Jehovap kiffai tunngaveqarluartumik neriuuteqarput
Jehovap kiffai tunngaveqarluartumik neriuuteqarput
„Jaakup amiakkuisa inuiaqatigiippassuit akornanniittut assigiumaarpaat kanerneq [Jehovamit] pisoq. . . . Angutit isumalluutigissanngilaat.“ — MIKA 5:6.
1. Anersaakkut Israelikkut qanoq ilillutik inuummarissinartuuppat?
JEHOVAP sialuk kanernerlu pilersippai, inuit pilersissinnaanngisaat. Pruffiiti Mika ima allappoq: „Jaakup amiakkuisa inuiaqatigiippassuit akornanniittut assigiumaarpaat kanerneq [Jehovamit] pisoq sialullu naasunut nakkartoq. Angutit isumalluutigissanngilaat inuillu neriuffigissanagit.“ (Mika 5:6) ’Jaakup amiakkui’ ullumikkut kikkuuppat? Tassaapput anersaakkut Israelikkut, ’Israeli Guutip pigisaata’ amiakkui suli nunamiittut. (Galatiamiut 6:16) Taakku ’inuiaqatigiippassuarnut’ inuummarissinartumik ’kanernertut Jehovamit pisutut sialuttullu naasunut nakkartutut’ ipput. Aap, kristumiut tanitat ullumikkut inuiannut Guutimit pilluaqqussutaapput. Jehovap Naalagaaffimminik oqaluussitippai neriuullu pillugu tusarliussani inunnut nalunaarutigitillugu.
2. Silarsuarmi ajornartorsiorfiusumi inuugaluarluta sooq siunissamut tunngaveqarluartumik neriuuteqarpugut?
2 Silarsuarmi matumani inuusut piviusumik neriuuteqannginnerat tupaallannanngilaq. Politikkikkut allanngorarnerit, ileqqorlussiartuinnarneq, pinerluttuliornerit, aningaasarsiornikkut ajornartorsiornerit, peqqarniisaarniarnerit sorsunnerillu silarsuarmi Saatani Diaavulumit naalagaaffigineqartumi pisinnaasutut ilimagaavut. (1 Johannesi 5:19) Soorunami inuppassuit siunissami qanoq pisoqarnissaa annilaanngatigaat. Jehovalli kiffaasut siunissaq siooraginngilarput. Neriuuterput tunngaveqarluarpoq ilumoortuullunilu Guutip oqaasianik tunngaveqarami. Jehovap neriorsuutai tatigilluinnarpavut, oqaasiimi piviusunngortuaannarput.
3. (a) Sooq Jehova Israelikkunnut Judakkunnullu akuliuttariaqarpa? (b) Sooq Mikap oqaasii nalitsinnut aamma tunngappat?
3 Mikap siulittuutaata, Guutimit isumassarsiarititaasup, Jehovap aqqani inuunissatsinnut nakussatsittarpaatigut piviusumillu neriuuteqarnissamut tunngavissilluta. Ukiuni 700-kkunni ukiunik naatsorsuisalerfitta siorna Mika siulittuimmat Guutip innuttamisut angerfigeqatigisai avissimapput inuiannut marlunnut — Israelikkunnut Judakkunnullu. Inuiaqatigiit taakku marluk Guutimik angerusertik suusupagaat, tamatumalu kinguneraa upperisarsiornikkut tunussineq, noqissinnaassuseqarnani pigisalerituneq ileqqorlussiartuinnarnerlu. Taamaattumik Jehovap akuliunnissaminik mianersoqquai. Soorunami Mikap nalaani inuusunut mianersoqqussutaapput, ullumikkulli pissutsit taamanikkut pissutsinut assingulluinnarmata Mikap oqaasii nalitsinnut aamma tunngapput. Tamanna paasinarsissaaq Mikap allagaasa kapitalii arfineq-marluk pingaarnersiorutsigik.
Pingaarnersiuineq
4. Mikap siulittuutaani kapitalini 1-imiit 3-mut qanoq paasitinneqarpugut?
4 Mikap allagai pingaarnersioqqaariartigik. Kapitali 1-imi Jehovap Israelikkut Judakkullu imminut pikitsitsinerat qulaarpaa. Inuit unioqqutitsimmata Israeli piuneerunneqassaaq, Jerusalemillu isaaffii tikivillugit Juda pillagaassaaq. Kapitali 2-mi uparuarneqarpoq pisuut pissaanillillu sanngiitsunik susinnaanngitsunillu naqisimannittut. Aammattaarli neriorsuuteqarpoq Guutimeersumik: Innuttai katersorneqassapput. Kapitali 3-mi Jehovap inuianni siuttuusunut pruffiitioqqusersunullu oqaasii issuarneqarput. Siuttuusut eqqartuussinerluttarput, pruffiitillu sallusarput. Taamaattoqaraluartoq Mika Jehovamit nakussatsinneqarpoq eqqartuussinissap oqaluussissutiginissaanut.
5. Mikap allagaani kapitali 4-mi 5-imilu suut pingaarnersaappat?
5 Kapitali 4-mi siulittuutigineqarpoq ullussani kingullerni inuiaat tamarmik majuassasut qaqqamut Jehovap naalaffiata inaanut, qaqqanit tamanit qutsissisitaasumut; tassani inuiaat Jehovamit ilinniartitaassapput. Tamakkuli pitinnagit Judakkut Babylonimut aallarussaassapput, Jehovalli aniguisissavai. Kapitali 5-imi saqqummersinneqarpoq Missiarsi Judami Betlehemimi inunngussasoq. Innuttaminut paarsisuussaaq inuiannillu naqisimannittunit aniguisissallugit.
6, 7. Mikap siulittuutaani kapitali 6-imi 7-imilu suut pingaarnersaappat?
6 Mikap allagaani kapitali 6-imi Israelikkunnut Guutip oqaasii eqqartuussinermi unnerluutitut saqqummiunneqarput. Jehovap innuttani qanoq iliuuseqarfigigamigit pikitsitsippat? Inornanngitsuinnarnik piumasaqarpoq. Kissaatigaa pallorfiginnitsini eqqortuliussasut, tunniusimasuussasut anneruniajuillutillu inooqatigissagaanni. Israelikkulli Judakkullu piumasaqaatinik taakkuninnga eqqortitsippat? Naagga, pikitsitsipput kingunerlutsitsissallutillu.
7 Atuakkap kapitaliisa kingullersaanni Mikap nalimini ajussuseq takusani tamaat avoqqaaraa. Nikallunngilarli, ’Guuti annatsitsisini neriuffiginiarlugu’ aalajangiusimagamiuk. (Mika 7:7) Naggataatigullu erserpoq Mikap tatigigaa Jehovap innuttani nallittorumaarai. Oqaluttuarisaanerup takutippaa neriuutaa piviusunngortoq. Ukiumi 537-mi u.n.s., Jehovap inuit pisariaqartumik perorsareerlugit, nallittorpai amiakkuusut nunaannut utertillugit.
8. Mikap allagaasa imai eqikkarlugit qanoq oqaatigissavigit?
8 Jehovap Mika aqqutigalugu pingaarutilinnik paasissutissippaatigut. Atuakkami isumassarsiarititaasumi tassani maligassiuinerluttut mianersoqqussutitut allaatigineqarput, tassanilu erserpoq Jehovap akuliuffigisarai imminut kiffartornerartut, ilumuunngitsulli. Aamma siulittuuteqarpoq ullumikkut eqquuttunik. Guutimeersunillu siunnersuuteqarpoq ulluni ajornartorsiorfiusuni maannakkorpiaq atukkatsinni neriuutitsinnik aalajaallisitsisunik.
Naalagaq Kisimi Oqartussaasoq Jehova oqaluppoq
9. Mika 1:2 naapertorlugu Jehova qanoq iliorniarpa?
9 Mikap allagai misissorneroriartigik. Mika 1:2-mi ima allassimavoq: „Tusaagitsi, inuiaqatigiit tamassi! Tusarnaaritsi, nuna taassumaniittullu tamassi! Guuti [Jehova] ilissinnik unnerluussissaaq naalaffimminit illernartumit.“ Mikap nalaani inuusimasuuguit qularnanngitsumik oqaatsit taakku malugisimassagaluarpatit. Allaat ullumikkut naalaartittarpaatigut, Jehovami naalaffimminit illernartumit oqaluppoq, aamma Israelikkut Judakkullu kisimik oqaluffigineqanngillat, inuilli tamarmik pineqarput. Mikap nalaani inuit sivisuallaamik Naalagaq Kisimi Oqartussaasoq Jehova sumiginnarpaat. Qanittukkulli pissutsit allanngussapput. Jehova akuliunniarluni aalajangersimavoq.
10. Sooq Mika 1:2-mi oqaatsit uagutsinnut pingaaruteqangaarpat?
10 Ullumikkut aamma taamaappoq. Saqqummersitat 14:18-20-mi allassimavoq Jehova naalaffimminit illernartumit tusarliisaleqqittoq. Ungasinngitsukkut akuliutissaaq, pisussallu pingaaruteqartut inuiannik aalassatsitseqqissapput. Tamatumuuna nunarsuup ’viinnequtai’ ajortut Guutip uumitsannerata tunguiaaffissuanut kuineqassapput, tamatumalu kinguneranik Saatanip pissutsinik aaqqissuussinera ajortoq suujunnaarsinneqarluinnassaaq.
11. Oqaatsit Mika 1:3, 4-mi allassimasut qanoq isumaqarpat?
11 Jehova qanoq iliorniarnersoq tusariaruk. Mika 1:3, 4-mi ima allassimavoq: „[Jehova] qilammi najukkaminit anivoq, aqqarpoq nunallu qattorngisigut ingerlalluni. Qaqqat tummarfigisai aapput, qooroqalersillugu, soorlu kutsuk innermi aattartoq, soorlu imeq qorlortoq qaqqap sivingarnatigut.“ Jehova qilammi iniminit aqqarluni nunami neriorsuutigisami qaqqat narsartallu tutivillugit tummassavai? Naagga. Pisariaqanngilaq. Nunarsuarmik soqutiginniinnarluni piumasani naammassisinnaavaa. Aammattaaq nunarsuup nunavittaa allanngortussaanngilaq, inuttaali uani allassimasutut allanngornersuarnik misigisaqartussaapput. Jehova akuliuppat ilumuunngitsunut ajunaarnersuaqassaaq qaqqat aattuuppata kutsuup aanneratulli, narsartalluunniit nunap sajunnerani quppaqalernerattulli, ajunaarutaatigisumik.
12, 13. Petrusip allagaasa aappaat 3:10-12 naapertorlugu suup qularnaatsumik siunissamut neriuutississavaatigut?
12 Oqaatsit siulittuutaasut Mika 1:3, 4-mi allassimasut siulittuummut isumassarsiarititaasumut allamut eqqaanarput. Petrusip allagaasa aappaanni 3:10-mi siulittuutigineqarpoq nunami ajunaarutaasunik pisoqarumaartoq. Apustili ima allappoq: „[Jehovap] ullussaa tillinniatut nalliutissaaq, taavalu qilaat perpaluttorsuullutik nungussapput pinngoqqaartullu ikuallakkumaarlutik, nunalu suullu inunnit suliarineqarsimasut tassaniittut pissuserisamissut illutik takussaajunnaarput.“ Petrusip oqaasiini qilaat nunalu piviusut pineqanngillat soorlu Mikap siulittuutaani aamma taamaattoq. Akerlianik allaatigineqarpoq pissutsit aaqqissuussaanerat ajortoq annikilliortitaangaarumaartoq.
13 Taamatulli annikilliornartussarsuaqaraluartoq kristumiut, Mikatut, siunissaq isumalluarfigisinnaavaat. Qanoq? Siunnersuut Petrusip allagaani versip tulliani allassimasoq maleruarlugu. Apustili ima allappoq: ’Iluartumik ileqqoqarlusi mianerinnittariaqarpusi. Guutip ullussaata nalliuffissaa ilimagalugu qilanaaralugulu.’ (2 Petrusi 3:11, 12, 1961) Siunissarput isumannaatsuussaaq Guutip naalannissaa uummammit pisumik sungiukkutsigu, iluartumik ileqqoqarniarsarigutta Guutimullu tunniusimanermut naapertuuttumik iliuuseqartuaannarutta. Jehovap ullussaata nalliukkumaarneranik eqqaamannittuarnerput neriuutitsinnik aalajaallisitsissaaq.
14. Sooq Israelikkut Judakkullu pillarneqartariaqarpat?
14 Jehovap nassuiarpaa sooq itsaq innuttani pillarneqartariaqartut. Mika 1:5-imi ima allassimavoq: „Taama ittumik pisoqarpoq Jaakup unioqqutitsineri pillugit, Israelikkut ajortuliaat pillugit. Jaakup unioqqutitsinera sunaava? Samaria! Qattorngit Judap pilliisarfii suuppat? Jerusalemi!“ Jehovaqarallartillugu Israelikkut Judakkullu piupput. Taamaattoq pikitsitsivigaat, allaallu illoqarfiit pingaarnersaanni, Samariami Jerusalemimilu, pikitsitsipput.
Ajussuseqangaarneq
15, 16. Inuit Mikap nalaani inuusut qanoq ajortuliorpat?
15 Mikap nalaani ajussuseqangaarneq Mika 2:1, 2-mi ima allaatigineqarpoq: „Eqqanaq ajortuunissamik pilersaarusiortut, innanngavimminni ajortuliassanik isumalioqqutiginnittut. Qaagaangat pilersaarutitik naammassisaraat, taamaaliornissaq sapinnginnamikku. Narsaatit pileritsaakkaangamikkit tiguinnaaraat, illut pileritsaakkaangamikkit arsaarinnissutigiinnaaraat. Qunusiarisarpaat angut inoqutai ilanngullugit, angut pigisai ilanngullugit.“
16 Inuit piumatuut unnuami eqqumasarput tullermik narsaataat illuilu qanoq pissarsiarisinnaanerlugit pilersaarusiorlutik. Qaagaangat pilersaarutitik piviusunngortipallattarpaat. Taama naakkittaatsiginavianngikkaluarput Jehovamut angerusertik eqqaamagaluarunikku. Mosesip inatsisaani aalajangersagaqarpoq piitsunut illersuutaasunik. Kinguaariit kikkulluunniit nunaat kingornuttaqattaagartik annaavillugu annaasinnaanngilaat. Piumatuulli tamanna akornutigisanngilaat. Aammattaaq Mosesimik allakkat pingajuanni 19:18-imi allassimasoq soqutiginngilaat, tassani ima allassimavoq: „Tullit ilittut asassavat.“
17. Qanoq pisoqarsinnaava Guutimut kiffartornerartut pigisanik salliutitsileraangata?
17 Tamatuma takutippaa inuit Guutimut kiffartornerartut anersaakkut eriagisassat eriagiunnaaraangamikkik pigisallu salliutileraangamikkik qanoq pisoqartartoq. Paulusip nalimini kristumiut ima mianersoqquai: „Inuit pisuunngorumasut usserneqarlutillu napitinneqartarput ueqqivigisarlugillu kajungerfigiligarpassuatik sianiitsuliornerusut ajoqutaasullu, inunnut aseruutaasut tammartitsisullu.“ (1 Timotheusi 6:9) Inuup aningaasarsiorneq inuunermini pingaarnerpaatileraangamiuk guutipilussiuliinnartarpoq — Mammoni imaluunniit Pisuussutit guutipilussiorfigilerlugit. Guutipiluk taanna siunissamut qularnaatsumik neriuuteqalersitsinngilaq. — Matthæusi 6:24.
18. Pigisanik tatigisaqartut Mikap nalaani qanoq pineqassappat?
18 Mikap nalaani inuppassuit pigisanik tatigisaqarnerup qanoq piunngitsiginera ilikkartariaqarsimavaat. Mika 2:4-mi atuarsinnaasatsitut Jehova ima oqarpoq: „Ullussami tassani mitalliummik erinarsuutigineqassaasi. Aliasungaarnermit kappialajumaarpusi ima oqarlusi: ’Suujunnaarsitaavugut, inuiaqatima nunaataat allanut tunniuppaa. Alianaq, narsaatitsinnik arsaarpaatigut tunussisunut agguaallugit.’“ Aap, taama pineqassapput allat illuutaannik narsaataannillu tillittut — nunaat kingornuttaqattaagartik annaassavaat nunamullu takornartamut aallarussaallutik. Pigisaat ’tunussisunit’, tassa inuiannit allaneersunit, tiguarneqassapput. Pisuunngornissamik neriunnerigaluat maangaannassaaq.
19, 20. Juutit Jehovamik tatiginnittut qanoq pippat?
19 Jehovamilli tatiginnittut neriuutiminnik pakatsisinneqassanngillat. Jehova Aaperaamut angerutsiminut Daavimullu angerutsiminut aalajaappoq, nallittorpaalu Mikatut asanitsini nunaqqatiminnillu Guutimit avissaarsimasunik aliasuutiginnittut. Piffissarititani nalliuppat imminut aalajaatsut aniguisitaanissaat nunaminnullu uternissaat isumagissavaa.
20 Ukiumi 537-mi u.n.s. Babyloni uppereermat juutillu amiakkuusut nunaminnut utersinnaalermata Guutip piffissarititaa nalliuppoq. Tamatuma nalaani Mika 2:12-imi oqaatsit eqquuteqqaarput. Jehova ima oqarpoq: „Katersorumaarpakkit Jaaku, katersorniarpakka Israelikkut amiakkui. Ataatsimut kattutitikkumaarpakka savatut ungalusamut isersimatitatut, savaatitut ivigartorfimmiittutut, inuppassuit nipiliortut.“ Jehovap asanninnera erserpoq innuttani perorsareerlugit amiakkuusut uternissaat akuerimmagu nunami siuaasaminnut tunniussaani pallorfigisinnaaqqullugu.
Ullumikkumut naleqqiunneqarsinnaasut maluginiarnartut
21. Ullumikkut pissutsit Mikap nalaani pissutsinut qanoq assinguppat?
21 Maanna Mikap allagaani kapitalini siullerni marlunni versialuit misissoreerlugit immaqa malugaat ullumikkut pissutsit taamanikkut pissutsinnut qanoq assingutigisut. Mikap nalaanisulli ullumikkut inuppassuit Guutimut kiffartornerarput. Judakkutulli Israelikkutullu saqitsaateqatigiipput allaallu imminnut sorsuuttarlutik. Nunani kristumiuunerarfiusuni pisoorpassuit piitsunik naqisimannittarput. Upperisarsiornikkullu siuttuusut Biibilimi erseqqissumik avoqqaarineqartut akuersaaleraluttuinnarpaat. Tupinnanngilaq Jehovap kristumiuunerartut Babylonersuullu, eqqunngitsumik upperisarsiornerup silarsuarmi tamarmi naalagaaffissuata, sinnera piuneerutingajalermagu, siulittuutini ersersinneqartutut! (Saqqummersitat 18:1-5) Mikalli nalaanisulli ullumikkut aamma Jehova nunami aalajaatsunik kiffaqassaaq.
22. Katersat marluk kikkut Guutip naalagaaffianik isumalluuteqarpat?
22 1919-imi kristumiut tanitat aalajaatsut kristumiuunerartunit avissaarluinnarput, paasivaallu Guutip naalagaaffia pillugu nutaarsiassaq nuannersoq inuiannut tamanut oqaluussissutigineqassasoq. (Matthæusi 24:14) Aallaqqaammut katersorneqartut tassaapput anersaakkut Israelikkut amiakkui. Taava ’savat allat’ katersorneqalerput, katersallu taakku marluk tassaalerput ’savaatit katersat ataatsit ataatsimik paarsisullit’. (Johannesi 10:16) Nunani 234-ni najugaqaraluarlutik Guutimik pallorfiginninnermi ’ataatsimut kattutitinneqarput’, tamatumalu kinguneranik savat inaanni ’inuppassuit nipiliorput’. Pissutsit aaqqissuussaanerat manna isumalluarfiginagu, isumalluutigaat Guutip naalagaaffia, qanittukkut nunarsuarmi Paratiisimik pilersitseqqittussaq.
23. Neriuutivit qularnaatsuunera sooq upperilluinnarpiuk?
23 Mikap allagaani kapitali 2-mi versit kingullersaanni Jehovap pallorfiginnittai aalajaatsut pillugit ima allassimavoq: „Kunngiat siornanni ingerlavoq, [Jehovap] siulersorpai.“ Ingerlaaqatigiinnut taakkununnga Jehova Guutimit siulersorneqartunut, kunngimillu Jiisusi Kristusimik tullersorteqartumut, ilaallutit takorloorsinnaaviuk? Taamaassinnaaguit ajugaaqataalerlutit qularissanngilat. Neriuutit piviusunngussaaq. Tamannalu takorloorluarnerusinnaassavat Mikap siulittuutai pingaarnersioqqikkutsigik.
Uteqqiinermi apeqqutit
• Mikap nalaani sooq Jehova aalajangerpa Judakkunnut Israelikkunnullu akuliunniarluni?
• Guutimut kiffartornerartut pigisanik salliutitsileraangata qanoq pisoqarsinnaava?
• Mikap allagaani kapitalit siulliit marluk siunissamut neriuutivit tatiginartuuneranik qanoq qularunnaarsitseqataappat?
[Atuaqqissaarnermi apeqqutit]
[Qupp. 15-mi assiliartaq]
Mikap siulittuutaa anersaakkut nakussatsissutigisinnaavarput
[Qupp. 16-mi issuagaq]
Ukiumi 537-mi u.n.s. juutit amiakkuusut assigalugit ullumikkut anersaakkut Israelikkut suleqataasalu pallorfiginninneq ilumoortoq siuarsarpaat