Jehovap angingaassusia killisissaanngilaq
Jehovap angingaassusia killisissaanngilaq
„Angingaarpoq [Jehova] unnersiutigineqangaarlunilu, angingaassusia killisissaanngilaq.“ — TUSSIAAT 145:3.
1, 2. Daavi inuttut qanoq ittuua, Guutimullu sanilliulluni imminut qanoq isigiva?
TUSSIAAT 145-mik taalliortoq oqaluttuarisaanermi ilisimaneqarluartut ilagaat. Nukappiaraalluni inorujussuaq sakkulisartoq sassarfigaa toqullugulu. Tussiaasiortup taassuma kunngitut sorsuttartutut akerarpassuit ajugaaffigai. Aqqa tassaavoq Daavi, Israelikkullu kunngiisa aapparaat. Daavi suli millionilippassuarnit eqqaamaneqarpoq.
2 Sapiitsuliarpassuaqaraluarlunili Daavi anneruniajuitsuuvoq. Jehova erinarsorluni unnersiutigaa imatut: „Takugaangakkit qilak pigisat, assappit pinngortitaat, qaammat ullorissallu tassani ivertitatit, taava inuk suummat eqqaasarpiuk, inuup qitornaa suummat isumagisarpiuk?“ (Tussiaat 8:4, 5) Daavi imminut angussuartut isiginngilaq, akeqqaminilli aniguisitaasarnini Jehovamut ataqqinaataatippai, Guutilu pillugu ima oqarluni: „Eqqortinnaveeqqutinnik illersuutissannik tunivarma, ikiuinerpillu [maniguunnerpillu, NV] nakussassarpaanga.“ (2 Samueli 22:1, 2, 36) Jehovap maniguunnera erserpoq ajortuliortunut nallittuisuuneratigut, Daavillu Guutip ajunngissusia pisassarinngisaraluaq qujamasuutigaa.
’Nersussavara Guutiga kunngiga’
3. (a) Daavip Israelip kunngeqarnera qanoq isigaa? (b) Daavip Jehova qanoq unnersiutigerusutsigaa?
3 Daavi Guutip toqqagaatut kunngiugaluarluni, Jehova Israelikkunnut kunngiviusutut isigaa. Ima oqarpoq: „[Jehova], illit pigaat naalagaaffik, illimmi tamanut qullersaasutut qutsissisitaavutit.“ (1 Nalunaarsuutit 29:11) Daavillu Guutip kunngiunera ataqqingaarpaa. „Nersussavakkit, Guutiga kunngiga, aqqillu unnersiutigalugu naassaanngitsumik. Ullut tamaasa nersussavakkit, aqqillu unnersiutigissavara naassaanngitsumik.“ (Tussiaat 145:1, 2) Daavip Jehova Guuti ullut tamaasa naassaanngitsumillu unnersiutigerusuppaa.
4. Tussiaat 145 unnerluussinerit suut eqqunngitsuunerannut uppernarsaataava?
4 Tussiaat 145 uppernarsaataalluarpoq Saatanip Guutimik pinngortitaminik qanorluunniit ittumik kiffaanngissuseqartitsinani namminissarsiorluni naalakkersuisuuneraanerata eqqunngitsuuneranut. (1 Mosesi 3:1-5) Aammattaaq tussiaammi erserpoq Saatani sallusoq oqarami Guutimik pallorfiginnittut taamaaliortartut iluaqutissarsiffiginiaannarlugu, imaanngitsoq Guuti asagamikku. (Jobi 1:9-11; 2:4, 5) Daavitulli ullumikkut kristumiut ilumoortut Diaavulup eqqunngitsumik unnerluussineranut Guuti akissutissaqartippaat. Qujamasungaarput Guutip naalagaaffiata ataani naassaanngitsumik inuunissamik neriuuteqaramik, naassaanngitsumimmi Jehova unnersiutigerusuppaat. Maannangaaq inuit millionillit Jiisusip utertitsissutitut pilliutaanik upperinnittut Jehova unnersiutigaat, taakkualu naalallutik Jehovalu asagamikku tassunga kiffatut tunniulluinnarsimasutut kuisimasutullu pallorfigaat. — Romamiut 5:8; 1 Johannesi 5:3.
5, 6. Jehova qanoq unnersiutigisinnaavarput?
5 Eqqarsaatigeriaruk Jehovap kiffaasut taassuma unnersiutiginissaanut qanoq periarfissaqartiginersugut. Oqaasia, Biibili, atuarlugu qamuuna attortikkaangatta, qinunikkut qutsavigisinnaavarput. Qujamasulluta Jehova unnersiutigisinnaavarput innuttaminik isumaginneriaasia killissutigigaangatsigu pinngortitaaluunniit nuanningaartut qiimmattaatigigaangatsigik. Aammattaaq Jehova unnersiutigisarparput siunissami naammassiumaagai kristumiut ataatsimiinnerini eqqartoraangatsigik uppeqativulluunniit oqaloqatigiinnaraangatsigik. Aap, Guutip naalagaaffiata soqutigisaanik siuarsaaniarluni ’suliat ajunngitsut’ tamarmik Jehovamut ataqqinaataapput. — Matthæusi 5:16.
6 Ukiuni kingullerni ajunngitsulianut taakkununnga ilaapput nunani piitsoqarfiusuni Jehovap innuttaasa naalagaaffilersaarfiliarpassui. Taakkua amerlanersaat nunani allani uppeqatinit aningaasatigut tapersiinikkut naammassineqarput. Kristumiullu ilaat sanaqataajumallutik nammineq kajumissutsiminnit sumiiffinnut taamaattunut aallarsimapput. Ajunngitsulialli tamarmik pingaarnersaat tassaavoq Guutip naalagaaffianik nutaarsiassamik nuannersumik oqaluusseqataanikkut Jehovamik unnersiutiginninneq. (Matthæusi 24:14) Soorlu Tussiaat 145-mi versit tulliuttut ilaasa takutikkaat Daavip Guutip naalakkersuinera qujamasuutigingaarpaa kunngiussusialu unnersiutigalugu. (Tussiaat 145:11, 12) Guutip naalakkersueriaasia Daavitulli qujamasuutigitigaajuk? Guutillu naalagaaffia pillugu aalajangersimasumik allat oqaloqatigisarpigit?
Guutip angingaassusianut assersuutit
7. Jehovamik unnersiutiginninnissamut pissutissaalluartumik taasaqarit.
7 Jehovap unnersiutiginissaanut Tussiaat 145:3-p pissutissaqarlualersippaatigut. Daavi ima erinarsorpoq: „Angingaarpoq [Jehova] unnersiutigineqangaarlunilu, angingaassusia killisissaanngilaq.“ Jehovap angingaassusia killeqanngilaq. Inuit misissorluarsinnaanngisaannassavaat, paasilluarsinnaanngisaannassavaat ’uuttorluarsinnaanngisaannassallugulu’. Taamaattorli iluaqutigissavarput Jehovap angingaassusiata killisissaannginneranut assersuutinik eqqarsaatiginnikkutta.
8. Jehovap angingaassusia pissaaneralu pillugit avataarsua sumik ersersitsiva?
8 Eqqarsaatigilaaruk unnukkut illoqarfiup qullii tarrillugit qilak allaaqqissoq isiginnaarlugu. Taggarimmi allaaqqissumi ulloriarpassuit takusinnaasatit qamuuna attorneqaatiginngiligit? Jehovap angingaassutsimini ulloriarpassuit taakku pinngortissimammagit unnersiutiginissaanut killinneqanngilatit? Massa ullorissat takusinnaasatit galaksemi Nunarsuup sumiiffianiittut ullorissat ilaminiminiinnarigaat. Aammattaaq ilimagineqarpoq avataarsuarmi allanik 100 milliardinit amerlanerusunik galakseqartoq, taakkualu ilaat pingasuinnaat isaannarmik takuneqarsinnaapput. Aap, avataarsuarujussua kisissaanngitsunik ullorialik galakselillu Jehovap pinngortitsisinnaaneranut angingaassusiatalu killisissaannginneranut uppernarsaataalluarpoq. — Esaja 40:26.
9, 10. (a) Jehovap angingaassusia Jiisusi Kristusimut atatillugu sutigut erserpa? (b) Jiisusip toqusunit makititaanera uppernitsinnut qanoq sunniuteqartariaqarpa?
9 Maanna Jehovap angingaassusiata Jiisusi Kristusimut tunngasortai misissoriartigik. Guutip angingaassutsini takutippaa ernini pinngortikkamiuk ’suliortumisullu’ piffissami sivisoorujussuarmi atoramiuk. (Ussatit 8:22-31, NV) Jehovallu asanninnerata angingaassusia erserpoq ernituani inuiaat ajortaasa matoorneqaatissaattut pilliutigigamiuk. (Matthæusi 20:28; Johannesi 3:16; 1 Johannesi 2:1, 2) Paasisinnaanngilluinnakkavullu tassaapput timi anersaajusoq toqujuitsoq naalannassuserlu Jehovap Jiisusimut toqusunit makititsinermigut tunniussai. — 1 Petrusi 3:18.
10 Jiisusip toqusunit makinneranut atatillugu Jehovap angingaassusia killisissaanngitsoq arlalitsigut erseqqilluinnarpoq. Qularnanngitsumik Guutip isumagaa Jiisusip taamani takussaasunik takussaanngitsunillu pinngortitseqataanermineersunik sunik tamanik eqqaasaqaqqinnissaa. (Kolossemiut 1:15, 16) Takussaasut takussaanngitsullu ilaatigut makkuupput: pinngortitat anersaajusut allat, avataarsuaq, nunarsuaq naggorissoq nunarsuatsinnilu uumassusillit takussaasut tamarmik. Inuttut inunngunngikkallarmat qilammi nunamilu inuunerup qanoq ittuusimaneranik paasisimasaqarluinnalerseqqinnerata eqqaamannilluinnalerseqqinneratalu saniatigut Jehovap aamma inuttut naammalluinnartutut inuuneranik eqqaamannissinnaatippaa. Aap, angingaassusia killisissaanngitsoq Jiisusip toqusunit makinneragut erseqqilluinnarpoq. Aammattaaq iliuuseq tupinnartoq tamanna allanik toqusunit makititsisoqarsinnaaneranut qulakkeerutaavoq. Tamanna Guutip naammalluinnartumik eqqaamannissinnaanerminiittunik inunnik millionilinnik inuulersitseqqissinnaaneranik upperinninnitsinnut nakussatsissutaasariaqarpoq. — Johannesi 5:28, 29; Apustilit Suliaat 17:31.
Tupinnartuliai suliaalu angingaartut
11. Ukiumi 33-mi piinsip ullua aallarnerfigalugu Jehova sunik tupinnartuliortalerpa?
11 Jiisusip toqusunit makititaanerata kingornagut Jehova allarpassuarnik tupinnangaartuliaqarpoq. (Tussiaat 40:6) Piinsip ulluani ukiumi 33-mi Jehovap pilersippai inuiaat nutaat, „Israeli Guutip pigisaa“, tassaasut Kristusip ajoqersugai anersaaq illernartumit tanitat. (Galatiamiut 6:16) Inuiaat anersaakkut ittut taakku silarsuarmut taamanikkut ilisimaneqartumut tamarmut tupinnartumik siaruarsimapput. Apustilillu toqunerisa kingorna kristumiuuneraqatigeeqalerneranik kinguneqartumik tunussisoqaraluartoq, Jehova tupinnartuliortuarpoq siunertami piviusunngornissaa qulakkeerniarlugu.
12. Biibilip oqaatsini atorneqarnerusuni tamani atuarneqarsinnaanera sumut uppernarsaataava?
12 Assersuutigalugu Biibili tamaat tammatsaalineqarpoq piffissallu ingerlanerani silarsuarmi oqaatsinut atorneqarnerusunut tamanut nutserneqarluni. Biibilimik nutserisut atugarliortitaagajupput Saatanillu ikiortaanit toqumut sioorasaarneqartarlutik. Biibili oqaatsinut 2000-init amerlanerusunut nutserneqarsinnaasimassanngikkaluarpoq Guutitta angingaartup, Jehovap, piumasarinngikkaluarpagu.
13. Naalagaaffimminik siunertami naammassineqarnissaanut atatillugu 1914-imiilli Jehovap angingaassusia qanoq erserpa?
13 Jehovap angingaassusia aamma erserpoq Naalagaaffimminut atatillugu piumasaminik naammassisaqarneratigut. Assersuutigalugu 1914-imi ernini, Jiisusi Kristusi, qilammi kunnginngortippaa. Kinguninnguatigut Jiisusip Saatani inngilipiluilu akuliuffigai. Igitaapput qilammit nunap eqqaanut, maannalu tassani itinersuarmut pisitaanissartik utaqqivaat. (Saqqummersitat 12:9-12; 20:1-3) Taamanimiilli Jiisusip ajoqersugai tanitat malersorneqarnerulerput. Piffissamili tamatumani Kristusip takussaanani najuunnerani Jehovap annertoqqusersorpai. — Matthæusi 24:3; Saqqummersitat 12:17.
14. 1919-imi Jehova sumik tupinnartuliorpa, sumillu kinguneqartumik?
14 1919-imi Jehova allamik tupinnartuliorpoq angingaassutsiminut uppernarsaataasumik. Jiisusip ajoqersugai tanitat, anersaakkut toqungasutut ittut, uummarteqqinneqarput. (Saqqummersitat 11:3-11) Taamanimiilli kristumiut tanitat qilammi naalagaaffik pilersinneqarsimasoq pillugu nutaarsiassaq nuannersoq aallussilluarlutik oqaluussissutigaat. 144.000-t tamakkerniarlugit tanitat allat katersorneqarput. (Saqqummersitat 14:1-3) Jehovallu Kristusip ajoqersugai tanitat ikiortigalugit „nuna nutaaq“, tassa inuiaat naapertuilluartuusut, tunngavilerpaa. (Saqqummersitat 21:1) Tanitalli aalajaatsut tamarmik qilaliareerpata „nuna nutaaq“ qanoq pineqassava?
15. Suliaq suna kristumiut tanitat siuttuuffigaat, qanorlu kinguneqartumik?
15 1935-mi Vagttaarnet 1. aamma 15. oktobarimoortuni ’amerlangaartut’, Saqqummersitat kapitali 7-imi eqqaaneqartut, pillugit pingaaruteqartunik allaaserisaqarpoq. Kristumiut tanitat aallussilluarlutik ’amerlangaartunik’ taakkuninnga inuiaqatigiinni naggueqatigiinnilu inuiannilu immikkullu oqaasilinni tamani ujarlerlutik aallartipput ataatsimoorlutik Guuti pallorfiginiassagamikku. ’Amerlangaartut’ taakku „annikilliortitaangaarnermit“ qanitukkut pisussamit aniguissapput paratiisimilu naassaanngitsumik inuulernissaminnut ’nunamut nutaamut’ ilaajuartussatut periarfissaqassallutik. (Saqqummersitat 7:9-14) Kristumiut tanitat siuttuuffigisaannik oqaluussisoqarallartillugu ajoqersuganngortitsisoqarallartillugulu paratiisimi nunarsuarmi naassaanngitsumik inuunissamik neriugisallit maanna 6 millioninit amerlanerupput. Saatani silarsuaalu ajortunngorsimasoq akerlilersuigaluartut taamatut amerliartorneq kia ataqqinaatissaraa? (1 Johannesi 5:19) Jehovap, taassumami kisimi anersaani illernartoq ikiortigalugu tamakku tamaasa naammassisinnaavai. — Esaja 60:22; Zakaria 4:6.
Jehovap ataqqinassusiata alutornangaassusia
16. Sooq inuit ’Jehovap ataqqinassusiata alutornangaassusia’ takusinnaanngilaat?
16 Jehovap ’tupinnartuliaa’ ataaserluunniit ’pissaassusialuunniit’ puiorneqanngisaannassaaq. Daavi ima allappoq: „Kinguaariikkuutaani erinalimmik unnersiutigineqassapput naammassisatit, oqaluttuarineqassaarlu pissaassutsit. Ataqqinangaarsutsit naalannassutsillu [Ataqqinassutsivit alutornangaassusia, NV] eqqartorpaat, tupinnartuliatit erinarsuutigissavakka. Pissaanerit annilaarnangaartoq oqaluttuaraat, angingaarsutsit oqaluttuarissavara.“ (Tussiaat 145:4-6) Daavili Jehovap ataqqinassusiata alutornangaassusia pillugu qanoq ilisimasaqartigisinnaava ’Guuti anersaajummat’ taamaattumillu inunnut takussaanngitsuulluni? — Johannesi 1:18; 4:24.
17, 18. ’Jehovap ataqqinassusiata alutornangaassusia’ Daavip qanoq paasinerulersinnaavaa?
17 Naak Daavip Guuti takusinnaanngikkaluarlugu Jehovap ataqqinangaassusia assigiinngitsutigut ilinniarnerusinnaavaa. Assersuutigalugu Guutip suliai angingaartut pillugit, soorlu nunarsuaq tamakkerlugu ulersuarmi silarsuup guutiitsup piuneerussaanera, Biibilimi oqaluttuat atuarsinnaavai. Guutip Israelikkut Egyptenimi tigusaaqqanerannit aniguisimmagit Egyptenimiut guutipilui qanoq nikanarsagaasut Daavip tusarsimassavaa. Pisimasut taamaattut Jehovap ataqqinassusianut angingaassusianullu uppernarsaataapput.
18 Allakkat atuarneratiguinnaanngitsoq Daavi Jehovap ataqqinassusianik paasinninnerulerpoq pingaartitsinerulerlunilu, ilimanarporli aamma atuakkani eqqarsaatigeqqissaartarsimassagai. Assersuutigalugu eqqarsaatigisimasinnaavaa Jehovap Israelikkut Inatsisinik tunimmagit qanoq pisoqarnersoq. Kallerpoq innaallattarlunilu, nuiallu ussissup qaqqaq ulippaa, sulluartaatillu nipaa nipitoorujussuarmik tutsiuppoq. Qaqqaq Sinaji sajuppoq tamarmilu putsumik poorsimalluni. Israelikkut qaqqap killingani katersorsimasut allaat „inassutit qulit“ Jehovap inngili aqqutigalugu oqaatigisai innermit nuissanillu tutsiuttut tusaavaat. (5 Mosesi 4:32-36; 5:22-24; 10:4; 2 Mosesi 19:16-20; Apustilit Suliaat 7:38, 53) Jehovap angingaassusianik alutornassusianillu asseqanngitsumik takutitsineruvoq! Guutip oqaasianik nuannarinnittut oqaluttuanillu taakkuninnga eqqarsaatiginninnerusut ’Jehovap ataqqinassusiata alutornangaassusia’ tupigusuutiginngitsoorsinnaanngilaat. Ullumikkut Biibili tamaat pigaarput Jehovap angingaassusianik takorruuinernik alutornartorpassuarnik tupinnartorpassuarnillu imalik. — Ezekieli 1:26-28; Danieli 7:9, 10; Saqqummersitat kapitali 4.
19. Jehovap ataqqinassusianik qanoq paasinninnerulersinnaavugut pingaartitsinerulersinnaallutalu?
19 Aammattaaq Guutip Israelikkunnut inatsisigititai atuaqqissaarlugit Daavip killissutigisimasinnaavai. Jehovammi ataqqinassusia qutsissisitaasoq ersersippaat. (5 Mosesi 17:18-20; Tussiaat 19:8-12) Jehovap inatsisaanik maleruaanermikkut Israelikkut qutsissisinneqarput inuiannillu allanit tamanit immikkoortinneqarlutik. (5 Mosesi 4:6-8) Daavitulli Allakkanik aalajangersimasumik atuartarnikkut, atuakkatsinnik eqqarsaatiginnilluartarnikkut, eqiasuillutalu atuaqqissaartarnikkut Jehovap ataqqinassusianik paasinninnerulissaagut pingaartitsinerulissallutalu.
Guutip pissusii angingaassusianut uppernarsaataapput
20, 21. (a) Jehovap pissusii suut Tussiaat 145:7-9-mi unnersiutigineqarpat? (b) Guutip pissusii tassunga asannittunut tamanut qanoq sunniuteqartarpat?
20 Soorlu takoreeripput Tussiaat 145-mi versit siulliit arfinillit pissutissaqarlualersikkaatigut Jehovap angingaassusianut killisissaanngitsumut atatillugu Jehovamik unnersiutiginninnissamut. Versi 7-imiit 9-mut Jehovap angingaassusia pissusiini ersertoq unnersiutigineqarpoq. Daavi ima erinarsorpoq: „Tusaamaneqalersissavaat ajunngingaarsutsit qiimmattaatigalugu iluarsutsit. Saammaallunilu naakkinnittuuvoq [Jehova], kamajaatsuulluni ilumoorsusermillu peqangaarluni [ilumoorfiginnillunilu tunniusimangaarluni, NV]. Tamanut ajunngisaartarpoq [Jehova], pinngortitaminut tamanut naakkinnittuuvoq.“
21 Tassani Daavip siulliullugit erseqqissarpai Jehovap ajunngissusia naapertuilluartuuneralu — Jehovap pissusii Saatani Diaavulup apeqqusigai. Pissusii taakku Guutimik asannittunut naalakkersuineranullu naalatsigitittunut qanoq sunniuteqarpat? Jehovap ajunngissusia naapertuilluartumillu naalakkersueriaasia kiffaasa ima nuannaarutigitigaat unnersiutiginngitsoorsinnaanagu. Aammattaaq „tamanut“ ajunngisaartarpoq, neriunarporlu tamanna pissutigalugu suli amerlanerusut kingusinaartinnatik allamik isumataarumaartut Guutimillu ilumoortumik pallorfiginnilerlutik. — Apustilit Suliaat 14:15-17.
22. Jehovap kiffani qanoq periaaseqarfigai?
22 Aammattaaq Daavip pingaartingaarpai Guutip pissusii Guutip nammineq erseqqissagai Mosesi „sarsukkamiuk [ima suaarluni]: ’[Jehova], [Jehova] tassa Guuti nallittuisoq saammaasorlu, kamajaatsoq ilumoornermik [ilumoorfiginnilluni tunniusimangaartoq, NV] sallusuissummillu peqangaartoq’“. (2 Mosesi 34:6) Taamaattumik Daavi ima nalunaarsinnaavoq: „Saammaallunilu naakkinnittuuvoq [Jehova], kamajaatsuulluni ilumoorsusermillu peqangaarluni [ilumoorfiginnillunilu tunniusimangaarluni, NV].“ Jehovap angingaassutsimini killisissaanngikkaluarluni inuit pallorfiginnitsini nallittorlugit ataqqivai. Jiisusip pilliutaa utertitsissutaasoq tunngavigalugu ajortuliortut peqqissimisut allamillu isumataartut isumakkeerfigiumavai. Aammattaaq Jehova kamajaatsuuvoq, kiffanimi periarfissittarpai silarsuassaminut nutaamut naapertuilluassuseqarfiusumut isernissaminnut akornusiisinnaasunik sanngiissutiminnik ajugaaffiginninnissaannut. — 2 Petrusi 3:9, 13, 14.
23. Pissuseq suna allaaserisami tulliuttumi sammineqassava?
23 Daavip Guutip ilumoorfiginnilluni tunniusimanera, ilumoorfiginnilluni asanninnera, unnersiutigaa. Tassami Tussiaat 145-p versiisa sinnerini ersersinneqarpoq Jehovap pissuseq taanna qanoq ersersikkaa kiffaasalu ilumoorfiginnittut ilumoorfiginnilluni tunniusimanera qanoq periaaseqarfigigaat. Tamanna allaaserisami tulliuttumi sammineqassaaq.
Qanoq akissavit?
• „Ullut tamaasa“ Jehovap unnersiutiginissaanut suut periarfissaappat?
• Jehovap angingaassusiata killisissaannginnera assersuutini suni ersersinneqarpa?
• Jehovap ataqqinassusiata alutornangaassusianik qanoq paasinninnerulersinnaavugut pingaartitsinerulersinnaallutalu?
[Atuaqqissaarnermi apeqqutit]
[Qupp. 18-mi assiliartaq]
Avataarsuarmi galakset Jehovap angingaassusianut uppernarsaataapput
[Suminngaanneernera]
Anglo-Australian Observatoryp akuersineratigut, assiliisoq: David Malin
[Qupp. 20-mi assiliartaq]
Jehovap angingaassusia Jiisusi Kristusimut atatillugu qanoq erserpa?
[Qupp. 21-mi assiliartaq]
Qaqqami Sinajimi Israelikkut Inatsisit pigamikkik Jehovap ataqqinassusiata alutornangaassusia paasilerpaat