’Naalakkami nakussatsinniaritsi’

’Naalakkami nakuussusiatalu pissaaneqarnersuani nakussatsinniaritsi.’ — EFESOSIMIUT 6:10, 1900/1961.

1. (a) Ukiut 3000-t missaat matuma siorna akiuunneq immikkut ittoq suna pisimava? (b) Sooq Daavi ajugaava?

UKIUT 3000-t missaat matuma siorna angutit sakkutuut akerariit sorsuffianni akiuunnissaminnut piareersimallutik imminnut saallutik qeqarput. Inuusunnerusoq nukappiaraavoq savanik paarsisoq Daavimik atilik. Saallugu qeqarpoq Goliati inorujussuaq nukittoorsuaq. Saattuaasaa 57 kiilut missaannik oqimaassuseqarpoq, qalugiusarujussuaqarporlu panaqarujussuaqarlunilu. Daavi sakkutuussuteqanngivippoq, sakkutuaraalu illusaat. Filisteri inorujussuaq Goliati ajuallappoq akiugassani Israelikkuusoq nukappiaraannaammat. (1 Samueli 17:42-44) Isiginnaartut illugiillutik tamarmik akiuunnerup inernissaa nalunanngereersorisimassagunarpaat. Sorsunnermili pissarsuit tamatigut ajugaaneq ajorput. (Oqaluussisartup oqaasii 9:11) Daavi ajugaavoq Jehovamit nakussatsinneqarluni sorsukkami. ’Jehova sorsunnermi pisussanik aalajangiisuuvoq,’ oqarpoq. Biibilimi oqaluttuami ima allassimavoq: „Daavip illuutiminik illusariaatiminillu filisteri ajugaaffigaa.“ — 1 Samueli 17:47, 50.

2. Sorsunneq qanoq ittoq kristumiut peqataaffigaat?

² Kristumiut uinikkut sorsunnerit peqataaffigineq ajorpaat. Inuit tamaasa eqqisseqatigaat, taamaattorli akerlilersuisunut pissaaneqangaartunut anersaakkut sorsupput. (Romamiut 12:18) Efesosimiunut allakkamini kapitalimi kingullermi Paulusip sorsunneq kristumiut tamarluinnarmik akuliunneqarfigisaat allaatigaa. Ima allappoq: „Sorsunnerput uinimmut aammullu sorsunnerunngilaq, piginnaatitaasunulli pissaanernullu taartumi matumani silarsuarmi naalagaasunut ajussutsillu anersaavinut pissaasunut qilaap ataaniittunut.“ — Efesosimiut 6:12.

3. Efesosimiut 6:10 naapertorlugu sorsunnerput iluatsissappat suut pisariaqarpat?

³ ’Ajussutsip anersaavi pissaasut’ taakku tassaapput Saatani anersaapiluillu Jehova Guutimut attaveqarunnaarnissatsinnik kissaateqartut. Uagutsinnit pissaaneqarnerungaarmata, pissutsit atukkavut Daavip atugaanut assingupput, Guutimillu nakussatsinneqanngikkutta ajugaasinnaanngilagut. Taamaattumik Paulusip ilungersorluni kajumissaarpaatigut ’Naalakkami nakuussusiatalu pissaaneqarnersuani nakussatseqqulluta’. (Efesosimiut 6:10, 1900/1961) Taamatut siunnersuereerluni apustilip anersaakkut sakkutuussutit kristumiullu pissuserisassaat ajugaanissatsinnut pisariaqartut allaatigai. — Efesosimiut 6:11-17.

4. Pingaarnersat marluk suut allaaserisami matumani sammissavavut?

 ⁴ Maanna misissoriartigu akeqqatta pissaanera qanorlu periaaseqarnera Biibilimi qanoq allaatigineqarnersut. Taava immitsinnut illersorniarluta qanoq illersoriaaseqassanersugut misissussavarput. Jehovap siunnersuutai maleruartarutsigik qularutigissanngilarput akeqqatta ajugaaffigisinnaassanngikkaatigut.

Ajussutsip anersaavinut pissaanilinnut sorsunneq

5. Efesosimiut 6:12-imi oqaatsip ’sorsunnerup’ isumavianik misissuinermi Saatanip periaasia pillugu suna ilikkarparput?

⁵ Paulusip nassuiarpaa ’ajussutsip anersaavinut pissaasunut’ sorsuttariaqartugut. Soorunami ajussutsip anersaavisa pissaanillit malunnarnerpaartaat tassaavoq Saatani Diaavulu, „anersaapiluit naalagaanerat“. (Matthæusi 12:24-26) Sorsunnermut peqataaffigisatsinnut oqaaseq Grækerisut allassimaqqaarfiani atorneqartoq paanermut eqqaanarpoq. Grækenlanditoqqami paasut paasartik uppeqqajaalersinniartarpaat naloriussinnaaniassagamikku. Taamatuttaaq Diaavulup anersaakkut uppeqqajaalerserusuppaatigut. Qanoq iliorluni?

6. Biibili atorlugu ersersiguk Diaavulu upperunnaarsinniarluta assigiinngitsunik sunik periaaseqartarnersoq.

⁶ Diaavulu pulateriaarsuusaarsinnaavoq, løvitut uiannisaartutut pissusilersorsinnaavoq allaallu qaamasumut inngiliusaarsinnaalluni. (2 Korithimiut 11:3, 14; 1 Petrusi 5:8) Nunami ikiortini atorlugit uagutsinnik malersuisinnaavoq nikallortinniarsinnaallutaluunniit. (Saqqummersitat 2:10) Saatanip silarsuaq tamaat atorsinnaagamiuk kajungerisinnaasavut pileritsassutigisinnaasavullu tamaasa atorlugit napitinniarsinnaavaatigut. (2 Timotheusi 2:26; 1 Johannesi 2:16; 5:19) Aamma silamiut tunusissullu eqqarsaataat atorsinnaavai uagutsinnik tammartitsiniarnermini, Evamik nakutitsigami iliornermisut. — 1 Timotheusi 2:14.

7. Inngilipiluit pisinnasaat qanoq killeqarpat, uagullu suut iluaqutigisinnaavavut?

⁷ Saatanip inngilipiluisalu sakkui pissaaneqarnerallu susinnaarpasinngikkaluarivut, pisinnaasaat killeqarput. Anersaat ajortut taakkua Ataatatta qilammiusup iluarinngisaanik iliortissinnaanngilaatigut. Ileqqussat tungaatigut kiffaanngissuseqarpugut, eqqarsaativullu iliuusivullu nammineq aqussinnaavavut. Aammami sorsunnitsinni kisimiinngilagut. Soorlu Elisap nalaani taamaassimasoq, ullumikkut aamma taamaappoq: „Uagut ilivut akeqqatta iliinit amerlanerupput!“ (2 Kunngit 6:16) Biibilimi neriorsoqqissaarneqarpugut Guutimut naalatsigitikkutta Diaavululu akerartorlugu, uagutsinnit qimaassasoq. — Jaaku 4:7.

Saatanip pilersaarutai eqqumaffigikkit

8, 9. Saatanip Jobi qanoq misilippaa assuarnaakkunnaartinniarlugu, uagullu ullumikkut anersaakkut qanoq navianartorsiorsinnaavugut?

⁸ Saatanip pilersaarutai nalunngilavut, periaasii pingaarnerusut Biibilimi qulaarneqarmata. (2 Korinthimiut 2:11) Diaavulup Jobi naapertuilluartoq saassussimavaa aningaasatigut ajornartorsiortingaarlugu,  ilaquttaanik toqusoqartillugu, ilaqutaasunit akerlilersorneqartillugu, timikkut naalliuuteqartillugu ikinngutillu ilumuunngitsut pissutissaqanngitsumik issornartorsiuitillugit. Jobi isumatsappoq misigalunilu Guutimit qimanneqarluni. (Jobi 10:1, 2) Naak Saatani immaqa ullumikkut taamatut toqqaannartumik ajornartorsiortitsisanngikkaluartoq, kristumiorpassuit tamakkununnga assingusunik annikilliuuteqartarput, tamakkulu Saatanip atornerlupallattarpai.

⁹ Ulluni kingullerni makkunani anersaakkut naviarnartut amerliartupiloorsimapput. Silarsuarmi inuuvugut anersaakkut anguniagassat sumiginnarlugit pigisalerituffiusumi. Tusagassiuutini allaatigineqartarpoq kinguaassiuutitigut tamalikanneq nuannaarutaasutut aliasuutaanngitsutut. Inuppassuillu ’inuulluarniutit Guutimit pingaarnerutilersimavaat’. (2 Timotheusi 3:4) ’Upperisaq sorsuutiginngikkutsigu’, taamatut eqqarsartaaseqarneq anersaakkut oqimaaqatigiissaarisinnaanitsinnik navianartorsiortitsisinnaavoq. — Judasi 3.

10-12.  (a) Naatsiiassanik siaruarterisumik assersuusiamini Jiisusi ilaatigut qanoq mianersoqqusiva? (b) Anersaakkut sammisassat qanoq ’ipitinneqarsinnaasut’ assersuuteqarit.

¹⁰ Saatanip periaasiisa iluatsilluarnerpaat ilaat tassaavoq silarsuarmut matumunnga taassumalu pigisalerituujuneranut uagutsinnik tiguartiffiginnitsitsisarnera. Naatsiiassanik siaruarterisumik assersuuamini Jiisusi mianersoqqusilluni oqarpoq ’silarsuarmi matumani isumakuluutit pisuussutillu nakutitsisarnerisa [Guutip naalagaaffia pillugu] oqaaseq ipitittarsinnaagaat’. — Matthæusi 13:18, 22.

¹¹ Nunat kiattut orpippassuini naasoqarpoq ’figeni ipititsisartoq’-mik taaneqartartumik. Arriitsumik naasarpoq orpiup naajartorfigisami kanaartaa nimertutut illugu. Naasup nermussorluni naajartortartup sorlaasa, ninngutsikkaluttuinnartartut, orpik naajartorfigisani poorluinnartarpaa. Naggataatigut figenip ipititsisartup sorlappassuisa inuussutissat orpiup mannguaniittut tamangajaasa milluartarpai, orpiullu naajortorfigisami nuua qaamaneerutitivittarlugu. Naggataatigut orpik naajartorfiusoq toqusarpoq.

¹² Taamatulli pissutsit aaqqissussaaneranni matumani isumakuluuteqarnerup pisuunngorniarnerullu ilorrisimaarnartumillu inuuniarnerup piffissaarukkaluttuinnartissinnaallutalu nukeerukkaluttuinnartissinnaavaatigut. Silarsuup neqeroorutigisai allamut saasaatigigutsigik Biibilimik atuaqqissaartarnerput sumiginnariaannaavarput kristumiullu ataatsimiinnerisa ilaannut najuutinngitsoortarneq ileqquliussinnaallugu, taamaalilluta imminut anersaakkut inuussutissaarutitilluta. Anersaakkut sammisassanit pigisalerituneq pingaartinneqarnerulertarpoq, naggataatigullu Saatanimit nakutinneqariaannanngortarpugut.

Aalajaattariaqarpugut

13, 14. Saatani saassussigaangat qanoq periaaseqartariaqarpugut?

¹³ Paulusip ilungersorluni uppeqatini kajumissaarpai ’Diaavulup qoqassiniaraangatik aalajaaqqullugit’. (Efesosimiut 6:11, 1900/1961) Soorunami Diaavulu inngilipiluilu suujunnaarsissinnaangilavut. Suujunnaarsitsinissaq Guutip Jiisusi Kristusimut suliassiissutigaa. (Saqqummersitat 20:1, 2) Saatanip suujunnaarsinneqarnissaata tungaanut  saassussigaangat ’aalajaattariaqarpugut’ ajugaaffigineqaqqunata.

¹⁴ Aamma apustili Petrusip Saatani saassussigaangat aalajaannissap pingaaruteqassusia erseqqissarpaa. „Eqiingagitsi silatusaarlusilu!“ allappoq. „Akerartortersi Diaavulu løvitut uiannisaartutut angalasarpoq iisassarsiorluni. Uppernikkut aalajaallusi assortorsiuk, ilisimavarsimi qatanngutisi silarsuarmiittut taamatuttaaq atugarliortitaasartut.“ (1 Petrusi 5:8, 9) Aap, anersaakkut qatanngutitta tapersersuisarnerat pingaaruteqarpoq Diiavulu løvitut uiannisaartutut saassussigaangat aalajaannissatsinnut.

15, 16. Biibilimeersumik assersuuteqarlutit ersersiguk kristumioqatit tapersersuinerat aalajaattuarnissamut qanoq iluaqutigisinnaagipput.

¹⁵ Afrikami narsarsuarni løveq qatimaakkaangat, antilopit sapinngisartik tamaat pangalittarput isumannaatsumut pinissamik tungaanut. Nagguaatsulli ikioqatigiinneq eqqarsaatigalugu assersuutissaalluarput. Atuakkami Elephants — Gentle Giants of Africa and Asia-mi ima nassuiarneqarpoq: „Nagguaatsut eqimattakkuutaat nalinginnaasumik imatut illersoriaaseqarput: Inersimasut iloqqasunngorlutik piaqqat illersugassatik ilorlinngorlugit navianartorsiortitsisoq saallugu inissittarput.“ Løvit pissaanermik ikioqatigiinnermillu taamatut takutitsisunik naammattoorsigaangamik, nagguaatsulluunniit piaraagaluarpata, qaqutiguinnaq saassussisarput.

¹⁶ Saatanimit inngilipiluinillu navianartorsiortinneqarangatta, aamma uagut pisariaqartipparput ikioqatigiinneq, qatanngutivut uppernikkut aalajaaqatigalugit. Paulusi allappoq Romami parnaarussaanermini uppeqatimi kristumiut ilaat imminut ’nakussatsissutaasut’. (Kolossemiut 4:10, 11, NV) Grækerit oqaasiat ’nakussatsissutaasoq’-mik nutserneqartoq Kristumiut Allagaataat Grækerisuut-ni ataasiaannarluni atorneqarpoq. Expository Dictionary of New Testament Words-imi Vinep atuakkiaani ima allassimavoq: „Oqaluut assingusoq ungillerinermut iluaaginninnermut nakorsaatit pillugit atorneqarpoq.“ Aap, Jehovamut kiffaasunit inersimalluartunit tapersersorneqarneq tarnutitut iluaallannartutut misigissutsikkut timikkullu anniaatinik nipaallisitsisinnaavoq.

17. Suut iluaqutigalugit Guutimut aalajaattuarsinnaavugut?

¹⁷ Ullumikkut uppeqatitsinnit kristumiunit qiimmassarneqarneq Guutimut aalajaalluta kiffartornissamik aalajangersimanitsinnut nakussatsissutigissavarput. Ingammik utoqqaanertat kristumiut anersaakkut ikiuineq ulapputigaat. (Jaaku 5:13-15) Aalajangersimasumik Biibili atuaqqissaartarutsigu kristumiullu ataatsimiinnerinut ataatsimeersuarnerinullu najuuttarutta ilumoorfiginnittuarnissatsinnut iluaqutigissavarput. Guutimut qanittumik attaveqarutta taassumunnga aalajaattuarsinnaavugut. Aap, nerigaluarutta, imeraluarutta allatulluunniit iluuseqaraluarutta iliuutsivut tamaasa Guutimut ataqqinaataatikkumavavut. (1 Korinthimiut 10:31) Soorunami aamma Jehova qinnuigisariaqarparput tatigilluinnarlugulu taassuma iluarisaanik inooriaaseqartuassagutta. — Tussiaat 37:5.

18. Naak annikilliornitsinni misilinneqarnitsinnilu nukissaarukkiartortaraluarluta sooq qatsussissanngilagut?

¹⁸ Ilaannikkut Saatanip saassuttarpaatigut anersaakkut nukittuujunngitsutut misigiffigisatsinni. Løvip sanngiitsunik saassussisarneratut sanngiitsut saassuttarpai. Ilaqutariinni  ajornartorsiutit, aningaasaqarnikkut ingerlanerliornerit nappaateqarnerlu anersaakkut sanngiillissutigisinnaavavut. Guutilli iluarisaanik iliorneq qatsutinngisaannartigu, Paulusimi ima allappoq: „Sanngiittaraangama pissatsittarpunga.“ (2 Korinthimiut 12:10; Galatiamiut 6:9; 2 Thessalonikamiut 3:13) Oqaatsinuku taakku qanoq isumaqartikkai? Isumaqarpoq pissaanerup Guutimeersup inuttut sanngiissutivut soqutaajunnaarsissagai, Jehovamit nakussatsinneqarutta. Daavip Goliatimut ajugaanerata takutippaa Guutip innuttani nakussatsissinnaallugillu nakussatsikkumaarai. Ullumikkut Jehovamut nalunaajaasut oqaluttuarsinnaapput ilungersunartumik ajornartorsiorfiusumi qanoq Guutimit nakussatsinneqarsimanerlutik. — Danieli 10:19.

19. Jehovap kiffaminik nakussatsitsisinnaaneranik assersuuteqarit.

¹⁹ Aappariit Guutimit annertoqqusersorneqarsimanertik pillugu ima oqaluttuarput: „Ukiut ingerlaneranni aappariittut Jehovamut kiffartornermi pilluaqqussuterpassuit nuannaarutigisimavavut inuppassuillu nuannersut ilisarisimalersimallugit. Aammattaarli Jehovamit ajoqersorneqarlutalu nakussatsinneqartarpugut misilinneqarnerni pinertusaarnissatsinnut. Jobitut pisut sooq taama pinersut tamatigut paasisanngilavut, tatigiuarparpulli Jehova uagutsinnik ikiuinissaminut piareersimajuartoq.“

20. Jehovap innuttani annertoqqusersortuaannarai Biibilimi qanoq uppernarsarneqarpa?

²⁰ Jehovap talia naappallaanngilaq; innuttani aalajaatsut annertoqqusersortarpai nakussatsittarlugillu. (Esaja 59:1) Tussiaasiortoq Daavi ima erinarsorpoq: „[Jehovap] najummisarpai orlulersut tamaasa, massitsittarlugillu taaqqungasut tamaasa.“ (Tussiaat 145:14) Aap, Ataatarput qilammiusoq ullut tamaasa ’kissumiartigaarput’ pisariaqartilluinnakkatsinnillu tunniussisarpoq. — Tussiaat 68:20.

Guutip sakkutuussutai tamaasa pisariaqartippavut

21. Paulusip sakkutuussutit anersaakkut ittut pingaaruteqarnerat qanoq erseqqissarpaa?

²¹ Saatanip periaasiisa ilaat sammereerpavut paasillugulu taassumannga saassunneqaraangatta aalajaattuarnissaq qanoq pingaaruteqartigisoq. Maanna sakkutuussutit inuunermut pingaaruteqartut uppernitta illersorluarnissaanut iluaqutigisinnaasavut misissussavavut. Efesosimiunut allakkamini Paulusip kristumiut Saatanip qoqassiiniarnerinut illersuutigisinnaasaat anersaallu pissaanillit ajortut ajugaaffiginissaannut iluaqutigisinnaasaat pingaartoq marloriarluni eqqaavaa. Ima allappoq: „Guutip sakkutuussutai tamarmiusut atiniarsigit atasinnaaqqullusi Diaavulup qoqassiniaraangasi. . . . Guutip sakkutuussutai tamarmiusut atiniarsigit ullussami ajortumi akiuussinnaaqqullusi, suullu tamaasa ajugaaffigalugit atattuinnaqqullusi.“ — Efesosimiut 6:11, 13.

22, 23. (a) Anersaakkut sakkutuussutivut sunik ilaqarpat? (b) Allaaserisami tulliuttumi suut misissornerussavavut?

²² Aap, „Guutip sakkutuussutai tamarmiusut“ atisariaqarpavut. Paulusip Efesosimiut allaffigigamigit,  Romamiut sakkutuuisa ilaannit nakkutigineqarpoq, taassumalu immaqa ilaannikkut sakkutuussutini tamaasa atortarpai. Guutilli anersaavanit isumassarsisitaalluni apustilip anersaakkut sakkutuussutit Jehova Guutip kiffaanut tamanut pingaaruteqarluinnartut allaatigai.

²³ Sakkutuussutit tamarmiusut Guutimeersut tassaapput kristumiup pissuserisariaqagai anersaakkullu iluaqutaasussat Jehovameersut. Allaaserisami tulliuttumi anersaakkut sakkutuussutit ataasiakkaarlugit misissornerussavavut. Taamaalilluta paasissavarput anersaakkut sorsunnissamut qanoq piareersimatiginerluta. Aammattaaq misissussavarput Jiisusi Kristusip maligassiaata nuannersup malinneratigut Saatani Diaavulumut sorsunnermi qanoq ajugaasinnaanersugut.

Qanoq akissavit?

• Kristumiut tamarmik sorsunneq suna peqataaffigaat?

• Saatanip periaasiisa ilaat oqaluttuarikkit.

• Uppeqatitta qanoq tapersersorsinnaallutalu nakussatsissinnaavaatigut?

• Kia pissaanera tatigisariaqarparput, aamma sooq?

[Atuaqqissaarnermi apeqqutit]

[Qupp. 23-mi assiliartat]

Kristumiut „ajussutsip anersaavinut pissaasunut“ sorsupput

[Qupp. 24-mi assiliartaq]

Silarsuarmi matumani isumakuluutinit Guutip naalagaaffia pillugu oqaaseq ipitinneqarsinnaavoq

[Qupp. 25-mi assiliartaq]

Uppeqativut ’nakussatsissutaasinnaapput’

[Qupp. 26-mi assiliartaq]

Guutimut nakussatseqqullutit qinusarpit?