Iluarneq pissutigalugu qinugineqartut

„Pilluarput iluarneq pissutigalugu qinugineqartut.“ — MATTHÆUSI 5:10.

1. Sooq Jiisusi Pontiusi-Pilatusip saavaniippa, Jiisusillu qanoq oqarfigaa?

„TAAMAATTUMIK inunngorpunga, taamaattumillu silarsuarmut pivunga sallusuissut nalunaajaassutigissallugu.“ (Johannesi 18:37) Jiisusip oqaatsit taakku oqaatigigamigit Pontiusi-Pilatusip, Romamiut Judæami naalagaatitaata, saavaniippoq. Nammineq piumassutsiminit Pilatusimilluunniit qaaqquneqarami tassaniinngilaq. Naagga, tassaniippoq juutit upperisarsiornikkut siuttuisa pinerluttutut toqusariaqartutut eqqunngitsumik unnerluutigimmanni. — Johannesi 18:29-31.

2. Jiisusi qanoq iliorpa, qanorlu kinguneqarpa?

² Jiisusip nalunngilluinnarpaa Pilatusip iperagaatissinnaagaani toqutaatissinnaagaaniluunniit. (Johannesi 19:10) Guutip naalagaaffiali pillugu nakimaalluni Pilatusip oqaluttuunnissaa tunuarsimaarfiginngilaa. Jiisusip inuunini navianartorsiortinneqaraluartoq oqartussaasumut tamaani qutsinnerpaamut nalunaajaanissamut periarfissaq nakimaalluni atorpaa. Taamaattoq Jiisusi toqutassanngortitaavoq nappakkamilu martyrisut naalliunnartumik toqutaalluni. — Matthæusi 27:24-26; Markusi 15:15; Lukasi 23:24, 25; Johannesi 19:13-16.

Nalunaajaasoq imaluunniit martyri

3. Biibilip nalaani oqaaseq „martyri“ qanoq isumaqarpa, ullumikkulli qanoq isumaqarpa?

³ Ullumikkut inuppassuit oqaaseq „martyri“ ingasattajaarnianut attuumassuteqartittarpaat. Inuit isumartik, ingammik upperisarsiornikkut qularuteqannginnertik, pillugu toqoriaannaasut innuttaaqatigiinnut ulorianartorsiortitsisutut peqqarniisaarniartutulluunniit pasillerneqartarput. Oqaaserli „martyri“ grækerit oqaasiannit (marʹtys-imit) naggueqarpoq Biibilip nalaani isumaqartoq „nalunaajaasoq“, inuk ilumoorsorisaminik, immaqa eqqartuussivimmi, nalunaajaasoq. Aatsaat kingusinnerusukkut oqaaseq „inuk nalunaajaasutut inuunerminik pilliuteqartumik“, imaluunniit inuunerminik pilliutiginnilluni nalunaajaasumik, isumaqalerpoq.

4. Pingaarnertut Jiisusi qanoq martyriua?

⁴ Jiisusi pingaarnertut oqaatsip aallaqqaammut isumaatut martyriuvoq. Pilatusimut oqarnermisut tikiuppoq „sallusuissut nalunaajaassutigissallugu“.  Nalunaajaanera assigiinngeqisumik qisuariarfigineqarpoq. Assersuutigalugu inuinnaat ilaasa killissutigingaarpaat, tusakkatillu takusatillu pissutigalugit Jiisusi upperfigilerlugu. (Johannesi 2:23; 8:30) Inuit amerlanerit, ingammillu upperisarsiornikkut siuttut, aamma qisuariarujussuarput — ajortumilli. Jiisusi eqqarliminut uppinngitsunut ima oqarpoq: „Ilissi silarsuup uumigisinnaanngilaasi, uangali uumigaanga suliami ajortuunera nalunaajaatigigakku.“ (Johannesi 7:7) Inuiaat siuttuisa Jiisusi kamaappaat sallusuissut nalunaajaatigimmagu, tamannalu toqutaassutigaa. Ilumut Jiisusi tassaavoq „nalunaajaasoq (marʹtys) ilumoortoq sallusuitsorlu“. — Saqqummersitat 3:14.

„Uumissorneqassaasi“

5. Kiffartornermi aallaqqaataani malersugaaneq pillugu Jiisusi qanoq oqarpa?

⁵ Jiisusi nammineq sualuttumik malersugaaginnanngilaq, aammattaarli ajoqersukkani mianersoqquai taamatut pineqarumaartut. Kiffartornermi aallaqqaataani Jiisusip qaqqami oqaluutsiminut tusarnaartut ima oqarfigai: „Pilluarput iluarneq pissutigalugu qinugineqartut, taakkuami Qilaap naalagaaffia pigaat. Pilluarpusi ilissi uanga pillunga mitaatigippasi qinugalusilu tamanillu ajortunik oqaatigippasi sallullutik. Tipaatsugitsi nuannaarlusilu akissarsiassarsi qilanniittoq angeqimmat.“ — Matthæusi 5:10-12.

6. Jiisusip apustilini aqqaneq-marluk aallartikkamigit qanoq mianersoqquai?

⁶ Kingusinnerusukkut Jiisusip apustilini aqqaneq-marluk aallartikkamigit ima oqarfigai: „Mianersorfigisigit inuit! Taakkuami eqqartuussassanngortissavaasi synagogiminnilu iperartorlusi. Uanga pillunga naalagaatitanut kunnginullu sassartinneqarumaarpusi, taakkununnga Guutimillu nalusunut uppernarsaataallusi.“ Upperisarsiornikkulli oqartussaasuniinnaanngitsoq malersorneqassapput, Jiisusimi aamma ima oqarpoq: „Qatanngutip qatanngunni toqumut eqqartuussassanngortissavaa, ataatallu qitornani, qitornallu angajoqqaatik akerlilersussavaat toqumullu eqqartuussaatissallugit. Atera pillugu tamanit uumissorneqassaasi.  Naggatissamulli nikallujuitsuusoq taanna annaanneqassaaq.“ (Matthæusi 10:17, 18, 21, 22) Ukiuni hundredelinni siullerni kristumiut oqaluttuarisaaneranni taamatut pisoqarneranik uppernarsaatissaqarpoq.

Aalajaalluni pinertusaarneq

7. Suut Stefanusip martyrinnguutigai?

⁷ Jiisusip toqunerata kinguninngua Stefanusi kristumiuni siullersaalluni toqutaavoq sallusuissut pillugu nalunaajaanini pissutigalugu. „Saammaannermik pissaanermillu ilumioqangaarluni angisuunik tupinnartuliortarpoq nalunaaqutiliortarlunilu inuit akornanni.“ Upperisarsiornikkut akeraasa „ilisimassuseqarluni anersaaqarlunilu oqalummat assortorneq saperpaat“. (Apustilit Suliaat 6:8, 10) Sinngangaaramik Stefanusi juutit eqqartuussisoqatigiivisa pingaarnersaannut, Sanhedrinimut, sassartippaat. Eqqunngitsumik unnerluussisini saallugit kimittuumik nalunaajaavoq. Taamaattorli nalunaajaasoq aalajaatsoq taanna akeqqaminit toqutaavoq. — Apustilit Suliaat 7:59, 60.

8. Ajoqersukkat Jerusalemimiittut Stefanusip toqutaanerata kingorna malersugaanertik qanoq periaaseqarfigaat?

⁸ Stefanusip toqutaanerata kingorna „Jerusalemimi ilagiinnik qinuginninnerujussuaq pilerpoq; tamarmillu Judæamut Samariamullu siammartitaapput apustilit kisimik pinnatik.“ (Apustilit Suliaat 8:1) Kristumiut malersorneqaramik oqaluussiunnaarpat? Naagga, oqaluttuamili allassimavoq ’siammartitaasimasut angalaartalersut oqaaserlu nalunaajaatigisalerlugu’. (Apustilit Suliaat 8:4) Apustili Petrusitut isiginnittaaseqarput siusinnerusukkut ima oqartutut: „Guuti inunnit naalattariaqarneruvoq.“ (Apustilit Suliaat 5:29) Malersugaagaluarlutik ajoqersukkat aalajaatsut sapiitsullu taakkua sallusuissut nalunaajaatigiuarpaat, nalunngikkaluarlugu taamaaliornertik misilinneqaatigeqqissallugu. — Apustilit Suliaat 11:19-21.

9. Jiisusip ajoqersugai qanoq malersugaajuarpat?

⁹ Misilinneqartuarput. Siullermik allassimavoq Saulusi, Stefanusip ujaqqanik milloorneqarneranik isiginnittoq iluarinnittorlu, ’kamattorsuujuartoq Naalakkallu ajoqersugai sioorasaarlugit toqukkumallugit’. „Palasiunermukarpoq qinnuigalugulu Damaskusimi synagoginut allakkanik tuneqqulluni Aqqummik atuaasut angutit arnallu nanisinnaasani tigusariumallugit Jerusalemimukaallugillu.“ (Apustilit Suliaat 9:1, 2) Taava, ukiup 44-p missaani, „kunngip Herodesip ilagiit ilaat tigusaatippai naalliutsikkumallugit. Johannesillu qatanngutaa Jaaku panamik toqutaatippaa“. — Apustilit Suliaat 12:1, 2.

10. Apustilit Suliaat-ni Saqqummersitat-nilu malersugaaneq qanoq allaatigineqarpa?

¹⁰ Apustilit Suliaat-ni kapitalit sinnerini puiugassaanngitsunik uppernarsaateqarpoq kristumiut qanoq misilinneqartarsimanerannik, parnaarunneqartarsimanerannik malersugaasarsimanerannillu. Apustili Paulusi, nammineq kristumiunik malersuisimasoq, aamma taama pineqarpoq. Ilimanarpoq ukiup 65-ip missaani Romamiut kaasariannit Neromit toqutaatinneqarsimassasoq. (2 Korinthimiut 11:23-27; 2 Timotheusi 4:6-8) Saqqummersitat-ni, ukiut hundredellit siulliit naalerneranni allanneqartuni, allassimavoq apustili Johannesi utoqqalisoq pillakkat aallartitaasarfianni qeqertami Patmosimi parnaarussaaqqasoq „Guutip oqaasia Jiisusillu nalunaajaataa pissutigalugit“. Aammattaaq Saqqummersitat-ni allassimavoq Antipasi Pergamumimi ’nalunaajaasiga ilumoortoq toqutaasoq’. — Saqqummersitat 1:9; 2:13.

11. Malersugaaneq pillugu Jiisusip oqaasii kristumiunut siullernut qanoq eqquuppat?

¹¹ Naalakkap Jiisusi Kristusip ajoqersukkani ima peqquai: „Nalunaajaasigissavassi Jerusalemimi Judæamilu tamarmi Samariamilu nunarsuullu isua tikillugu allaat.“ (Apustilit Suliaat 1:8) Kristumiut siulliit aalajaatsut  taamaaliornerminni piareersimaffigaat misilinneqarneq annerpaaq, toqu — naalliutsitaanerup kingunerisaanik, uumasunut kiisortunut igitaanikkut allatulluunniit. Taamaalilluni Jiisusip ajoqersukkaminut oqaasii uppernarsineqarput: „Uanga qinugisimaguninnga ilississaaq qinugiumaarpaasi.“ — Johannesi 15:20.

12. Sooq kristumiut malersugaanerat oqaluttuarisaanerinnaanngila?

¹² Isumaqartoqaruni Jiisusip ajoqersugai itsaq taamaallaat taama ajortigisumik pineqassasut, kukkungaarput. Paulusi, eqqaaneqareersutut misilinneqarnermik nammineq misigisaqarsimasoq, ima allappoq: „Guuti mianeralugu Kristusi-Jiisusimi inuujumasut tamarmik qinugineqartarput.“ (2 Timotheusi 3:12) Aammattaaq Petrusi malersugaaneq pillugu ima allappoq: „Tamatumunngami qaaqqusaavusi Kristusi aamma anniartitaammat ilissi pillusi maligassamillu qimatsivigalusi, tumini atuarlugit malinnaaqqullusi.“ (1 Petrusi 2:21) Pissutsit aaqqissuussaanerata matuma ’ullussaat kingulliit’ maanna misigisavut tikivillugit Jehovap innuttai uumigineqarput akeqqersimaarfigineqarlutillu. (2 Timotheusi 3:1) Nunarsuarmi sumi tamaani Jehovap Nalunaajaasui piffissap ingerlanerani malersugaapput, inuttut ataasiakkaatut eqimattatulluunniit, nunani demokratiskiusuni kisermaassillunilu naalakkersuiffiusuni.

Sooq kristumiut uumigineqarpat malersugaallutillu?

13. Ullumikkut Jehovap kiffaasa malersugaanermut atatillugu suna puiussanngilaat?

¹³ Amerlanersatta maannakkut kiffaanngissuseqarluta oqaluussisinnaanerput eqqissillutalu ataatsimiissinnaanerput nuannaarutigisinnaagaluaraat, ’silap matuma pissusia nikittartoq’ Biibilimi allassimasoq puiussanngilarput. (1 Korinthimiut 7:31, NV) Pissutsit ima allanngoriataarsinnaatigipput sianissutsikkut, misigissutsikkut anersaakkullu piareersimanngikkutta, quaariaannaassalluta. Taamaaliumanata qanoq iliorsinnaavugut? Illersuutaangaassaaq kristumiut eqqissinermik nuannarisaqartut inatsisinullu naalattut sooq uumissorneqarnerannik malersorneqarnerannillu paasinninneq.

14. Petrusi naapertorlugu kristumiut malersugaanerat sumik pissuteqarpa?

¹⁴ Tamanna apustili Petrusip eqqaavaa ukiup 62-ip ukiullu 64-ip akornanni allakkamini siullerni, kristumiut Romamiut naalagaaffissuanni tamarmi uppernikkut misilinneqartillugit malersugaatillugillu. Ima allappoq: „Asasakka, innikkut misilinneqarneq atugarsi tupigusuutigissanngilarsi pineqarnersi immikkuuissutut isumaqarfigalugu.“ Petrusip suna eqqarsaatiginerlugu nangilluni ima nassuiarpaa: „Arlarsi kinaluunniit toqutsisutut, tillittutut, pinerluttutulluunniit susassarinngisaminulluunniit akuliuttutut naalliunngikkili, arlarsili kristumiuunini pissutigalugu naalliussaguni tamanna kanngusuutigissanngilaa, kristumiumilli taaguuteqarnermigut Guuti naalannartissavaa.“ Petrusip erseqqissarpaa kristumiut naalliunnerat eqqunngitsuliornermik pissuteqanngitsoq, kristumiuunerannilli pissuteqartoq. Allat pisarnerattut ’inuunerlunnerannut attataritiinnarsimagunik’ inunnit akuerineqarsimassagaluarput. Maannali eqqunngitsuliorfigineqarput kristumiutut inuuniarsarigamik. Ullumikkut kristumiut ilumoortut aamma taama pineqartarput. — 1 Petrusi 4:4, 12, 15, 16.

15. Jehovap Nalunaajaasui ullumikkut imminnut akerleriittutut ittunik assiginngilluinnartunik qanoq pineqartarpat?

¹⁵ Nunani assigiinngitsorpassuarni Jehovap Nalunaajaasui inunnit nersorneqartarput ataasiussuseqaramik suleqatigiilluarsinnaasaramillu, assersuutigalugu ataatsimeersuarnerminni sanaartornerminnilu. Aamma nersorneqaatigisarpaat unneqqarissuunertik, eqiasuitsuunertik, ilaqutariittut inuunertik, qutsissunik najoqqutaqarnertik pissuserissuunertillu atisalersoriaasertillu. * Taamaattoq allaaserisap matuma allanneqarnerata nalaani suliaat nunani 28-nit ikinnerunngitsuni inerteqqutaavoq, Jehovap Nalunaajaasuisalu ilarpassui uppernertik pissutigalugu timimikkut pinerlineqartarput annaasaqartarlutillu. Sooq imminnut akerleriittutut ittunik pissusilersorfigineqartarpat? Kristumiullu  ilumoortut malersugaanerat sooq Guutip akueraa?

16. Guutip innuttami malersugaanerannik akuerinninneranut suna pissutaanerpaava?

¹⁶ Pingaarnerpaamik eqqaamasariaqarpavut Ussatit 27:11-mi oqaatsit: „Ernera, ilisimasuuniarit taamalu uummatiga nuannaartillugu, mitallersikka akisinnaaniassavakka.“ Aap, kia qilammi nunamilu kisimi oqartussaalluni naalagaasussaviuneranik akerleriissutitoqqamut akuliunneqarsimavugut. Ukiut hundredelikkuutaat ingerlaneranni assuarnaattuarsimasut ataatsimut uppernarsaataangaarput. Saatanilli Jehovamik mitalliiuarnermini tamanna akornutiginngilaa, Jobip naapertuilluartup inuunerata nalaani iliorsimanermisut. (Jobi 1:9-11; 2:4, 5) Maanna Guutip naalagaaffiata aalajaatsumik tunngaveqarnerani nunarsuarmilu sumi tamaani ilumoorfiginnittunik innuttaqarnerani aallartitaqarneranilu, qularnanngitsumik Saatani oqaatsiminik uppernarsaaniaraluarnermini kamanneruleriaannarpoq. Guutip kiffai qanorluunniit misilinneqaraluarlutik annikilliortitaagaluarlutillu aalajaattuassappat? Apeqqut taanna tamatta immikkut akisariaqarparput. — Saqqummersitat 12:12, 17.

17. Jiisusip suna pivaa ima oqarami: „Taamaaliorneqarnissi nalunaajaanissamut periarfissaqartissavaasi“?

¹⁷ Jiisusip ’pissutsit aaqqissuussaanerata naggatissaani’ pisussat ajoqersukkaminut oqaluttuarigamigit, Jehovap kiffami malersugaanerannik akuerinninneranut pissutaasoq alla oqaatigaa. Ima oqarpoq: „Atera pillugu kunnginut naalagaatitanullu sassartinneqarumaarpusi. Taamaaliorneqarnissi nalunaajaanissamut periarfissaqartissavaasi.“ (Matthæusi 24:3, 9, NV; Lukasi 21:12, 13) Jiisusi nammineq Herodesimut Pontiusi-Pilatusimullu nalunaajaavoq. Aammattaaq apustili Paulusi ’kunnginut naalagaatitanullu sassartinneqarpoq’. Naalakkamit Jiisusi Kristusimit siulersorneqarluni Paulusi naalagaasumut taamani pissaaneqarnerpaamut nalunaajaanissani anguniarlugu ima oqarpoq: „Kaasarimut suliassanngortippunga!“ (Apustilit Suliaat 23:11; 25:8-12) Aamma nalitsinni pissutsit misilinneqarfiusut oqartussaasunut tamanullu nalunaajaalluarnermik kinguneqarajupput. *

18, 19. (a) Misilinneqarnerni pinertusaarnerput qanoq iluaqutigissavarput? (b) Apeqqutit suut allaaserisami tullermi sammineqassappat?

¹⁸ Kiisalu oqartoqarsinnaavoq misilinneqarnerni annikilliornernilu pinertusaarutta inuttut iluaqutigisinnaagipput. Qanoq? Ajoqersukkap Jaakup uppeqatini kristumiut ima eqqaasippai: „Qatanngutikka, tamalaanik misilinneqartarnisi nuannaarutigiinnartassavasi; nalunngilarsimi uppernersi misilinneqaraangami nikallujuitsunngortitsisartoq.“ Tassa malersugaanerput upperisatsinnik minguinnerulersitsisinnaavoq pinertusaarnerulersissinnaallutalu. Taamaattumik siooraginngilarput, periaatsillu Biibililerpalaanngitsut atorlugit pinngitsoorniarsarinngilarput unitsiniarsarinaguluunniit. Aap, Jaakup oqaaqqissaarutaa una malipparput: „Nikallujuinneq suliamik naammassisitsilluassaaq tassaaqqullusi naammalluinnartut pissuserilluartullu sumik inorsarfeqanngitsut.“ — Jaaku 1:2-4.

¹⁹ Biibilimi paasigaluarlutigu sooq Guutip kiffai aalajaatsut malersugaanersut aamma sooq Guutip tamanna akuerineraa, malersugaaneq pinngitsoorani oqinnerulertariaqanngilaq. Malersugaanerup naammagalugu atornissaanut suna nakussatsissutigisinnaavarput? Malersorneqaraangatta qanoq iliorsinnaavugut? Apeqqutit pingaarutillit taakku allaaserisami tullermi sammineqassapput.

[Quppernerup ataani ilanngussat]

Uteqqiinermi apeqqutit

• Pingaarnertut Jiisusi qanoq martyriua?

• Ukiuni hundredelinni siullerni malersugaaneq kristumiunut qanoq sunniuteqarpa?

• Petrusi naapertorlugu kristumiut malersugaanerat sumik pissuteqarpa?

• Sooq Jehovap kiffami malersugaanerat akueraa?

[Atuaqqissaarnermi apeqqutit]

[Qupp. 10, 11-mi assiliartat]

Ukiuni hundredelinni siullerni kristumiut naalliunnerat eqqunngitsuliorsimanermik pissuteqanngilaq, kristumiuunerannilli pissuteqarpoq

PAULUSI

JOHANNESI

ANTIPASI

JAAKU

STEFANUSI