Utoqqaat qatanngutigiissuarnut kristumiunut ilaasut pingaaruteqangaartut

„Ikkunneqarsimapput [Jehovap] naalaffiani, naajartussapput. . . . Utoqqalingaarlutik allaat inerititaqassapput.“ — TUSSIAAT 92:14, 15.

1. Inuppassuit utoqqarnut qanoq isiginnittaaseqarpat?

JEHOVAP kiffani aalajaatsut tamaasa asavai, aamma utoqqalisut. Missingiuunneqarsimavorli ukiut tamaasa USA-mi utoqqaat millionit affangajaat naalliutsinneqartartut paarinerlugaasartulluunniit. Silarsuup ilaanit allanit nalunaarusiat takutippaat utoqqarnik naalliutsitsisarneq silarsuarmi tamarmi ajornartorsiutaasoq. Pissutaa peqatigiiffiup ataatsip ima allaatigaa: „Inuppassuit isumaqarput utoqqaat iluaqutaajunnaartut, pingaaruteqarunnaartut ikiortariaqarpallaartullu.“

2. (a) Jehovap kiffani utoqqaat aalajaatsut qanoq isiginnittaaseqarfigai? (b) Allaatiginninneq qiimmaallannartoq suna Tussiaat 92:13-16-imi atuarsinnaavarput?

² Jehova Guutip kiffani utoqqaat ilumoorfiginnittut pingaartingaarpai. ’Inuuserput ilorleq’ — anersaakkut qanoq ittuunerput — pingaartinneruaa, timikkut pisinnaasatta killeqarneri pinnagit. (2 Korinthimiut 4:16) Oqaasiani Biibilimi qiimmaallannartumik ima neriorsuuteqarpoq: „Iluartoq naajartussaaq palmisut naassalluni Libanonip cederiisut portutigilerluni. Ikkunneqarsimapput [Jehovap] naalaffiani, naajartussapput Guutitta silarliutaani. Utoqqalingaarlutik allaat inerititaqassapput orpittut uummaasutut qorsuusutut, nalunaajaatigissallugu [Jehova] peqqusersuitsumik iliortoq.“ (Tussiaat 92:13-16) Versinik taakkuninnga misissuinermi paasinarsissaaq ilissi utoqqaat qatanngutigiissuarnut kristumiunut pingaaruteqangaartumik iluaqutaasinnaasusi.

„Utoqqalingaarlutik allaat inerititaqassapput“

3. (a) Sooq naapertuilluartut palminut assersuunneqarpat? (b) Utoqqaat qanoq ’utoqqalingaarlutik allaat ineritaqarsinnaappat’?

³ Tussiaasiortup naapertuilluartut palminut „Guutitta silarliutaani“ ikkunneqarsimasunut assersuuppai. „Utoqqalingaarlutik allaat inerititaqassapput.“ Eqqarsaat tamanna illit aamma nuannaraajuk? Biibilip nalaani palmit narlorissut kusanartut kangiani qiterlermi illut kaajaluisaanni takussaaqaat. Kusanartuupput, aammattaarli inerititaqarluartarmata pingaartinneqarput. Palmit ilaat ukiunit hundredenit amerlanerusuni inerititaqartarput. * Utoqqaat, ilissi pallorfiginninnermi ilumoortumi sorlaqarluartuarussi, aamma ilissi ’ajunngitsulianik tamanik inerititaqartuarsinnaassaasi’. — Kolossemiut 1:10.

4, 5. (a) Kristumiut inerititaq pingaarutilik suna ineritittariaqarpaat? (b) Utoqqarnik ’qarlut inerititaannik’ inerititaqarsimasunik Biibilimeersunik taasaqarit.

⁴ Jehovap naatsorsuutigaa kristumiut pilluni  siunertanilu pillugu oqaluussinermikkut ’qarlut inerititaannik’ inerititaqassasut. (Hebræerit 13:15) Aamma ilissi utoqqaat inerititaqarnissarsi naatsorsuutigaa? Aap, taamaappoq.

⁵ Biibilimi oqaluttuarineqarput utoqqarpassuit qunusuillutik Jehovap aqqanik siunertaanillu nalunaajaasut. Mosesi 70-it sinnerlugit ukioqarpoq Jehovap pruffiitissamisut oqaaseqartitassamisullu toqqarmani. (Tussiaat 90:10; 2 Mosesi 4:10-17) Aamma pruffiiti Danielip ukioqqortusinini Jehovap kisimi oqartussaaneranik qunusuilluni nalunaajaanissaminut akornutiginngilaa. Danieli 90-it sinnerlugit ukioqarunarpoq Belshassarip iikkami allakkat paasissaanngitsut nassuiariartoqqullugit qaaqqummani. (Danieli, kapitali 5) Aamma apustili Johannesi eqqarsaatigiuk. Kiffartornini sivisooq naangajalersoq, ukioqqortusilluni, parnaarussatut qeqertami Patmosimiippoq „Guutip oqaasia Jiisusillu nalunaajaataa pissutigalugit“. (Saqqummersitat 1:9) Qularnanngitsumik utoqqarpassuarnik ’qarlut inerititaannik’ inerititaqartunik Biibilimi eqqaaneqartunik eqqaasaqarsinnaavutit. — 1 Samueli 8:1, 10; 12:2; 1 Kunngit 14:4, 5; Lukasi 1:7, 67-79; 2:22-32.

6. Ulluni kingullerni makkunani Jehovap ’utoqqaat’ qanoq siulittuitippai?

⁶ Pruffiiti hebræeriusoq Joeli issuarlugu apustili Petrusi ima oqarpoq: „Ullussani kingullerni pissaaq, oqarpoq Guuti: Anersaannit kuisiumaarpunga inunnut tamanut [aamma ’utoqqarnut’] . . . siulittuissappullu.“ (Apustilit Suliaat 2:17, 18; Joeli 3:1) Aammattaaq ulluni kingullerni makkunani Jehovap utoqqaat katersanut tanitaasunut ’savanullu allanut’ ilaasut siunertaminik oqaluussitippai. (Johannesi 10:16) Taakkua ilaat ukiuni qulikkuutaani aalajaallutik Guutip naalagaaffiata inerititaanik inerititaqarsimapput.

7. Utoqqaat timikkut pisinnaasatik killeqaraluartut Guutip naalagaaffiata inerititaanik inerititaqartuarnerannik assersuuteqarit.

⁷ Assersuutitut taasinnaavarput Sonia, 1941-mi piffissaq tamaat oqaluussisartunngortoq. Naak sivisuumik katsorsarneqarsinnaanngitsumik nappaateqaraluarluni angerlarsimaffimmini aalajangersimasumik Biibilimik atuaqqissaaqateqartarpoq. „Nutaarsiassamik nuannersumik oqaluussineq inuuninnut ilaavoq,“ Sonia nassuiaavoq. „Eqqornerusumilluunniit oqaatigalugu, tassa inuunera tamarmi. Uniinnarnianngilanga.“ Soniap angajuatalu Olivep qanittukkut napparsimmaviup utaqqisarfiani Janet, toqussutissaminik nappaateqartoq, naapippaat neriuummillu Biibilimeersumik oqaluttuullugu. Janetip arnaata, aallussilluarluni katuuliusup, panimminik asannittumik soqutiginninnerat tupigusuutigingaaramiuk Biibilimik atuaqqissaaqatigineqarnissamik neqeroorut akueraa, maannalu siumukarluarpoq. Guutip naalagaaffiata inerititaanik inerititaqarnissamut periarfissat taamaattut atorsinnaavigit?

8. Kalebip utoqqalisup Jehova tatigalugu qanoq ersersippaa, kristumiullu utoqqaat qanoq ilaarsinnaavaat?

⁸ Kristumiut utoqqaat utoqqalinerup kingunerisaanik pisinnaasatik killeqaraluartut Guutip naalagaaffianik aallussilluarlutik oqaluussiuarnermikkut Israelikkuusoq aalajaatsoq Kalebi, ukiuni 40-ni Mosesip inoqajuitsumeeqataa, ilaarpaat. Kalebi 79-inik ukioqarpoq kuussuaq Jordani ikaarlugu nunamut neriorsuutigisamut pigami. Kingusinnerusukkut ukiuni arfinilinni Israelikkut sakkutuuisa ajugaasaqattaarneranni sorsoqataareerluni tunuarsimasinnaagaluarpoq  eqqissisimaalerlunilu. Taamaaliornanili sapiilluni suliassamik imaannanngitsumik suliaqarumavoq, Judap qaqqaani, anakikkunnik angisoorsuarnik inulimmi, ’illoqarfinnik angisuunik pallittaalisalinnik’ tiguaasaqattaarumalluni. Jehovap ikiuineratigut ’inuit illoqarfiinit anisippai, soorlumi [Jehova] taama oqartoq’. (Josva 14:9-14; 15:13, 14) Utoqqalininni Guutip naalagaaffiata inerititaanik inerititaqartuaruit qularissanngilat Jehovap Kalebimik najuinermisut najorumaaraatit. Aalajaattuaruillu silarsuarmi nutaami neriorsuutigisamini inissaqartissavaatit. — Esaja 40:29-31; 2 Petrusi 3:13.

’Uummaasut qorsuusut’

9, 10. Kristumiut utoqqaat uppersutsimikkut qanoq peqqissuujuarsinnaappat anersaakkullu nukittujuarlutik? (Qupperneq 21-mi ungalusaq takuuk.)

⁹ Jehovap kiffaasa utoqqaat inerititaannut uparuussilluni tussiaasiortoq ima erinarsorpoq: „Iluartoq naajartussaaq palmisut naassalluni Libanonip cederiisut portutigilerluni. Utoqqalingaarlutik allaat inerititaqassapput orpittut uummaasutut qorsuusutut.“ — Tussiaat 92:13, 15.

¹⁰ Qatanngutit utoqqaat ukioqqortusigaluarlutik anersaakkut qanoq nukittujuarsinnaappat? Palmi ukioq naallugu kusanartarpoq qorsuusarlunilu imaaruttussaanngitsumik imilimmiikkami. Taamatulli Guutip oqaasianik atuaqqissaartarnitsigut peqatigiissortaanillu peqateqartarnitsigut sallusuissutip ernga Biibilimeersoq inuussutigisinnaavarput. (Tussiaat 1:1-3; Jeremia 17:7, 8) Utoqqaat anersaakkut nukittuujugamik uppeqatiminnut pingaaruteqangaarput. Palasiuneq Jojada utoqqalisoq aamma taamaappoq.

11, 12. (a) Jojada naalagaaffiup Judap oqaluttuarisaanerani qanoq pingaaruteqarpa? (b) Jojadap sunniuteqarsinnaanini pallorfiginninnermik ilumoortumik siuarsaanermut qanoq atorpaa?

¹¹ Qularnanngitsumik Jojada hundredet sinnerlugit ukioqarpoq dronngi Atalja pissaaneqarusuttoq ernuttaminik toqoraalluni Judamut imminut naalakkersuisunngortimmat. Jojada utoqqaq qanoq iliorsinnaava? Nulianilu kunngissaq annattutuaq, Joashi, ukiuni arfinilinni naalaffimmi isertorpaat. Taava Jojadap tupaallatsitsilluni Joashi arfineq-marlunnik ukiulik kunngitut suaarutigaa Ataljalu toqutaatillugu. — 2 Nalunaarsuutit 22:10-12; 23:1-3, 15, 21.

¹² Jojadap kunngimut angajoqqaatut oqaasissaqartitaasutut sunniuteqarsinnaanini atorlugu pallorfiginninneq ilumoortoq siuarsarpaa. Jojadap „kunngi inuillu angerfigeqatigai neriorsuillutik [Jehovamut] innuttaanissaminnik“. Jojadap peqqussineratigut inuit guutipiluup Ba’alip naalaffia, pilliiviit guutiliallu aserortippaat palasilu toqullugu. Jojadap siulersuineratigut Joaship aamma naalaffimmi pallorfiginninneq aallarteqqippaa naalaffillu iluarsaattariaqaqisoq iluarsaallugu. Joashi „[Jehovap] isaani eqqortumik iliorpoq palasimit Jojadamit ilitsersorneqarami.“ (2 Nalunaarsuutit 23:11, 16-19; 24:11-14; 2 Kunngit 12:3) Jojada 130-nik ukioqarluni toqugami immikkorluinnaq ittumik ataqqinaatigalugu kunngit iliveqarfiannut ilineqarpoq ’Israelimi Guutimut illuanullu ajunngitsunik naammassisaqarsimaqigami’. — 2 Nalunaarsuutit 24:15, 16.

13. Kristumiut utoqqaat qanoq ’Guutimut illuanullu ajunngitsunik naammassisaqarsinnaappat’?

¹³ Immaqa peqqiilliorlutit allamilluunniit pissuteqarlutit pallorfiginninnermik ilumoortumik siuarsaaniarlutit pisinnaasatit killeqarput. Taamaattoq periarfissaqarputit ’Guutimut illuanullu ajunngitsunik naammassisaqarnissannut’. Ilagiit ataatsimiinnerinut najuunnikkut peqataanikkullu pisinnaagaangavillu oqaluusseqataanikkut Jehovap anersaakkut illuanut aallussilluarnerit ersersissinnaavat. Biibilimi siunnersuutinik maleruaanissannik kajuminnerit aamma ’kiffamik ilumoortumik silatuumillu’ ilagiinnillu ilumoorfiginnillutit tapersersuinerit qatanngutigiissuarnik kristumiunik nakussatsitseqataapput. (Matthæusi 24:45-47) Aammattaaq qatanngutitit „asaqatigiinnermut ajunngitsuliornermullu“ kajumissaarsinnaavatit. (Hebræerit 10:24, 25; Fiilimuut 8, 9) Apustili Paulusillu siunnersuutaa una malikkukku allanut pilluaqqussutaassaatit: ’Angutit utoqqaat imerajuttuussanngillat, ataqqinartuussapput, silatusaartuussapput, peqqissuussappullu uppersutsimikkut  [upperluartuussapput, An American Translation] asannissutsimikkullu nikallujuissutsimikkullu; taamatuttaarlu arnat utoqqaat illernartut ileqqussaat eqqorlugu ileqqoqassapput, oqajamaajunatik imerajuttuunatilluunniit. Ajunngitsuliornermilli ajoqersuussisuussapput.’ — Titusi 2:2-4.

14. Qatanngutit ukiorpassuarni utoqqaanertaasimasut pallorfiginninnermik ilumoortumik qanoq siuarsaasinnaappat?

¹⁴ Ukiorpassuarni ilagiinni utoqqaanertatut kiffartorsimavit? Qatanngut sivisuumik utoqqaanertaasimasoq ima siunnersuivoq: „Ukiut ingerlanerini ilisimassuseqalersimanerit namminissarsiunngitsumik atoruk. Allat aamma akisussaaffilikkit, ilinniarusussuseqartullu misilittakkannik oqaluttuullugit . . . Allat pikkoriffigisinnaasaat eqqumaffigikkit. Pikkoriffigisinnaasaminnik ineriartortitsisinnaaqqullugit atorluaasinnaaqqullugillu ikiukkit. Siunissaq eqqarsaatigalugu ilinniartikkit.“ (5 Mosesi 3:27, 28) Guutip naalagaaffiata suliaanik, alliartortuartumik, ilumoorlutit soqutiginninnerit qatanngutigiissuarniittunut kristumiunut allanut pilluaqqussutaangaassaaq.

’Nalunaajaatigiuk Jehova peqqusersuitsumik iliortoq’

15. Kristumiut utoqqaat qanoq ’nalunaajaatigisinnaavaat Jehova peqqusersuitsumik iliortoq’?

¹⁵ Guutimut kiffaasut utoqqaat ’Jehovap peqqusersuitsumik iliornerinik nalunaajaanermik’ akisussaaqataanertik nuannaarutigaat. Qatanngutaaguit kristumiu utoqqaq oqaatsitit iliuutsitillu takussutaasinnaassapput Jehova ’qaarsorigit taannalu assuarnartoqanngitsoq’. (Tussiaat 92:16) Palmip oqaaseqarani nalunaajaatigai Pinngortitsisup pissusii nalissaqanngitsut. Jehovalli immikkut pisinnaatitaaffeqartippaatit pallorfiginninnermik ilumoortumik maanna ilassinnittunut taanna pillugu oqaluttuarnissannik. (5 Mosesi 32:7; Tussiaat 71:17, 18; Joeli 1:2, 3) Sooq tamanna taama pingaaruteqartigaa?

16. ’Jehovap peqqusersuitsumik iliornerinik nalunaajaanissap’ pingaaruteqarnera oqaluttuami Biibilimeersumi qanoq ersersinneqarpa?

¹⁶ Israelikkut siulersuisuata Josvap, ’utoqqalilluni ukiorpassuit angusimallugit’, „Israelikkut tamaasa — utoqqaanertat, qullersaasut, eqqartuussisut allattuusullu — katersortippai“ Guutip peqqusersuitsuliorsimaneranik  eqqaasinniarlugit. Ima oqarpoq: „Ilisimassavarsi ajunngitsut [Jehovap] Guutissi ilissinnut oqaatigisaasa ilaat ataasinnguarluunniit qammuinnarsimanngitsoq. Tamarmik piviusunngorsimapput.“ (Josva 23:1, 2, 14) Oqaatsit taakku Israelikkut aalajaanniarlutik aalajangersimanerminnut ukiualunni nakussatsissutigaat. Josvalli toqunerata kingorna „ineriartulerput kinguaariissoqatigiit nutaat [Jehovap] Israelikkunni naammassisaanik ilisimasaqanngitsut. Taava Israelikkut [Jehovap] isaani ajortumik iliulerput Ba’alillu guutisiorfigilerlugit“. — Eqqartuussisut 2:8-11.

17. Nalitsinni Jehovap innuttani qanoq isumassorsimavai?

¹⁷ Soorunami oqaluussisartut utoqqaat oqaluttuarisartagaat ilagiit kristumiut ullumikkut assuarnaassusiannut aalajangiisuunngillat, ullunili kingullerni makkunani innuttaminut ’angeqisunik iliornerinik’ misigisaminnik oqaluttuartarnerat Jehovamut uppernitsinnut taassumalu neriorsuutaanik upperinninnitsinnut nakussatsissutaasarpoq. (Eqqartuussisut 2:7; 2 Petrusi 1:16-19) Ukiorpassuarni Jehovap peqatigiissortaanut ilaasimaguit eqqaamasinnaagunarpat oqaluussinerup akerlilersorneqangaarsimanera, nunagisanniluunniit oqaluussisartut ikittuararsuunerat. Ukiut ingerlanerini takusimassavat Jehovap akornutaasut assigiinngitsut piiartarai Guutillu naalagaaffiata suliai pilertortittarlugit. (Esaja 54:17; 60:22) Misigisimassavat ajoqersuutinik Biibilimeersunik paasinnilluarnerulernerput, Guutillu peqatigiissortaani takussaasuni pitsanngorsaasoqarnera takusimassallugu. (Ussatit 4:18; Esaja 60:17) Jehovap peqqusersuitsuliornerinut atatillugu misigisannik oqaluttuarnikkut allat ineriartortinniarlugit sapinngisannik iliorpit? Taamaaliorneq qatanngutigiissuarnut kristumiunut qiimmassaataasinnaavoq nakussatsissutaallunilu.

18. (a) ’Jehovap peqqusersuitsumik iliornerinik nalunaajaaneq’ ungasinnerusoq eqqarsaatigalugu qanoq sunniuteqarsinnaanersoq nassuiaruk. (b) Jehovap peqqusersuitsuunera nammineq qanoq misigisimaviuk?

¹⁸ Qularnanngitsumik aamma Jehovap asannittumik isumassuinera siulersuineralu nammineq misigisarsimassavatit. (Tussiaat 37:25; Matthæusi 6:33; 1 Petrusi 5:7) Qatanngutip Marthamik atillip allat ima kajumissaartarpai: „Qanorluunniit pisoqaraluarpat Jehova tununngisaannaruk. Isumassussavaatit.“ Siunnersuut taanna Tolminamut, Marthap Biibilimik atuaqqissaaqatigisarsimasaanut 1960-ikkut aallartinneranni kuisittumut, pingaaruteqangaarsimavoq. „Uiga toqummat nikallungasorujussuuvunga,“ Tolmina oqaluttuarpoq, „Marthalli oqaasii pissutigalugit aalajangerpunga ataatsimiigianngitsuunngisaannassallunga. Jehovap pisariaqartitannik nakussatsippaanga.“ Ukiut ingerlanerini Tolminap siunnersuut taannarpiaq nammineq Biibilimik atuaqqissaaqatigisartakkami ilarpassuinut siunnersuutigisarpaa. Aap, uppeqativut qiimmassarlugit  Jehovallu peqqusersuitsuliornerinik oqaluttuullugit uppernerat nakussatsissinnaavarput.

Jehovap utoqqaat aalajaatsut pingaartingaarpai

19, 20. (a) Jehovap kiffani utoqqaat qanoq isiginnittaaseqarfigai? (b) Allaaserisami tulliuttumi suna sammineqassava?

¹⁹ Ullutsinni silarsuarmi, qujasuinnermik ilisarnaateqartumi, utoqqaat piffissaqarfigineqarpianngillat. (2 Timotheusi 3:1, 2) Eqqaaneqaraangamik siornatigut — taamanikkut maannakkuunngitsoq — iliuuserisimasatik pissutigalugit eqqaaneqartarput. Tamatumali akerlianik Biibilimi ima allassimasoqarpoq: „Guuti iluaatsuunnginnami puiorsimanngilai suliasi asanninnersilu aqqanut takutissimasarsi illernartunik kiffartuussisimanissigut kiffartuussiuarnissigullu.“ (Hebræerit 6:10) Soorumami Jehova Guutip utoqqaat siornatigut iliuuserisimasaat tamaasa eqqaamavai, aammattaarli tassunga kiffartornerminni iliuuseriuagaat pissutigalugit pingaartippai. Aap, utoqqaat aalajaatsut inerititaqartartutut, kristumiutut anersaakkut peqqissutut upperluartutut, — pissatsitsisinnaanerminut uppernarsaataalluartutut — isigai. — Filippimiut 4:13.

²⁰ Qatanngutigiissuarni kristumiuni utoqqaat Jehovap isiginnittaaseqarneratut isigaagit? Taamaakkuit asanninnerit iliuuseqarnikkut ersersikkumassavat. (1 Johannesi 3:18) Allaaserisami tulliuttumi sammissavarput pisariaqartitaannik matussusiinikkut qanoq asannittuliorfigisinnaanerlugit.

[Quppernerup ataani ilanngussaq]

Qanoq akissavit?

• Utoqqaat qanoq inerititaqartarpat?

• Sooq utoqqaat anersaakkut nukittuujunerat pingaaruteqarpa?

• ’Jehova peqqusersuitsumik iliortoq’ utoqqaat qanoq nalunaajaatigisinnaavaat?

• Sooq Jehovap ukiorpassuarni imminut kiffartorsimasut pingaartingaarpai?

[Atuaqqissaarnermi apeqqutit]

[Qupp. 21-mi ungalusaq]

Uppersutsimikkut qanoq peqqissuujuarsimanersut

Ukiorpassuarni sallusuissummiissimasut uppersutsimikkut peqqissujuarnissaminnut anersaakkullu nukittuujuarnissaminnut suna iluaqutigisimavaat? Ilaat ima akipput:

„Jehovamut attaveqarnitsinnut tunngasunik allassimaffinnik atuartarneq pingaaruteqarluinnarpoq. Unnuit tamangajaasa Tussiaat 23 aamma 91 eqqaasarpakka.“ — Olive, 1930-mi kuisittoq.

„Ataatsimeersuarnerni kuisinneq pillugu oqalugiartoqaraangat najuuttuaannarpunga tusarnaaqqissaartarlungalu, soorlu tassa nammineq kuisittussaallunga. Tunniulluinnarsimanera puiunngisaannarakku aalajaattuarnissannut iluaqutigaara.“ — Harry, 1946-mi kuisittoq.

„Pisariaqarluinnarpoq ullut tamaasa qinusarnissaq — Jehovamut ikioqqulluni, sernissoqqulluni pilluaqqoqqullunilu qinujuarnissaq ’eqqarsaatigiuarnissaalu sumiikkaluaraanniluunniit.’“ (Ussatit 3:5, 6) — Antônio, 1951-imi kuisittoq.

„Ukiorpassuarni Jehovamut kiffartorsimasut misigisartagaat misilittagaallu tusaraangakkit Jehovamut ilumoorfiginnittuarnissannik aalajaattuarniarnissannillu aalajangersimanera aalajangiuteriaannartarpara.“ — Joan, 1954-imi kuisittoq.

„Imminut pingaartippallaannginnissaq pingaaruteqarpoq. Pigisavut tamaasa Guutip ajunngissusia pisassarinngisaraluarput pissutigalugu pigaavut. Tamanna eqqaamajuarutsigu naggatissamut aalajaannissatsinnut pisariaqartunik anersaakkut inuussutissaqarniarluta sumiiffimmi eqqortumiittuassaagut.“ — Arlene, 1954-imi kuisittoq.

[Qupp. 19-mi assiliartaq]

Utoqqaat Guutip naalagaaffiata inerititaanik inerititaqarnerat pingaaruteqarpoq

[Qupp. 22-mi assiliartaq]

Utoqqaat anersaakkut nukittuujunerat pingaaruteqangaarpoq