Guutip naalagaaffianik oqaluussissutiginninnermit nutaarsiassat

Aak pillugu Guutip inatsisaata naalannissaanut ikiuut

NUNARSUAQ tamakkerlugu Jehovap kiffaasa Guutimut ilumoornertik ersersippaat aap illernartuunera pillugu inatsisaa naalakkamikku. (Apustilit Suliaat 15:28, 29) Tassunga tunngatillugu kiffap ilumoortup silatuullu kristumiut qatanngutigiissuit ikiorsimavai. (Matthæusi 24:45-47) Takoriartigu Filippinerini qanoq angusaqartoqarsimasoq.

Filippinerini immikkoortortaqarfimmiittut oqaluttuarput: „1990-imi paasitinneqarpugut Betelimi Brooklynimiittumi suleqataasut maani Filippinerini isumasioqatigiinniartut. Qatanngutit angutit Asiami immikkoortortaqarfinnit assigiinngitsuneersut, Korea, Taiwan Hong Kongimeersullu, aggersarneqarput. Isumasioqatigiinnerup siunertaraa immikkoortortaqarfinni taakkunani Napparsimmavinnut Paasissutissiisarfinnik pilersitsinissamut ikiuinissaq, ilanngullugulu nunani pineqartuni Napparsimmavinnut Attaveqartitat aaqqissugaanissaat. Filippinerini aallaqqaammut illoqarfinni annerusuni sisamani Napparsimmavinnut Attaveqartitat pilersinneqarput.“ Qatanngutit angutit Napparsimmavinnut Attaveqartitaniittut najukkaminni nakorsat, aak pillugu kristumiutut aalajangiussatsinnik ataqqinnikkumasut, atassuteqarfiginiartussaavaat. Qatanngutit taakkua aamma uppeqatitik ikiortussaavaat aammut isiginnittaasertik pillugu ajornartorsiulissagaluarunik.

Remegio Baguiomi Napparsimmavinnut Attaveqartitanut ilaasussatut toqqarneqarpoq. Piffissap ingerlanerani ataatsimiititaliap kiffartuutigerusutaata naleqassusia nakorsat akueriartuaalerpaat. Remegio pisimasumik ataatsimik eqqaamasaqarpoq, tassa nakorsat Napparsimmavinnut Attaveqartitaniittunik ataatsimeeqateqarlutik qanoq Jehovap Nalunaajaasuinik aalersortikkusunngitsut katsorsarneqarsinnaanissaanik paaserusutaqarmata. Remegio oqaluttuarpoq: „Nakorsat apersuilerput, akisinnaanngilakkali, apeqqutaat teknikkimut tunngasorujussuummata.“ Jehovamut qinuvoq ajornartorsiutip tamatuma anigornissaanut ikioqqulluni. Remegio nangippoq: „Apeqquteqareernerit tamaasa nakorsat allat nappaasarput oqaluttuarlutillu pisimasumi assingusumi qanoq iliorsimallutik.“ Remegiop ikiorneqarnini nuannaarutigaa, pingaartumik piffissaq apeqquteqarfiullunilu akissuteqarfiusoq nalunaaquttap akunnerinik marlunnik sivisussuseqarmat.

Maannakkut nunami tassani Napparsimmavinnut Attaveqartitat 21-upput qatanngutinit angutinit katillugit 77-init peqataaffigineqartut. Danilo, Jehovap Nalunaajaasuisa ilaat nakorsaq, oqarpoq: „Nakorsat nalunngilaat napparsimasut Jehovap Nalunaajaasuusut ikiorneqarlutillu tapersersorneqartartut, peqatigiiffimmik aaqqissuussaasumik isumagineqarlutik.“ Nakorsaq aallaqqaammut qatanngut angut aalersornagu suliarinissaanut piumanngilaq. Qatanngutilli isummani aalajangiusimavaa. Suliaritinneq ajunngitsumik naammassineqarpoq. Napparsimmavinnut Paasissutissiisarfik nalunaarusiorpoq: „Qatanngutip peqqissipallannera nakorsap tupigusuutigisorujussuuaa. Oqarpoq: ’Uppeqatersi assingusumik suliaritittariaqalissagaluarpat, uanga pisimasut tunuliaqutaralugit nuannaarlunga aak atornagu passussiumavunga.’“ (wE 5/1 03)