„Guuti, sooq taamaattoqarnera akueraajuk?“
„Guuti, sooq taamaattoqarnera akueraajuk?“
RICARDOP suli eqqaamavaa nulianilu, Maria, nakorsiartarfimmi Mariap kingullermik misissortinnerata inernera atuarniarlugu sapiillisallutik. * Ricardop nakorsap allagai ammaramigit, marluullutik siallugit atuarpaat. Oqaaseq „cancer“ maluginiarpaat, qanorlu isumaqarnera paasigamikku marluullutik qissaserput.
„Nakorsaq inussiarnersorujussuuvoq,“ Ricardo oqaluttuarpoq, „pisulli ilungersunartuunera ilisimalluarpaa, Guutimi tatigeqqullugu oqarfigisaqattaarpaatigut.“
Suli qinnguartartinnissaa aallartinngitsoq nakorsap malugaa Mariap isigaa talerperleq piumassuserinngisaminik aalariartartoq. Misissuisaqattaarnerni paasineqarpoq kræfti qarasaanut siaruaassimasoq. Sapaatip-akunnera qaangiutiinnartoq qinnguartaaneq unitsinneqarpoq. Maria toquussarpoq, qaamatillu marluk qaangiummata toqulluni. „Anniaatai qaangiummata qujavunga,“ Ricardo oqaluttuarpoq, „maqaasingaarakkuli nammineq toqunissara kissaatigiinnaleraluarpara. Arlaleriaqalunga qiallunga suaarusuttaraluarpunga: ’Guuti, sooq taamaattoqarnera akueraajuk?’
Ajunaartoqartillugu apeqqutit qaffakaalersartut
Inuppassuit Ricardotut naalliuutit piviusuunerat akuerisariaqartarpaat. Pisuussuteqanngitsut eqqugaagajuttarput. Eqqarsaatigeriakkit piffissami kingullerni sakkuaannerit aliasutsitsingaartartut. Imaluunniit inuit pisuussuteqanngitsut pinngitsaalineqarlutik arneriffigitissimasut, meeraanerminni kinguaassiuutitigut atornerlugaasimasut, angerlarsimaffimmi nakuusernerit allanilluunniit ajungaartunik misigititaasimasut atugaat ajortut. Oqaluttuarisaaneq qimerluussagaanni, inuit inoqatiminnut naapertuilluanngitsuliorsimanerat naalliutsitsisimanerallu killissaqarsimagunanngilaq. (Oqaluussisartup oqaasii 4:1-3) Tamatumunnga ilanngunneqarsinnaapput naalliuutit, ajunaarnersuit pinngortitap pilersitai imaluunniit timikkut tarnikkullu nappaatit. Taamaattumik tupinnarpallaanngilaq inuppassuit aperisarmata: „Sooq Guutip naalliuutit taamaattut atuutitippai“?
Allaat inunnut upperisaminnik aalajangiussisimasunut anniaatit atoruminaassinnaapput. Immaqa aamma illit eqqarsaatigisimassavat Guutip asannittup pissarsuusullu suna tunngavigalugu naalliuutit atuutitinnerai? Pingaaruteqarpoq apeqqummut ularussinartumut tamatumunnga akissut naammaginartoq ilumoortorlu nassaarissallugu, tamannami tarnitsigut eqqissinissatsinnut Guutimullu attaveqarluarnissatsinnut pingaaruteqarpoq. Akissullu taamaattoq Biibilimi nassaarisinnaavarput. Tassani qanoq allassimasoqarnera allaaserisami tulliuttumi maluginiariaruk.
[Quppernerup ataani ilanngussaq]
^ imm. 2 Aqqi allanngortitaapput.
[Qupp. 3-mi assiliartaq]
Nakorsap Guuti tatigeqqullugu oqarfigisaqattaarpaatigut