„Guuti qaninniarsiuk, taava taanna ilissinnut qanillissaaq“

Pissaaneq allanngornissamut ikiuisinnaasoq nanivaa

SANDRA Mexicomeersoq ilaqutariinni inukulugineqarnersaasimavoq. Inuusuttuaraanermini sumiginnagaasimavoq. Nammineq oqarpoq: „Inuusuttuuninni imaqanngitsutut misigisimajuarpunga sunalu pillugu inuunerlunga imaluunniit inuunerup siunertaqarnera takusinnaanngilara.“

Sandra ilinniarnertuunngorami ataatami viinniutaanik viinnisortalerpoq. Taava nammineq pisisalerpoq imerajuttunngorlunilu. „Inoorusunngivippunga,“ nassuerpoq. Sandra ernumatsassimanermini ikiaroornartunik tuppallersaatissarsiorpoq. „Ajornartorsiutinnik puiguisitsisinnaasutuaasut pooqattanniipput: puiaasaq, iisartagamernit ikiaroornartuminerlu marihuana,“ Sandra oqarpoq.

Niviarsiatut ilinniarnini naammassigamiuk imigassamik ajornartorsiuteqarnera annerulerpoq. Imminoriaraluarpoq, aniguillunili.

Sandrap upperisarsiortut assigiinngitsut amerlasuut ornittarsimagaluarpai anersaakkut ittumik ikiorneqarusulluni misigissutsikkullu tapersersorneqarusulluni, iluatsinnanili. Neriuutaarukkami isumatsassimaqigamilu Guutimut ilungersorluni arlaleriarluni qinusarpoq: „Sumiippit? Sooq ikiunngilinga?“ Imminut ataqqiunnaangajavissimasoq Jehovap Nalunaajaasuisa ilaata attavigilerpaa.Biibilimik atuaqqissaarnissamut Sandra akuersivoq nuannaangaarlunilu tusaramiuk „sequmissimasumik uummatillit“ Jehovap qanikkai. — Tussiaat 34:19.

Biibilip oqaloqatigiissutigisarneratigut ilikkarpaa Jehova Guutip nalunngikkaa ajorti naammalluinnanngitsuunerlu Adamimit kingornutarput pissutigalugu eqqunngitsumik ilioqqajaasartugut. Paasivaa Guuti inassutiminik naapertuilluartunik naammalluinnartumik malinnissinnaannginnitsinnik paasinnittuusoq. (Tussiaat 51:7; Romamiut 3:23; 5:12, 18) Nuannaraa paasillugu Jehovap sanngiiffivut pingaarnerutinngikkai, sapikkatsinnillu ilimasuffiginngikkaatigut. Tussiaasiortoq aperivoq: „Illit [Jehova], ajortuliat naatsorsuutigissagaluarukkit kina atassagaluarpa taava, [Jehova]?“ — Tussiaat 130:3.

Sandrap uummataanik neriulersitsisoq tassaavoq Biibilimi sallusuissummik pingaaruteqartumik Jiisusi Kristusip utertitsissutitut pilliutaanik paasinninneq. Tassuuna Jehovap naakkinnissutsimigut pisassaritippaa inuit naalattut naapertuilluartutut inissisimanissaat, naak naammalluinnanngitsuugaluarlutik. (1 Johannesi 2:2; 4:9, 10) Aap, ’ajortitsinnik isumakkeerfigineqarsinnaavugut’ taamaattumillu pingaanngitsutut misiginissatsinnut pissutissaqanngilagut. — Efesosimiut 1:7.

Sandra Paulusip maligassiaanik pingaarutilimmik ilikkagaqarpoq. Guutip ajortuliarisimasaminik isumakkeerfiginninnissamut piumassuseqarnera eqqunngitsunillu iliuuseqaqqajaanerminut akiuunnermini tapersersuinera qujamasuutigisorujussuuaa. (Romamiut 7:15-25; 1 Korinthimiut 15:9, 10) Paulusip inuunini allanngortippaa, ’timini peqqarniisaarfigalugu naalatsillugulu pinngitsaalillugu’ Guutip aqqutigeqqusaasigut ingerlajuaannarumalluni. (1 Korinthimiut 9:27)  Ajortulioqqajaasarnerminut inussiaatinngortinngilaq.

Sandrap sanngiissutsini akiortuartariaqarpai, tunniutiinnanngilarlu. Ilumoorluni Jehova qinnuigaa ajugaaffiginissaannut ikioqqulluni naakkinninneralu noqqaassutigisarlugu. (Tussiaat 55:23; Jaaku 4:8) Kinaassutsini Guutimit soqutigineqartoq malugileramiuk, pissaaneq inuunerminik allanngortitsisinnaasoq nanivaa. „Nuannaarutigaara piffissara tamaat allat Biibilimit ilinniartinnerannut atorsinnaagakku,“ oqarpoq. Sandra nuanningaartumik misigisaqarpoq angajuni nukkanilu Jehovamik ilisarsilersikkamigit. Aamma ’ajunngitsuliorpoq’, Jehovap Nalunaajaasuisa ataatsimeersuarnerini niviarsiatut misilittakkami atornerisigut. — Galatiamiut 6:10.

Qanormi piva pinngitsuuisinnaajunnaarsimanera? Tulluusimaarluni oqarpoq: „Isumaga kajumiikkunnaarpoq. Imertarunnaarpunga, pujortartarunnarlunga ikiaroortarunnaarlungalu. Pisariaqartikkunnaarpakka, amigaatigami nanivara.“ (wE 7/15 03)

[Qupp. 32-mi issuagaq]

„Amigaatigisara nanivara“

[Qupp. 32-mi ungalusaq]

Biibilimi najoqqutassiat atorsinnaapput

Tulliuttut Biibilimi najoqqutassiat ilaat atornerluiunnaarniarneranni inuppassuarnik ikiuisimasut:

„Timimi anersaamilu minguk tamaat piiassavarput illernartuullutalu Guutimik mianerinninnermi.“ (2 Korinthimiut 7:1) Guutip minguiarsimasut ajortumillu iliorumanngitsut akilissavai.

„[Jehova] mianerigaanni ajortoq uumigisassaavoq.“ (Ussatit 8:13) Guutimik mianerinninneq ajortunik ileqqoqarunnaarnissamut iluaqutaavoq, ilaatigut ikiaroornartumik atornerluiunnaarnermut. Jehovap iluaraa allanngortoqaraangat, aamma taassumunnga nappaatinut siooragisanut illersuutaavoq.

„Qullersaasunut pisortaasunullu naalatsigi[tigitsi], taakkununnga maleruuteqqullugit.“ (Titusi 3:1) Nunani amerlasuuni ikiaroornartuuteqarneq ikiaroornartutornerlu inatsisinik unioqqutitsineruvoq. Kristumiut ilumoortut inerteqqutaasunik pigisaqaratillu atuisuunngillat.