Kristumiut imminnut pisariaqartipput
Kristumiut imminnut pisariaqartipput
„Immitsinnut avatioqatigiippugut!“ — EFESOSIMIUT 4:25.
1. Inuup timaa pillugu ujarlerfissiami qanoq allassimava?
INUUP timaa torrallataavoq! The World Book Encyclopedia-mi ima allassimavoq: „Ilaannikkut inuup timaa maskiinamik, sanalluagaanerpaamik, taaneqartarpoq. Soorunami inuup timaa maskiinaanngilaq. Amerlasuutigulli maskiinamut assersuunneqarsinnaavoq. Timi maskiinatut atortorpassuaqarpoq, tamarmik immikkut atorfilinnik. Timili maskiinaluunniit ingerlalluartarpoq pisatai atortuiluunniit tamarmik suleqatigiittarmata.“
2. Inuup timaa kristumiullu ilagiivi qanoq assigiissuteqarpat?
2 Aap, inuup timaa amerlasuunik atortoqarlunilu avateqarpoq, tamarmillu pisariaqartunik suliaqarlutik. Taqqat tamarmik, nukiit tamarmik avatillu tamarmik pisariaqartinneqarput. Taamatut kristumiut ilagiiviniittut tamarluinnarmik ilagiit anersaakkut peqqissuujuarnissaannut pinnersuujuarnissaannullu taperseeqataasinnaapput. (1 Korinthimiut 12:14-26) Ilagiinniittoq kinaluunniit imminut allanit pingaarnerusorisariaqanngilaq, aammali kinaluunniit pisariaqartinneqanngitsutut misigisariaqanngilaq. — Romamiut 12:3.
3. Efesosimiut 4:25 naapertorlugu sooq kristumiut imminnut pisariaqartippat?
3 Timip avataasa imminnut pinngitsoorsinnaannginnerattulli, kristumiut imminnut pisariaqartipput. Apustili Paulusip uppeqatini tanitat ima allaffigai: „Salluliortarneq iperarniarsiuk ilumoortumillu immissinnut oqaluffigisarlusi. Immitsinnummi avatioqatigiippugut!“ (Efesosimiut 4:25) Anersaakkut Israelimut, ’Kristusip timaanut’, ilaasut ’avatioqatigiipput’, taamaattumillu ilumoortumik imminnut oqaluffigisarput. Sutigut tamatigut suleqatigiipput tamarmik avatioqatigiikkamik. (Efesosimiut 4:11-13) Kristumiut ilumoortut nunami inuunissamik neriugisallit pilluarlutik taakku ataasiussuseqaqatigaat suleqatigalugillu.
4. Kristumiut ilagiivini nutaat qanoq ikiorsinnaavavut?
4 Ukiut tamaasa tusindilikkuutaat nunami paratiisimi inuunissamik neriugisallit kuisittarput. Ilagiinniittut allat nuannaarutigaat nutaat taakku ’inersimasummut ingerlagasuarnissaannut’ ikioramikkik. (Hebræerit 6:1-3, NV) Assersuutigalugu kristumiut misilittagaqarluartut nutaat taakku apeqqutinik Biibilimut tunngasunik akissutissarsiorneranni ikiorsinnaavaat oqaluussinermilu ilinniartissinnaallugit. Ataatsimiinnerni aalajaalluta peqataasarnikkut maligassiuilluta nutaat ikiorsinnaavavut. Aamma nikallungasut qiimmassarsinnaavavut tuppallersarsinnaallugilluunniit. (1 Thessalonikamiut 5:14, 15) Allat ’sallusuissummi inuujuarnissaannut’ qanoq ikiorsinnaanerivut eqqumaffigisariaqarparput. (3 Johannesi 4) Qanorluunniit ukioqaraluarutta, aamma aatsaat sallusuissummiileraluarutta ukiorpaalunniluunniit sallusuissummiissimagaluarutta, uppeqatitta anersaakkut peqqissuutinnissaannut iliuuseqarsinnaavugut. Taakkualu pisariaqartilluinnarpaatigut!
Ikiortariallit ikiortarpaat
5. Akvilap Priskillallu Paulusi qanoq ikiortarpaat?
5 Aappariippassuit kristumiut uppeqatiminnik ikiuinertik nuannaarutigisarpaat. Assersuutigisinnaavavut Akvila nulialu Priskilla (imaluunniit Priska) Paulusimik ikiuisut. Illusisippaat, tupiliortutut suleqatigalugu Korinthimilu ilagiinnik pilersinneqarlaanik ineriartortitsinerani ikiorlugu. (Apustilit Suliaat 18:1-4) Toqqaannartumik oqaatigineqanngitsumik Paulusi pillugu inuunertik arlaatigut navianartorsiortissimavaat. Romami najugaqartillugit Paulusip kristumiut tassaniittut ima allaffigai: „Inuulluaqqutikkisigit Priska Akvilalu, Kristusi-Jiisusimi suleqatigisakka. Namminneq inuunertik navianartorsiortippaat uanga inuunera annaanniarlugu; uangaannaanngitsummi, kisianni aamma ilagiit Guutimik nalusuusimagaluit tamarmik qutsavigaat.“ (Romamiut 16:3, 4) Ullumikkut kristumiut ilaat Akvilatut Priskillatullu ilagiinnik ineriartortitseqataapput uppeqatiminnillu assiginngitsutigut tapersersueqataallutik. Allaat ilaannikkut inuunertik navianartorsiortittarpaat uppeqatitik malersuisunut naalliutsitsiniartunut toqutsiniartunulluunniit illersorniarlugit.
6. Apollosi qanoq ikiorneqarpa?
6 Efesosimi Akvilap Priskillallu uppeqatertik oqallorissorsuaq Apollosi, Jiisusi pillugu oqaluussisoq, aamma ikiorpaat. Tamatuma nalaani Apollosip kuissut Johannesip kuissutaa, Mosesip inatsisaanik unioqqutitsilluni ajortuliarisimasanik peqqissimissutiginninnermik saannermillu takutitsinerusoq, kisiat nalunngilaa. Akvilap Priskillallu takusinnaavaat ikiortariaqartoq „Guutillu aqqutigeqqusaanik sukumiinerusumik nassuiaallugu“. Qularnanngitsumik oqaluttuuppaat kristumiut kuissutaannut ilaasoq imermut morsutsitaalluni kuisinneq anersaaq illernartumillu ilumioqalerneq. Apollosip ilikkakkani atorluarpai. Kingusinnerusukkut Akajamiitilluni „uppertunut Guutip saammaanneragut iluaqutaangaalerpoq. Tamaasami tusaatillugit juutit oqaasissaarutitilluinnarpai Allakkallu tunngavigalugit uppernarsarlugu Jiisusi Kristusiusoq“. (Apustilit Suliaat 18:24-28) Amerlasuutigut uppeqatitta akissuteqarnermikkut Guutip oqaasianik paasitinnerusinnaavaatigut. Aamma tamatumuuna immitsinnut pisariaqartippugut.
Timip piisigut pisariaqartitalinnik ikiuineq
7. Filippimi kristumiut qanoq iliorpat uppeqatitik timip piisigut ikiortariaqalermata?
7 Filippimi kristumiut Paulusi asangaarpaat Thessalonikamiitillugulu timip piisigut pisariaqartitaanik nassillugu. (Filippimiut 4:15, 16) Jerusalemimi qatanngutit ikiortariaqalermata Filippimiut tukkortuunertik takutippaat, allaat sapinngisartik akimorlugu. Paulusip Filippimi qatanngutit pissusiat nersortarialik qujamasuutigingaaramiuk kristumiunut allanut maligassatut allaatigaa. — 2 Korinthimiut 8:1-6.
8. Epafroditusi qanoq pissuseqarpa?
8 Filippimiut Paulusi parnaarussaaqqatillugu timip piisigut nassiinnanngilaat, aammali immikkut aallartippaat Epafroditusi. „Kristusi kiffartuutsillugu inuunini navianartorsiortippaa toqungajavillunilu ilissi uannut kiffartuussinissinni suli amigaataasut naammassiniartillugit,“ Paulusi allappoq. (Filippimiut 2:25-30; 4:18) Allaatigineqanngilaq Epafroditusi utoqqaanertaanersoq ilagiinniluunniit kiffartortuunersoq. Qanorluunniit kiffartuuteqaraluaruni kristumiuuvoq imminut pilliutigeriaannaasoq ikiuiumatoorlu Paulusip pisariaqartilluinnagaa. Ilagiinni attavigisanni kina Epafroditusitut ippa?
’Nakussatsissutaapput’
9. Aristarkip maligassiaa qanoq malissinnaavarput?
9 Qatanngutit asannittut Akvilatut, Priskillatut Epafroditusitullu ittut ilagiinni tamani pingaartinneqangaarput. Uppeqatitsinnik Aristarkimut, ukiuni hundredelinni siullerni inuusumut, eqqaanartunik qularnanngitsumik ilisarisimasaqarputit. Taanna allallu ’nakussatsissutaapput’, immaqa tuppallersaanermikkut pisariaqartunilluunniit ikiuinermikkut. (Kolossemiut 4:10, 11, NV) Paulusip pisariaqartitsiffiani Aristarki ikiuinermigut takutippaa ikinngutaalluni ilumoortoq. Ny Verden nutsigaq naapertorlugu Ussatit 17:17-imi ima allassimasoq eqqortippaa: „Ikinngut ilumoortoq asannittuaannarpoq, qatanngutaallunilu annikilliornartussaq pillugu erniarititaasoq.“ Tamatta sapinngisarput tamaat kristumioqatitsinnut ’nakussatsissutaaniartariaqannginnerpugut’? Ilumut, ingammik atugarliortunut.
10. Petrusi utoqqaanertanut kristumiunut qanoq maligassaalluarpa?
10 Ingammik utoqqaanertat kristumiut anersaakkut qatanngutiminnut nakussatsissutaasariaqarput. Jiisusi apustili Petrusimut ima oqarpoq: „Qatanngutitit nakussatsikkigit.“ (Lukasi 22:32) Petrusi taamaaliorsinnaavoq qaarsutut aalajaatsigigami nukittuujugamilu, ingammik Jiisusip toqusunit makinnerata kingorna. Utoqqaanertaasusi, allanik ikiuiumatuujugitsi, qajassuartumillu taamaaliortaritsi. Uppeqatissi pisariaqartippaasi! — Apustilit Suliaat 20:28-30; 1 Petrusi 5:2, 3.
11. Timotheusip pissusia ilaarutsigu qanoq iluaqutigissavarput?
11 Paulusip angalaqataa Timotheusi utoqqaanertaavoq kristumiunik allanik isumassuingaartoq. Peqqiillioraluarluni uppernermigut aalajaatsuuvoq ’Paulusilu iivangkiiliumut kiffartoqatigisimallugu’. Taamaattumik apustilip Filippimiut ima allaffigisinnaavai: „Allamik taassumatut isumalimmik taama ilumoortigisumik ilissinnik isumaginnikkumasumik aallartitassaqanngilanga.“ (Filippimiut 2:20, 22; 1 Timotheusi 5:23; 2 Timotheusi 1:5) Uppeqatitsinnut iluaqutaangaarsinnaavugut Timotheusip pissusia ilaarutsigu. Tamatta timikkut sanngiissutivut assigiinngitsutigullu misilinneqarnivut akiortariaqaraluarpavut, uaguttaarli upperluartuusinnaavugut taamaattariaqarlutalu anersaakkullu qatanngutitsinnik asannittumik isumassuisariaqarluta. Pisariaqartikkaatigut eqqaamajuartariaqarparput.
Arnat allanik isumassuisut
12. Tabitha sumik ilinniarfigisinnaavarput?
12 Itsaq arnat Guutimut tunniusimasut allanik isumassuingaartut ilagaat Tabitha. Toqummat ajoqersukkat Petrusi qaaqqutippaat innanngavianullu inimut qullermiittumukartillugu. „Uillarnerillu tamarmik qianngarmik tikiupput takutillugillu ilupaat qallersaatillu Tabithap imminniikkallarami sanaavi.“ Tabitha toqusunit makitinneqarpoq qularnanngitsumillu ’ajunngitsuliungaartarnini piitsunullu tunissutinik amerlasuunik tunisisarnini’ ingerlateqqillugu. Aammattaaq ullumikkut kristumiut ilagiivini arnaqarpoq Tabithatut ittunik asannillutik atisaliuussisartunik allatigulluunniit pisariaqartitalinnik isumassuisunik. Soorunami ajunngitsuliortarneri ingammik Guutip Naalagaaffianut kiffartornermut ajoqersuganngortitsiortornermullu tunngassuteqarput. — Apustilit Suliaat 9:36-42; Matthæusi 6:33; 28:19, 20.
13. Lydia uppeqatiminik qanoq isumassuiva?
13 Aamma arnaq Guutimik mianerinnittoq Lydia allanik isumassuiumatuujuvoq. Thyatirameersuuvoq Filippimili najugaqarluni Paulusi ukiup 50-ip missaani tassani oqaluussimmat. Juutinut ilasiaagunarpoq, Filippimili juutit ikittuinnaagunarput synagogeqarunarnatillu. Taamaattumik Lydia arnallu uppertut allat kuup sinaani qinuniarlutik katersuussimapput Paulusip nutaarsiassaq nuannersoq taakkununnga oqaluussissutigimmagu. Oqaluttuaq imaappoq: „[Jehovap Lydiap] uummataa ammarpaa Paulusip oqaasiinik pigiliussisillugu. Inoqutinilu kuisereeramik qaaqquaatigut oqarluni: ’[Jehovamut] ilumoortuusorigussinga taava illunnut iseritsi tassaniillusilu.’ Taama kimigiiserfigaatigut.“ (Apustilit Suliaat 16:12-15) Lydia allanut ajunngitsuliorusukkami Paulusi angalaqataalu illusisinniarlugit akuersiinnartippai. Kristumiut isumassuiumatuut asannittullu ullumikkut assingusumik inoroorsaartut pingaartingaarpavut. — Romamiut 12:13; 1 Petrusi 4:9.
Meeqqat inuusuttullu — aamma ilissi pisariaqartippassi
14. Jiisusip meeqqat qanoq pisarpai?
14 Kristumiut ilagiivi Guutip erneranit isumassuiumatuumit, Jiisusimit, tunngavilerneqarput. Asannittuugami misiginneqataasuugamilu ilakkuminartinneqarpoq. Ilaanni angajoqqaat qitornatik mikisut Jiisusimukaammatigik ajoqersugaasa qimagutitinniaraluarpaat. Jiisusili ima oqarpoq: „Meerannguit uannut qaaginnarlit, akornuseqinasigillu; taakkuami Guutip naalagaaffia pigaat. Ilumut oqarfigaassi: Kialuunniit Guutip naalagaaffia meerannguatut pinngikkuniuk iserfiginngilluinnassavaa.“ (Markusi 10:13-15) Guutip Naalagaaffiata pilluaqqussutissartai misigissagutsigik, meerannguatulli maniguutsigisariaqarlutalu ilinniarusussuseqartigisariaqarpugut. Jiisusip meeqqat asallugit pakkunnerisigut pilluaqqunerisigullu takutippaa. (Markusi 10:16) Ullumikkummi? Meeqqat inuusuttullu, ilagiinniittunit nuannarineqarpisi? Pisariaqartinneqarpisi? Aap, tamanna qularutigissanngilarsi!
15. Jiisusi pillugu Lukasi 2:40-52-imi qanoq allassimava, meeqqallu inuusuttullu sumik Jiisusi ilinniarfigisinnaavaat?
15 Nukappiaraallunili Jiisusip takutippaa Guuti asallugu Allakkallu Illernartut nuannaralugit. Aqqaneq-marlunnik ukioqarluni Jiisusip angajoqqaani, Josefi Marialu, najukkaminniit Nazaretimiit Jerusalemimut poorskisioriartoqatigai. Utimut aallareerlutik angajoqqaavisa paasilerpaat Jiisusi angalaqatiminnut ilaanngitsoq. Kiisami naalaffimmiittoq ilinniartitsisut tusarnaarlugillu aperisarai nassaaraat. Josefip Mariallu sumiinnini nalummassuk tupaallaatigalugu ima aperai: „Nalugassiuk Ataatanniittariaqartunga?“ Angerlaqatigai pisarnermisullu naalattuarlugit, ilisimassutsimigullu siumukartuinnarpoq timimigullu alliartorluni. (Lukasi 2:40-52) Meeqqanut inuusuttunullu akornatsinniittunut Jiisusi maligassiuilluarpoq. Pingaaruteqarpoq meeqqat inuusuttullu angajoqqaaminnut naalannissaat anersaamullu tunngasunik ilinniarusussuseqarnissaat. — 5 Mosesi 5:16; Efesosimiut 6:1-3.
16. (a) Jiisusi naalaffimmi oqaluussimmat nukappiaqqat qanoq suaartarpat? (b) Meeqqat inuusuttullu, ullumikkut sumik immikkut pisinnaatitaaffeqarpisi?
16 Atuarfimmi aamma angajoqqaatit ilagalugit illumiit illumut Jehova pillugu oqaluussisarpit? (Esaja 43:10-12; Apustilit Suliaat 20:20, 21) Jiisusi toqungajalerluni naalaffimmi oqaluussimmat ajorunnaarsitsisaqattaarmallu nukappiaqqat ima suaarput: „Hosianna, Daavip ernera.“ Palasiunerit allakkanillu ilisimasut unnerluusserpalullutik Jiisusi ima aperaat: „Tusaavigit uku qanoq oqaluttut?“ Jiisusip akivai: „Aap. Imaattut atuanngisaannarpisigit: ’Naalungissat miluttullu qarninit erinalimmik unnersiutigineqarnissat piareersarpat’?“ (Matthæusi 21:15-17) Inuusuttuususi meeqqatut taakkunatut Guutip erneratalu unnersiutiginissaat immikkut pisinnaatitaaffigaarsi angingaartoq. Oqaluussisartutut suleqatiginersi nuannaarutigaarput, pisariaqartippassilu.
Uppeqatit atugarliorpata
17, 18. (a) Sooq Paulusi Judæami kristumiut iluaqutissaannik katersuiniartitsiva? (b) Juutiunngitsut tunissutaat tunisisunut tunissuteqarfigineqartunullu qanoq sunniuteqarpat?
17 Qanorluunniit atugaqaraluarpata asanninnermit kajumissisinneqartarpugut uppeqatitsinnik atugarliortunik ikiuinissatsinnut. (Johannesi 13:34, 35; Jaaku 2:14-17) Paulusi Judæami kristumiunut asanninnerminit katersuiniartitsinissaminut killinneqarpoq. Ingammik Jerusalemimi ajoqersukkat malersugaanermik, eqqissiviilliornernik kaannersuarnillu nalaataqartarsimapput. Immaqa tamakku nalaanni ’naalliutsitaasarsimapput anniartitaasarsimallutillu pigisaminnillu arsaarneqartarsimallutik’. (Hebræerit 10:32-34; Apustilit Suliaat 11:27–12:1) Taamaattumik Paulusi Judæami kristumiunik piitsunik ikiuiniarnermi fondimut, ilagiit Akajamiittut, Galatiamiittut, Makedoniamiittut, nunallu immikkoortuani Asiamiittut tuniseqataaffigisaannut, nakkutilliisuuvoq. — 1 Korinthimiut 16:1-3; 2 Korinthimiut 8:1-4, 13-15; 9:1, 2, 7.
18 Judæami illernartunut nammineq kajumissutsimit tunissuteqarnerannit takuneqarsinnaavoq Jehovap pallorfiginnittui juutiusut juutiunngitsullu qatanngutigiissutut peqatigiittut ataqatigiilluinnartuusut. Kristumiullu juutiunngitsut tukkortuunerannit takuneqarsinnaavoq uppeqatimik Judæamiittut anersaakkut pisuussutinik tunissuteqarnerat qujamasuutigigaat. Taamaattumik anersaamut tunngasutigut timillu piisigut avitseqatigiipput. (Romamiut 15:26, 27) Ullumikkut kristumiut uppeqatiminnik atugarliortunik ikiuinerat aamma nammineq kajumissutsimit asanninnermillu pissuteqarpoq. (Markusi 12:28-31) Immitsinnut aamma taamatut pisariaqartippugut assigiimmik atugaqalerniassagatta, ’ikittunillu katersuisoq amigaateqannginiassammat’. — 2 Korinthimiut 8:15.
19, 20. Ajunaartoqartillugu Jehovap innuttaasa ikiuisimanerannik taasaqarit.
19 Nalunnginnatsigu kristumiut imminnut pisariaqartittut uppeqativut ikiorniapallattarpavut. Taamaannera erserpoq 2001-ip aallartilaarnerani El Salvadorimi nuna sajorujussuarmat nunalu sisoorujussuarmat. Nalunaarusiami ima allassimavoq: „El Salvador tamakkerlugu qatanngutit eqqugaasunik ikiuipput. Qatanngutit arlalikkuutaat Guatemalameersut, USA-meersut Canadameersullu ikioriartorluta tikipput. . . . Illut 500-nit amerlanerusut naalagaaffilersaarfiillu kusanartut pingasut tulleriiginnarlugit sananeqapallapput. Qatanngutit imminnut pilliutigeriaannaasut eqiasuinnerat suleqatigiilluarnerallu nalunaajaataalluarpoq.“
20 Afrika Kujallermiit ima nalunaarusiaqarpoq: „Qarsutsinersuit Mocambiquep ilarujussuani perlussiortitsisut aamma qatanngutitsinnik kristumiunik eqquipput. Pisariaqartinneqartut amerlanersaat Mocambiquemi immikkoortortaqarfimmiit isumagineqarput; qinnuigiinnarpaatigut atisanik atornikunik nungullajaatsunillu qatanngutit ikiortariallit nasseqqullugit. Containeri 12 meterisut takitigisoq atisanik ulikkaarlugu Mocambiquemi qatanngutitsinnut nassiupparput.“ Aap, aamma pissutsini taamaattuni immitsinnut pisariaqartippugut.
21. Allaaserisami tullermi suna sammineqarpa?
21 Eqqaaneqareersutut inuup timaata pisatai tamarmik pingaaruteqarput. Aamma kristumiut ilagiivini taamaalluinnarpoq. Tamarmik imminnut pisariaqartipput. Aamma ataasiussuseqarluta kiffartortuartariaqarpugut. Taamaaliorsinnaassagutta iliuuserisariaqakkavut pingaarutillit allaaserisap tulliani sammineqarput.
Qanoq akissavit?
• Inuup timaa kristumiullu ilagiivi qanoq assigiissuteqarpat?
• Kristumiut siulliit uppeqatitik ikiortariaqalermata qanoq iliorpat?
• Assersuutit Biibilimeersut suut takutippaat kristumiut imminnut pisariaqartittut ikioqatigiittartullu?
[Atuaqqissaarnermi apeqqutit]
[Qupp. 22-mi assiliartaq]
Akvila Priskillalu allanik isumassuipput
[Qupp. 24-mi assiliartaq]
Ajunaartoqartillugu Jehovap innuttai ikioqatigiittarput allanillu ikiuisarlutik