’Jehovap aalajangiinera’ pinngitsoorani iluatsittussaavoq

„Nalunaajaatigissavara [Jehovap] aalajangiinera. Oqarfigaanga: ’Illit erneraakkit . . .Qinnuigigamma taava tunniutissavakka inuiaat illit pigisassattut.’“ — TUSSIAAT 2:7, 8.

1. Guutip siunertaa inuiaallu siunertaat qanoq assigiinngissuteqarpat?

JEHOVA GUUTIP inuit nunarsuarlu siunertaqarfigai. Inuiaat aamma siunertaqarput, imaluunniit anguniagaqarput. Guutilli inuillu siunertaat assigiinngilluinnarput! Tamanna naatsorsuutigiinnarsinnaavarput, Guutimi ima oqarpoq: „Soorlu qilak nunamit qutsinnerusoq, taama aqqutigisakka ilissi aqqutigisassinnit qutsinnerupput pilersaarutikkalu pilersaarutissinnit qutsinnerullutik.“ Guutip siunertaata naammassineqarnissaa qularnaappoq, imami nangippoq: „Soorlu sialuit qaniillu nakkartartut qilammit tassungalu utissanatik nunali masatsertarlugu, inerititaqalersittarlugu naalersoqalersittarlugulu, tunniussaqartarlutik siaruartigassanik siaruarteriumasunut inuussutissanillu neriumasunut, taama ippoq oqaasera qaninnit anisoq: Susaarluni uannut utissanngilaq, kisianni suliareqqusakka suliarissavai naammasseqqusakkalu naammassissallugit.“ — Esaja 55:9-11.

2, 3. Tussiaatit aappaanni suna erseqqippa, suulli apeqqutaalerpat?

² Guutip kunngiutitaminut Missiarsiusumut atatillugu siunertaa naammassineqarumaartoq erseqqilluarpoq Tussiaat 2-mi, Daavimit itsaq Israelimi kunngiusumit allanneqartumi. Taassuma Guutimit isumassarsisinneqarluni siulittuutigaa piffissaq maluginiarnartoq nalliukkumaartoq inuiaat pikitsitsiffissaat. Taakkua naalakkersuisui Jehovamut Tanitaanullu akerliussapput. Tussiaammili aamma ima allassimavoq: „Nalunaajaatigissavara [Jehovap] aalajangiinera. Oqarfigaanga: ’Illit erneraakkit . . . Qinnuigigamma taava tunniutissavakka inuiaat illit pigisassattut, nunarsuarlu isorartooq kingornussarsiassattut.’“ — Tussiaat 2:7, 8.

³ ’Jehovap aalajangiinera’ inuiannut qanoq isumaqassava?  Inuinnarnik qanoq attuissava? Tussiaat 2-millu atuartunut Guutimik mianerinnittunut tamanut qanoq isumaqassava?

Inuiaat pikitsitsisut

4. Tussiaat 2:1, 2-mi pingaarnersat qanoq eqikkassavigit?

⁴ Tussiaasiortup erinniani aallartippaa inuiaat taakkualu naalakkersuisuisa pissusilersornerat ima uparuarlugu: „Sooq inuiaqatigiit pikitsitsippat? Sooq inuiaat pilersaarusiorpat iluatsittussaanngitsunik? Nunarsuup kunngii saassussinialerput, naalagaanerit iligiilerput [Jehovamut] taassumalu tanitaanut akerartorlutik.“ — Tussiaat 2:1, 2. *

5, 6. Inuiaat qanoq ’pilersaarusiortuarpat iluatsittussaanngitsunik’?

⁵ Nalitsinni inuiaat qanoq „pilersaarusiorpat iluatsittussaanngitsunik“? Guutip tanitaa — Missiarsi, imaluunniit Kristusi — ilassinagu namminneq pissaanertik annaajumanagu ’pilersaarusiortuarput’. Tussiaatit aappaanni oqaatsit taakku aamma ukiuni hundredelinni siullerni eqquupput juutit Romamiullu oqartussaasuisa peqatigiillutik Jiisusi Kristusi, Guutimit kunngissatut toqqagaasoq, toqutaatimmassuk. Annerusumilli eqquunnera 1914-imi aallartippoq Jiisusi qilammi kunnginngormat. Taamanerniilli nunarsuarmi naalakkersuisut ataatsilluunniit Guutip kunnginngortitaa akuerinngilaat.

⁶ Tussiaasiortup apeqqutaa una qanoq isumaqarpa: „Sooq inuiaat pilersaarusiorpat iluatsittussaanngitsunik?“ Pilersaarutaat siunertaallu iluaqutaanngillat, iluatsinngitsoortussaapput. Siuttuusut nunarsuarmi eqqissisitsisinnaanatillu aaqqiagiilersitsisinnaanngillat. Taamaattoq allaat Guutip naalakkersuinera akerlilersorpaat. Aap, Qutsinnerussaartoq Tanitaalu ataatsimoorlutik saassunnialersaalerpaat. Sianiilliornerussusia!

Jehovap kunngiutitaa ajugaasoq

7. Jiisusip ajoqersugaasa siulliit Tussiaat 2:1, 2 qinnummi qanoq atorpaat?

⁷ Kristumiut siulliit oqaatsit Tussiaat 2:1, 2-mi allassimasut Jiisusimut tunngatittarpaat. Uppernertik pillugu malersorneqaramik ima qinupput: „Naalagaq, illit qilammik nunamillu immamillu taakkunaniittunillu tamanik pinngortitsisutit, illit Anersaakkut Illernartukkut kiffat Daavi nagguigisarput aqqutigalugu oqartutit: Sooq inuiaqatigiit pikitsitsippat? Sooq inuiaat pilersaarusiorpat iluatsittussaanngitsunik? Nunarsuup kunngii saassussinialerput, naalagaanerit iligiilerput [Jehovamut] taassumalu tanitaanut akerartorlutik. Ilumummi kiffat illernartoq Jiisusi tanissimasat assortorlugu illoqarfimmi matumani iligiilersimapput Herodesi [Antipasi] Pontiusi-Pilatusilu inuiaat Israelillu naggueqatigiissortaat peqatigalugit.“ (Apustilit Suliaat 4:24-27; Lukasi 23:1-12) * Tassa ukiuni hundredelinni siullerni Guutip kiffaanut tanitamut Jiisusimut perlulioqatigiinniartoqarpoq. Ukiulli hundredelikkuutaat tamatuma kingorna tussiaat taanna eqquuteqqittussaavoq.

8. Nalitsinni inuiannut Tussiaat 2:3 qanoq attuumassuteqarpa?

⁸ Taamani Israelitoqaq inummik kunngeqarallarmat, soorlu Daavimik, inuiaat naalakkersuisullu Guutimik nalusut Guutimut kunnginngortitaanullu tanitamut ataatsimoorlutik akerliupput. Ullumikkummi? Nalitsinni inuiaat Jehovap Missiarsillu piumasaqaataannik maleruaajumanngillat. Taamaattumik ima oqartutut allaatigineqarput: „Qartorartigit kalunniliussaat allunaasarsuarnit qilersuutaannit aniguilluta.“ (Tussiaat 2:3) Naalakkersuisut inuiaallu Jehovap Tanitaatalu killilersuutaannut tamanut akerliussapput, kalunnernilli qartoraaniaraluarnerat pituutaajaaniaraluarnerallu soorunami iluatsinngitsuussaaq.

Jehovap mitaatigai

9, 10. Sooq Jehovap inuiaat mitaatigai?

⁹ Inuiaat naalakkersuisuisa oqartussaanertik annaajumanagu akiuunnerat Jehovap eqqissiunnaarutiginngilaa. Tussiaat 2 ima nanginneqarpoq: „Qilammi issiavissaarsuarmi issiasoq illarpoq, [Jehovap] mitaatigai.“ (Tussiaat 2:4) Guutip siunertani naammassissavaa soorlulusooq naalakkersuisut taakku piunngitsut. Kannguttaatsuliornerat illaatigaa mitaatigalugillu. Qanoq iliorniarsarinertik oqarissaarutigiinnarlissuk. Jehovap isaani tissinaannarput. Iluaqutaanngitsumik akerliunerat illaatigaa.

 ¹⁰ Tussiaatit arlaanni Daavip inuit inuiaallu akeqqersimaartut ima oqaatigai: „Illit Katersaarsuit Naalagaat [Jehova], Israelip Guutia, iterit inuiaallu tamaasa pillarlugit, pinerluttut unneqqaserluttut arlaannaalluunniit asattuuteqinagu! Akeqqakka unnulersukkut utertarput miaggoorlutik qimmisut illoqarfillu angalaarfigalugu. Kipissanatik oqalupput, panamik qarlormioqarput oqaramik: Kia oqaatsivut tusassagamigit? Kisianni illit [Jehova] illaatigiinnarpatit, inuiaat tamaasa asissorpatit.“ (Tussiaat 59:6-9) Jehovap inuiaat oqarissaarnerat sianiitsorpallattumillu pikitsitsiumatuumillu pissusilersornerisa kingunerisaannik ularussineq illaatigai.

11. Inuiaat Guutip siunertaanik akerlilersuinerat qanoq kinguneqassava?

¹¹ Guutip unamminiarnartumik sumilluunniit sapigaqannginneranik upperinninnerput oqaatsinit Tussiaat 2-mi allassimasunit nakusatsinneqarpoq. Qularinngissinnaavarput piumasani naammassiuaannaraa kiffanilu ilumoorfiginnittut pakatsisinngisaannassagai. (Tussiaat 94:14) Taavami inuiaat Jehovap siunertaanik akerlilersuinerat qanoq kinguneqassava? Tussiaat taanna naapertorlugu Guutip ’kamalluni oqarfigissavai’, kallerujussuarneratulli. Aammattaaq ’annilaartingaassavai’ „uumitsannermini“, soorlulusooq innaallannerujussuarmik eqqorlugit. — Tussiaat 2:5.

Guutip kunngioqqusaa ivertinneqareerpoq

12. Tussiaat 2:6 naapertorlugu Jehovap kina kunngisut ivertereerpaa, aamma sumi?

¹² Jehovap tussiaasiortoq aqqutigalugu nangilluni oqaasii qularnanngitsumik inuiaat eqqissiunnaarutigaat. Guuti ima nalunaarpoq: „Uanga kunngioqqusara ivertereerpara Zionimi, qaqqanni illernartumi!“ (Tussiaat 2:6) Qaqqaq Zioni tassaavoq qaqqaq Jerusalemimiittoq, Daavip Israelimut tamarmut kunnginngorfigisaa. Kunngili Missiarsiusoq Jerusalemimi nunarsuulluunniit ilaani allami issiavissaarsuarmi issiassanngilaq. Piviusut takutippaat Jehovap Jiisusi Kristusi kunngisut Missiarsiusutut toqqakkamisut Qaqqami Zionimi qilammiittumi ivertereeraa. — Saqqummersitat 14:1.

13. Jehovap erni sumik angerfigeqatigaa?

¹³ Maanna kunngi Missiarsiusoq nammineq oqalulerpoq. Ima oqarpoq: „Nalunaajaatigissavara [Jehovap] aalajangiinera [Guutip erni Guutip naalagaaffia pillugu angerfigeqatigaa]. [Jehova Guutip] oqarfigaanga: ’Illit erneraakkit, ullumi ernertaaraakkit.’“ (Tussiaat 2:7) Kristusip Guutip naalagaaffia pillugu angeruseq taanna eqqarsaatigaa apustilini ima oqarfigigamigit: „Ilissi uannut najuuttuartuuvusi misilinneqarfigisanni; angerfigeqatigaassilu, soorlu Ataatama uanga angerfigeqatigigaanga, naalagaaffik pillugu.“ — Lukasi 22:28, 29, NV.

14. Sooq Jiisusip kunngiusussaatitaanera assortorneqarsinnaanngila?

¹⁴ Tussiaat 2:7-imi siulittuutigineqartutut Jehovap Jiisusi erneralugu uppernarsarpaa. Tamanna pivoq Jiisusi kuisimmat aamma Jehovap anersaatut makitimmagu. (Markusi 1:9-11; Romamiut 1:4; Hebræerit 1:5; 5:5) Aap, naalagaaffimmi qilammiittumi kunngiusoq tassaavoq Guutip ernitua. (Johannesi 3:16) Kunngi Daavip kinguaavatut kunngiusussaatitaanera assortorneqarsinnaanngilaq. (2 Samueli 7:4-17; Matthæusi 1:6, 16) Tussiaat taanna naapertorlugu Guutip erni ima oqarfigaa: „Qinnuigigamma taava tunniutissavakka inuiaat illit pigisassattut, nunarsuarlu isorartooq kingornussarsiassattut.“ — Tussiaat 2:8.

15. Sooq Jiisusi qinua inuiaat kingornukkumallugit?

 ¹⁵ Kunngi — Guutip nammineq ernera — Jehovamut oqartussaanerpaamut tullersortaavoq. Jiisusi tassaavoq Jehovap ernera misilinneqarsimasoq, ilumoorfiginnittoq tatiginartorlu. Aap, tassaavoq „Guutip takussaanngitsup assinga, pinngortitaani tamani erniusut siullersaat“. (Kolossemiut 1:15) Taamaalilluni angajulliliap kingornussassai kingornuttussaavai. Allamik iliuuseqarani qinnutigiinnartussaavai, Guutillu ’tunniutissavai inuiaat taassuma pigisassaatut, nunarsuarlu isorartooq kingornussarsiassaatut’. Jiisusi taamatut qinnuteqarpoq ’inuit nuannaarutigigamigit’ qamuunalu kissaatigigamiuk Ataatami qilammiusup nunarsuarmut inunnullu piumasaanik naammassinninnissani. — Ussatit 8:30, 31.

Jehovap aalajangiinera naammassineqassaaq

16, 17. Tussiaat 2:9 naapertorlugu inuiaat qanoq pineqassappat?

¹⁶ Tussiaat 2 tamarmi ullumikkut, Jiisusip takussaanani najuunnerani, eqquuttussaammat inuiaat qanoq pineqassappat? Guutip nalunaarutaa una kunngip taassuma qanittukkut piviusunngortissavaa: „Kunngisut tigumiannik saviminiusumik sequmisissavatit aserorterlugillu marriortup immersagaataasut.“ — Tussiaat 2:9.

¹⁷ Kunngisut tigumiaq itsaq kunngip oqartussaaneranut assersuutaavoq. Kunngisut tigumiat ilaat saviminiupput, tussiaammi eqqaaneqartoq assigalugu. Uani assersuusiarineqarnerani erserpoq kunngi Kristusip inuiaat qanoq sequmiseriaannaatigissagai. Kunngisut tigumiamik saviminiusumik sunniuteqarluartumik anaasineq marriortup qummuattaataanik marraasunik annaanneqarsinnaajunnaarlugit sequmiilluinnarnerussaaq.

18, 19. Nunami kunngit Guutimit iluarisaajumallutik qanoq iliortariaqarpat?

¹⁸ Inuiaat naalakkersuisuisa sequmisitaanissaq tamanna pinngitsoorsinnaavaat? Aap, tussiaasiortummi ima kajumissaarpai: „Ilissi kunngit silatusaaleritsi, siunnersuutit akuersaartarniarsigit nunarsuarmi eqqartuussisut ilissi.“ (Tussiaat 2:10) Kunngit kajumissaarneqarput tusaaqqullugit, silatusaaqqullugit. Guutip naalagaaffiata inunnut iluaqutaasumik iliuusissaanut sanilliullugit pilersaarutitik qanoq iluaqutaanngitsigisut eqqarsaatigisariaqarpaat.

¹⁹ Nunami kunngit Guutimut iluarisaalerumallutik iliuutsitik allanngortittariaqarpaat. Ima kajumissaarneqarput: „[Jehova] kiffartorfigisiuk mianeralugu qiimmattaritsilu uulillusi!“ (Tussiaat 2:11; vers 12-imut quppernerup ataani ilanngussaq) Taamaaliorunik qanoq pineqassappat? Pikitsitsinatik perulluliorniarsarinatillu kunngip Missiarsiusup neriuutigititaasut siunissaq nuannaarutigisinnaassavaat. Nuannaarutigisinnaassagunikku nunami naalakkersuisut makitasuujuneq pingaakujunerlu naalakkersuinermik ilisarnaatigisaat qimattariaqassavaat. Aammattaaq nangaanatik taamatut allannguisariaqarput, paasisariaqarpaallu Jehova nunami qilammilu kisimi oqartussaasuusoq, taassuma naalakkersuinera namminneq naalakkersuinerminnit pitsaanerungaartoq, Guutimullu taassumalu Missiarsiutitaanut akerlilersuinertik iluatsinnavianngitsoq.

’Kunissiuk erneq’

20, 21. ’Ernermik kunissineq’ qanoq isumaqarpa?

²⁰ Tussiaat 2 naapertorlugu maanna inuiaat naalakkersuisui nallittuisumik kajumissaarneqarput. Jehovamut Tanitaanullu ataatsimoorlutik saassussinialersaarnatik siunnersuut una  malittariaqarpaat: „Kunissiuk ernera; kamaleqqunagu nungutitaaqqunasilu; tassanngaannarmi kamalersinnaasarpoq.“ (Tussiaat 2:12a; quppernerup ataani ilanngussaq) Naalagaq Jehova kisimi oqartussaasoq aalajangiigaangat, imaluunniit peqqussuteqaraangat, naalanneqartuaannartariaqarpoq. Guutip erni kunnginngortimmagu, nunami naalakkersuisut ’iluatsittussaanngitsunik pilersaarusiorunnaartariaqaraluarput’. Ingerlaannaq Kunngi akuerisariaqaraluarpaat qamanngalu pisumik naalattariaqaraluarlugu.

²¹ Sooq ’erneq kunissavaat’? Taamani tussiaat taanna allanneqarmat kunissineq ikinngutigiinnermut ersiutaavoq, pulaartullu kunillugit tikilluaqquneqartarput. Kunissineq aamma ilumoorfiginninnermut ersiutaasinnaavoq. (1 Samueli 10:1) Tussiaatit aappaanni versimi tassani Guutip inuiaat peqquai ’erneq kuneqqullugu’, tassa Taassuma kunngiutitaatut tanitatut tikilluaqqussagaat.

22. Inuiaat naalakkersuisuisa mianersoqqussut suna ilassisariaqarpaat?

²² Guutip kunngiutitaata toqqakkap oqartussaaneranik akuersiumanngitsut Jehova narrunarsarpaat. Jehova Guutip qilammi nunamilu kisimi oqartussaasuunera inunnullu naalakkersuisussatut kunngimik pitsaanerpaamik toqqaanissamik piginnaaneqarnera oqartussaaneralu akueriumanngilaat. Inuiaat naalakkersuisuisa namminneq pilersaarutiminnik piviusunngortitsiniartillugit Guutip kamanneranit eqqorneqariataassapput. „Tassanngaannaq kamalersinnaasarpoq“, imaaliallaannaq sakkortuumillu. Inuiaat naalakkersuisuisa mianersoqqussut taanna qujamasullutik ilassisariaqarpaat tamannalu naapertorlugu iliuuseqarlutik. Taamaaliorneq inuuginnarnissamut aalajangiisuuvoq.

23. Inuit ataasiakkaat suna suli angumerisinnaavaat?

²³ Tussiaat pissanganartoq taanna ima naavoq: „Pilluarpoq kinaluunniit taassumani qimarnguffissarsiortoq.“ (Tussiaat 2:12b) Inuit ataasiakkaat isumannaatsumut qimarnguffissarsiornissamut suli piffissaqarput. Allaat pissaanillit ataasiakkaat inuiaat pilersaarutaannik tapersersuisimasut aamma taamatut periarfissaqarput. Jehova taassumalu naalagaaffia qimaaffigisinnaavaat. Taamaaliortariaqarpulli Naalagaaffik Missiarsikkoortoq inuiannik akeqqersimaartunik piuneerussitinnagu.

24. Qanoq nalerisimaarnerulluta inuulersinnaavugut, allaat silarsuarmi matumani ajornartorsiorfiusumi?

²⁴ Eqiasuilluta Biibilimik atuaqqissaartarutta siunnersuutillu tassaniittut maleruartarutsigik nalerisimaarnerulluta inuusinnaavugut, allaat maanna silarsuarmi matumani ajornartorsiorfiusumi. Biibilimi siunnersuutit malillugit inuuneq ilaqutariinniittut imminnut qaninnerulissutigisarpaat, ullutsinnilu silarsuarmiittut sioorassutigisaasa isumakuluutigisaasalu ilarpassuinit aniguisitaassutigisarparput. Biibilimi siunnersuutinik maleruaagaangatta, qularutigissanngilarputtaaq Pinngortitsisoq nuannaartittaripput. Qilammi nunamilu kisimi Oqartussaasutut qularnaveeqqusiisinnaasutuaavoq „inuunermut matumunnga piumaartussamullu“ — tassa maannakkut inuunermut nunamillu saleereeruni aqutsinerminillu naapertuilluartumik narruginnittunik piiaareeruni inuunermut. — 1 Timotheusi 4:8.

25. ’Jehovap aalajangiinera’ pinngitsoorani iluatsittussaammat, ullutsinni qanoq pisoqarnissaa naatsorsuutigisinnaavarput?

²⁵ ’Jehovap aalajangiinera’ pinngitsoorani iluatsittussaavoq. Pinngortitsisutut, inunnut suna pitsaanerpaanersoq ilisimannittutut, siunertani naammassissavaa inuillu naalattut ernermi asasami naalagaaffiata ataani eqqissinermik, nalerisimaarnermik ataavartumillu toqqissisimanermik pilluaqqullugit. Nalerput pillugu pruffiiti Danieli ima allappoq: „Kunngit taakkua inuutillugit qilaap Guutiata naalagaaffik qaqugumulluunniit atasussaq pilersikkumaarpaa. . . . Guutip naalagaaffiata kunngeqarfiit allat tamaasa aserortissavai suujunnaarsillugillu, namminerli soraajuitsumik atassaaq.“ (Danieli 2:44) Taamaattumik ’ernerup kuninnissaanut’ Naalakkallu kisimi oqartussaasup, Jehovap, kiffartorfigilernissaanut piffissaarutilerpoq! (wE 7/15 04)

[Quppernerup ataani ilanngussat]

Qanoq akissavit?

• Inuiaat qanoq ’pilersaarusiortuarpat iluatsittussaanngitsunik’?

• Sooq Jehovap inuiaat mitaatigai?

• Jehovap aalajangiinera inuiannut qanoq isumaqassava?

• ’Ernermik kunissineq’ qanoq isumaqarpa?

[Atuaqqissaarnermi apeqqutit]

[Qupp. 26-mi assiliartaq]

Naalakkersuisut Guutimik nalusut Israelikkullu Jiisusi Kristusimut perullulioqatigiipput

[Qupp. 27-mi assiliartaq]

Qaqqami Zionimi qilammiittumi Kristusi kunngisut ivertinneqareerpoq