Ilumoortuuneq pisariaqarpoq — naammappali?

ULLUINNARNI inuunitsinni ilumoortuuneq pisariaqarpa? Ilumoortuuneq ima nassuiarneqarpoq: „Unneqqarinneq, isertuannginneq ilumoornerlu, marloqiusaanani ilumoortuusaarnaniluunniit.” Tamanna pissuseq inuit akornanni attaveqarlualersitsissaaq. Apustili Paulusi ima oqaaqqissaarivoq: „Nunami naalagarisasi tamatigut naalattarsigit, ilumoortuusaartutut inunnut iluareqqusaaginnartutut pinnasi, uummatissigulli ilumoorlusi [Jehova] mianeralugu.“ (Kolossemiut 3:22) Kina oqaaqqissaarummik taamaattumik malinnikkusuttumik sulisoqarusussannginnerpa? Ullumikkut unneqqarissoq suliffittaarluarsinnaassaaq suliffinilu tigumiaannarlugu.

Guutimulli attaveqarnitta sunnerpaatigut ilumoorusunnermik kissaateqalersilluta. Itsaq Mosesip Inatsisai malillugit Israelikkut nalliuttorsiornermut aalajangersakkat maleqqissaaraangamikkik Guutip pilluaqqusinera nuannaarutigisinnaasarpaat. Ilagiit minguitsuunissa pillugu ajoqersuinermini Paulusi kristumiunut ima kajumissaarivoq: „Nalliuttorsiorniarta seernarsaatitoqaq — tassa seernarsaat iluaatsoq ajortorlu — pinnagu, timiusarli seernarsaateqanngitsoq minguitsoq piviusorlu pigalugu.“ (1 Korinthimiut 5:8) Pallorfiginninnerput Guutimit iluarisaassappat ilumoortuuneq kissaataannaanngilaq, piumasaqaataallunili. Aammattaaq maluginiaruk ilumoortuuneq kisiat naammanngimmat. Pissuseq taanna sallusuissusermik ataqateqartariaqarpoq.

Ilaasartaassuarmik Titanic-imik umiarsualiortut avalammallu ilaasut ilumoorlutik upperaat kivisinnaanngitsoq. 1912-imili angalaqqaarnermini iluliarsuarmut aporpoq, inuillu 1517-it ajunaarlutik. Juutit ilaat ukiuni hundredelinni siullerni qularnanngitsumik aamma ilumoorlutik isumaqarput Guutimut eqqortumik pallorfiginnillutik, ilungersuussineralli ‘siuneqarluanngilaq’. (Rûmamiut 10:2) Pallorfiginninnerput Guutimit iluarisaassappat ilisimassusermik eqqorluartumik tunngaveqartariaqarpoq. Guuti ilumoortumik eqqortumillu kiffartorniaraanni sunik piumasaqaateqarnerata misissornissaanut Jehovap Nalunaajaasuisa nuannaarutigalugu ikiorumassavaatsit.