’Kiffartuutit naammassiuk’

„Kiffartuutigisat peqqissaartumik suliariuk.“ — 2 TIMOTHEUSI 4:5, Byington.

1, 2. Utoqqaanertanut Biibilimi sunik piumasaqaateqarpa?

GUUTIP naalagaaffia pillugu nutaarsiassamik nuannersumik oqaluusseqataavit? Taamaakkuit nuanningaartumik immikkut pisinnaatitaaffeqalersimanerit pillugu Jehova qutsavigisariaqarpat. Ilagiinni utoqqaanertaavit? Tamanna aamma immikkut pisinnaatitaaffiuvoq Jehovameersoq. Puiunngisaannartariaqarparpulli ilinniagaqarneq inunnguuseraluguluunniit oqallorissuuneq oqaluussinissamut ilagiinnilluunniit nakkutilliisuunissamut uagutsinnik piginnaanngortitsisuunngimmata. Jehovaana uagutsinnik kiffartorsinnaanngortitsisuusoq, nakkutilliisutullu immikkut pisinnaatitaafillit taamatut pisinnaatitaaffeqalersimapput Biibilimi piumasaqaatinik immikkut ittunik naammassinnissimagamik. — 2 Korinthimiut 3:5, 6; 1 Timotheusi 3:1-7.

² Kristumiut tunniulluinnarsimasut tamarmik iivangkiiliumik oqaluussisartup suliassaanik suliaqarput, pingaarnerpaamilli nakkutilliisut, utoqqaanertat, kiffartornermi tamatumani maligassiuilluartussaapput. Guutip Kristusillu utoqqaanertat „qasusuillutik nalunaajaasartut ajoqersuisartullu“ malugisarpaat, uppeqatiminnillu aamma malugineqartarput. (1 Timotheusi 5:17; Efesosimiut 5:23; Hebræerit 6:10-12) Utoqqaanertaq ilinniartitsigaangami tamatigut ajoqersuut peqqissinartoq saqqummiuttassavaa, apustili Paulusimi nakkutilliisumut Timotheusimut ima allappoq: „Ullussani nalliuttussani inuit ajoqersuut peqqissinartoq naammagiunnaarumaarpaat, namminneq iluarisaminnik amerlaqisunik ajoqersuisussarsiumaarput siutimik tusarnarisaat tunngavigalugu. Sallusuissut tusarumajunnaarumaarpaat oqaluttuatoqqallu sammisarilerlugit. Illilli pututitaanaveersaarniarit, naalliussinnaat, iivangkiiliulersaartutut [iivangkiiliumik oqaluussisartutut, NV] suliat ingerlanniaruk kiffartuutillu naammassillugu.“ — 2 Timotheusi 4:3-5.

3. Ilagiit anersaakkut peqqissusiat ajoqersuinerluutinit navianartorsiortinneqaqqunagu utoqqaanertaq qanoq iliortariaqarpa?

³ Ilagiit anersaakkut peqqissusiat ajoqersuinerluutinit navianartorsiortinneqannginniassammat, nakkutilliisuusup malittariaqarpaa Paulusip siunnersuutaa una: „Sutigut tamatigut putumatsaaliniarit, . . . kiffartuutigisat peqqissaartumik suliariuk.“ (2 Timotheusi 4:5, Byington) Aap, utoqqaanertap kiffartuutini peqqissaartumik suliarisariaqarpaa. Tassa tamakkiisumik imaluunniit sukumiisumik suliarisariaqarpaa, imaluunniit naammassilluinnartariaqarpaa. Utoqqaanertaq ’kiffartuutiminik naammassinnittoq’ imaluunniit ’kiffartuutigisaminik peqqissaartumik suliarinnittoq’ akisussaaffimminik tamanik nakkutiginnittuuvoq, sumiginnaasuunanilu ilaannakkuusumik iliuuseqartanngilaq. Allaat annikitsutigut aalajaappoq. — Lukasi 12:48; 16:10.

4. Kiffartornitsinnik peqqissaarluta suliaqarnissatsinnut suna iluaqutigisinnaavarput?

⁴ Kiffartornitsinnik peqqissaartumik suliaqarneq isumaqartariaqanngilaq piffissamik atuineruneq, piffissarli atorluarneqartariaqarpoq. Patajaatsumik aalajangersimasumillu ingerlanertik kristumiut tamarmik kiffartornerminni angusaqarnissaminnut iluaqutigisinnaavaat. Utoqqaanertaasoq oqaluussinermi piffissamik atuineruniarluni pilersaarusiorluartariaqarpoq nalunngittariaqarlugulu suliassat suut allanut suliassiissutigisinnaanerlugit, qanorlu. (Hebræerit 13:17) Utoqqaanertaq ataqqisaasoq soorunami nammineq aamma suleqataasarpoq, Nehemiatulli, Jerusalemip qarmaqqinneqarnerani suleqataasutulli. (Nehemia 5:16) Jehovallu kiffai tamarmik aalajangersimasumik oqaluusseqataasariaqarput. — 1 Korinthimiut 9:16-18.

5. Oqaluussineq qanoq isigisariaqarparput?

⁵ Qilammi naalagaaffimmik maanna pilersinneqareersumik oqaluussisartutut suliassinneqarsimanerput nuannersuuvoq! Naggatissaq nalliutsinnagu  nutaarsiassap nuannersup silarsuarmi tamarmi oqaluussissutigineqarneranut peqataanerput immikkut pisinnaatitaaffiusoq pingaartingaarparput. (Matthæusi 24:14) Naammalluinnangitsuuvugut, Paulusilli oqaasii uku qiimmassaatigisinnaavavut: „Erlinnartuut tamanna [kiffartorneq] pigaarput immersakkani marraasuniitillugu, pissaaneq asseqanngitsoq tassaaqqullugu uatsinnit pinnani Guutimit pisoq.“ (2 Korinthimiut 4:7) Aap, iluarinartumik kiffartorsinnaavugut — aatsaalli Jehovameersumik ilisimassuseqarutta Jehovamillu nakussatsinneqartarutta. — 1 Korinthimiut 1:26-31.

Guutip naalannassusia ersersiguk

6. Uinikkut Israelikkut anersaakkullu Israelikkut qanoq assigiinngissuteqarpat?

⁶ Kristumiut tanitat eqqarsaatigalugit Paulusi allappoq Guuti ’uatsinnik kiffartorsinnaanngortitsisuusoq angerutsimut nutaamut’. Apustilip angeruseq nutaaq, anersaakkut Israelikkunnik Jiisusi Kristusi akunnermiliuttoralugu angeruserineqartoq, angerusitoqqamit, uinikkut Israelikkunnik Mosesi akunnermiliuttoralugu angeruserineqartumit, allaanerulluinnarnerarpaa. Paulusi nangilluni oqarpoq Mosesi Inatsisit Qulit nassarlugit Qaqqamit Sinajimit atermat kiinaata amia ima qinngorneqalersimatigisoq Israelikkut isigisinnaanngikkaat, kiinnanilu ulittariaqarsimagaa. Kingusinnerusukkut ajornerungaartumik pisoqarpoq ’isumaat manngertimmata’, uummataallu uleqalermata. „[Jehovamulli] saattoqaraangat ulik peerneqartarpoq,“ Paulusi allappoq. Taava innersuussivoq angerutsimut nutaamut ilaasunut kiffartuutigeqqusamut, oqarlunilu taakku tamarmik ’kiinartik ulissimanagu Jehovap naalannassusia ersersikkaat’ (NV). (2 Korinthimiut 3:6-8, 14-18; 2 Mosesi 34:29-35) Ullumikkut Jiisusip ’savaataasa allat’ aamma Jehovap naalannassusianik ersersitsinissaq immikkut pisinnaatitaaffigaat. — Johannesi 10:16.

7. Inuit Guutip naalannassusianik qanoq ersersitsisinnaappat?

⁷ Inuit ajortiliusut Guutip naalannassusia qanoq ersersissinnaagamikku inuup kialuunniit Guutip kiinaa takuguniuk inuuginnarsinnaanngimmat? (2 Mosesi 33:20) Jehovap naalannassusia aamma siunertaanut attuumassuteqarpoq, kisimi oqartussaanini naalagaaffini atorlugu akitsisissammagu. Sallusuissutit Guutip naalagaaffianut tunngasut ’Guutip tupinnangaartuliaanut’ ukiumi 33-mi piinsip ulluani anersaaq illernartumik ilumioqalersunit oqaluussissutigineqalersunut ilaapput. (Apustilit Suliaat 2:11) Anersaap siulersuinerata kiffartuutigeqqusaasumik naammassinnissinnaatippai. — Apustilit Suliaat 1:8.

8. Paulusip kiffartornerminut atatillugu suna aalajangiusimavaa?

⁸ Paulusip aalajangiusimalluinnarpaa kiffartornerminik naammassinninnissaminut sumilluunniit akornusertinnginnissani. Ima allappoq: „Kiffartuutigisatsinni nallittorneqarnikkut pisimasatsinni nikallunngilagut. Isertortut kanngunartullu naaggaarsimavavut peqqusersiornerlu ileqqorinagu Guutilluunniit oqaasii mumitittarnagit; sallusuissulli saqqummersittarparput taamaaliornitsigullu inuit tamarmik tarningisa nalunngissusiannut ilasseqqusarluta Guutip takkuani.“ (2 Korinthimiut 4:1, 2) ’Kiffartuutigisaq’ Paulusip eqqaasaa iluaqutigalugu sallusuissut ilisimatitsissutigineqartarpoq qaamasorlu anersaakkut ittoq siaruarterneqartarluni.

9, 10. Jehovap naalannassusia qanoq ersersinneqarsinnaava?

⁹ Qaamanerup aamma anersaakkut ittumik  qaamanerup pilerfiat pillugu Paulusi ima allappoq: „Guutip ima oqartup: ’Taartumit qaamaneq qinngussaaq,’ nammineq uummatitsinnut qinngorsimatippaa qaammaqqutaatillugu ilisimassutaaqqullugulu Guutip naalannassusianut Jiisusi-Kristusip kiinaaniittumut.“ (2 Korinthimiut 4:6; 1 Mosesi 1:2-5) Guutip kiffaasut nalissaqanngitsumik immikkut pisinnaataaffeqartitaagatta, taava minguitsuujuarta Jehovap naalannassusianik ersersitsisinnaajumalluta.

¹⁰ Inuit anersaakkut taartumiittut Jehovap naalannassusia Jiisusi Kristusimilluunniit, Mosesimit annermit, qanoq ersersinneqartoq takusinnaanngilaat. Jehovamulli kiffaasutut qaamaneq alutornangaartoq Biibilimeersoq pivarput allanullu iluaqutaasumik ersersillugu. Maanna anersaakkut taartumiittut piuneerusaassanngikkunik qaamaneq Guutimeersoq pisariaqartippaat. Taamaattumik nuannaarutigingaarlugu aallussilluarlutalu taartumit qaamasumik qinngortitseqqusineq naalapparput, Jehovap ataqqinaatigisaanik.

Illit qaamasut qaamatiguk Biibilimik atuaqqissaaqateqartarnikkut

11. Jiisusi oqarami qaamasorput qaamatissagipput qanoq isumaqarpa, oqaluusseriaaserlu suna uani eqqaaneqarpa?

¹¹ Jiisusi ajoqersukkaminut ima oqarpoq: „Ilissi silarsuup qaamasoraasi. Illoqarfik qaqqap qaaniittoq isertorneqarsinnaanngilaq. Naneruarluunniit ikissinnarlugu nappartap ataanut inissinneqarneq ajorpoq, qullilerfimmulli, illumiittunut tamanut qaammaqqutaaqqullugu. Taamatuttaaq qaamasorsi qaamali inunnut, suliasi ajunngitsut taakkununnga takoqqullugit Ataatarsilu qilanniittoq unnersiutigeqqullugu.“ (Matthæusi 5:14-16) Pissuserissuunerput pissutigalugu allat Guutimik naalannarsisitsilersinnaapput. (1 Petrusi 2:12) Oqaluusseriaatsitsinnilu assigiinngitsuni qaamasutta qaamatinnissaanut periarfissarpassuaqarpugut. Anguniakkatta pingaarnersaasa ilagaat anersaakkut qaamanerup Guutip oqaasianeersup siumukartumik Biibilimik atuaqqissaaqateqartarnikkut ersersinnissaa. Tamanna kiffartornitsinnut ilaavoq pingaaruteqangaartoq. Biibilimik atuaqqissaaqateqaraangatta sallusuissummik ujarlersut killinniarlugit qanoq iliorsinnaavugut?

12. Qinuneq Biibilimillu atuaqqisssaaqateqarneq imminnut qanoq attuumassuteqarpat?

¹² Biibilimik atuaqqissaaqateqarnermi ikioqqulluta Jehova qinnuigigutsigu ersersissavarput oqaluusseriaatsimi tamatumani peqataarusungaarluta. Aammattaaq ersersissavarput allat Guutimik ilisarsilernissaannik ikiuinissap pingaaruteqarnera takusinnaallutigu. (Ezekieli 33:7-9) Jehovap qinnutivut akingaassavai peqqissaarluartumillu oqaluussinerput pilluaqqungaassallugu. (1 Johannesi 5:14, 15) Qinnutigiinnartanngilarpulli Biibilimik atuaqqissaarusuttumik nassaarnissarput. Atuaqqissaaqatitaareeraangatta atuaqqissaaqatigineqartup pisariaqartitai immikkut ittut eqqarsaatigisassavavut taakkualu matussuserniarlugit ikioqqulluta qinusarluta tamatigut siumukartumik atuaqqissaaqatiginiassagatsigu. — Romamiut 12:12.

13. Siumukartumik Biibilimik atuaqqissaaqateqartarnissamut suna iluaqutigisinnaavarput?

¹³ Siumukartumik Biibilimik atuaqqissaaqateqartassagutta tamatigut piareersarluartariaqarpugut. Piginnaanikippallaartutut misigigutta, ilagiit atuakkamik atuaqqissaarneranni nakkutilliisup sapaatip-akunneranut pisassat qanoq sammitittarnerai maluginiaraanni iluaqutaasinnaavoq. Aammattaaq Biibilimik atuaqqissaaqateqarnermi angusaqarluarsimasumik immaqa ilaannikkut oqaluusseqateqartarsinnaavugut. Soorunalumi ingammik Jiisusi Kristusip isiginnittaasia ilinniartitseriaasialu eqqarsaatigisariaqarpavut.

14. Biibilimik atuaqqissaaqatigisartagarput qanoq killissinnaavarput?

¹⁴ Jiisusip nuannaarutigingaartarpaa Ataatami qilammiusup piumasaatut iliornini allanullu taanna pillugu oqaluttuarnini. (Tussiaat 40:9) Qanilaartuuvoq tusarnaartiminillu killiisinnaassuseqarluarluni. (Matthæusi 11:28-30) Aammattaaq uagut atuaqqissaaqatigineqartartut killinniarsarisariaqarpavut. Iluatsitsissagutta pissutsit atuaqqissaaqatigineqartup immikkut atugai eqqarsaatigalugit atuaqqissaaqatiginissaanut tamatigut piareersartariaqarpugut. Assersuutigalugu allamik kultureqarnini pissutigalugu Biibilimik ilisimasaqanngippat Biibililuunniit akuerinngippagu Biibilip ilumoortuuneranik qularunnaarsitsinissaq pisariaqarsinnaavoq. Taamaappat allassimaffippassuit  atuartariaqassavavut nassuiarlugillu.

Atuaqqissaaqatigineqartartut assersuusianik paasinninnissaannik ikiukkit

15, 16. (a) Atuaqqissaaqatigineqartup assersuusiaq Biibilimi atorneqartoq paasinngippagu qanoq ikiorsinnaavarput? (b) Atuaqqissaaqatigineqartup paasiuminaatsitaanik atuagassiaatitsinni assersuusiaqarpat qanoq iliorsinnaavugut?

¹⁵ Biibilimik atuaqqissaaqatigineqartartut ilaasa assersuusiat Biibilimi atorneqartut ilisimavallaanngilaat. Immaqa Jiisusi paasinngilaat naneruutip qullilerfimmut ikkunneqartarnera eqqartormagu. (Markusi 4:21, 22) Jiisusip eqqartugaa tassaavoq itsaq qulleq uuliatortoq ikumasumik iperalik. Qulleq taamaattoq qullilerfimmut immikkut ittumut ikkunneqartarpoq ini tamaat qaamatinniarlugu. Jiisusip assersuusiaa nassuiarniarlugu Indsigt i Den Hellige Skrift-imi allaaserisat „Lampe“-mik aamma „Lampestander“-imik qulequtallit atuarneqartariaqarsinnaapput. * Atuaqqissaaqatigineqartartut paasisinnaasaannik pingaartitaannillu nassuiaasinnaaneq nalerisimaarnangaartuuvoq!

¹⁶ Atuakkami atuaqqissaaqatigiissutigineqartumi immaqa assersuusiaqarpoq atuaqqissaaqatigineqartup paasiuminaatsitaanik. Nassuiarnissaanut piffissaqarit, assersuusiarluunniit alla tassunga assingusumik erseqqissaatitalik atoruk. Assersuutigalugu imaassinnaavoq naleqqulluartumik peqateqarnerup suleqatigiilluarnerullu aappariinnermi pingaaruteqarnera atuagassiaatitsinni erseqqissarneqartoq. Tamanna assersuunneqarpoq angummut cirkusimi issakatsiaarfimmi issakatsiaartumut, isiginnaartitseqatimilu tigussagaani tatigalugu issakatsiaarfimmik iperaasumut. Atuaqqissaaqatigineqartup assersuusiaq taanna paasiuminaatsippagu, naleqqulluartumik peqateqarnerup suleqatigiinnerlu pisariaqarnera immaqa assersuunneqarsinnaavoq suleqatigiinnut inummiit inummut karsinik ingerlatitsillutik umiarsuarmik usingiaasunut.

17. Assersuusiat pillugit Jiisusi sumik ilinniarfigisinnaavarput?

¹⁷ Assersuusiaq alla atorsinnaassagutsigu piareersartariaqarpugut, taamaalillutali takutissinnaavarput Biibilimik atuaqqissaaqatigineqartoq inuttut soqutigalugu. Jiisusi paasiuminaatsunik nassuiaagaangami assersuusiat paasiuminartut atortarpai. Tamanna qaqqami oqaluusiani erserpoq, Biibilimilu atuarneqarsinnaavoq ilinniartitsinera tusarnaartunut sunniuteqarluartartoq. (Matthæusi 5:1–7:29) Jiisusi allanik ilumoortumik soqutiginnikkami nassuiaagaangami nikallujuingaartarpoq. — Matthæusi 16:5-12.

18. Atuagassiaatitsinni allassimaffiit innersuussutigineqarnerinut atatillugu qanoq kajumissaarneqarpugut?

¹⁸ Allanik soqutiginninnerput kajumississutigaarput „Allakkat najoqqutaralugit“ tunngaveqartumik eqqarsalersitsiniaanissatsinnut. (Apustilit Suliaat 17:2, 3) Taamaaliussagutta qinunikkut atuaqqissaartariaqarpugut atuagassiallu ’pilittaasup ilumoortup’ pilersitai silatusaartumik atortariaqarlugit. (Lukasi 12:42-44) Assersuutigalugu atuakkami Ilisarsineq inuunermut naasaanngitsumut sammisoq-mi allassimaffippassuaqarpoq. * Inissakinnera pissutigalugu allassimaffiit ilaannaat issuarneqarput. Ilarpassui innersuussutigineqaannarput. Atuaqqissaarnermi pingaaruteqarpoq allassimaffiit innersuussutigineqartut ilaannaasaluunniit atuarnissaat nassuiarnissaallu. Ilinniartitsinerpummi Guutip oqaasianik, sunniisinnaassuseqangaartumik, tunngaveqarpoq. (Hebræerit 4:12) Atuaqqissaarnermi Biibilimut innersuussiuarit, allassimaffiillu immikkoortuniittut ilaat Biibilimi quppertarsigik. Pineqartoq aalajangersimasoq periaaserluunniit aalajangersimasoq pillugu Biibilimi qanoq allassimasoqarneranik atuaqqissaaqatigineqartartoq paasitiguk. Guutimut naalanneq qanoq iluaqutigisinnaaneraa paasitinniarlugu sapinngisannik iliorit. — Esaja 48:17, 18.

Eqqarsaallannartunik apeqquteqartarit

19, 20. (a) Sooq Biibilimik atuaqqissaaqateqaraangatta atuaqqissaaqatigisartakkatsinnik isumasiuisarneq iluaqutaava? (b) Aalajangersimasumut tunngasoq nassuiaqqineqartariaqarpat qanoq iliorsinnaavugut?

¹⁹ Jiisusip apeqqutinik atuillaqqissuunera inuit tunngaveqartumik eqqarsalernissaminnut iluaqutigaat.  (Matthæusi 17:24-27) Atuaqqissaaqatigineqartartut peqqusiileqitinnagit qanoq isumaqarnerannik aperisarutsigik, aalajangersimasoq pillugu isumaat akissutaannit paasisinnaavavut. Immaqa paasilerparput assigiinngitsunut suli Biibilerpalaanngitsumik isiginnittaaseqartut. Imaassinnaavoq ataasiullunilu pingasuussuseq suli upperigaat. Atuakkami ’Ilisarsineq’-mi kapitali 3-mi malugeqquneqarpoq oqariartaaseq „ataasiullunilu pingasuussuseq“ Biibilimi atorneqanngitsoq. Atuakkami allassimaffiit issuarneqarlutillu innersuussutigineqarput takutitsisut Jehovap Jiisusiunnginneranik, anersaaq illernartullu kinaassusiliunnginneranik, Guutilli pissaanerigaa sulissutiginnittoq. Immaqa allassimaffiit taakkua atuarnissaat oqaloqatigiissutiginissaallu naammappoq. Nassuiaaqqittoqartariaqarpalli qanoq iliortoqarsinnaava? Immaqa tullianik atuaqqissaaqatigiinnermi atuagassiaq alla, assersuutigalugu atuagassiaaraq Skal man tro på treenigheden?, atorlugu oqaloqatigiittoqarsinnaavoq. Taava atuagaq ’Ilisarsineq’ atorlugu atuaqqissaaqatigiinneq nanginneqarsinnaavoq.

²⁰ Oqariarta atuaqqissaaqatigineqartartup apeqqutitsinnut akissutaa tupaallaatigigipput allaalluunniit pakatsissutigigipput. Assersuutigalugu pujortartarnermut, allamulluunniit mianersornartumut, tunngappat immaqa siunnersuutigisinnaavarput atuaqqissaaqatigiinneq ingerlatiinnarneqassasoq kingusinnerusukkullu apeqqut taanna uterfigineqassasoq. Nalunngikkutsigu atuaqqissaaqatigineqartartoq suli pujortartartoq, anersaakkut siumukarnissaminut iluaqutigisinnaasaanik paasissutissarsiornissatsinnut periarfissaqarpugut. Atuaqqissaaqatigineqartartup killinniarsarineranut atatillugu Jehova qinnuigisinnaavarput anersaakkut ineriartornissaanik ikioqqullugu.

21. Atuaqqissaaqatigineqartartup immikkut pisariaqartitai naapertorlugit ilinniartitseriaatsivut naleqqussarutsigik qanoq angusaqarsinnaavugut?

²¹ Piareersarluartarluta Jehovallu ikiuineratigut ilinniartitseriaatsivut atuaqqissaaqatigineqartartup immikkut pisariaqartitai naapertorlugit qularnanngitsumik naleqqussarsinnaassavavut. Piffissap ingerlanerani Jehovamut asanningaarnermik ineriartortitsinissaanik immaqa ikiorsinnaavarput. Immaqa aamma Jehovap peqatigiissortaanik ataqqinnilersissinnaavarput pingaartitsilersillugulu. Nuanningaartuuvoq takullugu Biibilimik atuaqqissaaqatigineqartartup paasileraa ’ilumut Guuti akornatsinniittoq’. (1 Korinthimiut 14:24, 25) Taamaattumik siumukartumik Biibilimik atuaqqissaaqateqartarta sapinngisarpullu tamaat allat Jiisusimut ajoqersuganngornissaannik ikiorlugit.

Erlinnartuut naleqangaartoq

22, 23. Kiffartornerput naammassissagutsigu susariaqarpugut?

²² Kiffartornerput naammassissagutsigu pissaaneq Jehovameersoq tatigilluinnartariaqarparput. Kiffartorneq pillugu Paulusi kristumiunut tanitanut allanut ima allappoq: „Erlinnartuut tamanna pigaarput immersakkani marraasuniitillugu, pissaaneq asseqanngitsoq tassaaqqullugu uatsinnit pinnani Guutimit pisoq.“ — 2 Korinthimiut 4:7.

²³ Tanitanut imaluunniit ’savanut allanut’ ilaagaluarutta immersakkatut marrartulli qajannartigaagut. (Johannesi 10:16) Jehovalli uagutsinnut suliassiissutigineqartunik, tatineqaraluarluta, suliaqarsinnaaqqulluta pisariaqartumik nakussatsissinnaavaatigut. (Johannesi 16:13; Filippimiut 4:13) Taamaattumik Jehova tatigilluinnartigu, kiffartorneq erlinnartuutitut naleqangaartutut isigisigu, kiffartornerpullu naammassisigu. (wE 3/15 04)

[Quppernerup ataani ilanngussat]

Qanoq akissavit?

• Utoqqaanertat kiffartornertik naammassiniarlugu qanoq iliorsinnaappat?

• Biibilimik atuaqqissaaqateqaraangatta sunniuteqarnerusumik qanoq ilinniartitsisinnaavugut?

• Atuaqqissaaqatigineqartup assersuusiaq paasinngippagu, pineqartorluunniit aalajangersimasoq pillugu paasissutissinneqarnerusariaqarpat qanoq iliussavit?

[Atuaqqissaarnermi apeqqutit]

[Qupp. 29-mi assiliartaq]

Utoqqaanertat kristumiut ilagiinni ilinniartitsisarput oqaluussinermullu uppeqatiminnik ilinniartitseqataasarlutik