Pissutissaqanngitsumik uumissorneqartut

„Pissutissaqaratik uumigaannga.“ — JOHANNESI 15:25.

1, 2. (a) Kristumiut ingunneqaraangata inuit ilaasa sooq tupigusuutigisarpaat, uagulli sooq tupaallaatigisariaqanngilarput? (b) Oqaatsip „uumissuineq”-up isumaa sorleq allaaserisami uani misissussavarput? (Takuuk ilanngussaq.)

JEHOVAP NALUNAAJAASUISA najoqqutassat Guutip oqaasianiittut inuunerminni ilungersorlutik malinniartarpaat. Tamatuma kingunerisaanik nunarpassuarni ajunngitsumik tusaamaneqarput. Ilaannikkulli eqqunngilluinnartumik oqaatigineqartarput. Assersuutigalugu Ruslandimi Sankt Petersborgimi naalagaaffimmi atorfilik ima oqaluttuarsimavoq: „Jehovap Nalunaajaasui inerteqqutaasumik immikkut upperusiortutut meeqqanik isertorlutik toqutsisartutut imminortartutullu tusaamavavut.“ Ataatsimeersuarnermili nunanit tamalaanit peqataaffigineqartumi Jehovap Nalunaajaasui suleqatigereerlugit naalagaaffimmi atorfilik ima oqarpoq: „Maannakkut inuit nalinginnaasut qungujulasullu . . . takuakka. Eqqissisimasuupput nipaatsuullutillu asaqatigeeqalutillu.“ Nangipporlu: „Paasisinnaanngivippara sooq inuit taama salluliuutigisartigigaat.“ — 1 Petrusi 3:16.

² Soorunami Guutip kiffaasa ingunneqarneq pinerluttuunerarneqarnerlu nuannarinngilaat, inunnilli eqqartornerlunneqaraangamik tupaallaatigisanngilaat. Jiisusimmi ajoqersukkani ima mianersoqquai: „Silarsuup uumissorpasi ilisimassavarsi ilissi siunissigulli uumissormanga. . . . Taamali pisoqarsimavoq oqaaseq inatsisaanni allassimasoq una eqquuteqqullugu: ’Pissutissaqaratik uumigaannga.’“ * (Johannesi 15:18-20, 25; Tussiaat 35:19; 69:5) Siusinnerusukkut ajoqersukkani ima oqarfigisimavai: „Illumi ittuusoq Beelzebulimik taasimagamikku, qanormi taava ajortigisunik inoqutai taassavaat?“ (Matthæusi 10:25) Kristumiut paasivaat asissugaanerup kanngunarsagaanerullu taamaattup naammagalugu atornissaa ’nappakkamut anniartitaaffimmut’, Kristusimut ajoqersuganngoramik nammakkumallugu angerfigisimasaminnut, ilaasoq. — Matthæusi 16:24, NV.

3. Guutimik pallorfiginnittut ilumoortut qanoq malersorneqartigaat?

³ Guutimik pallorfiginnittunik ilumoortunik malersuineq nutaajunngilaq, ’Abelilli iluartup’ nalaanili taamaattoqartarpoq. (Matthæusi 23:34, 35) Arlalialuinnartigut taama pisoqartarsimanngilaq. Naamik, Jiisusi oqarpoq aqqi pillugu ajoqersukkani ’tamanit uumissorneqassasut’. (Matthæusi 10:22) Aamma apustili Paulusi allappoq Guutip kiffaasa tamarmik — tassa tamarluinnatta — malersorneqarnissartik ilimagisinnaagaat. (2 Timotheusi 3:12) Sooq taamaappa?

Pissutissaqanngitsumik uumissuinermut kina pisuua?

4. Pissutissaqanngitsumik uumissuinernut tamanut kia aallarniisuusarnera Biibilimi qanoq qulaarneqarpa?

⁴ Guutip oqaasiani qulaarneqarpoq aallaqqaammulli takussaanngitsumik uumissuititsisoqartoq. Angutip uppertup siulliup, Abelip, peqqarniitsumik toqunneqarnera eqqarsaatigeriassagit. Biibilimi eqqaaneqarpoq qatanngutaa toqutsiumatooq, Kaini, „ajortumit pisuusoq“, tassa Saatani Diaavulumeersuusoq. (1 Johannesi 3:12) Kaini Saatanitut isumaqaleriartuaarpoq, Saatanillu pilersaarutipiluni piviusunngortinniarlugit Kaini atorpaa. Biibilimi ersersinneqarportaaq Jobimik Jiisusi Kristusimillu ajoqisumik saassussinermi Saatani akuusimasoq. (Jobi 1:12; 2:6, 7; Johannesi 8:37, 44; 13:27) Jiisusip ajoqersugaasa malersorneqarnerannut  kina pisuunersoq Saqqummersitat-ni isertorneqanngilaq, allassimavormi: „Diaavulup ilasi parnaarussivimmut pisikkumaarpai misilinneqaqqullusi.“ (Saqqummersitat 2:10) Aap, Guutip innuttaasa pissutissaqanngitsumik uumissorneqarnerinut tamanut Saatani aallarniisuusarpoq.

5. Saatanip pallorfiginnittunik ilumoortunik uumissuineranut suna pissutaava?

⁵ Saatanip pallorfiginnittunik ilumoortunik uumissuineranut suna pissutaava? Pilersaarummini sualuttumik imminut angisuujutinnermik ersersitsisumi Saatanip „naassaanngilluinnartumik kunngiusoq“, Jehova Guuti, akerlilerpaa. (1 Timotheusi 1:17; 3:6) Oqarpoq Guutip naalakkersuinera killilersuivallaartoq, kialuunniillu Jehova minguitsumik pissuteqarluni kiffartorfigisanngikkaa, namminissarsiortumilli iluanaarniarluni kiffartorfigisaraa. Saatani oqarpoq, inunnik misiliisinnaatitaasuuguni tamarluinnaasa Guutimit tunutsissinnaallugit. (1 Mosesi 3:1-6; Jobi 1:6-12; 2:1-7) Jehova ingullugu sallutuutullu qunutitsisutullu naalagaanerluttutullu isigineqartillugu Saatani imminut unammillerluni kisimi oqartussanngortinniarsarivoq. Taamaattumik Guutip kiffaanut kamangaarnera pallorfigineqarusungaarneranit aallaaveqarpoq. — Matthæusi 4:8, 9.

6. (a) Jehovap kisimi oqartussaanera pillugu apeqqummit qanoq attorneqarpugut? (b) Assuarnaatsuujuarnissatsinnut apeqqummik taassuminnga paasinninneq qanoq iluaqutigaarput? (Qupperneq 22-mi ungalusaq takuuk.)

⁶ Akerleriissut taanna ilinnik qanoq attuinersoq paasiviuk? Jehovap kiffaatut misigisimagunarpat Guutip piumasaanik iliornissaq ilungersunartuusoq, aammattaarli pilluaqqusaanangaartoq. Taavami inuuninni pissutsit assigiinngitsut pissutigalugit Jehovap inatsisaanik najoqqutassiaanillu maleruaajuarnissat ajornakusoortikkukku, immaqa allaat anniaatigigukku? Misigiguimmi pilluaqqusaanak? Isumaqassanerpit Jehovap kiffartorfigiuarnissaa iluaqutaanavianngitsoq? Imaluunniit Jehovamut asanninnerpit taassumalu pissusiinik tupinnangaartunik pingaartitsinerpit taassuma aqqutigeqqusaani tamani ingerlajuartissavaatsit? (5 Mosesi 10:12, 13) Jehovap Saatani uatsinnik annikilliortitsisinnaatikkamiuk taassuma unnerluussinerinut tamatta immikkut akissutaanissatsinnut periarfissippaatigut. — Ussatit 27:11.

„Mitaatigippasi“

7. Jehovamit tunutsinniarluta Diaavulup periuserisartagaasa ilaannik eqqaasaqarit.

⁷ Saatanip oqaatsini uppernarsarniaraluarlugit qoqassiiniutigisartagaasa ilaat misissoriartigu — tassa salluliorluni ingutsineq. Jiisusip Saatani ’sallumut ataataasumik’ taavaa. (Johannesi 8:44) Ateq Diaavulu, isumaqartoq „eqqunngitsumik unnerluussisoq, mamarliisoq“, Saatanimut pigitinneqalersimavoq taanna pingaarnertut Guutimik ingutsisuummat aamma taassuminnga, taassuma oqaasianik aqqanillu illernartumik eqqunngitsumik unnerluutiginnittuummat. Jehovap kisimi oqartussaanera Diaavulup ajortisarniartarpaa tusangiasaarinerit, eqqunngitsumik unnerluussinerit toqqaannartumillu salluliornerit atorlugit, Guutillu kiffai ilumoorfiginnittut ajoquserniarlugit taamatorluinnaq periaaseqartarpoq. Nalunaajaasunik taakkuninnga kanngunarsaanermigut misilinneqarnerni ilungersunartuni pinertusaarnissaat ilungersunarnerulersissinnaavaa.

8. Saatanip Jobi qanoq kanngunarsarpaa, qanorlu sunniuteqarpa?

⁸ Jobi, „akerarineqartoq“-mik isumalimmik atilik, qanoq nalaataqartoq eqqarsaatigeriassagit. Jobip inuussutissarsiutaarunneranut, meeqqaminik annaasaqarneranut peqqikkunnaarneranullu Saatani pissutaaginnanngilaq; aamma ajortilittut Guutimit pillarneqartutut isigineqartippaa. Naak Jobi ataqqineqartorujussuusimagaluarluni narrugisaalerpoq  nikanartutullu isigineqalerluni, allaat ilaquttaminit ikinngutiginerpaasaminillu. (Jobi 19:13-19; 29:1, 2, 7-11) Aammattaaq tuppallersaaniaraluartut atorlugit Saatanip ’Jobi oqaatsit atorlugit sequmisinniarsaraa’. Taakkua siullermik Jobi sualuttunik ajortuliorsimassasoq oqarfigimisaariarlugu unioqqutitsisutut toqqaannartumik assuaraat. (Jobi 4:6-9; 19:2; 22:5-10) Eqqarsaatigeriassagit tamanna Jobimut qanoq nikallornartigisimassasoq!

9. Jiisusi qanoq ajortuliortartutut isigineqalersinniarneqarpa?

⁹ Jehovap kisimi oqartussaaneranik illersuisutut pingaarnertut Guutip ernera Saatanimit akeqqersimaartumit saassunneqarnerpaasarpoq. Jiisusi nunamut pimmat Saatanip iluarisaajunnaartinniarsaralugulu ajortuliortartutut isigineqartinniarsaraa, Jobimut iliorsimanermisorluinnaq. (Esaja 53:2-4; Johannesi 9:24) Inuit imerajuttuunerartarpaat nerrersuujunerartarlugulu oqarlutillu ’anersaapiloqartoq’. (Matthæusi 11:18, 19; Johannesi 7:20; 8:48; 10:20) Guutimik mitalliinerarneqarluni salluliuutigineqarpoq. (Matthæusi 9:2, 3; 26:63-66; Johannesi 10:33-36) Soorunami Jiisusip tamanna aliasuutigaa, nalunngilaami tamanna Ataataminut kanngunarsaataassasoq. (Lukasi 22:41-44) Naggataatigut Jiisusi pinerluttutut perloqqusatut qisummut nivinngarneqarpoq. (Matthæusi 27:38-44) Jiisusip ilumoorfiginnilluinnartuaannarsinnaajumalluni ’ajortuliortunit assortorneqangaarnini’ naammagalugu atorpaa. — Hebræerit 12:2, 3.

10. Ukiuni kingulliunerusuni tanitat sinneri Saatanimit qanoq saassunneqartarsimappat?

¹⁰ Ukiuni kingulliunerusuni Kristusip ajoqersugaasa tanitat sinneri taamatorluinnaq Diaavulumit akeqqersimaarfigineqartarput. Saatani ’[Kristusip] qatanngutaasa unnerluutiginnittaattut, ullukkut unnuakkullu taakkuninnga Guutimut unnerluutiginnittartutut’ allaatigineqarpoq. (Saqqummersitat 12:9, 10) Saatani qilammit anisitaalluni nunap qanittuaniiginnarsinnaatitaalernermi kingorna Kristusip qatanngutai inupalaatut narrunartutut isigineqalersinniarlugit ilungersorneruleraluttuinnarpoq. (1 Korinthimiut 4:13) Taakku nunat ilaanni ulorianartutut immikkut upperusiornerarneqarlutik salluliuutigineqartarsimapput, soorluttaaq ukiuni hundredelinni siullerni kristumiut taamaanneqartarsimasut. (Apustilit Suliaat 24:5, 14; 28:22) Allaaserisap aallaqqaataani eqqaaneqartutut ajoquserniarneqarlutillu salluliuutigineqartarsimapput. Taamaakkaluartoq Kristusip qatanngutaasa tanitat maniguullutik „ataqqineqarnermi narrugineqarnermilu, mitaatigineqarnermi nersorneqarnermilu“ Guutip inassutaasa maleruarnissaat Jiisusilu pillugu nalunaajaanissaq ilungersuutigaat, suleqatiminnillu, ’savanit allanit’, tapersersorneqarput. — 2 Korinthimiut 6:8; Johannesi 10:16; Saqqummersitat 12:17.

11, 12. (a) Kristumiut pasillerneqartarnerannut pissutaasunik assigiinngitsunik eqqaasaqarit. (b) Kristumiu upperisani pissutigalugu qanoq naapertuilluanngitsumik naalliutsinneqarsinnaava?

¹¹ Soorunami Guutip kiffaasa inuttut ataasiakkaatut isornartorsiorneqartarnerat tamatigut ’iluarnermik pissuteqartanngilaq’. (Matthæusi 5:10) Immaqa ajornartorsiutit ilaannut naammalluinnanngitsuunerput pissutaasarpoq. ’Ajortuliorsimanerput pillugu isanneqartilluta ilalaartarneq’ nersornartuunngilaq. Kristumiuli ’nalunngeqatiginnissutsimigut Guutimut ataneq pillugu iluanngitsumik anniartitaasaraangat naalliunnartunik naammaginnittarpat’ tamanna Jehovamit iluarineqarpoq. (1 Petrusi 2:19, 20, 1900/1961) Pissutsini qanoq ittuni taamaattoqarsinnaava?

¹² Kristumiut ilaat nikanarsarneqartarput ilisinermi ileqqulersuutit Biibilimut naapertuutinngitsut peqataaffigiumannginnamikkik. (5 Mosesi 14:1) Jehovap Nalunaajaasui inuusuttut Jehovap ileqqussatigut najoqqutassiaanik aalajangiusimannikkamik naakkittaatsumik asissorneqarlutillu mitaatigineqartarput. (1 Petrusi 4:4) Angajoqqaat kristumiut ilaasa meeqqatik aalersuinertaqanngitsumik nakorsartikkusuttaramikkit „paarsinerluttutut“ imaluunniit „naalliutitsisutut“ salluliuutigineqartarput. (Apustilit Suliaat 15:29) Jehovamut kiffanngornertik pissutigiinnarlugu kristumiut ilaquttaminnit saniliminnilluunniit alarneqartarsimapput. (Matthæusi 10:34-37) Kristumiut tamakku tamarmik naapertuilluanngitsumik naalliutsitaanermikkut pruffiitit Jiisusillu maligassiaannik malinnipput. — Matthæusi 5:11, 12; Jaaku 5:10; 1 Petrusi 2:21.

Asissugaanermi kanngunarsagaanermilu nikallujuinneq

13. Asissugaallutalu kanngunarsagaagaangatta anersaakkut oqimaaqatigiissaariuarnissatsinnut suna iluaqutigisinnaavarput?

¹³ Upperisarput pissutigalugu asissugaallutalu  kanngunarsagaagaangatta Jeremiatut nikallortoorsinnaavugut misigisinnaallutalu Guutimut kiffartortuarsinnaanata. (Jeremia 20:7-9) Anersaakkut oqimaaqatigiissaariuarnissatsinnut suna iluaqutaasinnaava? Pisoq Jehovap isiginnittaasiatut isiginiariaruk. Misilinneqarnerminni ilumoorfiginnittuartut ajugaasutut — eqqugaasutuunngitsoq — isigisarpai. (Romamiut 8:37) Anguterpassuit arnarpassuillu Diaavulumit nikanarsarneqartaraluaqalutik Jehovap kisimi oqartussaaneranik illersuisimasut takorlooriakkit. Taakkununnga ilaapput Abeli, Jobi, Jiisusip anaanaa, Maria, itsarlu Guutip kiffai aalajaatsut allat kiisalu ukiuni kingulliunerusuni uppeqativut. (Hebræerit 11:35-37; 12:1) Assuarnaatsumik inuunerat eqqarsaatigeriassagit. Nalunaajaasorpassuit ilumoorfiginnittut taakkua qaaqquaatigut silarsuarmut uppernermikkut ajugaasunut akissarsiassaritinneqartumik akissarseqatigeqqullutik. — 1 Johannesi 5:4.

14. Qamannga pisumik qinuneq qanoq aalajaattuaannarnissatsinnut nakussatsissutigisinnaavarput?

¹⁴ ’Eqqarsaatitta eqqissiviilliortileraangatigut’ Jehova qamannga pisumik qinunikkut saaffigisinnaavarput, taassumalu tuppallersarlutalu nakussatsissavaatigut. (Tussiaat 50:15; 94:19) Misilinneqarnerup naammagalugu atornissaanut pisariaqartumik ilisimassuseqalersissavaatigut, kiffamilu pissutissaqanngitsumik uumissorneqarnerannut pissutiviusumik, tassa kisimi oqartussaanini pillugu akerleriissummik pingaarutilerujussuarmik, pingaarnerutitsinissamut ikiussavaatigut. (Jaaku 1:5) Aamma Jehovap ’eqqissinermik siuneqassusernit tamanit annerungaartumik’ tunisinnaavaatigut. (Filippimiut 4:6, 7) Eqqissineq Guutimeersoq tamanna tatineqarujussuartilluta qularnermut ersinermulluunniit nakkaannarnata eqqissisimajuassutigaarput aalajangersimalluinnartuassutigalugulu. Qanorluunniit nalaataqarnissarput Jehovap akuerigaluarlugu anersaani ikiortigalugu napatissinnaavaatigut. — 1 Korinthimiut 10:13.

15. Naalliuutsitaagaangatta narrutsannginnissamut suna iluaqutigisinnaavarput?

¹⁵ Pissutissaqanngitsumik uagutsinnik uumissuisut narrutsaatinnginnissaannut suna iluaqutigisinnaavarput? Eqqaamasariaqarparput akeqqavut pingaarnerit tassaasut Saatani inngilipiluillu. (Efesosimiut 6:12) Naak inuit ilaasa piaaralutik malersortaraluaraatigut, Guutip innuttaanik assortuisorpassuit ilisimasaqannginnamik imaluunniit uukapaatinneqaramik taamaaliortarput. (Danieli 6:5-17; 1 Timotheusi 1:12, 13) Jehovap kissaatigaa ’inuit tamalaat annaanneqarnissamut eqqorluartumillu ilisarsilernissamut’ periarfissinneqassasut. (1 Timotheusi 2:4, NV) Assortuisuusimasullumi ilaat assuarnaatsumik ileqqoqarnitsinnik qimerluuisinnaasimammata kristumiutut qatanngutigilersimavavut. (1 Petrusi 2:12) Aammattaaq Jaakup ernera Josefi ilinniarfigisinnaavarput. Naak affarmik qatanngutini pissutigalugit naalliorujussuarsimagaluarluni uumissunngilai. Sooq? Paasigamiuk Jehova akuliulluni pisut aqukkai siunertani naammassineqartillugu. (1 Mosesi 45:4-8) Aamma naapertuilluanngitsumik naalliuutigisinnaasarput sunaluunniit Jehovap sunniinermigut aterminik naalannarsisitsininngortissinnaavaa. — 1 Petrusi 4:16.

16, 17. Sooq akerlilersuisut oqaluussinermik akornusiiniarlutik iliuusii ingasattumik ernumassutigilissanngilavut?

¹⁶ Ingasattumik ernumalissanngilagut akerlilersortivut piffissap ilaani nutaarsiassap nuannersup siaruarneqarnissaanut akornusiinnissaminnut iluatsitserpasippata. Silarsuaq tamakkerlugu nalunaajaasoqarneratigut Jehovap maanna inuiaat sajutsippai, erlinnartuutillu katersorneqarput. (Haggaji 2:7) Savanik paarsisoq ajunngitsoq, Jiisusi Kristusi, ima oqarpoq: „Savaatima nipiga tusartarpaat, uangalu ilisimavakka, malittarpaanngalu; inuunermillu naassaanngitsumik tunisarpakka . . . taakkuninngalu kialluunniit arsaarsinnaanngilaanga.“ (Johannesi 10:27-29) Aamma inngilit illernartut anersaakkut katersuinersuarmi peqataapput. (Matthæusi 13:39, 41; Saqqummersitat 14:6, 7) Taamaattumik Guutip siunertaa  akerlilersuisut oqaasiinit iliuusiinillu suugaluartunilluunniit akornuserneqarsinnaanngilaq. — Esaja 54:17; Apustilit Suliaat 5:38, 39.

¹⁷ Akerlilersuisut ilungersorneri taakkununnga kingunerlutsitsigajuttarput. Afrikami inuiaqatigiit ilaanni Jehovap Nalunaajaasui amiilaarnaannartumik salluliutigineqarput, ilaatigut Diaavulumik pallorfiginnittuunerarneqarlutik. Tamanna pissutigalugu Grace Jehovap Nalunaajaasui takkukkaangata illup tunuanut toqqoriartupallattarpoq, ingerlaqqinnissaannullu tassaniittarluni. Ullulli ilaanni oqaluffimmi palasip atuagassiaatitta ilaat nittarlugu najuuttut tamaasa mianersoqquai oqarluni taanna atuarunikku upperisartik qimassagaat. Taamaaliornerata Grace soqutiginnilersippaa. Nalunaajaasut tulliani takkummata toqqornani oqaloqatigilerpai, atuagassiarlu eqqaaneqareersoq pivaa. Grace Biibilimik atuaqqissaaqatigineqartalerpoq, 1996-imilu kuisippoq. Maanna piffissani atortarpaa Jehovap Nalunaajaasui pillugit immaqa eqqunngitsumik paasitinneqarsimasunik allanik ujarlerluni.

Uppernerit maanna nakussatsiguk

18. Sooq sualuttunik misilinneqalersinnata uppernerput nakussatsittariaqarparput, qanorlu taamaaliorsinnaavugut?

¹⁸ Saatani qaqugukkulluunniit saassussisinnaammat pissutissaqanngitsumillu uumissorneqartissinnaammatigut uppernitsinnik maanna nakussatsitsinissarput pingaarutilerujussuuvoq. Qanoq taamaaliorsinnaavugut? Nalunaarusiami, nunami Jehovap innuttaasa malersugaaffigisimasaanneersumi, ima allassimavoq: „Manna erseqqilluinnalersimavoq: Anersaakkut ajunngitsunik ileqqullit sallusuissummillu Biibilimeersumik paasisimasaqarluartut, misilinneqarnerminni aalajaannissartik ajornartorsiutiginngilaat; ’piffissaasukkulli’ ataatsimiigianngitsuukulasut, aalajangersimasumik oqaluussisanngitsut pingaaruteqarpasinngitsutullu ittutigut nakkaannartartut, ’innermillusooq misilinneqarnermi’ nakkaannartarput.“  (2 Timotheusi 4:2, NV) Takusinnaagukku arlaatigut siuariaateqartariaqarlutit nangaanak pisariaqartumik iliuuseqartariaqarputit. — Tussiaat 119:60.

19. Guutip kiffaasa pissutissaqanngitsumik uumissorneqaraluarlutik ilumoorfiginninnerat sumik kinguneqarpa?

¹⁹ Pallorfiginnittut ilumoortut Saatanimit uumissuisumit saassunneqarnerminni Guutimut ilumoorfiginninnerat Jehovap kisimi oqartussaalluni naalakkersuinerata eqqortuuneranut, naapertuilluartuuneranut pissusissamisoortuuneranullu uppernarsaataavoq. Taakkua aalajaannermikkut Guutip uummataa nuannaartippaat. Naak inunnit immaqa asissorneqarlutillu kanngunarsarneqaraluartut, Jehovap, nunamit qilammillu ataqqinassuseqarnerungaartup, ’taakku taakkualuunniit Guutiannik taaneqarneq kanngusuutigissanngilai’. Guutimut kiffaasut ilumoorfiginnittut taamaattut tamaasa pillugit ima eqqortumik oqartoqarsinnaavoq: ’Taakku silarsuup qinngaqquffigai.’ — Hebræerit 11:16, 38, 1900/1961.

[Quppernerup ataani ilanngussaq]

Uteqqiinermi apeqqutit

• Guutimik pallorfiginnittut ilumoortut pissutissaqanngitsumik uumissorneqarnerannut suna pissutaava?

• Jobi Jiisusilu assuarnaatsuujunnaarsinniaraluarlugit Saatanip kanngunarsaanerit qanoq atortarpai?

• Saatanimit uumissorneqaraluarluta aalajaattuarnissatsinnut Jehovap qanoq nakussatsittarpaatigut?

[Atuaqqissaarnermi apeqqutit]

[Qupp. 22-mi ungalusaq/​assiliartaq]

Akerleriissutiviusoq paasivaat

Ukrainemi, ukiut 50-it sinnerlugit oqaluussinerup inerteqqutaaffigisimasaani, Jehovap Nalunaajaasuisa ilaat ima oqarsimavoq: „Jehovap Nalunaajaasuisa pissutsit atugaat inuit isiginnittaasiattuinnaq isigineqassanngillat. . . . Atorfillit amerlanersaasa suliassartik suliariinnartarpaat. Allanik naalakkersuisoqaleraangat atorfillit isumartik allanngortittarpaat naalakkersuisullu nutaat ilumoorfigilersarlugit, uagulli aalajangiusimasarput aalajangiusimaannartarparput. Paasivarput annikilliornitsinnut pissutiviusoq Biibilimi atuarneqarsinnaasoq.

Inunnit naqisimannittunit pisuussuteqanngitsutut eqqugaasutuinnaq imminut isiginngilagut. Aalajaattuarnissatsinnut iluaqutaasoq tassaavoq naatsiivimmi Edenimi akerleriissutaalersimasumik — Guutip naalakkersuisinnaatitaanera pillugu apeqqummik — paasinnilluarneq. . . . Akerleriissut inuit soqutigisaannut tunngasuinnaanngitsoq aammali qilammi nunamilu Kisimi Oqartussaasumut attuumassuteqartoq isummerfigaarput. Suna pineqavinnersoq pillugu paasinninnerput qutsinnerungaarpoq. Taamaammat nukittuujuvugut allaallu pissutsini ajorluinnartuni assuarnaattuaannarsinnaalluta.“

[Assiliartaq]

Viktor Popovitj, 1970-imi tigusaasoq

[Qupp. 19-imi assiliartaq]

Jiisusip kanngunarsagaaneranut kina pisuua?

[Qupp. 21-mi assiliartat]

Jobip, Mariap ukiunilu kingulliunerusuni Guutip kiffaasa, soorlu Stanley Jonesip, Jehovap kisimi oqartussaanera illersorsimavaat