Ikioqqulluta inngilinut qinusariaqarpugut?

EQQORTUUSSAVA ajornartorsiorfiusuni inngilinut qinunissaq? Amerlasuut taama isumaqarput. Katuullit ujarlerfissiaanni atuakkami New Catholic Encyclopedia-mi allassimavoq: „Inngilinut . . . qinusarpugut . . ., taamaallaat siunertaralugu Guutimut qinnunneqarnissarput.“ Inngilit qinnuigisariaqarpavut qinnuteqqulluta?

Guutip oqaasiani taamaallaat Guutip inngilii ilumoortut marluk atiisigut taaneqarput, tassa Mikaeli Gabrielilu. (Danieli 8:16; 12:1; Lukasi 1:26; Judasi 9) Atit taakkua Biibilimi taaneqarmata, paasivarput inngilit tassaaginnanngitsut nukiit kinaassuseqanngitsut, kinaassusiliusulli anersaat atillit. Inngililli allat atitik taajumanngilaat. Soorlu Jaakup pulaartini inngili qinnuigimmagu aqqa oqaatigeqqullugu, inngilip atini taajumanngilaa. (1 Mosesi 32:29; Eqqartuussisut 13:17, 18) Biibilimi inngilit aqqi allattorneqarsimanngillat, taamaalillunilu inuit inngilinik soqutiginnippallaalernissaat pinngitsoortinneqarpoq.

Inngilit suliassaasa ilagaat nalunaarutit Guutimeersut inunnut apuunnissaat. Oqaatsip hebræerisuup grækerisuullu „inngili“-mik nutserneqartup eqqortumik isumagaa „aallartitaq“. Kisianni inngilit akunnermiliuttutut inunninngaanniit Qutsinnerussaartup issiavissaarsuanut qinnutinik ingerlatitseqqittartutut sulinngillat. Guutip aalajangersimavaa qinnuigineqartassalluni ernermi, Jiisusi Kristusip, aqqani. Jiisusi oqarpoq: „Ataatap uanga atikkut qinnutigisassinnik sumilluunniit tunissavaasi.“ — Johannesi 15:16; 1 Timotheusi 2:5.

Jehova Guuti eqqortumik qinnuigigutsinni tusarnaarnissaminut ulapippallaanngisaannarpoq. Biibilimi imaattumik neriorsuuteqarpoq: „[Jehova] qanippoq torlorfigisiminut tamanut, tamanut ilumoorlutik imminut torlorfiginnittunut.“ — Tussiaat 145:18.  (wE 4/1 04)