Aappariinnermi Biibili iluaqutigisinnaavat

AAPPARIINNEQ — oqaaseq taanna inuit ilaannut nuannaajummernarpoq. Allanulli annernartuusinnaavoq. „Misigissutsikkut avissimasutut ippunga,“ arnaq anersaamivoq. „Sumiginnarneqarlungalu kiserliorlunga misigivunga.“

Suna pillugu inuit marluk asaqatigiinnissamik isumageqatigiinnissamillu neriorsoqatigiissimagaluartut avissaariartulissappat? Ilaatigut aappariinnerup nassataanik ilisimasakinneq pissutaasinnaavoq. „Aappariilertarpugut tamatuminnga ilinniartitaanngivilluta,“ nakorsaasarneq pillugu allaaserinnittartoq taama allassimavoq.

Tamanna uppernarsarneqarpoq Rutgers University New Jerseymi, USA-miittumi, The National Marriage Project-ip misissuinerani. „Misissuinermi peqataasut ilarpassui avissimasunik imaluunniit pilluarnatik aappariittunik angajoqqaaqarlutik alliartorsimapput,“ misissuinermik siulersuisut allapput. „Aappariinneq ajortoq qanoq ittuusoq nalunngilluarpaat, naluaalli aappariinneq ajunngitsoq qanoq ittuusoq. Ilaasa aappariinneq ajunngitsoq nassuiarniaraangamikku allatut oqaatigisinnaaneq ajorpaat: ’Angajoqqaakka taamaanngillat’.“

Kristumiut aappariinnermi ajornartorsiuteqannginnerpat? Naamik. Ukiuni hundredelinni siullerni kristumiut ilaat ’avinniaqqunagit’ allaffigineqarput. (1 Korinthimiut 7:27) Aappariit tamarmik naammalluinnanngitsuugamik pinngitsooratik ajornartorsiutinik naammattoorsisassapput. Ikiorneqarsinnaappulli. Aappariinnertik nakussatsissinnaavaat Biibilimi najoqqutassiat atorlugit.

Soorunami Biibili aappariinneq pillugu ilinniutaanngikkaluarpoq. Biibilili aappariinnermik pilersitsisumit, Guutimit, isumassarsiarititaammat ilimagisinnaavarput najoqqutassiat imarisai atoriaannaasut. Pruffiiti Esaja aqqutigalugu Jehova Guuti oqarpoq: „Uanga tassa [Jehova], Guutit, iluaqutaasunik ilinnik ajoqersuisoq, illit ingerlavigisassakkut ingerlatitsisoq. Ilumulli inassutikka tusaaniarsimagaluarukkit taava eqqississutissat ilissagaluarpoq kuussuartut, iluassutsillu immap malingisut.“ — Esaja 48:17, 18.

Aapparpillu asaqatigiinnersi nillunganerulersimava? Aappariinnermi asanninnertaqanngitsumi soriarsinnaajunnaaqqasutut misigivit? Arnaq ukiuni 26-ni aappaqarsimasoq oqarpoq: „Aappariinnermi taama ittumi anniarnera oqaatigineqarsinnaanngingajappoq. Anniaat tamanna malersuiuarpoq suullu tamaasa qulangersimajuarlugit.“ Pissutsilli akueriinnarnagit sooq iliuuseqarfigissannginnerpigit? Allaaserisap tulliani takutinneqassaaq aappariit Biibilimi najoqqutassianik paasinninnermikkut atuinermikkullu qanoq aappariinnerminnik nakussatsitsinissaminnut kajumissisinneqarsinnaasut.