Guutip toqusut qanoq isigigai

ASASAMIK toqukkut annaasaqarneq alianartorujussuuvoq. Maqaasineq, kiserliorneq imaqanngitsutullu misigineq angingaarami oqaatigiuminaappoq. Annaasaqarneq ikiortissaasuanermik misigilersitsisinnaavoq, qanorluunniimmi pisuujutigigaluaraanni, pissaaneqartigigaluaraanni sunniuteqartigigaluaraanniluunniit nunarsuarmi inoqanngilaq toqusumik uummartitseqqissinnaasumik.

Pinngortitsisittali tamanna allatut isigaa. Inuk siulleq nunap pujoralaanit pinngortippaa aammalu toqusoq pinngorteqqissinnaallugu. Taamaattumik Guutip toqusut inuusutut isigai. Itsaq kiffat aalajaatsut toqusimasut pillugit Jiisusi oqarpoq ‘Guutimut tamarmik inuusut’, allatut oqaatigalugu Guutip isaani tamarmik uumapput. — Lukasi 20:38.

Jiisusi nunamiikkallarami toqusut makitinnissaannut pissaaniligaasimavoq. (Johannesi 5:21) Ataatamisut toqoreersut aalajaatsutut isigai. Assersuutigalugu Jiisusi Lazarusi toqummat ajoqersukkaminut oqarpoq: „Itersariartussavarali.“ (Johannesi 11:11) Inuit isaanni Lazarusi toqungavoq, kisianni Jehovamut Jiisusimullu sinittutut ippoq.

Jiisusip naalagaaffiata aqutsinerani „toqusut makikkumaarput — iluartut iluaatsullu.“ (Apustilit Suliaat 24:15) Makititaasut Guutimit ilinniartitaassapput nunamilu naassaanngitsumik inuunissamik periarfissaqalissallutik. — Johannesi 5:28, 29.

Asasamik annaasaqarneq assut aliasutsitsillunilu isumatsatsitsisinnaavoq, ukiuni arlalinni atasinnaasumik. Kisianni Guutip toqusunut isiginnittaasiatut isiginnittaaseqarnerup tuppallersangaarsinnaavaatigut neriuuteqalersillutalu. — 2 Korinthimiut 1:3, 4. (wE 8/15 03)