Atuartartut apeqqutaat

Annikitsunnguanik aningaasanoorneq ajorami?

Guutip oqaasia aningaasanoorneq pillugu itinerusumik eqqaasaqanngilaq, kisianni ersarissumik allassimavoq aningaasanoorneq qanoq ittorluunniit Biibilip najoqqutassiaanut kattunneqarsinnaanngitsoq. Naluneqanngitsutut aningaasanoorneq piumatuussusermik siuarsaasarpoq. Tamatuma takutippaa kristumiut eqqarsarluaqissaarnissaat pingaartuusoq, Biibilimimi allassimavoq „piumatuulluunniit“ Guutip naalagaaffia kingornutissanngikkaat, piumatuunerlu guutipilussiornermut atasuummat. — 1 Korinthimiut 6:9, 10; Kolossemiut 3:5.

Aningaasanoornerup ineriartortittarpai namminissarsiorneq unammillerumanerlu peqqinnanngitsoq, ajugaarusussuseqarnersuaq. Apustili Paulusip taama pissuseqalernissaq mianersoqqussutigisimavaa allakkami: „Immitsinnut angisuusoreqinata, kamassaaqinata sinngaateqinatalu.“ (Galatiamiut 5:26) Aningaasanoornerup ilaat upperisapalaaqalersittarpaat iluatsitsinissamut tatiginnilersillugit, aamma upperisapalaanut assigiinngitsunut saattarput iluanaarnerup najorniassammatik. Tamatuma eqqaasippaatigut Israelikkut uppernikitsut ’Gadimut [Iluatsitsinerup Guutianut] nerrivimmik piareersaasimasut imertarfimmillu immiisimasut Menip [Inuunermi atugassaatitap Guutiata] imigassaanik’. — Esaja 65:11.

Immaqa ilaat akerliliissapput ilaquttat ikinngutilluunniit ilagalugit nallukattarnermut pinnguaatinilluunniit sukisaarsaarluni aningaasamininnguit atoraanni ajoqutaanngitsoq. Aningaasamininnguanik ilisilluni iluanaarniarluni unammillertoq immaqa nammineq isumaqarpoq piumatuujunani, namminissarsiortuunani, upperisapalaaqarani imaluunniit unammillertuunani. Kisianni aamma eqqarsaatigisariaqarpoq pinnguaqatit qanoq sunnertissinnaanerannik. Amerlasuut aningaaserituujumanermik tiguartissimasut aningaasamininnguit atorlugit aningaasanoortalersimapput, asulilu ’nuannariinnarlugu’ aallartissimallutik. (Lukas 16:10) Taakkununnga sukisaarsaarneq pisuussuteqarpasinngikkaluartoq ilungersunartunngorsimavoq.

Ulorianartoqarsinnaavoq ingammik meeqqat pineqaraangata. Meerarpassuit annikitsumilluunniit eqquilluni pissanganaateqarnera misigereersimavaat, ussernartorsiorsimappullu aningaasat annertunerusut iluanaarniutigalugit. (1 Timotheusi 6:10) USA-mi ukiorpassuarni misissuinerup Arizona Council on Compulsive Gambling-itigullu saqqummiunneqarsimasup ersersippaa ludomanerpassuit ukiukitsuaraallutik „timersuunnerni unammisoqaraangat aningaasamininnguit iluanaarniutigalugit aamma ikinngutit ilaquttalluunniit ilagalugit nallukattaraangamik“ aallartittarsimasut. Misissuinermi allami nalunaarutigineqarpoq „angerlarsimaffimmi meeqqat aningaasanoorlutik aallartittartut, ilaquttat ikinngutilluunniit ilagalugit nallukattaqatigiinnermi“. Nalunaarusiami ilanngullugu allassimavoq „meeqqat taakkua 30 procentiisa aningaasanoorneq 11-nik ukioqalertinnatik aallartittarsimagaat“. Misissuineq Why Do People Gamble Too Much — Pathological and Problem Gambling naapertorlugu inuusuttuaqqat amerlasuut pinerluttuliorlutik imaluunniit kinguaassiuutitigut inuunerluttuliorlutik aningaasanoorutissarsisartut. Ilumut kingunipiluk aallaqqaammut suunngitsutut isigisaraluakkamit!

Silarsuarmi naakkiussutissanik aamma ussernartorsiutinik ulikkaartumi inooreeratta, sooq aamma immitsinnut allamik pisariaqanngitsumik uloriarnartorsiortissaagut? (Ussatit 27:12) Aningaasanoorneq — meeqqat peqataatillugit imaluunniit peqataatinnagit aningaasamininnguugaluarpata aningaasarpassuugaluarpatalluunniit ilisilluni — anersaakkut peqqissutsikkut ulorianartorsiortitsisuuvoq ingalassimasariaqarparpullu. Namminneq, ilaquttamik aammalu ikinngutimik anersaakkut peqqissutsiminnik paarsiumasut silatusaassapput aningaasanoorneq — annikitsuugaluarpalluunniit — ingalassimagunikku. (wE 11/01 02)