„Inussiaq“ aalajaallunilu silatuujusoq
„Inussiaq“ aalajaallunilu silatuujusoq
„Kinaavami inussiaq aalajaallunilu silatooq, naalagaata kiffaminut paarsisunngortitaa?“ — MATTHÆUSI 24:45, NV.
1, 2. Sooq pingaaruteqarpa ullumikkut aalajangersimasumik anersaakkut nerisarnissarput?
UKIUMI 33-mi marlunngornermi nisanip 11-anni ualikkut ajoqersukkat ullumikkut uagutsinnut pingaaruteqangaartumik Jiisusi ima aperaat: ’Suna nalunaaqutaassava illit tikiunnissannut silarsuullu naggatissaanut?’ Apeqqutaat akillugu Jiisusi maluginiarnartumik siulittuivoq. Piffissaq ilungersunartoq sorsuffiusoq, kaannersuaqarfiusoq, nunami sajuttoqarfiusoq toqoraataasunillu nappaassuaqarfiusoq oqaatigaa. Tamakkulu ’nallisitsinernut aallaqqaataannaapput’. Pissutsit ajornerulissapput. Siunissaq annilaarnartoq! — Matthæusi 24:3, 7, 8, 15-22; Lukasi 21:10, 11.
2 1914-imiilli Jiisusip siulittuutaa tamangajammi eqquussorpoq. Ilumut inuiaat ’nallisitsinerujussuarnik’ eqqorneqarput. Kristumiulli ilumoortut sioorassutissaqanngillat. Jiisusi neriorsuivoq anersaakkut inuussutissanik peqqinnartunik nakussatsittassallugit. Maannali Jiisusi qilammiippoq; uagut maani nunarsuarmiittugut anersaakkut inuussutissaqarsinnaanerput qanoq isumagaa?
3. „Piffissaq eqqorlugu“ inuussutissaqarnissarput Jiisusip qanoq isumagaa?
3 Jiisusip apeqqut taanna nammineq akivaa. Naggatissap nalaa pillugu siulittuumminut atatillugu ima aperivoq: „Kinaavami inussiaq aalajaallunilu silatooq, naalagaata kiffaminut paarsisunngortitaa piffissaq eqqorlugu nerisassaannik tunisaqqullugit?“ (NV) Taava ima oqarpoq: „Pilluarpoq kiffaq [inussiaq, NV] taanna naalagaata taamaaliortillugu tikitaa. Ilumut oqarfigaassi: Pigisaminut tamanut paarsisunngortissavaa.“ (Matthæusi 24:45-47) Aap, ’inussiaqassaaq’ anersaakkut inuussutissanik isumaginnittussamik, ’inussiamik’ aalajaallunilu silatuujusumik. „Inussiaq“ taanna inuk ataasiinnaassava, inuit ataasiakkaajussappat kingoraartaattut, allarluinnaassavaluunniit? Inussiaq pisariaqarluinnartunik anersaakkut inuussutissalersuisuummat, apeqqutip tamatuma akineqarnissaa iluaqutigissavarput.
Inuk ataaseq eqimattalluunniit?
4. Qanoq nalunngilarput „inussiaq aalajaallunilu silatooq“ inuk ataasiinnaasinnaanngitsoq?
4 „Inussiaq aalajaallunilu silatooq“ inuk ataasiinnaasinnaanngilaq. Sooq? Inussiaq taanna anersaakkut inuussutissanik ukiuni hundredelinni siullerni agguaassilluni aallartimmat, Jiisusilu naapertorlugu taanna suli taamaaliussaaq Naalagaq 1914-imi tikiuppat. Taamaappat inuk ataaseq ukiut 1900-t missaanni aalajaalluni kiffartorsimassagaluarpoq. Metusalemiluunniit taama inuunertutigisimanngilaq. — 1 Mosesi 5:27.
5. Nassuiaruk sooq oqariartaaseq „inussiaq aalajaallunilu silatooq“ kristumiunut ataasiakkaanut atorneqarsinnaanngitsoq.
5 Taavami oqariartaaseq „inussiaq aalajaallunilu silatooq“ kristumiunut ataasiakkaanut tamanut atorneqarsinnaava? Kristumiummi tamarmik aalajaatsuusussaapput silatuujullutillu, erseqqipporli Jiisusi allamik eqqarsaateqartoq „inussiaq aalajaallunilu silatooq“ eqqartoramiuk. Qanoq tamanna nalunngissinnaavarput? Oqarmat ’naalakkap tikiukkuni’ inussiaq ’pigisaminut tamanut paarsisunngortissagaa’. Kristumiut ataasiakkaat tamarmik qanoq ilillutik Naalakkap pigisaanut „tamanut“ paarsisunngortinneqarsinnaappat? Ajornarpoq!
6. Israelikkut sutigut tassaasussaappat Guutip ’kiffaa’ imaluunniit ’inussiaataa’?
6 Taamaattumik tunngaveqarluartumik isummerneruvoq isumaqaraanni Jiisusip kristumiut eqimattat tassaanerarai „inussiaq aalajaallunilu silatooq“. Inussiaq katitigaasoq pisimassanerpaa? Aap, Kristusi ukiunik 700-nik sioqqullugu Jehova oqarpoq Israelikkut tamaasa ’ilisimannitsigalugit’ imatullu eqqaallugit: „kiffara qinersimasara“. (Esaja 43:10) 1513-imiit u.n.s., Mosesip inatsisai tunniunneqarmata, ukiumi 33-mi piinsip ullua tikillugu Israelimi innuttaasut tamarmik kiffaqatigiinnut taakkununnga ilaapput. Israelikkut ikittuinnaat inuiaqatigiinnut tunngasut anersaakkulluunniit inuussutissanut pilersaarutit toqqaannartumik peqataaffigaat. Jehovap kunngit, eqqartuussisut, pruffiitit, palasit Levikkullu tamakkuninnga suliassippai. Inuiattulli ataatsimut isigalugit Israelikkut Jehovap kisimi oqartussaaneranut sinniisuusussaapput nersorneqaatissaalu inuiannut allanut oqaluussissutigissallugu. Israelikkuusut tamarmik Jehovamut nalunaajaasuusussaapput. — 5 Mosesi 26:19; Esaja 43:21; Malaki 2:7; Romamiut 3:1, 2.
’Kiffaq’ ajattorneqarpoq
7. Sooq Israelikkut Guutip ’kiffaatut’ ajattorneqarpat?
7 Tassa ukiut hundredelippassuit matuma siorna Israelikkut tassaapput Guutip ’kiffaa’, aammattaarli tassaappat „inussiaq“ Jiisusip eqqartugaa? Naagga, paasinarsivormi itsaq Israelikkut inuiattut aalajaannatillu silatuujunngitsut. Paulusip Jehovap taakkununnga oqaasii issuaramigit pissutsit ima eqikkarpai: „Ilissi pissutaallusi Guutip aqqa inuianni allani mitaatigisaavoq.“ (Romamiut 2:24) Israelikkut pikitsitsisaqattaarnerat ingasatseruttorpoq juutit Jiisusi ajattormassuk, tamannalu pissutigalugu Jehovap taakku ajattorpai. — Matthæusi 21:42, 43.
8. ’Kiffaq’ Israelikkut kingoraartaat qanga toqqarneqarpa, pissutsinilu qanoq ittuni taama pisoqarpa?
8 ’Kiffalli’ taassuma, Israelikkut, aalajaakkunnaarnera isumaqanngilaq pallorfiginnittut aalajaatsut anersaakkut inuussutissanik naassaanngitsumik pisinnaajunnaartut. Ukiumi 33-mi piinsip ulluani, Jiisusip toqusunit makinneraniit ullut 50-it qaangiuttut, anersaaq illernartoq Jiisusip ajoqersugaanut 120-t missaanniittunut Jerusalemimi inimi katersorsimasunut kuineqarpoq. Piffissami tamatumani inuiaat nutaat pinngorput. Pinngornerat nalunaarutigineqarpoq taakkununnga ilaasut „Guutip tupinnangaartuliai“ pillugit Jerusalemimiut nakimaatsumik oqaluttuutilermatigik. (Apustilit Suliaat 2:11) Taamaalillutik inuiaat nutaat taakku — inuiaat anersaakkut ittut — ’kiffanngorput’ Jehovap naalannassusianik inuiannut oqaluussisussat piffissarlu eqqorlugu inuussutissanik pilersuisussat. (1 Petrusi 2:9) Naleqqulluartumik „Israeli Guutip pigisaa“-nik taaneqarpoq. — Galatiamiut 6:16.
9. (a) „Inussiaq aalajaallunilu silatooq“ kinaava? (b) ’Kiffat’ kikkuuppat?
9 „Israeli Guutip pigisaa“-nut ilaasut tamarmik kristumiuupput tunniulluinnarsimasut kuisimasullu, anersaaq illernartumit taninneqarsimasut qilaliarnissamillu neriuutillit. Taamaattumik oqariartaatsimi „inussiaq aalajaallunilu silatooq“-mi pineqartarput inuiannut anersaakkut ittunut tanitanut ilaasut ukiumi 33-miit ulloq manna tikillugu piffissami qanorluunniit ittumi nunarsuarmiittut tamarmik, soorlu Israelikkuusoq kinaluunniit, ukiup 1513-ip u.n.s. ukiullu 33-p piinsip ulluata akornanni piffissami qanorluunniit ittumi inuusoq, kristumiussutsip aallartinnera sioqqullugu kiffaqatigiinnut, Esaja 43:10-mi eqqaaneqartunut, ilaasoq. Taavami kikkuuppat ’kiffat’, inussiap anersaakkut inuussutissalersugai? Ukiuni hundredelinni siullerni kristumiut tamarmik qilaliarnissamik neriuuteqarput. Taamaattumik kiffat aamma kristumiuupput tanitat, eqimattatulli isiginagit, inuttut ataasiakkaatut isigalugit. Tamarmik, aamma ilagiinni akisussaaffeqartut, inussiamit anersaakkut inuussutissalersorneqarnissartik pisariaqartippaat. — 1 Korinthimiut 12:12, 19-27; Hebræerit 5:11-13; 2 Petrusi 3:15, 16.
’Tamarmik immikkut suliassinneqartut’
10, 11. Qanoq nalunngilarput inussiaqatigiinnut ilaasut tamarmiunngitsoq assigiimmik suliassaqartut?
10 „Israeli Guutip pigisaa“ tassaavoq inussiaqatigiit aalajaallutillu silatuut suliassaqartinneqartut. Taakkununngali ilaasut ataasiakkaat aamma inuttut akisussaaffeqarput. Tamanna Jiisusip Markusi 13:34-mi oqaasiini erserpoq. Tassani ima oqarpoq: „Assigaa inuup nunamut allamut aallartussap illuni qimassagamiuk kiffani pisussaaffilerai tamaasa immikkut suliassillugit isertarfiullu paarsisaa peqqugaa eqqumassasoq.“ Tassa inussiaqatigiinnut ilaasut tamarmik immikkut suliassinneqarput — Kristusip nunami pigisai amerliartortittussaavaat. Suliassaq tamanna tamarmik piginnaanitik periarfissatillu naapertorlugit suliaraat. — Matthæusi 25:14, 15.
11 Aammattaaq apustili Petrusi nalimini kristumiunut tanitanut ima allappoq: „Guutip saammaanneranut assigiinngeqisunik ersiuteqartartumut pilittaalluartutut kiffartuuteqatigiigitsi, tamassi immikkut saammaannermit tunissutisiarsi naapertorlugu.“ (1 Petrusi 4:10) Taamaattumik tanitat Guutimit tunissutisiatik atorlugit kiffartuuteqatigiinnissartik akisussaaffigaat. Aammattaaq Petrusip oqaasiini erserpoq kristumiut tamarmiunngitsoq assigiimmik piginnaaneqassasut, akisussaaffeqassasut immikkulluunniit pisinnaatitaaffeqassasut. Inussiaqatigiinnulli ilaasut tamarmik inuiannik anersaakkut ittunik arlaatigut amerliartortitseqataasinnaapput. Qanoq?
12. Inussiaqatigiinnut ilaasut tamarmik, angutaagunik arnaagunilluunniit, inuiaanik anersaakkut ittunik qanoq amerliartortitseqataasinnaappat?
12 Pingaarnerpaamik tamarmik Jehovamut nalunaajaasuusariaqarput Guutillu naalagaaffianik nutaarsiassaq nuannersoq pillugu oqaluussisariaqarlutik. (Esaja 43:10-12; Matthæusi 24:14) Jiisusip qilalianngitsiarnermini ajoqersukkani aalajaatsut tamaasa, angutit arnallu, ilinniartitsisooqquai. Ima oqarpoq: „Taamaattumik aallarlusi inuiaqatigiit tamaasa uannut ajoqersuganngortissigik kuillugit Ataatap Ernerullu Anersaallu Illernartup aqqani ajoqersorlugillu ilissinnut peqqussutikka tamaasa maleruaqqullugit. Takuallu, ullut tamaasa najorpassi silarsuup naggatissaanut allaat.“ — Matthæusi 28:19, 20.
13. Tanitat tamarmik suna immikkut pisinnaatitaaffigaat?
13 Nutaanik ajoqersuganngortoqaraangat taakku Kristusip ajoqersukkaminut peqqussutaanik tamanik maleruaanissaminnik peqqissaartumik ilinniartinneqartassapput. Tusarliussamik ilassinnittut piffissap ingerlanerani allanik ilinniartitsisinnaanngortarput. Anersaakkut inuussutissat nakussatsinnartut inuiaqatigiippassuarni inussiaqatigiinnut ilaaleratarsinnaasunit pissarsiarineqarsinnaalerput. Tanitat tamarmik, angutit arnallu, ajoqersuganngortitsiortornermi suleqataapput. (Apustilit Suliaat 2:17, 18) Inussiap suliassaminik suliaqalerneranit pissutsit aaqqissuussaanerata matuma naggaserneqarnissaata tungaanut suliassaq tamanna suliarineqartussaavoq.
14. Ilagiinni ilinniartitsineq kikkut immikkut pisinnaatitaaffigaat, tamannalu arnat kristumiut tanitat aalajaatsut qanoq isiginnittaaseqarfigaat?
14 Tanitat kuiserlaat ’inussiamut’ ilaalersarput, apeqqutaatinnagulu kimit ilinniartinneqaqqaarsimanersut ilagiinniittunit Biibilimi utoqqaanertatut kiffartortunut piumasaqaatinik eqqortitsisunit siunnersorneqartuartarput. (1 Timotheusi 3:1-7; Titusi 1:6-9) Tassa angutit toqqakkat taakkua inuiannik immikkut ittumik amerliartortitseqataanertik immikkut pisinnaatitaaffigaat. Angutit kristumiut kisimik ilagiinni ilinniartitsisuutitaanerat arnat aalajaatsut tanitat ajorinngilaat. (1 Korinthimiut 14:34, 35) Akerlianik ilagiit angutitaasa eqiasuitsut suliaat iluaqutigisinnaagamikku nuannaarutigaat, qujamasuutigalugillu immikkut pisinnaatitaaffiit arnat kristumiut peqataaffigisaat, assersuutigalugu nutaarsiassap nuannersup allanut oqaluussissutiginera. Ullumikkut qatanngutit arnat tanitat aallussilluartut aamma taamatut maniguuttumik pissuseqarput, utoqqaanertat toqqakkat tanitanut ilaagaluarpata ilaanngikkaluarpataluunniit.
15. Ukiuni hundredelinni siullerni anersaakkut inuussutissat ingammik suminngaaneerpat, kikkullu inuussutissalersuinermi siuttuuppat?
15 Ukiuni hundredelinni siullerni anersaakkut inuussutissat tunngaviusut agguaanneqartut apustilinit ajoqersukkanillu allanit siuttuusunit toqqaannartumik pipput. Allakkat allagaat — ingammik Kristumiut Allagaataat Grækerisuut atuagartaannut isumassarsiarititaasunut 27-usunut ilaasut — ilagiinniit ilagiinnut nassiunneqartarput qularnanngitsumillu utoqqaanertat ilagiinni ilinniartitsinerannut tunngaviusarlutik. Taamaalillutik inussiamut sinniisuusut kristumiunik eqqortuliorusuttunik aalajaallutik anersaakkut nakussatsinnartunik inuussutissalersuipput. Tassa ukiuni hundredelinni siullerni inussiaqatigiit suliassiissutigineqartoq aalajaallutik suliarigaat paasinarsivoq.
’Inussiaq’ ukiut 1900-t qaangiummata
16, 17. Inussiap qanoq takutippaa 1914-ip tungaanut aalajaalluni suliassani suliarisimallugu?
16 Ullumikkummi? Jiisusip 1914-imi najuutilerami eqimattanik kristumiunik tanitanik aalajaallutik piffissaq eqqorlugu anersaakkut inuussutissalersuisoqarnera paasivaa? Ilaana. Eqimattat taakku inerititamikkut ilisarnarluarput. (Matthæusi 7:20) Tamatuma kingorna oqaluttuarisaanermi uppernarsarneqarpoq eqimattat taakku ilumut tassaasut „inussiaq aalajaallunilu silatooq“.
17 Jiisusip tikiunnerani kiffat 5000-it missaanniittut Biibilimi tusarliussamik ulapillutik oqaluussisarput. Oqaluussisartut ikittuinnaapput, inussiarli periaasissarsiullaqqissuuvoq nutaarsiassaq nuannersoq sapinngisamik amerlanerpaanut tusarliuneqarsinnaaqqullugu. (Matthæusi 9:38) Assersuutigalugu aviisini 2000-it missaanniittuni oqalugiaatinik Biibililersaarutinik ilanngussisoqartarnera isumagineqartarpoq. Taamaalilluni sallusuissut Guutip oqaasianeersoq atuartartunut titusindilikkuutaanut ataatsikkut tusarliunneqartarpoq. Aammattaaq suliarineqarpoq isiginnaagassiaq nalunaaquttap-akunnerinik arfineq-pingasunik sivisussusilik assit seqersittakkat qalipaatillit filmillu atorlugit ingerlanneqartoq. Isiginnaartitsinerup soqutiginartup tamatuma kingunerisaanik inuit 9 millioninit amerlanerusut nunavissuarni pingasuni tusarlerneqarput Biibilimi tusarliussamik pinngortitseqqaarnermiit Kristusip ukiuni tusindini naalakkersuinerata naaneranut. Aamma atuagassiat naqitat atorneqarput. Assersuutigalugu atuagassiaq una 1914-imi 50.000-inngorlugu naqiterneqartarpoq.
18. Qanga Jiisusip inussiaq pigisaminut tamanut paarsisunngortippaa, aamma sooq?
18 Aap, Naalakkap tikiukkami paasilerpaa inussiaatimi aalajaatsup peqqissaarluni kiffat nerisittarai nutaarsiassarlu nuannersoq oqaluussissutigisaraa. Maanna inussiaq akisussaaffeqarnerulersussanngorpoq. Jiisusi ima oqarpoq: „Ilumut oqarfigaassi: Pigisaminut tamanut paarsisunngortissavaa.“ (Matthæusi 24:47) Jiisusi 1919-imi taamaaliorpoq, inussiap misilinneqarnerata kingorna. Soormiuna „inussiaq aalajaallunilu silatooq“ akisussaaffeqarnerulersinneqartoq? Naalakkap pigisai amerliartormata. 1914-imi Jiisusi kunnginngortitaavoq.
19. ’Amerlangaartut’ anersaakkut pisariaqartitatik qanoq pisaraat nassuiaruk.
19 Kunnginngorlaap pigisani suunuku inussiaatiminut aalajaatsumut paarisassanngortikkai? Pigisani maani nunarsuarmiittut tamaasa. Assersuutigalugu, Kristusip 1914-imi kunnginngorneraniit ukiut 20-t missaat qaangiuttut ’amerlangaartut’ ’savanut allanut’ ilaasut kikkuunersut paasineqarpoq. (Saqqummersitat 7:9; Johannesi 10:16) Taakku tassaanngillat „Israeli Guutip pigisaa“-nut ilaasut tanitat, angutilli arnallu eqqortuliorusuttut nunarsuarmi inuunissamik neriugisallit. Taakkuattaaq Jehova asavaat tanitallu peqatigalugit kiffartorfigerusullugu. „Inussiaq aalajaallunilu silatooq“-mut ima oqarpullusooq: „Ingerlaqatigissavassi tusaratsigu Guutip najoraasi.“ (Zakaria 8:23) Kristumiut kuiserlaat taakku kiffat tanitat anersaakkut nakussatsinnartunik inuussutissalersorneqarnerattulli inuussutissalersorneqarput, taamanimiilli katersat taakku marluk anersaakkut nerrivimmi ataatsimi nerisarput. ’Amerlangaartunut’ ilaasunut pilluaqqussutaangaarsimavoq.
20. ’Amerlangaartut’ Naalakkap pigisaasa amerliartornerannut qanoq sunniuteqarsimappat?
20 ’Amerlangaartut’ nuannaarlutik inussiaqatigiit tanitat nutaarsiassamik nuannersumik oqaluusseqatigilerpaat. Oqaluussinerisa kinguneraat Naalakkap nunami pigisaasa amerliartornerat, taamaalillunilu „inussiaq aalajaallunilu silatooq“ akisussaaffeqarnerulerpoq. Inuit sallusuissummik ujarlersut amerliartortillugit atuagassianik Biibililersaarutinik pisariaqartitsineq matussuserniarlugu naqiterivinnik annerusunik sanasoqartariaqarsimavoq. Nunarpassuarni Jehovap Nalunaajaasuisa immikkoortortaqarfii pilersiortorneqarsimapput. Ajoqersuiartortitat „nunarsuup isua“ tikillugu aallartinneqarsimapput. (Apustilit Suliaat 1:8) Guutip naalagaaffianik oqaluussisartut 1914-imi tanitat 5000-it missaanniittut ullumikkut 6 millionit sinnerlugit amerleriarsimapput, taakkualu amerlanersaat ’amerlangaartunut’ ilaapput. Aap, kunngip pigisai 1914-imi kunnginngormalli amerleriarujussuarsimapput!
21. Allaaserisami tulliuttumi assersuusiat marluk suut sammissavavut?
21 Tamakkua tamarmik takutippaat inussiaq aalajaallunilu silatuujusoq. Jiisusip „inussiaq aalajaallunilu silatooq“ oqaluttuareriarlugu marlunnik assersuusiorpoq inussiap pissusii taakku pillugit paasissutissiisunik: niviarsiat silatuut sianiitsullu pillugit aamma talentit pillugit assersuusiat. (Matthæusi 25:1-30) Assersuusiat taakku ullumikkut uagutsinnut qanoq pingaaruteqarnersut paasilerlugu soqutiginarpoq, ilaa? Allaaserisami tulliuttumi tamanna sammissavarput.
Qanoq isumaqarpit?
• „Inussiaq aalajaallunilu silatooq“ kinaava?
• ’Kiffat’ kikkuuppat?
• Qanga inussiaq aalajaatsoq Naalakkap pigisaanut tamanut paarsisunngortinneqarpa, aamma sooq piffissami tamatumani piva?
• Ukiuni qulikkuutaani kingullerni kikkut Naalakkap pigisaanik amerliartortitseqataasimappat, qanorlu ilillutik?
[Atuaqqissaarnermi apeqqutit]
[Qupp. 14-mi assiliartat]
Inussiaqatigiit ukiuni hundredelinni siullerni suliassartik aalajaallutik suliaraat