulliit Jehovallu Nalunaajaasuisa ajoqersuutaasa assigiissuterpassui allat innersuussutigineqarsinnaapput. Allaaserisami tulliuttumi kikkut inuiannik sallusuissummik ajoqersuisarnersut qanoq allatigut paasineqarsinnaanersoq misissussavarput.

Qanoq akissavit?

• Pallorfiginninneq qanoq ittoq Guutip piumasaraa?

• Jiisusi Kristusi aqqutigalugu sallusuissut qanoq piviusunngortinneqarpa?

• Tarneq toqulu pillugit sallusuissut qanoq ittuua?

• Kristumiutut qanoq kuisittoqartussaava, kuisittussanullu suut piumasarineqarpat?

[Atuaqqissaarnermi apeqqutit]

[Qupp. 20-mi assiliartaq]

Jiisusip Pilatusi oqarfigaa: „Silarsuarmut pivunga sallusuissut nalunaajaassutigissallugu“

[Qupp. 21-mi assiliartaq]

Nassuiarsinnaaviuk sooq Jiisusi oqartoq: ’Sallusuissutaavunga’?

[Qupp. 22-mi assiliartaq]

Kristumiutut kuisinneq pillugu sallusuissut qanoq ittuua?