Inuuneq tunissutaasoq pingaartiguk
Inuuneq tunissutaasoq pingaartiguk
„Kristusip . . . nalunngeqatiginnissuserput . . . sulianit toqungasunit eqqiarsinnaassavaa nammineq aamminik piiarlugit taamalu Guutimut uumasumut kiffartorsinnaalersilluta.“ — HEBRÆERIT 9:14.
1. Inuunermik pingaartitsinerput sukkut takuneqarsinnaava?
APERINEQARUIT inuunerit qanoq naleqarnersoq, qanoq akissagaluarpit? Inuuneq — uagut nammineq inuunerput allallu inuunerat — pingaartingaarparput. Taamaattuminguna napparsimagaangatta nakorsiartartugut, imaluunniit peqqinnerluta akuttunngitsumik misissortittartugut. Inoorusuppugut aamma peqqissoorusuppugut. Allaat utoqqaat innarluutillillu amerlanerit inuuinnarusuttarput, toqorusuttanngillat.
2, 3. (a) Pisussaaffik suna Ussatit 23:22-mi erseqqissarneqarpa? (b) Ussatit 23:22 Guutimut pisussaaffeqarnitsinnut qanoq attuumassuteqarpa?
2 Allanut attaveqarnerit inuunermut isiginnittaatsinnit sunnerneqartarpoq. Assersuutigalugu Guutip oqaasiani oqaatigineqarpoq: „Naalanniaruk ataatat silarsuarmut pisitsisit, anaanallu utoqqalisoq sumiginnaqinagu.“ (Ussatit 23:22) ’Naalanneq’ oqaatigineqartunik tusaaginnarnermit imaqarneruvoq; ussatini eqqarsaatigineqarpoq naalanniarluni tusarnaarneq. (2 Mosesi 15:26; 5 Mosesi 7:12; 13:19; 15:5; Josva 22:2; Tussiaat 81:15) Sooq Guutip oqaasiani allassimava angajoqqaat tusaaneqassallutillu naalanneqassasut? Utoqqaanerunerat imaluunniit misilittagaqarnerunerat kisimi pissutaanngilaq. Naamik, pissutaatinneqarpoq ataatavit (soorunalimi aamma anaanavit) ilinnut inuunermik tunisisimanera. Nutsikkat ilaanni versi imatut nutserneqarpoq: „Ataatat ilinnut inuunermik tunisisoq tusaajuk.“ Inuuneq pingaartikkaanni inunngortitsisumut pisussaaffeqartutut misiginissaq pissusissamisoorpoq.
3 Kristumiuuguit ilumoortoq soorunami Jehova inuunerup pilerfiviatut akuerissavat. Taassumani „inuuvugut“; pinngortitaavugut ’anersaartorsinnaasut’ misigisinnaassusillit; ’atavugut’ siunissarlu eqqarsaatigalugulu pilersaarusiorsinnaavugut, minnerunngitsumik inuunermut naassaanngitsumut tunngatillugu. (Apustilit Suliaat 17:28; Tussiaat 36:9; Oqaluussisartup oqaasii 3:11) Ussatit 23:22 naapertorlugu Guutip tusaanissaa ’naalannissaalu’ pissusissamisoorpoq, taassumami inuunermut isiginnittaasia paaserusupparput siulersortigerusullugulu, allat isiginnittaasiat pinnagu.
Inuunermik ataqqinnittuugit
4. Inuunermut ataqqinninneq pillugu apeqqut oqaluttuarisaanermi siusissukkut qanoq qaqinneqarpa?
4 Oqaluttuarisaanermi siusissukkut Jehovap erseqqissarpaa inuit piumasaminnik inuunermik atuinissaat (imaluunniit atornerluinissaat) akuerinianngikkini. Kainip sinnganermik kamannermillu ulikkaarluni qatanngunni Abeli toquppaa, taamaalillunilu inuk sunngitsoq toqullugu. Isumaqarpit Kaini inuunermut tunngatillugu taamatut aalajangiisinnaatitaasoq? Guuti taamatut isumaqanngilaq. Kaini ima oqarluni akisussaatippaa: „Qanoq-una ilioravit? Nukkavit aavata nunamit torlorfigaanga.“ (1 Mosesi 4:10) Malugiuk Abelip aava nunamut kuisaq inuuneranut peqqarniitsumik kipitinneqarsimasumut assersuutaasoq, aallu akiniuteqqulluni Guutimut torlulasoq. — Hebræerit 12:24.
5. (a) Guuti Noap nalaani qanoq inerteqquteqarpa, tamannalu kikkunnut atuuppa? (b) Inerteqqut tamanna qanoq ililluni pingaarutilimmik iliuuseqarnerua?
5 Ulersuup kingorna inuiaat nutaamik aallarnerfeqarput, tarnit arfineq-pingasuinnaallutik. Nalunaarummi inunnut tamanut atuuttumi Guutip inuunermut aammullu qanoq isiginninnerluni erseqqinnerusumik saqqummiuppaa. Oqarpoq inuit nersutit neqaannik nerisinnaasut, imatulli killiliivigai: „Uumasut nunami aalasut suut tamaasa nerisarissavasi, ilissinnut tamaasa tunniuppakka soorlu naatitat qorsuusut tunniutereersimagikka. Neqili uumassusertalik, tassa aattalik, nerissanngilarsi.“ (1 Mosesi 9:3, 4) Tamanna juutit ilaasa neqimik imaluunniit nersutip suli uumasup aavanik nereqqusaannginnertut paasisarpaat. Piffissalli ingerlanerani erseqqissumik paasinarsissaaq inuuinnarniarluni aattornissaq Guutip inerteqqutigigaa. Aamma Guutip aammut tunngatillugu siunertaata nersornartup naammassineqarnissaanut Noakkut nalunaarutaa iliuusiuvoq angisooq — siunertaq inunnik naassaanngitsumik inuusinnaanngortitsisussaq.
6. Guutip Noamut peqqussuteqarnermigut inuunermik erlinnartutut isiginninni qanoq erseqqissarpaa?
6 Guuti nangippoq: „Ilissi nammineq aassi akiniunneqarnissaa piumasariumavara; akiniunneqarnissaa uumasumit sumilluunniit piumasariumavara; inuullu inuunerata akiniunneqarnissaa inummit kimilluunniit piumasariumavara. Inuup aavanik kuisisup aava aamma inunnit kuineqassaaq, Guutip inuk pinngortimmagu imminik assililluni.“ (1 Mosesi 9:5, 6) Inuiannut tamanut nalunaarummit tassannga ersersinneqarpoq Guutip inuup aava inuuneranut assersuutaasutut isigigaa. Pinngortitsisup inuk inuunermik tunisimavaa, inuunerlu taanna, aammut assersuunneqartoq, kialuunniit kipitissanngilaa. Inuk Kainitut inoqamminik toqutsippat Pinngortitsisoq piumasaqarsinnaatitaavoq toqutsisup inuunini akigissagaa.
7. Sooq Guutip aak pillugu Noamut nalunaarutaa soqutigisariaqarparput?
7 Guutip nalunaaruteqarnermigut inunnut peqqussutigaa aak atornerlussanngikkaat. Sooq taamaaliornersoq Guutillu aammut isiginnittaasianut suna tunuliaqutaanersoq eqqarsaatigisimaviuk? Akissut Biibilimi ajoqersuutit pingaarnerit ilaannut tunngassuteqarpoq. Kristumiut tusarliussaata pingaarnersaanut tunngassuteqarpoq, naak tamanna upperissarsiortorpassuarnit sumiginnarneqaraluartoq. Ajoqersuut suua, qanorlu inuuninnik, aalajangiisarninnik iliuutsinnillu attuiva?
Aak qanoq atorneqarsinnaava?
8. Aap atorneqarnissaa pillugu Jehova Inatsisini qanoq killiliiva?
8 Inatsisini Israelikkunnut tunniussamini Jehovap inuuneq aallu pillugit amerlanerusunik paasissutissippai. Taamaaliornermigut siunertami naammassineqarnissaanut iliuuseqaqqippoq. Inatsisinimi piumasarineqarpoq Guuti pilliivigineqartassasoq, soorlu karrinik, uuliamik viinnimillu. (3 Mosesi 2:1-4; 23:13; 4 Mosesi 15:1-5) Aammali uumasunik pilliisoqartarpoq, taakkulu pillugit Guuti ima oqarpoq: „Uinngup uumassutaa aammiippoq, ilissinnummi tunniuppara pilliivimmut ilisassanngorlugu saammaannarsissutissassinnik. Aak saammaannartitsissutaavoq uumassut tassaniimmat. Taamaattumik maanna Israelikkut oqarfigaakka: ’Aammik nerissanngilasi.’“ Jehova nangilluni oqarpoq uumasumik nerisassaminik pisaqartup toqutsisulluunniit, soorlu piniartup naggorissaasulluunniit, pisami aava kuutsissagaa issumillu matoorlugu. Nunarsuaq Guutip tummarfigaa, aammillu nunamut kuutsitsinikkut akuerineqartarpoq inuuneq Inuunermik Tunisisumut utertinneqartoq. — 3 Mosesi 17:11-13; Esaja 66:1.
9. Aak taamaallaat sumut atorneqassasoq Inatsisini peqqussutigineqarpa, sunalu siunertaava?
9 Aaqqissuussineq tamanna upperisarsiornikkut ileqqulersuutaannaanngilaq ullumikkut uatsinnut pingaaruteqanngitsoq. Malugaajuk Israelikkut sooq aattorsinnaanngitsut? Guuti oqarpoq: „Taamaattumik maanna Israelikkut oqarfigaakka: ’Aammik nerissanngilasi.’“ Suna pissutaava? „Ilissinnut [aak] tunniuppara pilliivimmut ilisassanngorlugu saammaannarsissutissassinnik.“ Tamanna ilutigalugu nassuiarneqarpoq sooq Guuti Noamut oqartoq inuit aattortassanngitsut. Pinngortitsisoq aalajangerpoq aak pingaaruteqangaartutut isigineqassasoq, siunertamut immikkut ittumut inuppassuit inuunerannik annaassissutaasutut immikkoortinneqarluni. Aak ajortit matoorneqarnissaannut imaluunniit saammaanneqarnissaannut atatillugu pingaaruteqartussaassaaq. Inatsisit atuunnerisa nalaanni aak ataasiinnarmut atorneqassasoq Jehovap akueraa, tassalu pilliivimmi kuineqarnissaa Israelikkut Jehovamut isumakkeerfigeqqullutik saammaannarsissutissaannik.
10. Sooq uumasut aavat isumakkeerfigineqarluinnarnermik kinguneqarsinnaanngila, Inatsisillu atuunnerisa nalaanni pilliutit Israelikkunnut sumik eqqaasitsippaat?
10 Aap saammaassissutaasinnaanera kristumiussusermi ajoqersuummut naapertuupportaaq. Apustili kristumiu Paulusi ima allakkami Inatsisini tassunga tunngasorpiaq innersuussutigaa: „Inatsisit malillugit suut tamangajammik aammik eqqiarneqartarput, isumakkeerfiginninnerlu pisinnaanngilaq aammik kuisineqartinnagu.“ (Hebræerit 9:22) Paulusip erseqqissarpaa pilliutit inatsisitigut piumasarineqartut Israelikkut tassaalersinngikkaat inuit naammalluinnartut ajorteqanngitsullu. Allappoq: „Pilliutiniippoq ajorteqarnermik eqqaasinneqartarneq ukiut tamarluinnaasa. Ussigimmi angutivissat savaasallu angutivissat aavata ajortuliat piiarsinnaanngilluinnarpaat.“ (Hebræerit 10:1-4) Taamaakkaluartoq pilliutit taamaattut siunertaqarput. Israelikkut ajortiliunerminnik aamma isumakkeerfigineqarluinnassagunik annerusumik iliuuseqartoqartariaqarneranik eqqaasinneqarput. Uumasulli aavat inuit ajortaannik tamakkiisumik matussusiisinnaanngippat, tamatumunnga taartaasinnaasumik aattut ittumik peqarpa?
Inuunermik Tunisisup aaqqissuussaa naammalluinnartoq
11. Qanoq ililluta nalunngilarput uumasut aavat annerusumut tikkuussisoq?
11 Guutip piumasaata naammassinneqarnissaanut pingaaruteqangaarnerusumik Inatsisit tikkuussipput. Paulusi aperivoq: „Inatsisit taava suna siunertaraat?“ Akivorlu: „Tapiliussatut ilanngussaapput unioqqutitsinerit pillugit [ilisimaneqalersikkumallugit, NV], kinguaassalli neriorsuiffigineqartup tikiunnissaata tungaannaanut atuuttussaallutik. Tunniunneqarput inngilitigut, akunnermiliuttoq [Mosesi] aqqutigalugu.“ (Galatiamiut 3:19) Allami Paulusi allappoq: ’Inatsisit ajunngitsuutit nalliuttussat pissusiviat piginagu tarraannaannik pigisaqarput.’ — Hebræerit 10:1.
12. Aammut atatillugu Guutip siunertaata qanoq ingerlasimanera takusinnaavarput?
12 Maannamut ilinniarparput Guuti Noap nalaani nalunaartoq inuit inuuinnarniarlutik uumasut neqaanik nerisinnaasut, aattussanngitsulli. Kingusinnerusukkut Guuti oqarpoq ’uinngup uumassutaa aammiittoq’. Tassa aalajangerpoq aak inuunermut assersuutaassasoq, oqarlunilu: „Ilissinnummi [aak] tunniuppara pilliivimmut ilisassanngorlugu saammaannarsissutissassinnik.“ Tupinnangaartumilli Guutip siunertaa paasinarsisinneqaqqikkumaarpoq. Inatsisimmi ajunngitsuutit takkuttussat tarraraat. Suut?
13. Sooq Jiisusip toqua pingaaruteqarpa?
13 Piviusut imaluunniit „nalliuttussat pissusiviat“ Jiisusi Kristusip toquneranut atassuteqarput. Nalunngilarput Jiisusi naalliutsinneqarluni qisummut kikiattorneqartoq, aamma pinerluttutut toqusoq. Paulusi allappoq: „Suli sanngiitsuutilluta Kristusi iluaatsut pillugit toquvoq piffissaq nalliummat. Guutilli uagutsinnut asanninnini takutippaa ajortiliugallartilluta Kristusip pilluta toquneratigut.“ (Romamiut 5:6, 8) Uagut pilluta toqunermigut Kristusip utertitsissut, ajortitta matoorneqaatissaat, pilersippaa. Utertitsissut taanna kristumiut tusarliusaannut tunngaviuvoq. (Matthæusi 20:28; Johannesi 3:16; 1 Korinthimiut 15:3; 1 Timotheusi 2:6) Utertitsissut, aak inuunerlu imminnut qanoq attuumassuteqarpat, tamannalu inuunitsinnut qanoq sunniuteqarpa?
14, 15. (a) Efesosimiut 1:7-ip nutserneqarnerani Jiisusip toqua ilaasa qanoq pingaarnerutillugu ersersittarpaat? (b) Efesosimiut 1:7-imut atatillugu suna arajutsineqarsinnaava?
14 Upperissarsiortut ilaasa Jiisusip toqua pingaartittarpaat. Assersuutigalugu tapersersuisui ima oqartarput: „Jiisusi uanga pillunga toquvoq.“ Malugeriaruk Biibilimik nutserisut ilaasa Efesosimiut 1:7 qanoq nutsersimaneraat: „Tassuuna toquatigullu aniguisitsissuteqalerpugut, tassa imaappoq unioqqutitsinivut peerneqarput.“ (The American Bible Frank Scheil Ballentinemit, 1902) „Kristusip toquatigut kiffaanngissuseqalersimavugut, tassa ajortitsinnik isumakkeerfigineqarpugut.“ (Today’s English Version, 1966) „Kristusikkummi inuunerminillu pilliutaa aqqutigalugu aniguisinneqarpugut, aniguisitaaneq tassaasoq ajortinik isumakkeerfigineqarneq.“ (The New Testament William Barclaymit, 1969) „Kristusip toqua aqqutigalugu ajortitsinnik isumakkeerfigineqarpugut aniguisinneqarlutalu.“ (The Translator’s New Testament, 1973) Ersarippoq nutsikkani taakkunani Jiisusip toqua pingaartinniarneqarnerusoq. ’Kisiannimi,’ ilaat oqassannguatsiarput, ’Jiisusip toqua pingaarutilerujussuuvoq. Nutsikkat taakkua suna ajoqutigigamikku?’
15 Nutsikkat taakkuinnaat pigisimagaluarutsigit pingaarutilik arajutseqqajarsimassagaluarparput, taamaattoqarsimasuuppallu Biibilimi tusarliusamik paasinninnerput killilerneqarsimassagaluarpoq. Tassami nutsikkani taakkunani piviusoq paasiuminaallisinneqarpoq, tassa Efesosimiut 1:7-imi allassimaqqaarfiani grækerit oqaasiat „aak“-mik isumalik atorneqarpoq. Taamaattumik Biibilimik nutsigarpassuarni, soorlu Biibili-mi, Biibilip allanneqaqqaarnerani oqaatsit atorneqartut eqqorluarnerusumik nutserneqarsimapput: „Taassumani utertitaavugut aavatigut, ajortitsinnik isumakkeerfigineqarluta Guutip saammaanneragut angingaartukkut.“
16. Oqaatsip „aavatigut“ sumik eqqarsaatiginnilersissavaatigut?
16 Oqaaseq „aavatigut“ isumaqartorujussuuvoq, tamatumalu aammut tunngasunik tamanik eqqarsaatiginnilersissavaatigut. Toqusoqarnera naammanngilaq, allaat inuup naammalluinnartup Jiisusip toqunera naamik. Aamma taassuma Inatsisini siumut assersuunneqartut eqquutitippai, ingammik ullormi saammaannartitsivimmi. Ullormi tassani immikkut ittumi uumasut Inatsisini aalajangersakkat malillugit pilliutigineqartarput. Taava palasiuneq uumasut aavata ilaanik tiguseriarluni Illernarnerpaamut, tupermi illernartuutiliami naalaffimmiluunniit inimut ilorlermiittumut, eqquttarpaa. Tassanilu aak Guutimut sassaattarpaa, soorlu taassuma najugaaniilluni. — 2 Mosesi 25:22; 3 Mosesi 16:2-19.
17. Jiisusip qanoq ililluni ullormi saammaannartitsivimmi siumut assersuutigineqartoq eqquutitippaa?
17 Paulusip nassuiaaneratut Jiisusip ullormi saammaannartitsivimmi siumut assersuutigineqartoq eqquutitippaa. Siullermik eqqaavaa Israelimi palasiuneq ukiumut ataasiarluni aammik eqqussisartoq „nammineq inuiaqatimilu piaarinatik ajortuliatik pillugit“. (Hebræerit 9:6, 7) Assersuut taanna naapertorlugu Jiisusi anersaatut makititaanermi kingorna qilammut iserpoq. Anersaajugami inuttut uineqarnanilu aaqannginnami ’Guutip kiinaata saanut sassarsinnaavoq iluaqutissatsinnik’. Guutimut suna sassaappaa? Tigussaasumik sassaassaqarnani pingaartorujussuarmilli sassaassivoq. Paulusi allappoq: „Kristusi tikiussimavoq palasiunerussalluni . . . Savaasat angutivissat nersuteeqqallu aavannik pinnani kisianni nammineq aamminik nassataqarluni ataasiaammik Illernarnerpaamut iserpoq utertinneqaatissillutalu naassaanngitsumik. Savaasammi angutivissat ussigillu angutivissat aavannik . . . inuit mingussimasut illernarsarneqarsinnaappata qallikkullu minguitsunngortitaallutik, taava Kristusip anersaakkut ittuinnartukkut pilliutitut innarluuteqanngitsutut imminut Guutimut sassaattup nalunngeqatiginnissuserput ajunnginnerungaartumik sulianit toqungasunit eqqiarsinnaassavaa nammineq aamminik piiarlugit taamalu Guutimut uumasumut kiffartorsinnaalersilluta.“ Aap, Jiisusip aammi nalinga Guutimut sassaappaa. — Hebræerit 9:11-14, 24, 28; 10:11-14; 1 Petrusi 3:18.
18. Sooq Biibilimi aak pillugu oqaatigineqartut ullumikkut kristumiunut pingaaruteqarpat?
18 Sallusuissut taanna iluaqutigaarput Biibilimi aak pillugu allaatigineqartunik pingaarutilinnik paasinninnissatsinnut — sooq Guutip aak taamatut isigineraa, uagut aammut qanoq isiginnittaaseqartariaqarnersugut aamma sooq Guutip aap atorneqarnissaa pillugu killiliinera ataqqisariaqarneripput. Kristumiut Allagaataat Grækerisuut atuaraanni „Missiarsip aavanut“ innersuussuterpassuit malugineqassapput. (Ungalusaq takuuk.) Allassimaffiit taakkua ersarissumik takutippaat kristumiut tamarluinnarmik ’[Jiisusip] aava’ upperisariaqaraat. (Romamiut 3:25) „[Jiisusip] aavagut“ aatsaat isumakkeerfigineqarsinnaavugut Guutimillu eqqisseqateqarluta. (Kolossemiut 1:20) Tamanna minnerunngitsumik atuuppoq Jiisusip qilammi naalakkersueqatissamisut immikkut isumaqatigiissuteqarfigisimasaanut. (Lukasi 22:20, 28-30; 1 Korinthimiut 11:25; Hebræerit 13:20) Tamannali aamma ’amerlangaartunut’ „annikilliornartitaangaarnermit“ aniguisussanut nunamilu paratiisiusumi naassaanngitsumik inuulersussanut ullumikkut atuuppoq. Assersuutitut oqaatigalugu ’atisaminnik Savaaqqap aavanut eqqiaapput’. — Saqqummersitat 7:9, 14.
19, 20. (a) Sooq Guutip aammik atuinissaq killilersimavaa, tamatumunngalu qanoq isiginnittaaseqartariaqarpugut? (b) Suup paasinissaa soqutigisariaqarparput?
19 Taamaattumik ersarippoq aak Guutip isaani immikkut pingaaruteqartoq. Aamma uagutsinnut taamaattariaqarpoq. Pinngortitsisoq inuunermik pingaartitseqisoq inuit aammik atuinerannut killilersuisinnaatitaavoq. Uagutsinnik isumassuingaarnermini aalajangerpoq aak ataasiinnarmut pingaarutilerujussuarmut atorneqarsinnaasoq, tamannalu naassaanngitsumik inuulernissamut periarfissiisutuaavoq. Tamanna Jiisusip aavanut akisuumut tunngassuteqarpoq. Qujamasuutigingaarsinnaavarput Jehova Guutip aak — Jiisusip aava — atorlugu taamatut inuunermik annaassiniarluni taama asannitsigisumik isumassorsimammatigut! Jiisusip aamminik uagut iluaqutissatsinnik pilliuteqarsimanera pingaartittariaqarparput! Aap, apustili Johannesip oqaasii isumaqatigisinnaavavut: „Taassuma asasitta aamminillu ajortitsinnit aniguisitsisitta, inuianngortitsisitta kunngikkormiuusut Guutimullu ataataminut palasinngortitsisitta naalannaat pissaanerlu pigiligit naassaanngilluinnartumik. Amen.“ — Saqqummersitat 1:5, 6.
20 Guutitta Inuunermillu Tunisisitta tamanik ilisimasup itsarsuarli siunertarisimavaa aak taamatut inuunermik annaassiniarluni atorneqassasoq. Taamaattumik pissusissamisuussaaq ima aperissalluni: ’Aalajangiinivut iliuutsivullu tamatumannga qanoq sunnerneqartariaqarpat?’ Apeqqut taanna allaaserisami tulliuttumi nassuiarneqassaaq.
Qanoq akissavit?
• Guutip aammut isiginnittaasia pillugu Kaini Noalu pillugit oqaluttuat qanoq ilinniutigisinnaavavut?
• Aap atorneqarnissaa pillugu Guuti Inatsisini qanoq killiliiva, aamma sooq?
• Ullormi saammaannartitsivimmi siumut assersuutigineqartoq Jiisusip qanoq eqquutitippaa?
• Jiisusip aava atorlugu inuunerput qanoq annaanneqarsinnaava?
[Atuaqqissaarnermi apeqqutit]
[Qupp. 24-mi ungalusaq]
AAK INUUNERMIK ANNAASSISUTAASOQ
„Immissinnut misissugariniaritsi savaatittaarlu tamaasa misissugaralugit; Anersaammi Illernartup taakkununnga nakkutilliisunngortippaasi Guutip ilagiissai nammineq aamminik pissarsiai paareqqullugit.“ — Apustilit Suliaat 20:28.
„Maannali uagut Kristusip aava pissutigalugu iluartuutitaasugut taassumuuna kamannermit annaanneqarnissarput annerungaassaaq.“ — Romamiut 5:9.
„Taamani . . . neriuutissaqarnasi silarsuarmilu Guuteqarnasi. Maannali Kristusi-Jiisusimiilerassi ilissi qanga Guutimit ungasikkaluartusi Kristusip aavatigut qanillivusi.“ — Efesosimiut 2:12, 13.
„Guutimmi peqangaassusia aalajangerpoq taassumani ineqarumaarluni taassumuunalu . . . tamaasa imminut saammaannartikkumallugit aavagut sanningasulimmiittukkut eqqissineqalersitsilluni.“ — Kolossemiut 1:19, 20.
„Qatanngutit! Jiisusip aava nakimaassutigaarput illernartuummut isersinnaannguutigalugu.“ — Hebræerit 10:19.
„Ilisimavarsi ileqqussinnit piunngitsunit siuaasassinnit kingornussassinnit utertinneqarsimannginnassi . . . nungujasut akigalugit, akiliunneqarsimallusili Kristusip aavanik erlinnartumik, soorlu savaaqqap assuarnaatsup innarluuteqanngitsuusullu aavanik.“ — 1 Petrusi 1:18, 19.
„Qaamasumi inuugutta, soorlu aamma taanna qaamasumiittoq, taava peqatigiissaagut erneratalu Jiisusip aavata tamanik ajortaajassavaatigut.“ — 1 Johannesi 1:7.
„Illit qinngaqqunnanngilatit mappersagaq pissallugu naqissutaassallugulu, toqunneqarsimagavit pisiaralugillu aannik inuit Guutip pigisassai naggueqatigiinnit immikkullu oqaasilinnit inuiannillu inuiaqatigiinnillu tamanit pisut.“ — Saqqummersitat 5:9.
’Qatanngutitta unnerluutiginnittaat igitaavoq. Ajugaaffigaat Savaaqqap aavatigut oqaatsitigullu nalunaajaassutigisamikkut.’ — Saqqummersitat 12:10, 11.
[Qupp. 22-mi assiliartaq]
Inatsisit aqqutigalugit Guuti erseqqissumik paasititsivoq aak ajortinik isumakkeerfiginninnermut atatillugu pingaaruteqartoq
[Qupp. 23-mi assiliartaq]
Jiisusip aava inuppassuit inuunerannik annaassissutaavoq